Lukas 8
8
Cov Pojniam Uas Nrog Yexus Mus
1Tsis ntev tomqab ntawd Yexus txawm mus txhuanrho hauv tej nroog thiab tej zos, qhia Txoj Moo Zoo uas hais txog Vajtswv lub Tebchaws. Yexus kaum-ob tug thwjtim nrog Nws mus, 2thiab kuj muaj ib co pojniam uas Yexus tau ntiab tej ntsujplig phem tawm thiab kho lawv mob zoo lawm nrog Nws mus thiab. Cov pojniam ntawd yog: Malis (uas hu ua Madalas), uas yav tas los Yexus ntiab xya tus dab tawm lawm; #Math 27:55-56; Malak 15:40-41; Lukas 23:49 3Yau-aanas, uas nws tus txiv yog Khuxas, tus uas saib Helauj lub tsev; thiab Xuxanas nrog rau ob-peb tug pojniam uas lawv siv lawv tej nyiaj thiab qhov txhia chaw los pab Yexus thiab Nws cov thwjtim.
Zaj Lus Pivtxwv Hais Txog Tus Tseb Nplej
(Mathais 13:1-9; Malakaus 4:1-9)
4Pheej muaj neeg tuaj hauv tej nroog tuaj cuag Yexus tsis tuncua li. Thaum cov neeg tuaj uake coob-coob lawm, Yexus txawm hais ib zaj lus pivtxwv hais tias:
5“Muaj ib tug txivneej nqa noob nplej mus tseb. Thaum nws tseb cov noob nplej rau hauv daim teb, muaj qee lub poob rau hauv txojkev, ces txawm raug neeg muab tsuj mus tsuj los, thiab noog txawm los khaws noj lawm. 6Muaj qee lub poob rau ntawm thaj av uas muaj pobzeb ntau, thaum cov noob nplej tuaj kaus ces txawm ciali qhuav lawm vim thaj av tsis noo. 7Muaj qee lub poob rau hauvqab tsob pos; tsob pos ntawd txawm lojhlob nrog tsob nplej thiab ciali tuaj laum tsob nplej tuag lawm. 8Thiab muaj qee lub poob rau ntawm qhov av zoo, cov ntawd lojhlob zoo thiab txhawv taus, ib hnab twg txi tau 100 npaug.”
Yexus xaus lus hais tias, “Yog leejtwg muaj pobntseg, ciali mloog!”
Lub Homphiaj Ntawm Tej Lus Pivtxwv
(Mathais 13:10-17; Malakaus 4:10-12)
9Yexus cov thwjtim nug Nws hais tias zaj lus pivtxwv uas Nws hais ntawd yog txhais licas. 10Yexus teb tias, “Lub tswvyim uas paub txog Vajtswv lub Tebchaws uas tau muab zais cia twb muab qhia rau nej paub lawm, tiamsis dua li lwmtus, Kuv ua lus pivtxwv qhia xwb, kom lawv saib los lawv tsis pom, thiab lawv mloog los lawv tsis totaub. #Yaxaya 6:9 (LXX)
Yexus Txhais Zaj Lus Pivtxwv Hais Txog Tus Tseb Nplej
(Mathais 13:18-23; Malakaus 4:13-20)
11“Zaj lus pivtxwv yog txhais li no: lub noob nplej yog piv txog Vajtswv Txojlus. 12Cov noob nplej uas poob rau hauv txojkev, piv txog cov uas hnov Vajtswv Txojlus, tiamsis dab ntxwgnyoog txawm los rho kiag txojlus ntawd tawm hauv lawv lub siab mus, kom lawv thiaj tsis ntseeg thiab thiajli tsis dim. 13Cov noob nplej uas poob rau ntawm thaj av uas muaj pobzeb ntau tiamsis av tsawg, piv txog cov neeg uas thaum lawv hnov dheev Vajtswv Txojlus, lawv txawm txaussiab hlo txais yuav. Tiamsis txojlus ntawd cog cag tsis tob rau hauv lawv; lawv ntseeg ib nyuag ntu xwb, thaum lawv raug kev simsiab ces lawv ciali thim rovqab lawm. 14Cov noob nplej uas poob rau hauvqab tsob pos, piv txog cov uas hnov Vajtswv Txojlus, tiamsis tej kev nyuajsiab, kev ntshaw nyiaj, thiab kev lomzem hauv lub neej no hlob tuaj laum lawv, thiaj ua rau lawv tej txiv lojhlob tsis taus li. 15Cov noob nplej uas poob rau ntawm qhov av zoo, piv txog cov uas hnov Vajtswv Txojlus es muab khaws nkaus cia rau hauv lub siab uas zoo thiab ncajncees, thiab lawv ua siabntev tiv mus txog hnub uas lawv tawgpaj txitxiv.
