Lükɛ̀n 9
9
Anwrɔn ɛvà-anhyrɛ̀ kɔ̀hɔ̀n-hán-kɔ̀hɔ̀n
(Nyɛ́n nyan Matie 10:5-15; mán Markɛ̀n 6:7-13 wrú lɔ mɛ̀n)
1Zhezü bɔrɛ n'ɛsɛnkɛn-bɔ̀ ɛkru kɩ tán yɔ ɛkɔrɛ̀-srɔn mán ɛkɔrɛ̀-levri, yɔ wrɔ́ anhɛ́n gbangbàn ô yɔ kɔrɛ ɛnlɔẅiɛ-bɔ̀. 2Zɛtɛn, nɛ̀n wá yɔ ɔkɔhɔ̀n yɔ hɔ̀n yɔ dɔ́ Ɔwɔ ankà ô yɔ kɔrɛ ɛnlɔẅiɛ-bɔ̀. 3Kɩ nɛ dɔ́ yɔ le: “Nyɛ́n bɩ́ bɩ́ eci zriɛmɛ́n nyɛ́n wá edomɛ̀n ke dú: kpaman, bàgɛ̀n kpò, abùtùkumɛ́n, ɔkùa, ɔwrɔn zri ke bɩ́ ẅɛn ɛwú ceci anhyrɛ̀. 4Ɛyri lɔ fɛn léyi ye le bɩ́ nyɛ̀n nɔn, nyɛ́n dú nanvrɛn hàn kɩ kɛ̀ krɔn ny'ɛhɔ́n vrá. 5Ɛyri lɔ fɛn léyi ye sɩ́ ji ye bɩ́ nyɛ̀n nɔn, nyɛ́n cɔhɔ́ anmàn lɔ, ô nyɛ́n korɛ ny'annan-hi nyɛ́n cüe, hɩ lɔ de ke le dú y'eci gbangbàn hán dalɛfuɛ-dì nɔn.” 6Ɛsɛnkɛn-bɔ̀ lɔ hɔ̀n; yɔ ci anmàn lɔ fɛn, yɔ dɔ́ Ɛmɛẅi ankà Ankrànkràn, kɩ ɛyri lɔ fɛn yɔ kɔrɛ ɛnlɔẅiɛ-bɔ̀.
Herɔdɛ̀n krɛ̀ta-kù
(Nyɛ́n nyan Matie 14:1-12; mán Markɛ̀n 6:14-29 wrú lɔ mɛ̀n)
7Nyàn ɔmuhi, Herɔdɛ̀n léyi dú govran nɔn, yá ankà lɔ fɛn léyi ke cì nɔn. Nɛ́n sɩ́ nyri ankà léyi ne le tro nɔn, ɔmuhi anwrɔn ndɔ hɔ̀n kɛ dɔ́ le: “Zhan Batisì dú owúemɛ̀n vru vá ɔkɔrɛ̀-bɔ̀ mɛ̀n.” 8Anwrɔn janbɔ̀ kɛ dɔ̀ le: “Eli de vru và nɔn.” Ndɔ hɔ̀n vru kɛ dɔ̀ le: “Ɛnbiɛnhɛ́n Ɔwɔ-mùanwú-ankà-dɔ́-bɔ̀ lɔ, ɔtɔ̀n de vru vá ɔkɔrɛ̀-bɔ̀ mɛ̀n nɔn.” 9Tɛ́n Herɔdɛ̀n mrɛ́n ɔmùan le: “Mɛ̀n hán ye ẅí Zhan ɛnkru. Kɛ̂, antɔn dú ɔwrɔn ndɔ léyi mɛ yá yɛ dɔ́ n'ankà nɛ́n?” Kɩ ne ji nɛ̀n kán Zhezü.
