JOHAN 6
6
Jisuei Hajar Ngao Oknyinbü
(Mt 14.13-21; Mk 6.30-44; Lk 9.10-17)
1Kho phaia Jisu Galil si thidang to haukei, (kho Tiberia si.) 2Khünei noknyüh hao phai seman kikei, aieilausi haoenei haoei mütshuong shatbü maitibü amaaphilabü hapbei. 3Jisu shongh to angkei hoba khünei hao eikshuong yoa setkei. 4Püetbü lem, Jihudabü lem kho nyangko kikei. 5Ladang Jisuei limchühkei hoba mütshang yaang hao jungto louko kibü hapbei, haoei Filip to laukei, “Habüei shaula shanga senei wentek laka jekla?” 6(Haoei kho hao takteila laukei; aishanga haoei ai kümlabü ki kho haoei ngekei.) 7Filipei hao to jongaikei, “Mütpem weko hanbang ong shomasikei sempak saoaneibü wentekei haoen asoulabü.” 8Eikshuong yoa che, Simon Petereibü na Andriaei hao to laukei, 9“Hanei nashou hanbü che kia, haoei barli wentek ngao hoba ngau penyi kia; lausikei müt khüjoche shanga khoei ai kümbula?” 10Jisuei laukei, “Mütshuong settiashi” (khünei sang juongnyu kikei.) Hibü mütshuong setkei; haoen hajar ngao thüng kiteikei. 11Jisuei wentek kho sungkei, hoba Mühghaü la nyensang kuan phaia mütshuong setan kijinei haoen la shombukei, hoba ngaukei khei kümbei. Mütpem wekoei photko shaukei. 12Ladang haoen senyühshembei, haoei hao eikshuong to laukei, “Ai amaulabü lele jouletbü netshou shuong heshaiashi.” 13Hibü haoenei khübü yoshaikei, hoba shaubü shuongei barli wentek ngao ka joutibü khoei kam anthüknyi shenkei. 14Haoei kümbü amaaphelabü hapbü mütshuongei laukei, “Maimaitham kaodak to loula kibü Thuseibou kho ho ki.” 15Hibü Jisuei, haoenei hao lapan choba la yeitilabü dogo kibü kho ngean, hao hao mütpem shongh aeto satan apbukei.
Jisu Dei Thüka Paibü
(Mt 14.22-33; Mk 6.45-52)
16Ladang chasem yeikei hao eikshuong yungnyu to yankei. 17Haoen long che to atkei hoba Kapernaum to danko kikei. Kho touje nangnaka hoba Jisu haoen jungto molouko kikei; 18hoba dei shoueila khangko kikei, aishanga yungnyua yei yaang souko kikei. 19Haoenei longa mail sem si lei phongan phaia haoenei Jisu dei thüka paiko long junga sühko louko hapbei; hoba haoen hatkei. 20Haoei haoen to laukei, “Ho ngo yingkei; tehüt.” 21Kheijinei haoenei hao long to leiyetmang sühkei, lausikei longche danga long khoei haoen hauko kibü kaoen sühkei.
Mütshuongei Jisu Lambü
22Nyibounyet, yungnyu thi aedanga shaibü noknyühei, khünei long che ong kiteikei hoba Jisu hao eikshuong yoto long to üet lausikei hao eikshuong lansan ong haukei dogo damenkei. 23Tiberia ka lubü long shuong, laonei haoenei Jisuei nyensang kuan phaia wentek shaukei, kho kaoen nyangko lousühkei. 24Hibü, ladang noknyühei khünei Jisu ayingsi haoeibü eikshuong ongkei ühüp, haoenei haoen lolo long to atkei, hoba Kapernaum to Jisu lamjung loukei.
Jisu Langkeibü Wentek
25Ladang haoenei hao yungnyu thinei hapbei, haoenei hao to laukei, “Lenbou, no ladang hato loukei?” 26Jisuei haoen to jongaikei, “Maimaitham ngühmaia ngei kan to lenda, kanei ngo kanei amaaphilabü hapbü shanga aying, lausikei kanei wentek janshauan senyühshembü ka lamyoda. 27#Isa 55.2 Nyaülabü shausi- yung shanga tekümtelei; thalabü hoba ponpen langkei sungbala, laobou Müteibü Shouei kan la kulabü ki, kheibü shausiyung shanga kümaleiashi; aishanga Bou Mühghaüei hao thüka haoeibü hau tetsida jankua.” 28Haoenei hao to laukei, “Künei Mühghaü kümsilei kümlabü lele künei ai kümla?” 29Jisuei haoen to jongaikei, “Mühghaü kümsilei kho ho ki, khei haoei ao hautikei kanei hao to mailemjan.” 30Hibü haoenei hao to laukei, “Künei kho haplabü hoba ka to mailemlabü lele nyi ai amaaphilabü kümda? Nyi kümlabü kho ai? 31Laishibaei, ‘Haoei haoen la khuthük ka shausiyung kukei’, dogo lenan kibü tegü küneibü pisibousi shuongei yama mana shaukei.” 32Jisuei haoen to laukei, “Ngei kan to ngühmaia ngüh juong lenda; Mosaei kan la khuthük ka shausiyung kukei aying; lausikei Kübouei tükdebü shausiyung kan la khuthük ka kuda. 33Aishanga Mühghaü shausiyung kho laobou khuthük ka louyenda hoba kaodak la langkei kuda kho ki.”