Muab Phiab Khwb Lub Teeb
(Malakaus 4:21-25)
16“Tsis muaj leejtwg taws teeb es muab lub phiab khwb rau lossis muab txawb rau hauv qabtxag. Tsuas muaj yuav muab txawb rau saum lub txee txawb teeb xwb, kom thaum neeg tuaj rau hauv tsev, lawv thiaj pomkev. #Math 5:15; Lukas 11:33
17“Tej uas muab zais cia lawm yeej yuav raug muab nthuav tawm, thiab tej uas muab npog cia lawm yeej yuav muaj tus nrhiav tau thiab muab qhib kom sawvdaws paub xwb. #Math 10:26; Lukas 12:2
18“Yogli ntawd, nej yuavtsum ua tibzoo mloog tej uas nej hnov, rauqhov tus uas muaj lawm, tseem yuav muab tsub ntxiv rau nws, tiamsis tus uas tsis muaj dabtsi li, txawm yog yam nyuag me-me uas nws xav tias nws muaj xwb los tseem yuav muab rho ntawm nws mus.” #Math 25:29; Lukas 19:26
Yexus Niam Thiab Yexus Cov Kwv
(Mathais 12:46-50; Malakaus 3:31-35)
19Yexus niam thiab Yexus cov kwv tau tuaj cuag Nws, tiamsis lawv tsis tau kev mus cuag Nws vim muaj neeg coob heev. 20Muaj ib tug los hais rau Yexus hais tias, “Koj niam thiab Koj cov kwv tabtom sawv sabnraud, lawv xav ntsib Koj.”
21Yexus hais rau lawv tias, “Kuv niam thiab Kuv cov kwv yog cov uas hnov Vajtswv Txojlus thiab ua rawsli txojlus ntawd qhia.”
Yexus Txwv Cua
(Mathais 8:23-27; Malakaus 4:35-41)
22Muaj ib hnub Yexus nrog rau Nws cov thwjtim nce mus rau hauv nkoj, thiab Nws hais rau lawv tias, “Peb ciali hla hiavtxwv mus rau sab tim ub.” Ces lawv txawm sawvkev mus. 23Thaum lawv tabtom nquam nkoj mus, Yexus txawm pw tsaugzog lawm. Tamsim ntawd txawm muaj cuadaj cuadub hlob heev ntsawj dej ntas los rau hauv lub nkoj yuav puv, ua rau lawv txhua tus ntshai kawg li. 24Cov thwjtim thiaj mus tsa Yexus thiab hais tias, “Xibhwb, Xibhwb, peb twb yuav puastsuaj tamsim no!”
Yexus sawvtsees los txwv cua thiab cov dej uas nphau tej niag nthwv ntawd; ces cua txawm tu thiab dej nyob tusyees lawm, ua rau nyob ntsiagto lawm xwb. 25Yexus hais rau cov thwjtim tias, “Nej txoj kev ntseeg dua twg lawm?”
Cov thwjtim xav tsis thoob thiab ntshai kawg li, lawv sibtham hais tias, “Tus no yog leejtwg es ho txwv tau cua thiab dej, ua rau cua thiab dej ciali kam mloog Nws lus?”