Zhezü tán anwrɔn tɛ̀bru-kru-ɛnrì ɛci-zî
(Nyɛ́n nyan Matie 14:13-21; Markɛ̀n 6:30-44; mán Zhan 6:1-14 wrú lɔ mɛ̀n)
10Ɔkɔhɔ̀n-wá-bɔ̀ lɔ vru ɛmɛẅí và kɩ kɛ dɔ́ Zhezü eci lɔ fɛn léyi yɔ hán nɔn yi ankà. Zhezü bɩ́ yɔ hɔ́n ɛyri tɔ̀n léyi ye bi Bɛtsahida nɛ́n mán yɔ mɛhi. 11Tɛ́n anwrɔn nyri ankà lɔ kɩ kɛ kɛ́n nɛ̀n ɛsɛ̀n. Zhezü bɩ́ yɔ, kɩ kɛ dɔ́ yɔ Anhɔbɩ́ Nɛ̀ncüì-dúyri ankà, kɩ kɔrɛ̀ yɔ hɔ̀n léyi ɛnlɔẅiɛ dú edomɛ̀n nɔn. 12Ɛnvra léyi, ɔwɔɛmɛ̀n kɛ vá ɛcɔ́-yri nɔn, ɛsɛnkɛn-bɔ̀ ɛvà-anhyrɛ̀ lɔ sɔnbá Zhezü ɛtɛsɛ̀n kɩ kɛ dɔ́ nɛ̀n le: “Ɛ̀ hán anwrɔn ndɔ hɔ̀n lɔ fɛn ke vru ɛmɛẅí kɛ̀ hɔ́n anmàn, mán nanbuenu hɔ̀n léyi dú ɛtɛsɛ̀n nɔn, ô kè ji ɛci-zî mán ɛdɛ́-yri, ɔmuhi ɛnu lɔ bɔ́ dú ɛyri tramɛ̀n nɔn.” 13Tɛ́n Zhezü kɛ dɔ́ yɔ le: “Nyɛ́n dùku nyɛ́n tán yɔ ɛci yɔ zî.” Yɔ mrɛ̀n nɛ̀n ɔmùan le: “Abùtùkumɛ́n ɛnrì mán ɛcàn anhyrɛ̀ kɩ bɔ́ ẅɛ̀n. Ɛ ji le, bɔ̀ hɔ̀n bɔ̀ wɔ́ ɛci bɔ̀ tán anwrɔn ndɔ hɔ̀n lɔ fɛn kè zîɛ̀?” 14Nanvrɛn lɔ, anwrɔn tɛ̀bru-kru-ɛnrì de dù nɔn. Zhezü kɛ dɔ́ n'ɛsɛnkɛn-bɔ̀ le: “Nyɛ́n hán yɔ yɔ yɛ́, ankpɔsɔ ɛkoẅi-anhyrɛ̀ mán ɛẅì ɛvá mɛ̀n.” 15Zhezü sɛnkɛn-bɔ̀ lɔ hán eci léyi nɛ̀n wá tán yɔ nɔn, kɩ fɛcüè lɔ vri-yɛ́. 16Zhezü bɩ́ abùtùkumɛ́n ɛnrì lɔ, mán ɛcàn anhyrɛ̀ lɔ, sɩ́ anvɛ̀ ɛwú, fú ɛnshi kɩ tán Ɔwɔ ɔkùɛn. Nɛ̀n voyan abùtùkumɛ́n lɔ, nɛ̀n tán n'ɛsɛnkɛn-bɔ̀ ô kɛ̀ dɛ́ fɛcüè. 17Yɔ lɔ fɛn yɔ zî ɛci, ɛmɛ̀ntɛ̀ yɩ́ yɔ. Ɛci hɔ̀n léyi wɔrɔ nɔn, dú ankɛ́ ɛvá-anhyrɛ̀ de ye bɩ nɔn.
