Cenisihs 1
1
Kishemanitoo Kii'oshihtootc Kahkina Kekoonini
1Maawac tahsh kihci niikaan, Kishemanitoo okii oshihtoon kiishik, ahkiini kaye. 2Kiihpikwacaya'iiwan, kiimashashkwaa hsa kaye o'o ahki. Nipi tahsh kiihkiishkaayawaa, wiinke tahsh misiwe kiihkashkiitipihkan. Kishemanitoo tahsh otAhcaahkwan ahshicipiik kiihpimi ayaawan. 3#2Co 4.6. Kishemanitoo tahsh kii‑ihkito, “Taka tawaahseyaa.” Miihsh kaaishi waahseyaanik. 4Miitahsh kaaishi minwaapantank i'i kaakii waahseyaanik. Okii nenaawinaan tahsh i'i kaakii waahseyaanik i'i kaye kaakii kashkiitipihkaninik. 5Kaakii waahseyaanik tahsh kiishikan okii ishinihkaataan shikwa kaakii kashkiitipihkaninik tahsh tipihkan okii ishinihkaataan. Miihsh kaa‑anishi tipihkaninik, kiiani kishepaawakanini kaye, mii 'i kiihpeshikokiishikaninik.
6Kishemanitoo tahsh kii‑ihkito, “Taka, ta‑ayaamakan aahsamikiishik akwana'ikanink keinentaakwahk keshi piihtawaakin nipiin.” 7Miitahsh kaakii oshihtootc aahsamikiishik, ekii nenaawinank ini nipiin anaamikiishik eyaanikin, ini kaye wakici kiishik. Mii hsa 'i kaaishihsenik. 8Kiishik tahsh okii ishinihkaataan i'i aahsamikiishik. Miihsh kaa‑anishi tipihkaninik ekii ani kishepaawakaninik kaye, mii 'i kiiniishokiishikaninik.
9Kishemanitoo tahsh miinawaa kii‑ihkito, “Taka tamaamawiciwanoon ini aahsamikiishik eyaakin nipiin i'imaa peshik ayaawinink, cinaakwahk cipaankwahkamikaak.” Mii hsa 'i kaaishihsenik. 10Kaakiih paankwahkamikaanik tahsh ahki okii ishinihkaataan, kaakii ishi maamawiciwaninikin tahsh nipiin kihcikam okii ishinihkaataan. Wiinke tahsh okii minwaapantaan. 11Kishemanitoo tahsh miinawaa kii‑ihkito, “Taka o'omaa ahkiink tasaakahkiiwan kaatahswewaanakahkin kihtikaani kekoonan, taapishkoo ashkipakoon kaamiiniwankin kihtikaanenhsan, iki kaye miinaahtikook entinowiwaatc kaanihtaawikihtoowaatc miinan i'imaa kaapiintekin wahkantaaminan.” Mii hsa 'i kaaishihsenik. 12Kiihpi saakahkiiniwan tahsh ini kaatahswewaanakahkin kihtikaani kekoonan taapishkoo ashkipakoon minihk entinowiwaatc kaamiiniwankin kihtikaanenhsan, iki kaye miinaahtikook minihk entinowiwaatc kaanihtaawikihtoowaatc miinan i'imaa kaapiintekin wahkantaaminan. Wiinke tahsh okii minwaapantaan. 13Miinawaa tahsh kiiani tipihkan, kiiani kishepaawakan kaye, mii 'i kiinihsokiishikaninik.
14Kishemanitoo tahsh kii‑ihkito, “Taka ta‑ayaamakanoon keonciwaahseyaak aahsamikiishik, cionci nenaawinikaatekin kaakiishikahkin, kaatipihkahkin kaye. Mii hsa iwe keonci kihkinawaaci kihkencikaatekin aaniin eshi kiishikahk, aaniin kaye ahpii kepipoonk, ahpii kaye kewiihkwantinaaniwank. 15Taka ta‑ayaamakanoon kewaahseyaakin aahsamikiishik keonciwaahseyaak o'o ahki.” Mii hsa 'i kaaishihsenik. 16Miitahsh Kishemanitoo kaaishi oshihtootc niishin kehci waahsahkonenikin; kiisihsoon ketipentaminitc kiishikan shikwa tipihkikiisihsoon ketipentaminitc tipihkan. Wanankohsha' tahsh kaye okii oshi'aa'. 17Miiwa' o'o kaaishi pakitinaatc aahsamikiishik ciwaahseshkaminitc ahkiini. 18Citipentaminitc kaakiishikaninik, kaatipihkaninik kaye cinenaawishkaminitc kaawaahseyaanik, onci kaakashkiitipihkaninik. Kishemanitoo tahsh okii minwaapantaan. 19Kiiani tipihkan tahsh, miinawaa ekii ani kishepaawakahk, mii 'i kiiniiwikiishikaninik.