Yexus Kho Tus Txivneej Raug Dab
(Mathais 8:28-34; Malakaus 5:1-20)
26Yexus thiab Nws cov thwjtim tau caij nkoj mus txog ntawm cheebtsam Nkelaxas#8:26: Nkelaxas; tej phau ntawv qub uas xuas tes sau, muaj Nkadalas (saib Math 8:28); thiab lwm phau hais tias Nkawnkexas. uas nyob sab Hiavtxwv Kalilais tim ub. 27Thaum Yexus tawm kiag los rau tim ntug xwb, Nws txawm ntsib ib tug txivneej raug dab uas nyob hauv lub nroog ntawd. Tus txivneej ntawd yeej tsis hnav ristsho thiab tsis nyob hauv tsev los ntev lawm, nws nyob tom tej roob tojntxas xwb. 28Thaum nws pom Yexus, nws quaj nrov-nrov, txhoscaug ntua ntawm Yexus xubntiag, thiab qw hais tias, “Yexus uas yog Vajtswv tus muaj Hwjchim Tshajplaws tus Tub! Koj tuaj thab kuv ua dabtsi? Kuv thov Koj tsis txhob tsimtxom kuv!” 29Nws hais li ntawd, vim Yexus twb hais kom tus ntsujplig phem ciali tawm ntawm nws mus lawm. Dab twb los tswj nws ntau zaug lawm, txawm yuav muab saw hlau khi nws tes nws taw thiab tso neeg zov, los nws yeej muab tej saw hlau ntawd ntiag tu tas huv tibsi, thiab dab yuam nws mus rau tom tej roob mojsab qhua.
30Yexus nug nws hais tias, “Koj lub npe hu licas?”
Nws teb tias, “Kuv lub npe hu ua ‘Coob’.” Rauqhov muaj ntau tus dab tau nkag mus nyob rau hauv nws lawm. 31Cov dab ntawd thov Yexus kom Nws tsis txhob ntiab lawv mus rau hauv lub qhov tob-tob.#8:31: lub qhov tob-tob: Luag ntseeg tias cov dab ntawd yuavtsum raug txim nyob hauv lub qhov uas tob tshajplaws hauv nruab tivtxwv mus txog hnub uas txiavtxim thaum kawg.
32Nyob ze ntawd muaj ib pab npua coob-coob tabtom nrhiav noj raws ib nta toj. Cov dab ntawd txawm thov Yexus kom cia lawv nkag mus nyob rau hauv pab npua ntawd, ces Yexus txawm tso ncauj rau lawv. 33Cov dab txawm tawm hauv tus txivneej ntawd mus nkag rau hauv pab npua. Tagnrho pab npua ntawd txawm dhia ntawm lub tsag tsua mus poob rau hauv hiavtxwv thiab tuag tas huv tibsi.
34Thaum cov neeg zov npua pom li ntawd, lawv txawm khiav rovqab mus qhia tej ntawd rau cov neeg uas nyob hauv nroog thiab nraum tej zos uas nyob ibncig lub nroog ntawd mloog. 35Ces sawvdaws txawm tawm tuaj mus saib tej xwmtxheej uas muaj ntawd; thaum lawv tuaj txog ntawm Yexus, lawv pom tus txivneej uas nws cov dab tawm tas lawm, nws twb hnav ristsho thiab feeb meej lawm, nws nyob ze ntawm Yexus kotaw; mas lawv ntshai kawg li. 36Cov uas tau pom tej xwmtxheej ntawd txawm qhia rau sawvdaws paub tias yog licas tus raug dab ntawd thiaj zoo lawm. 37Ces tagnrho cov neeg uas nyob hauv cheebtsam Nkelaxas txawm thov kom Yexus ciali mus rau lwmqhov, rauqhov lawv ntshai heev. Yogli ntawd, Yexus thiaj nce rau hauv nkoj thiab rovqab mus lawm. 38Tus txivneej uas cov dab tawm lawm txawm thov Yexus hais tias, “Thov cia kuv nrog Koj mus thiab.”
Tiamsis Yexus kom nws rovqab mus thiab hais rau nws tias, 39“Koj ciali rovqab mus rau koj vaj koj tsev thiab mus qhia tej uas Vajtswv twb pab koj lawm rau sawvdaws mloog.”
Yogli ntawd, nws thiaj mus thoobplaws lub nroog thiab qhia tej uas Yexus tau pab nws lawm rau sawvdaws mloog.