Piɛrɛ̀n kɛ dɔ̀ le Zhezü dú Ebɩ̀die-wrɔn
(Nyɛ́n nyan Matie 16:13-19; mán Markɛ̀n 8:27-29 wrú lɔ mɛ̀n)
18Ɛnbì tɔ̀n, Zhezü kɛ sɛ́n Ɔwɔ ɔhɔnán, kɩ n'ɛsɛnkɛn-bɔ̀ hɔ́n cɔ́ nɛ̀n. Ne yrɛ yɔ le: “Ankà tán de fɛcüè kɛ dɔ́ m'ɛwú nɛ́n?” 19Yɔ dɔ́ nɛ̀n le: “Anwrɔn ndɔ hɔ̀n kɛ dɔ̀ le, è dú Zhan Batisì, ɛnjanbɔ̀ kɛ dɔ̀ le è dú Eli, kɩ bobrebe ndɔ hɔ̀n kɛ dɔ̀ le, ɛnbiɛnhɛ́n Ɔwɔ-muannwú-ankà-dɔ́-bɔ̀ lɔ, ɔtɔ̀n de vru vá ɔkɔrɛ-bɔ̀ mɛ̀n nɔn.” 20Zhezu vru ke yrɛ yɔ: “Kɛ̂, nyɛ tɛ́n, antɔn de nye bú mɛ̀n nyɛ hán nɛ́n?” Piɛrɛ̀n mrɛ̀n ɔmùan kɛ dɔ̀ le: “È dú Ebɩ̀die-wrɔn.”
Zhezü kɛ dɔ́ n'owù mán n'owúemɛ̀n-dù-frɔ́ ankà
(Nyɛ́n nyan Matie 16:20-28; mán Markɛ̀n 8:31-38 wrú lɔ mɛ̀n)
21Zhezü wá tán yɔ ɛshishiemɛ̀n le, ye bɩ́ dɔ́ ɔwrɔnẅì zriɛmɛ́n ankà lɔ, 22Kɩ nɛ dɔ̀ le: “Ke ji le ɔwrɔnẅì Ẅì kɛ̀ kán ɛgbàn bobrebe; ɛcüìcüì-bɔ̀, Ɔwɔ-cice-bɔ̀ cüìcüì mán ɛnyanmàn-gbànvri-ankà-yé-bɔ̀, kɛ lɛ wrɔ́ nɛ̀n ze; yɔ le wri nɛ̀n kɩ ɛbi-anhɔ́nmɛ̀n bì lɔ, ne le dú owúemɛ̀n nɛ̀n frɔ́.”
23Zɛtɛn nɛ dɔ́ yɔ lɔ fɛn le: “Ke dú kɛ ɔwrɔn ke ji kɛ̀ và cɔ́ mɛ̀n hô, ke ji le, nɛ́n bɩ́ vru tro nɛ́n dùku n'edomɛ̀n ankà, ke ji le nɛ̀n shri n'ɛgbàn-kàn nɛ̀n bɩ ɛnbì lɔ fɛn, ô nɛ̀n kɛ́n mɛ̀n ɛsɛ̀n. 24Ɔmuhi, ɔwrɔn léyi ke ji kè bɩ́ n'ɛwúvà lɔ kè die nɔn, kɛ lɛ zrɛ́n nɛ̀n, tɛ́n, ɔwrɔn léyi ke le wú m'ɛkruhú nɔn, kɛ lɛ cɔ́ n'ɛwúvà lɔ. 25Vɔnshɛ́ tán de dú tán, ɔwrɔn léyi ke ji kɛ ẅɛn ɛnhi mumù lɔ fɛn, ke dú kɛ nɛ zrɛ́n n'ɛnhɛ́n lɔ nɛ́n? 26Ke dú kɛ ɔwrɔn tɔ̀n anvɛvrà kɛ ẅɛn, m'ɛkruhú mán m'ankà-dɔ́ kruhú, zɛtɛn, ɔwrɔnẅì Ẅì mán anvɛvrà kɛ lɛ ẅɛn n'ɛkruhú, ɛnvra léyi nɛ lɛ vá n'eci-zrɔ, nɛ́n zi ci-zrɔ, mán Ɔwɔ-kùyüre-bɔ̀ Prɔnprɔn hɔ̀n ci-zrɔ lɔ mɛ̀n nɔn. 27Mɛ dɔ́ nyɛ̀n ankàẅì annànwɔrɛ mɛ̀n le: anwrɔn hɔ̀n léyi dú ɛnu lɔ nɔn, ɛnjanbɔ̀ ke sɩ̀ wù, ke dú kɛ yɔ sɩ̀ kàn Anhobɩ́ Nɛ̀ncüì-dúyri lɔ.”
