JOHAN 14
14
Jisu Bou Jungto Lamnyu
1“Kaneibü maangpon teleilu. Mühghaü to mailemashi; kütokei mailemshi. 2Kübou chema kishang juongnyu kia. Khei aying tegüje, ngo kan shanga kishang lamlekula hauda dogo lenlep si? 3Hobaje ngo hauan kan shanga kishang lamlea longa, ngo nyibou longeilabü, hoba ngo lanei kilaje khünei kankei kilabü lele ngei kan kü jungto leilanglabü. 4Ngo laeto haudaje kanei lam kho ngeakei.” 5Thomaei hao to laukei, “Bunyubou, no laeto haudaje künei angekei; künei lam kho lai ngekei?” 6Jisuei hao to laukei, “Ngo lamnyu, ngühmai hoba langkei. Ngo adankoje aokei Kübou jungto alouda. 7Kanei ngo ngea tegüje, kanei Küboukei ngelabü. Tou ka jaüan kanei hao ngea hoba hao hapa.”
8Filipei hao to laukei, “Bunyubou, kün la Bou lenbü; kholonga kün khoei soua.” 9Jisuei hao to jongaikei, “Filip, ngo kan pendou yoa halokche kida lausikei kanei ngo angekei lo? Aoei ngo hapa haoei Boukei hapa. Aila kanei, ‘Kün la Bou lenbü’ dogo lauda? 10Ngo Bou to kida hoba Bou kü to kida dogo kanei maialemda lo? Ngei kan pendou to ai lenda ngei ngeibü jembü hauei alauda; ho kü to kibü Bou ki hoba hao jembü kümsilei kümda. 11Ngo Bou to ki hoba Bou kü to ki dogo kü to mailemkai; khei ayingsikei kümsilei shanga ongkei mailemshi. 12Ngühmaia ngei kan to lenda, aoei kü to mailemdaje haoeikei ngei kümbo kibü kümsilei kümlabü hoba ho to yaangbü kümsilei haoei kümlabü, aishanga ngo Bou jungto hauda; 13hoba kanei kü nyena ai ong hilaje, Shou to Bou soneikangtilabü shanga ngei kümlabü. 14Kanei denche shanga ongkei kü nyena hialonga ngei kho kümbulabü.
Soushou Saopobü Thekubü
15“Kanei kü to sanoua longa kanei kü ngühkhüm jungeilabü; 16hoba ngei Bou to hilabü hoba ponpen kan yoa kilabü lele haoei kan la lubü Thuibou che kulabü, 17kho ngühmai Soushou, ao kaodakei asungletenda; aieilausi kaodakei hao ladangkei ühüpda ayingsi angeda. Kanei hao ngeakei aishanga hao kan yoa kida hoba kan to ki.
18“Ngei kan litham üpyolabü, ngo kan jungto louada. 19Longche kian kaodakei ngo touje ühüplabü, lausikei kanei ngo haplabü. Aieilausi ngo lang kia, kankei lang kilabü. 20Khünyet kanei ngo Kübou to ki, khei, kan kü to hoba ngo kan to kida dogo kanei ngelabü. 21Aoei kü ngühkhüm ngeda hoba khübü jungeida haoei kü to sanouda; hoba aoei kü to sanouda hao Kübouei sanoulabü, hoba ngei hao to sanoulabü hoba ngo lolo hao to tang khitlabü.” 22Judas, (Iskhariot ayingko lubü che) ei hao to laukei, “Bunyubou, ailaibü no kaodak toje tang akhitko, kün to ong tang khitla?” 23Jisuei hao to jongaikei, “Müt atei kü to sanoua longa haoei kü ngüh jungeilabü, hoba Kübouei hao to sanoulabü, hoba küsi hao jungto loulabü hoba hao yoa kilabü. 24Aoei kü to asanouda haoei kü ngüh ajungeida; hoba kanei ditbü ho kü ngüh ji, lausikei ngo hautibou Boueibü ngüh ki.
25“Ngo kan yoa kijinei ngei habü ngüh ho kan to laukua; 26lausikei Thuibou, Soushou Saopobü, ao Bouei kü nyena hautilabü ki, haoei kan la pendou lenlabü hoba ngei kan to laubü pendou damentilabü. 27Hakso, ngei kan la bangbü jongsak apyokuda, kaodakei kubou kheibü aying lausikei ngeibü hakso ngei kan la kuda. Kaneibü maangpon teleilu hoba tehüt. 28Ngei kan to, ‘Ngo hauan apda, hoba ngo kan jungto nyibou longeilabü,’ dogo laubü kanei dida. Kanei kü to sanousije ngo Bou jungto haudabü kan olinlabü, aieilausi Bou kü to yaangbou ki. 29Ho ladang loushadlaje kheijinei kanei mailemlabü shanga, ho mohaüthükjinei 30ngei kan to lalok ajoyolabü, aishanga kaodak songdakbou kho louada. Lausikei hao kü thüka ai hau aki; 31habü pendou kho khei ngei Bou to sanouda hoba ngei Bouei kü la ngühkhüm kubü tegü kümda dogo kaodakei ngelabü shanga ong ki. Meimeiashi, sen haka satakho.
தற்சமயம் தேர்ந்தெடுக்கப்பட்டது:
JOHAN 14: CHANGBSI
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.