Yailaus Tus Ntxhais Thiab Tus Pojniam Uas Kov Yexus Tw Tsho
(Mathais 9:18-26; Malakaus 5:21-43)
40Thaum Yexus rov los txog rau sab ntug hiavtxwv tim no, muaj neeg coob-coob tuaj tostxais Nws, rauqhov lawv sawvdaws twb tos-tos Nws kawg li lawm. 41Thaum ntawd muaj ib tug txivneej hu ua Yailaus txawm tuaj txog, nws yog tus saib haujlwm hauv lub tsev sablaj. Nws txhoscaug ntua ntawm Yexus kotaw thiab thov kom Yexus mus rau tom nws lub tsev, 42rauqhov nws tibtug ntxhais uas muaj hnubnyoog kaum-ob xyoos tau mob thiab tabtom yuav tusiav.
Thaum Yexus taug kev mus ntawd, muaj neeg coob-coob kuj nrog Yexus mus ua rau sib txiv qev. 43Muaj ib tug pojniam uas txomnyem kawg li vim nws nchuav cev tau kaum-ob lub xyoos; txawm yog nws twb siv tagnrho nws tej nyiajtxiag mus ntiav kws-khomob#8:43: Tej phau ntawv qub uas xuas tes sau tsis muaj nws twb siv tagnrho nws tej nyiajtxiag mus ntiav kws-khomob. kho los yeej tsis muaj leejtwg kho tau kom nws zooli. 44Nws txawm peem ntiag ntawm cov neeg coob-coob mus rau tom Yexus nrobqaum thiab kov Yexus lub tw tsho, ces tamsim ntawd ntshav txawm tunrho lawm. 45Yexus nug hais tias, “Leejtwg kov Kuv?”
Tsis muaj leejtwg lees li. Petus thiaj hais tias, “Xibhwb, yeej yog cov neeg coob-coob uas nyob puagncig Koj thiab tabtom txiv Koj no xwb.”
46Tiamsis Yexus hais tias, “Muaj ib tug kov Kuv, rauqhov Kuv paub tias hwjchim twb tawm ntawm Kuv mus lawm.” 47Tus pojniam ntawd paub tias Yexus twb paub lawm, nws thiaj los txhoscaug ntua ntawm Yexus kotaw ua ibce tsheehnyo. Nws txawm qhia rau Yexus tabmeeg sawvdaws hais tias vim licas nws thiaj kov Yexus lub tw tsho thiab vim licas tamsim ntawd nws tus mob thiaj zoo kiag lawm. 48Yexus hais rau nws tias, “Mentxhais 'e, koj txoj kev ntseeg twb kho koj zoo lawm. Koj ciali mus kajsiab lug.”
49Thaum Yexus tseem tabtom hais li ntawd, muaj ib tug tuaj tom Yailaus tsev tuaj hais rau Yailaus hais tias, “Koj tus ntxhais twb tuag lawm; tsis tas yuav tabkaum Xibhwb ntxiv lawm.”
50Thaum Yexus hnov li ntawd, Nws hais rau Yailaus tias, “Koj tsis txhob ntshai; ciali ntseeg xwb, koj tus ntxhais yeej yuav ciaj.”
51Thaum Yexus mus txog tom Yailaus tsev lawm, Nws tsis pub leejtwg nrog Nws mus, Nws tsuas pub Petus, Yauhas thiab Yakaunpaus, thiab tus ntxhais ntawd leejniam thiab leejtxiv xwb. 52Cov neeg ntawd sawvdaws quaj-nyiav tus ntxhais ntsoogqees. Yexus hais rau lawv tias, “Nej tsis txhob quaj; tus mentxhais no twb tsis tau tuag, nws tsuas yog tsaugzog xwb!”
53Cov neeg ntawd luag Yexus zomzaws, rauqhov lawv yeej paub tias tus ntxhais ntawd twb tuag lawm tiag. 54Tiamsis Yexus mus tuav nkaus tus ntxhais ntawd txhais tes thiab hais tias, “Mentxhais 'e, ciali sawv!” 55Tus ntxhais ntawd txawm rov muaj sia tuaj thiab sawvtsees tamsim ntawd. Yexus thiaj hais kom lawv muab zaub-mov los rau tus mentxhais noj. 56Tus ntxhais ntawd niam thiab txiv xav tsis thoob li, tiamsis Yexus xaaj tsis pub nkawd qhia tej no rau leejtwg.
ప్రస్తుతం ఎంపిక చేయబడింది:
Lukas 8: MWW2022
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2022 United Bible Societies. All rights reserved.