Zhezü crɔn n'edomɛ̀n
(Nyɛ́n nyan Matie 17:1-8; mán Markɛ̀n 9:2-8 wrú lɔ mɛ̀n)
28 Ɛnbifɔ́n-kru zri vacì, ɛnvra léyi Zhezü dɔ́ n'owù mán n'owuemɛ̀n-dù-frɔ́ ankà nɔn, nɛ̀n bɩ́ Piɛrɛ̀n, Zhan mán Zhakɛ̀n kɩ yɔ hɔ́n ɔkpò tɔ̀n wú Ɔwɔ-sɛ́n-yri. 29Ɛnvra léyi Zhezü dú Ɔwɔ-sɛ́n mɛ̀n nɔn, n'ezì lɔ crɔn, kɩ n'ɛceci hɔ̀n lɔ srɔ ɔwosú, kɛ gbrɛ́n. 30Kpatakpata lɔ nanvrɛn lɔ anwrɔn anhyrɛ̀ srɔ kɩ cɔ́ Zhezü mɛhi yɔ dɔ́ ankà: Mohizì mán Eli, 31de srɔ anhobɩ́ ci-zrɔ wanzi. Zhezü mɛhi yɔ dɔ́ n'ɔkɔhɔ̀n mù-sá ankà, ɛnvra léyi ne le wú Zherüzalɛmɛ̀n anmàn nɔn. 32Piɛrɛ̀n mán nɛ́n nyran hɔ̀n mɛhi ndà vri tɔ̀n nwrì, tɛ́n yɔ gbɛ́ ɛvɛ̀, yɔ kán Zhezü ci-zrɔ mán anwrɔn anhyrɛ̀ léyi nyɔn nɛ̀n ɛtɛsɛ̀n nɔn. 33Ɛnvra léyi anwrɔn ndɔ hɔ̀n lɔ cɔhɔ́ Zhezü ɛtɛsɛ̀n nɔn, Piɛrɛ̀n kɛ dɔ́ nɛ̀n le: “Ankà-yé-wrɔn, zrɔ tán ɔmu le, bɔ́ dú ɛnu lɔ. Bɔ́ le ku ɛcasa-wɔn anhɔ̀n, vɛ tɛn ɔtɔ̀n, Mohizì tɛn ɔtɔ̀n mán Eli tɛn ɔtɔ̀n.” (Nɛ́n sɩ́ nyri ankà léyi nɛ dɔ̀ nɔn.) 34Ɛnvra léyi nɛ̀n dú ankà dɔ́ mɛ̀n nɔn, ɛnwì-gbú tɔ̀n srɔ kɩ murɛn yɔ ɛwú. Zhezü sɛnkɛn-bɔ̀ lɔ ɛnjansù bru, ɛnvra léyi ɛnwì-gbú lɔ murɛn yɔ ɛwú nɔn. 35Ɛnwì-gbú lɔ mɛ̀n, yɔ yá esùva tɔ̀n kɛ dɔ̀ le: “Ɔwrɔn ndɔ lɔ dú m'Ɛnẅì léyi mɛ̀n mrɛ́n mɛ́n bɩ nɔn. Nyɛ́n die nɛ̀n nukùɛ!” 36Ɛnvra léyi ɛsùva lɔ dɔ́ ankà trɔ nɔn, Zhezü zri kɩ yɔ kàn. Zhezü sɛnkɛn-bɔ̀ lɔ kɛ́n ɔmùan hɛ́n, kɩ hɩ vra lɔ, yɔ sì dɔ̀ ɔwrɔn zriɛmɛ́n eci lɛ́yi yɔ kàn nɔn yi ankà.
