Matiyu 7
7
Kǝla ambo shara njǝddoyen
(Luk 6.37-42)
1«Bare wundumaro shara yidduwwi,#7.1 bare wundumaro shara yidduwwi - Bare kǝlandoa sharawu am gadeyero ngonuwwi. nayi yero shara njaddiwawo. 2Jiɍi ambo shara yidduwidǝ gai, nayi yero shara njaddi. Koro jiɍi ambo ngalgǝwidǝ gai, nayi yero ngalnjagai.
3«Awiro kalǝm sim kamanǝmben rumi duwon, karjǝm curo simmǝmben asunǝmbawodǝ? 4Akko ni simmǝmlan karjǝmbadǝ, awiawin gǝle kamanǝmbo: “Kolle kalǝm simmǝmbedǝa tuluwukke,” nǝmi? 5Mǝnafǝk, karjǝm simmǝmbedǝa tuluwumiya duwon, daji ngǝlaro rume kalǝm sim kamanǝmbedǝa tuluwumi.
6«Bare awo tayirdǝa kǝriyaro yiwwi, koro bare awondo darajaa fuwu aladeyayen kolluwwi. Kolluwiya, tayia guguwaccai, kǝriya ye suwordane nayia njanjannjai.
Kǝla koro-a madu-a cinna bakta-ayen
(Luk 11.9-13)
7«Korowo njadi, manowo fanduwi, cinna bangowo kanjagai. 8Wundu duwon cuworimadǝro cadi, kam majimadǝ ye cuwandi, koro kam cinna bakcimadǝ yero kajagai.
9«Wundundo tadanju tia burodiro cuworiya, dongur kauye cidǝ? 10Bi buniro cuworiya, kadi cidǝ? 11Nayi diwiso awowa ngǝla tadawandoro njo nonuwwaa, balle Bawando Mai Samema awowa ngǝla am tia caworiro cidǝ! 12Adǝ nangaro awo duwon amso nayiro njaddiya raawwadǝa nayi ye tayiro yiddowo! Adǝma maana Attaura-a kitawuwa nawiyaye-aye wo.
Kǝla ngaworam jǝkkadǝyen
(Luk 13.24)
13«Ngaworam jǝkkadǝyen ngawowo, dalilnjudǝ ngaworam farak, jawalnju ye kǝskedǝ, tima ngaworam kannuyedǝ wo, koro am tiyen ngasayidǝ kada. 14Amma ngaworam jǝkka, jawalnju ye jaudǝ, tima ngaworam ro sawisoyero cadimadǝ wo, koro am tia cawandidǝ ganama.
Kǝla kǝska-a tadanju-ayen
(Mat 12.33-37; Luk 6.43-45)
15«Nawiya kattuwuyero hangal gǝnanowo! Tayidǝ nandoro isaiya, alamanja dimi gai, amma karwunja jauro diwi bulduye gai.#7.15 alamanja dimi gai, karwunja buldu gai - Curo dǝla, ngawo kani. 16Tada casakkidǝlan tayia asunuwi. Inab coccoɍilan njakcai wa? Koro tarmu kolollan cadori wa? 17Kǝska ngǝla nguson tada ngǝla cakki, koro kǝska diwi ye tada diwi cakki. 18Kǝska ngǝladǝ rakce tada diwi cakkiwawo, koro kǝska diwidǝ ye rakce tada ngǝla cakkiwawo. 19Kǝska fi duwon tada ngǝla cakkiwawodǝa caljane kannuro fijagai. 20Adǝ nangaro tadanjalan tayia asunuwi.
Kǝla fuwura jireyen
(Luk 13.25-27)
21«Am wuro: “Kǝma! Kǝma!” cani samma gǝni nodo bargaa Mai Samemayero ngasayi, sai kam awo Bawani Mai Samema cǝraanaa cǝdimadǝ. 22Yim adǝn#7.22 yim adǝn - Kiyama. am ngǝwu wuro: “Kǝma, Kǝma, cunǝmlan nawinawi kidiye, cunǝmlan sedanso duyeiye, koro cunǝmlan awo ajabba kada ye kidiye, gǝna?” cani. 23Daji wuye tayiro: “Ngaltema nayia nonjakkǝni. Nayi diwi diomaso, wun kuruwunno lenowo!” nǝkki.
Misal fado tandowu yindiye
(Luk 6.46-49)
24«Adǝ nangaro wundu duwon manani ania fanje jǝganamadǝ, ti alama kam hangalla soronju kǝla kauyen cǝdandǝnadǝ gai. 25Ingi sameye cudure bǝrǝm fala tarje, karuwa ye cije sorodǝa babakkenniya, sorodǝ wurdǝnni, dalilnjudǝ fǝrdunju kǝla kauyen tǝdandǝna nangaro. 26Amma wundu duwon manani ania fanjǝna jǝgannimadǝ, ti alama kam hangal bawoa soronju kǝla cidi kesayen cǝdandǝnadǝ gai. 27Ingi sameye cudure bǝrǝm fala tarje, karuwa ye cije sorodǝa babakkenniya, wurde tǝgǝmbo fiyada,» yeno Isaye.
28Isa mana ania cǝde kerǝnniya, jama captanadǝ alamdunjudǝa ajapkera, 29dalilnjudǝ malǝmbanja Attauraye gai gǝni, kǝnduwoaro tayia alamji nangaro.
ప్రస్తుతం ఎంపిక చేయబడింది:
Matiyu 7: KBY
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2024, Wycliffe Bible Translators, Inc. and SIM International. All rights reserved.