34Haoenei hao to laukei, “Yaangbou, kün la ponpen kho shausiyung kubü.” 35Jisuei haoen to laukei, “Ngo langkei shausiyung; ao kü jungto louda hao mühei ühailabü, hoba aoei kü to mailemda hao ladangkei nyibou dei alalabü. 36Lausikei kanei ngo hapasikei kanei kü to maialemda dogo ngei kan to lena. 37Bouei kü la kubü shuong pendou kü jungto loulabü, hoba ao kü jungto louda hao ngei shian asattilabü, 38aieilausi ngo jembüei maangangbü kümla khuthük ka loukei aying, lausikei ngo hautibouei maangangbü kümla loukei. 39Ho ngo hautibouei maangangbü ki, khei haoei kü la kubü ka ngei che ongkei amautijan, lausikei thonbü Chaloua haoen pendou langngaitijan. 40Aishanga aoyouei Shou hapda hoba hao to mailemda haoei pon- pen langkei haplabü kho Kübouei maangangbü ki; hoba ngei hao thonbü Chaloua langngaitilabü.”
41Hibü Jihudabü shuongei hao shangabü nyamnyambei aishanga haoei, “Ngo khuthük ka loubü shausiyung” dogo laukei. 42Haoenei laukei, “Ho Josef shou Jisu aying lo? Haobou si haonyu senei angekei lo? Khülonga haoei tou lai küman, ‘Ngo khuthük ka loukei’ dogo lauda?” 43Jisuei haoen to jongaikei, “Kan yoa tenyamnyamyo. 44#Hos 11.4 Ngo hautibou Bouei asenba longa aokei kü jungto loula athük; hoba ngei hao thonbü Chaloua langngaitilabü. 45Thuseibü lea ho doakei, ‘Hobaje haoen pendou la Mühghaüei lenlabü.’ Aoyouei Bou to ditda hoba hao ka ditletda hao kü jungto louda. 46Müt atei Bou hapa dogo ngei alauda, khei Mühghaü ka laobou Che khüto limanje; haoei ong Bou hapa. 47Ngühmaia ngei kan to lenda, aoei mailemda, haoei thon akibü langkei ki. 48Ngo langkei shausiyung. 49Kaneibü pisibousi shuongei yama mana shaukei, lankei haoen haikei. 50Mütei shaulabü hoba ühailabü shanga ngo khuthük ka loubü shausi- yung. 51Ngo khuthük ka louyenbü lang kibü shausiyung. Atei ho shausiyung shausije hao ponpen lang kilabü; hoba ngei kulabü shausiyung kho kü phe; kaodakbü langkei shanga ho kuda.”
52Hibü Jihudabüei haoen yoa ngühsak nepyoko laukei, “Ho mütei lai küman sen la haoeibü phe shaula kula?” 53Jisuei haoen to laukei, “Ngühmaia ngei kan to lenda, kanei Müteibü Shou phe ashau longa hoba hao sii ayung longa kan jembü lolo to langkei aki. 54Aoei kü phe shauda hoba kü sii yungda haoei athonbü langkei ki, hoba ngei hao thonbü Chaloua langngaitilabü. 55Aishanga kü phe kho tükdebü shausiyung, hoba kü sii kho tükdebü yunglabü. 56Aoei kü phe shauda hoba kü sii yungda hao kü to kida hoba ngo hao to kida. 57Lang kibü Bouei ngo ailai hautikei, hoba ngo Bouei lang kida, kho tegü aoei ngo shauda haokei ngo danko lang kilabü. 58Ho khuthük ka louyenbü shausiyung; ho kaneibü pisibousi shuongei shaubü kho tegü aying, aishanga kho shausiyungei haoen alangda; lausikei aoei ho shausi- yung shauda hao ponpen langkei kilabü.” 59Haoei ho Kapernauma sinagoga lenjinei laukei.
Thon Akibü Langkei Ngüh
60Haoenei ladang ho ditkei, hao eikshuong juongei laukei, “Ngüh hoje sekakei. Aoei ho ditenla?” 61Ho shangabü haoeibü eikshuongei nyamnyamda dogo Jisuei ngekei, hoba haoen to laukei, “Hoei kan phaiyetda lo? 62Khülonga kanei Müteibü Shou hao shangied kishang to angko hapsije lai kümla? 63Ho langkei kubou Soushou ki; pheje jim aki. Ngei kan to lenbü ngüh shuongje Soushou hoba langkei ki. 64Khei yingasikei kan yoa atje maialembü kia.” (Aishanga maialembü aoyou, hoba aoei hao yaakshaula khübü kho Jisuei khanglathama ngean kiteikei.) 65Hobaje haoei laukei, “Bouei akulonga aokei kü jungto loula athük dogo ngei kan to lena.”
66Kho jih ka jaüan hao eik juongnyu sepeijung ngaikei hoba hao yoa apaiko apbei. 67Kheijinei Jisuei Anthüknyi to laukei, “Kankei ngaimang sühda sai?” 68Simon Peterei hao to jongaikei, “Bunyubou, kün ao jungto sepeila? Nyi thon akibü langkei ki; 69hoba künei mailema hoba no Mühghaüeibü Saopobou ki dogo ngeena.” 70Jisuei haoen to jongaikei, “Ngei kan Anthüknyi kho apien lo? Lausikei kan yoa cheje huonbou ki.” 71Haoei Simon Iskhariot shou Judas shangabü lauko kiteikei; aishanga hao Anthüknyi yoa che yingasikei, hao yaakshaulabü lele kiteikei.
தற்சமயம் தேர்ந்தெடுக்கப்பட்டது:
JOHAN 6: CHANGBSI
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.