Zhezü kɔrɛ ɛnẅì-cɛ tɔ̀n léyi ɛnhɛ́n gbangbàn tɔ̀n ke di ejüe nɔn
(Nyɛ́n nyan Matie 17:14-18; mán Markɛ̀n 9:14-27 wrú lɔ mɛ̀n)
37Ɛnbì lɔ kɛ̀n nɔn, yɔ dú ɛnkpɔ̀ wú yɔ kakɛ kɩ fɛcüè vri tɔ̀n vá Zhezü ɛsù. 38Fɛcüè lɔ mɛ̀n, ɔwrɔn tɔ̀n ndù ke di nkù kɛ dɔ̀ le: “Ankà-yé-wrɔn, mɛ sɛ́n mɛ́n, crɛ nyan m'ɛnẅì, m'ɛnẅì zri lɔ!” 39Ɛnhɛ̀n tɔ̀n kɛ ẅɛn ɛnẅì lɔ kɩ kpata kpata lɔ, kɛ hán nɛ̀n ne di nkù, kɛ jɔkɔ nɛ̀n ecüemɛ̀n, kɩ kɛ hán andàfù kɛ sɔ́n nɛ̀n ɔmùan; nɛ hán yi anbɔrɛci, kɩ nɛ́n sɩ́ gɔ teze ɛnẅì lɔ. 40Mɛ̀n sɛ́n v'ɛsɛnkɛn-bɔ̀ kɛ wrɔ́ ɛnhɛ́n ndɔ lɔ, kɩ yɔ sɩ̀ cɔ̀ n'ɛhán-yri. 41Zhezü ke botò, kɩ kɛ dɔ̀ le: “Ô nyɛ́n, anwrɔn gbàngbàn hɔ̀n léyi dú nyɛ̀n hɩ kè sɩ̀ ẅɛ̀n ankàẅì-bùtan nɔn! Ɛnvra ɛ̀bɛ de vru ke ji le, mɛ̀n cɔ́ nyɛ̀n mɛhi bɔ̀ yɛ́ nɛ́n? Ɛnvra ɛ̀bɛ de vru ke ji le mɛ̀n bɔ̀sɔ nyɛ̀n nɛ́n? È sɩ́ v'ɛnẅì lɔ ɛnu.” 42Ɛnvra léyi ɛnẅì lɔ sɔnba Zhezü ɛtɛsɛ̀n nɔn, ɛnhɛ́n lɔ kɔ́n nɛ̀n ze ɛnhibɩ́ kɩ jɔkɔ nɛ̀n ecüemɛ̀n. Tɛ́n Zhezü dɔ́ ɛnhɛ́n gbangbàn lɔ ankà ɛshishiemɛ̀n, kɔrɛ̀ ɛnẅì lɔ, kɩ bɩ́ nɛ̀n tán nɛ́n zi. 43Kɩ, yɔ lɔ fɛn, ye dú anvɛmɛ̀n-frɛ́n mɛ̀n Ɔwɔ kɔrɛ̀srɔn vrisɩ̀ zɩ̀wú.
