LUK 22
22
Jisu Khulimbo Huonbü
(Mt 26.1-5; Mk 14.1-2; Jn 11.45-53)
1 #
Leiy 12.1-28 Püetbülem dogo laubü Tokai ajinbü Wentek Lem nyangko kikei. 2Ungshedbou shuong hoba Ngühkhüm lenbou shuongei Jisu haitilabü hangsilam lambo kikei; aishanga haoenei mütshuong to hatkei.
Judasei Jisu Yaakshaula Maangangenbü
(Mt 26.14-16; Mk 14.10-11)
3Anthüknyi yo kabü che, Iskhariot, dogo laubou Judas maangpon to Satan atkei; 4hoba Judas wenjung satkei hoba ungshedbou shuong si lembü- chem lombou leiyeibü shuong to haoei Jisu haoen ik to lai khümbo kuan apla kho sangkukei. 5Haoen olinkei hoba hao la nam kula theletkei. 6Hao maanghaikei, hoba mütshang akijinei haoen la Jisu khümbo kuan apla shanga jih maibü che chüheikei.
Jisuei Püetbülem Shaula Lamlebü
(Mt 26.17-25; Mk 14.12-21; Jn 13.21-30)
7Tokai ajinbü Wentek Lem, laonei Püetbülem sanlon shoushou lemla haitilabü kikei, kho chalou sühkei. 8Jisuei Peter si Johan hai lauko hautikei, “Hauashi hoba senei shaula Püetbülem lamleashi.” 9Haosiei hao to laukei, “Nyi küsi la ho lanei lamletimang sühda?” 10Haoei haosi to laukei, “Ladang kasi sangnyu to atlaje müt cheei thamchaka dei künan kasi to haüyolabü. Hao atbü chem to hao phai semshi, 11hoba chem bunyu to hai laushi, ‘Lenbouei kato lauda: Ngei kü eikshuong yoa Püetbülem shaulabü popchem kho lanei ki?’ 12Haoei kasi la thükkabü popchem yaangbü che jemetsangettian lenlabü. Khonei lamleashi.” 13Haosi haukei hoba ajanjan pendou haosi la lenbü tegü yingan kiteikei hoba haosiei Püetbülem khünei lamlekei.
Bunyubou Lem
(Mt 26.26-30; Mk 14.22-26; 1 Kor 11.23-25)
14Ladang jihsiphai sühkei hao hoba haoeibü youkoikjai shuong setkei, 15hoba haoei haoen to laukei, “Ngo khonakutoua ho Püetbülem kan yoa shaula ngei aeibou maangdühkei, 16aishanga ngei kan la lenda, ho nyekchüh Mühghaü Sanglea aloushad shongko ngei ho kan yoa nyibou ashaulabü.” 17Kheijinei haoei thung che sungletko Mühghaü la nyensang kukei hoba laukei, “Ho sungletashi hoba kan yoa shomashi; 18aishanga ngei kan la lenda, tou ka jaüan Mühghaü Sangle alou shongko ngei semlüh hek dei ayunglabü.” 19Haoei Wentek sungan nyensang kuko shaknyinkei hoba haoen la kuko laukei, “Ho kan shanga kubü ngeibü mang. (Ngo damenko hai kümashi.” 20Hobaje shauan phaia kho tegü ong haoei thung kho sungko laukei, “Ho thung kü siiei kümbü haanbü theyolanyobü ki; ho kan shanga kouda.) 21Lausikei chühashi, aoei ngo yaakshaulabü ki haoeibü ik kü phau denshanga hamakei; 22aishanga huongsepbü tegü maimaitham Müteibü Shou hailabü, lausikei hao ao danko khümbo kuan apda hao shangaje ügütü!” 23Haoenei haoen yoa laobouei ong ho kümla kima dogo cheei che to pheyola khangkei.
Yaangbou shangabü Pheyobü
24Haoen yoa ao yaangbou yingla dogo haoen wetyo khangkei. 25Jisuei haoen to laukei, “Kaodak choba shuongei mütli thüka bunyu yeida, hoba haoen thüka hau jungeibü shuong to Thuibou shuong dogo lauda. 26Lausikei kan yoaje khei aying; kan yoa yaangshangbou kho nashoubou tegü yingshi, hoba khuleibou kho khangenbou tegü yingshi. 27Laobou yaangbou, shaushanga setbou si nongeibou? Shaushang yungshanga setbou kho aying si? Lausikei ngo kan yoa khangenbou che tegü ki. 28Kü khonsak pendou dantiko kü yoa thüngbü shuong kho kan ki; 29Kübouei küla Sangle che pentibü Kü Sanglea ngeibü shau shang yungshanga shaulabü lele ngei kan pentida; 30hoba kanei Israel phang anthüknyi mat jembo choba setshanga setlabü.
Peterei Athekulabü shangabü Jisuei Tetenkubü
(Mt 26.31-35; Mk 14.27-31; Jn 11.36-38)
31“Simon, Simon, kan pendou youshou tegü sipan apla shanga Satanei hileda; 32lausikei Simon, kaibü mailemei no athük alottila shanga ngei ka shanga welaua. No ladang haan sepeingailaje, kaibü jaisinasi shuong hau kingaitiashi.” 33Peterei jongaikei, “Bunyubou, ngo ka yoa thüngdang to atla hoba hailakei lamleakei.” 34Jisuei laukei, “Ngei kala lenda, Peter, nyi ngo angekei dogo semnei alau shongko tat aunak akoulabü.”