20Miinawaa tahsh Kishemanitoo kii‑ihkito, “Taka tapaahtiinowak nipiink kaa‑ayaawaatc kemooshkinewaatc i'imaa nipiink. Tatashi papaamihsewak kaye pinehshiinshak newacikiishik.” 21Miitahsh kaaishi oshi'aatc kihci tinowihkaana' i'imaa kihcikamiink ciayaanitc. Okii oshi'aa' kaye kahkina nipiink kaa‑ayaanitc kaawahkawiinitc i'i wehkwiinonitc i'imaa nipiink, anooc entahswewaanakisinitc, kahkina kaye kaapimihsenitc pinehshiinsha' aaniin entahswewaanakisinitc. Okii minwaapantaan tahsh i'i kaakii waapantank. 22Kishemanitoo tahsh okii'inaa' ciminohsenitc ekii ihkitotc, “Nihtaawikinaawahsok cini paahtiinoyek, misiwe ani ayaak o'omaa kihcikamiink, tani paahtiinowak kaye pinehshiinshak wakitahkamik.” 23Miinawaa kiiani tipihkan, kiiani kishepaawakan kaye. Mii hsa 'i kiinaanokiishikaninik.
24Miinawaa tahsh Kishemanitoo kii‑ihkito, “Taka ta‑ayaawak aya'aawihshak wakitahkamik, anooc citahswewaanakisiwaatc. Awahkaanak ta‑ayaawak, iki kaye kaapimootewaatc, pikwaci aya'aawihshak kaye.” Mii hsa 'i kaaishihsenik. 25Miitahsh i'i nahke kaaishi oshi'aatc pikwaci aya'aawihsha', minihk iko entahswewaanakisinitc ci‑ishi'ayaanitc, okii oshi'aa' kaye awahkaana' entahswewaanakisinitc ci‑ishi'ayaanitc. Kahkina kaye mihtahkamik kaapimootenitc, entahswewaanakisinitc okii oshi'aa'. Kishemanitoo tahsh okii minwaapantaan.
26 #
1Co 11.7. Kishemanitoo tahsh kii‑ihkito, “Taka oshi'aataanik awiyak pemaatisiwaatc kaaishinaakosiyank ishi'aataanik, eshi'ayaayank kaye ci‑ishi'ayaawaatc. Oka tipenimaawaa' tahsh kinooshe' i'imaa kihcikamiink eyaanitc, pinehshiinsha' kaye newacikiishikonk eyaanitc, awahkaana' kaye, kaapapaamootenitc kaye. Misiwe kaye ahkiini oka tipentaanaawaa.” 27#Gen 5.1,2. Miitahsh kaaishi oshi'aatc awiya' pemaatisinitc ekii ishi'aatc taapishkoo eshinaakositc. Mayaa hsa piko eshinaakositc ekii ishi'aatc. Okii ishi'aa' ci‑ininiiwinitc, ci‑ihkwewinitc kaye. #Mat 19.4; Mrk 10.6. 28Miitahsh kaa'inaatc ciminohsenitc. O'o okii'inaa', “Nihtaawikinaawahsok cini paahtiinoyek, misiwe ani ayaak i'imaa ahkiink. Tipentamaasok ahki. Tipenimihkook kinooshek kihcikamiink kaa‑ayaawaatc, pinehshiinshak kaye newacikiishik kaa‑ayaawaatc, kahkina kaye kekoon kaapimaatahk kaawawaahkawiimakahk wakitahkamik.” 29Miihsh kaye kaa'inaatc, “Inashke, kahkina kimiinininim kaamiiniwankin kihtikaanenhsan o'omaa misiwe wakitahkamik, kahkina kaye tinowaahtikook kaamiiniwiwaatc kaawahkantaaminiwiwaatc mii 'iwe keomiicimimiyan. 30Kahkina kaye aya'aawihshak miinaawak kahkina kihtikaanan kaanihtaawikininikin cimiiciwaatc, iki kaye kahkina pinehshiinshak, kaapimootewaatc kaye mihtahkamik. Minihk hsa ko pemaatisiwaatc aya'aawihshak mii 'i eshi miinakwaa cishi omiicimimiwaatc.” Mii hsa 'i kaaishihsenik. 31Kishemanitoo tahsh okii waapantaan kahkina kekoon kaakii oshihtootc, aahpici tahsh wiinke kiionishihshinini. Miinawaa tahsh kiiani tipihkan, ekii ani kishepaawakahk kaye. Mii 'i kiininkotwaahsokiishikaninik.
ప్రస్తుతం ఎంపిక చేయబడింది:
Cenisihs 1: OJBR
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Ojibwe Shorter Bible (Roman Script) © 2008 Canadian Bible Society