Zhezü vru kɛ dɔ́ n'owú ankà
(Nyɛ́n nyan Matie 17:22-23; mán Markɛ̀n 9:30-32 wrú lɔ mɛ̀n)
Ɔmuhi ɔwrɔnwrɔn vru dú anvɛmɛ̀n-frɛ́n mɛ̀n, eci léyi Zhezü kɛ hán nɔn kruhú, kɩ nɛ dɔ́ n'ɛsɛnkɛn-bɔ̀ lɔ le: 44“Nyɛ́n wá ɛnkruemɛ̀n, ankà léyi mɛ vá nyɛ̀n ɛ dɔ́ yri zɛtɛ̀ lɔ nɔn: ye le bɩ́ ɔwrɔn-ẅì Ẅì yɔ wá anwrɔnẅì tamɛ̀n.” 45Tɛ́n yɔ sɩ́ yá ankà-dɔ̀ ndɔ lɔ n'ɛmɛ̀n: ankà-dɔ̀ lɔ dú ɛbán mɛ̀n tán yɔ, ô ye bɩ́ cɔ́ n'ɛyá-yri, kɩ ɛnjansù kɛ ẅɛn yɔ, yɔ sɩ́ ji yɔ yrɛ Zhezü ankà-bán-ankà ndɔ lɔ n'ɛmɛ̀n.
Antɔn sevri dú ecüìcüì hɛ̀?
(Nyɛ́n nyan Matie 18:1-5; mán Markɛ̀n 9:33-37 wrú lɔ mɛ̀n)
46Zhezü sɛnkɛn-bɔ̀, ecüìwrɔn dú angranmɛ̀n, ɔmuhi ye ji yɔ nyri ɔwrɔn léyi sevri dú ecüìcüì y'ɛmɛ̀n lɔ nɔn. 47Zhezü nyri y'ankà-tro. Zɛtɛn nɛ̀n bɩ́ ɛnẅì cɛ tɔ̀n, nɛ̀n hɛ́n ɛtɛsɛ̀n, 48kɩ nɛ dɔ́ n'ɛsɛnkɛn-bɔ̀ lɔ le: “Ɔwrɔn léyi ke bɩ́ ɛnẅì cɛ ndɔ lɔ m'ɛkruhú nɔn, mɛ́n mumù de ne bɩ́ mɛ̀n nɔn; kɩ ɔwrɔn léyi ke bɩ́ mɛ̀n nɔn, ɔwrɔn léyi wá mɛ̀n ɔkɔhɔ̀n nɔn de ne bɩ̀ nɔn. Ɔmuhi, ɔwrɔn léyi dú ɛcɛ ny'ɛmɛ̀n lɔ nɔn, nɛ́n de nɛ̀n sevri nɛ̀n dú ecüìcüì nɔn.”
Ɔwrɔn léyi ke sɩ́ gbri nyɛ̀n nɔn, nɛ̀n dú nyɛ tɛn
(Nyɛ́n nyan Markɛ̀n 9:38-40 wrú lɔ mɛ̀n)
49Zhan bɩ́ ankà-dɔ̀ kɩ kɛ dɔ̀ le: “Ankà-yé-wrɔn, bɔ̀ kán ɔwrɔn tɔ̀n kɛ wrɔ́ anhɛ́n gbàngbàn v'ebɩ́ mɛ̀n, kɩ bɔ́ ji bɔ̀ si nɛ̀n eci lɔ n'ɛhán mɛ̀n, ɔmuhi nɛ̀n sɩ̀ dù bɔ́ fɛcüè lɔ mɛ̀n nɔn.” 50Tɛ́n Zhezü mrɛ́n yɔ ɔmùan le: “Nyɛ́n bɩ́ kɛ́n nɛ̀n nyɛ́n hɛ́n hán, ɔmuhi ɔwrɔn léyi ke sɩ́ gbri nyɛ̀n nɔn, nɛ̀n dú nyɛ tɛn.”