Neimok, Nyungkai hoba Inlou
35Haoei haoen to laukei, “Ngei kan neimok, nyungkai ayingsi nguok akünko hautijinei kan aieije shalelao?” Haoenei laukei, “Ai aying.” 36Haoei haoen to laukei, “Lausikei touje aoei neimok kije jungashi, hoba nyungkaikei, hoba aoei inlou aki, haoei haoeibü mangyuk yakashi hoba che jekashi. 37#Isa 53.12 Ngei kan to lenda, Laishiba laobouei, ‘Hobaje hao ngühkhüm lulimbü dan yoa weoukei’, dogo laukei kho kü to loushatda.” 38Haoenei laukei, “Chüha, Bunyubou, hanei inlou penyi kia.” Haoei haoen to laukei, “Khoei soua!”
Jisuei Oliv Shongha Welaubü
(Mt 26.36-46; Mk 14.32-42)
39Haoei apyokei hoba hao hanghangbü tegü Oliv Shongh to haukei; hoba eikshuongei hao phai sembei. 40Ladang haoei kaoen sühkei haoei haoen to laukei, “Kan takteibü to aloulabü shanga welauashi.” 41Hao haoen ka jutak shijo thüng banglangkei, hoba khüpetko welaukei, 42“Abou, nyi maangangsije ho thung kü ka langkai; lausikei kü maang aying, nyi maangangbü kümshi.” 43Khuthük ka khuthük hangangbü che louan hao hau kingaitikei. 44Hao aeibou khonkukei hoba aei kaangko welaukei, hoba haoeibü lemli dei sii kao to sangbü tegü yeikei. 45Hao welaubü ka loenan eikshuong jungto loukei, hoba haoen maangmaubü ka yepan hapbei. 46Haoei haoen to laukei, “Kan aila yepan kida? Pienashi hoba kan takteibü to alotla shanga welauashi.”
Jisu Lapbü
(Mt 26.47-56; Mk 14.43-50; Jn 18.3-11)
47Haoei kho lauko kitoua mütshang che lousühkei, hoba Judas nyenbü, Anthüknyi yoa che kho thedang lean kikei. Haoei hao to sembung shepla shanga Jisu nyangko loukei. 48Jisuei hao to laukei, “Judas, nyi sembung shepbo Müteibü Shou khümbo kuan apda lo?” 49Loushadla kümbo kibü kho hapan hao phai sembü shuongei laukei, “Bunyubou, künei küneibü inei wapbo no?” 50Haoen yo ka cheei thükkabou ungshedboueibü sambü to wapbei hoba mae nou shipan apbukei. 51Lausikei Jisuei laukei, “Thakashi! Khüae leshi!” Hobaje haoei kho müteibü nou to jungkei hoba maitikukei. 52Jisuei hao khulimbo loubü ungshedbou shuong, lembüchem lombü leiyeibü shuong hoba jaishou shuong to laukei, “Kokbüsembü müt khulimbo loubü tegü kan in si juthep japan louda lo? 53Ngo kan yoa liko kijinei kü khu limbo ik ashing. Lausikei ho kaneibü jihsiphai; touje nakthühei songdakda.”
Peterei Jisu Atheletbü
(Mt 26.57-58,69-75; Mk 14.53-54,66-72; Jn 18.12-18,25-27)
54Haoenei hao lapan leilangkei hoba thükkabou ungshedbou chem to leibakei. Peterei tangküng heeko sembei. 55Ladang haoenei khongchia wan jikkei, haoen pendou setkei hoba Peterkei haoen yoa setyokei. 56Sambü-medei cheei hao wanlong junga setan hapbei hoba hao to tangko chühkei. Saoei laukei, “Ho mütkei hao yoa kiteikei.” 57Lausikei Peterei hao athelet hoba laukei, “Yaksa, ngei hao angekei.” 58Longche kian müt cheei hao hapbei hoba laukei, “Nokei haoen yoa che yingkei.” Lausikei Peterei laukei, “Ji, ngo aying.” 59Angh che thüng kian phaia lubü müt cheei chongchingko shean laukei, “Toknoklabü aki ho müt ho hao yoa kikei, aishanga hao Galilbü yingkei.” 60Lausikei Peterei laukei, “Nyi ai laudaje ngei angekei.” Khoyam, haoei lauko kitoua aunakei koukei. 61Jisuei sepeikei hoba Peter to chühkei, hoba Peterei Jisuei hao to, “Aunak akoutoua nyi ngo tat semnei sühko atheletlabü”, dogo laubü damenkei. 62Hao ngaikei hoba kaang haapbei.
Jisu Nyikubü hoba Ngümeibü
(Mt 26.67-68; Mk 14.65)
63Hao to hatan kibü shuongei hao to nyikuko hoba ngümeiko kikei. 64Haoenei haoeibü thenyek yuklepbukei hoba hao to phekei, “Kato ngümbou kho ao? Tetenashi!” 65Hobaje haoenei hao khulimbo Mühghaü nyikubü ngüh juong laukei.
Jisu Kambü Thedanga
(Mt 26.59-66; Mk 14.55-64; Jn 18.19-24)
66Ladang lang ngekei, mütli jaishou shuong, hoba ungshedbou shuong si Ngühkhüm lenbou shuong takshatkei hoba haoenei hao Thükkabou Kambü to leian hauko 67laukei, “No Khrista yingsije kün la lenbü.” Haoei haoen to laukei, “Ngei lenalonga kanei maialemlabü; 68hoba ngei kan ka phealonga, kanei ajongailabü. 69Tou ka jaüan Müteibü Shou Mühghaü sei mae aenei setan kilabü.” 70Haoen pendouei laukei, “Khülonga no Mühghaü Shou lo?” Haoei haoen to laukei, “Ngo hao dogo kanei lauda.” 71Haoenei laukei, “Sen shanga aukabü aei ai kümsilei ki? Senei lolokei hao sembung ka kho dida.”
தற்சமயம் தேர்ந்தெடுக்கப்பட்டது:
LUK 22: CHANGBSI
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.