Samari anmàn tɔ̀n krɔ ke sɩ̀ bɩ̀ Zhezü
51Ɛnvra léyi ɛnbì kɛ vá ɛcɔ́-yri, ô Zhezü kè dú ɛnu ɛnhi kɛ̀ hɔ́n anhobɩ́ nɔn, nɛ̀n wá kpankpan le, ke ji le nɛ̀n hɔ́n Zherüzalɛmɛ̀n. 52Nɛ̀n wá anwrɔn ɔkɔhɔ̀n hɛ́ nɛ̀n ezì. Ɔkɔhɔ̀n-wá-bɔ̀ lɔ, hɔ́n Samari anmàn tɔ̀n ô kɛ̀ hán n'edúyri. 53Kɩ nanvrɛn anmàn-bɔ̀ lɔ ke sɩ́ ji kɛ ẅɛn Zhezü nɛ̀nnyan-wrɔn, ɔmuhi Zherüzalɛmɛ̀n de nɛ hɔ̀n nɔn. 54Ɛnvra léyi Zhakɛ̀n mán Zhan mɛhi kán eci léyi anmàn-bɔ̀ lɔ hán nɔn, yɔ dɔ́ Zhezü le: “Ɛẅɛnwrɔn e ji le bɔ̀ hán anhobɩ́ hyà kɛ̀ và kɛ̀ biɛ yɔ lɔ fɛn hán?” 55Zhezü crɛ nyan yɔ, kɩ gbá anvɛ̀ wá yɔ. 56Kɩ yɔ hɔ́n anmàn nyantɛn.
Anwrɔn hɔ̀n léyi ke ji kɛ̀ kɛ́n Zhezü ɛsɛ̀n nɔn
(Nyɛ́n nyan Matie 8:19-22 wrú lɔ mɛ̀n)
57Yɔ dú ɛnlevri yɔ hɔ̀n kɩ ɔwrɔn tɔ̀n kɛ dɔ́ Zhezü le: “Mɛ lɛ kɛ́n mɛ́n ɛsɛ̀n ɛyri lɔ fɛn léyi ɛ lɛ hɔ̀n nɔn.” 58Zhezü kɛ dɔ́ nɛ̀n le: “Kpekpe hɔ̀n kɛ dɛ́ ɛnnanmàn mɛ̀n, kɩ annrɛ́n hɔ̀n ẅɛn anwɔn kɛ dɛ́ ɛmɛ̀n; ɔwrɔn-ẅì Ẅì tɛn, kè sɩ̀ ẅɛ̀n ɛyri hɩ ká dɛ́ kɛ̀ wrɔncüe nɔn.” 59Zhezü kɛ dɔ́ ɔwrɔn nyantɛn le: “Kɛ́n mɛ̀n ɛsɛ̀n.” Tɛ́n ɔwrɔn lɔ kɛ dɔ̀ le: “Ankà-yé-wrɔn, tán mɛ̀n ɛkɔrɛ̀-levri, ô mɛ̀n hɔ̀n bɩ́ dade léyi nwù nɔn.” 60Zhezü mrɛ́n nɛ̀n ɔmùan le: “Teze owú-bɔ̀ kè bɩ́ y'ɔwú-bɔ̀, vɛ tɛn ɛ̀ hɔ̀n ɛ̀ dɔ́ anwrɔn Anhobɩ́ Nɛ̀ncüì-dúyri ankà.” 61Ɔwrɔn tɔ̀n vru kɛ dɔ̀ le: “Mɛ lɛ kɛ́n mɛ́n ɛsɛ̀n, ankà-yé-wrɔn, tɛ́n tán mɛ̀n ɛkɔrɛ̀-levri mɛ̀n hɔ̀n mɛ̀n dɔ́ m'ɛmɛ̀n mɛ̀n bɔ̀ m'ɛyri hɔ́n ankà.” 62Zhezü kɛ dɔ́ nɛ̀n le: “Ɔwrɔn léyi kɛ wá ɛnnanmàn ankɛ̀tɛ mɛ̀n, hɩ kɛ crɛ nyan ɛmɛẅí nɔn, nɛ̀n sɩ̀ dù esɛ́-wrɔn Anhobɩ́ nɛ̀ncüì-dúyri.”
ప్రస్తుతం ఎంపిక చేయబడింది:
Lükɛ̀n 9: ƐAA03
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.