Mateo 4
4
Ang Pagtintar kay Hesus
Marcos 1:12-13; Lucas 4:1-13
1Pagkatapos adto, gingtuytuyan si Hesus ng Espiritu Santo sa tiway nga lugar para tintaron ng diyablo.#Hebreo 2:18, 4:15 2Sa suyod ng 40 ka adlaw kag gab-i nagpuasa si Hesus, nganì ginggutom gid siya. 3Nagpalapit sa iya si Satanas kag naghambay, “Kung ikaw ang Ungà ng Dios, himua ining mga bato nga maging tinapay.” 4Pero nagsabat si Hesus, “Ginahambay ng Kasulatan, ‘Bukon lang sa pagkaon nabubuhì ang tawo, kundì sa kada hambay ng Dios.’ ”#Deuteronomio 8:3
5Pagkatapos gingdaya si Hesus ng diyablo sa balaan nga syudad,#4:5 Ini hay ang syudad ng Jerusalem. kag gingpatindog siya sa pinakamataas nga parte ng templo. 6Kag hambay niya, “Kung ikaw ang Ungà ng Dios, maglumpat ka. Kay ginahambay ng Kasulatan, ‘Susuguon ng Dios ang iya mga anghel nga magbantay sa imo kag hahawiran ka ninda ng inda mga kamot, para indì mabunggò ang imo siki sa bato.’ ”#Salmo 91:11-12
7Pero naghambay si Hesus, “Nagahambay da ang Kasulatan, ‘Ayaw pagtintara ang Ginoo nga imo Dios.’ ”#Deuteronomio 6:16
8Pagkatapos gingdaya siya ng diyablo sa mataas gid nga bukid kag gingpakità sa iya ang tanan nga gingharian ng kalibutan kag ang inda manggad. 9Naghambay si Satanas sa iya, “Ini tanan itatao ko sa imo, kung maghapà ka kag magsamba sa akon.” 10Tapos naghambay si Hesus, “Lumayas ka, Satanas! Kay ginahambay ng Kasulatan, ‘Sambahon mo ang Ginoo nga imo Dios kag siya lang gid ang imo serbisyuhan.’ ”#Deuteronomio 6:13
11Pagkatapos adto, gingbayaan siya ng diyablo. Kag nag-abot ang mga anghel kag gingserbisyuhan siya.
Ang Pagtunà ng Pagwali ni Hesus
Marcos 1:14-15; Lucas 4:14-15
12Niyan, nang mabatian ni Hesus nga napriso si Juan nga Miyugbawtismo, nagbalik siya sa Galilea. 13Pero wayà na siya nagaistar sa Nazaret kundì didto na sa banwa ng Capernaum*. Ini nga banwa hay sa alihid ng Lawà ng Galilea* nga sakop ng lugar ng mga tribo ni Zebulun kag ni Naftali. 14Natabò ini para matuman ang gingpropesiya ni Propeta Isaias:
15“Ang mga dutà nga panublion ng mga tribo ni Zebulun kag ni Naftali,
hay malapit sa dagat kag yadto sa kabuak ng Subà ng Jordan.
Ini nga mga lugar hay sakop ng Galilea kag ginaistaran ng mga bukon Judio*.
16Pero aber ang mga tawo sa ini nga mga lugar hay yarà sa maduyom,
makakakità na sinda ng kahayag.
Kag ang yarà sa maduyom nga nahahadlok sa kamatayon,
mahahayagan na sinda.”#Isaias 9:1-2
17Nang yadto nagaistar si Hesus sa Galilea, nagtunà na siya magwali. Hambay niya, “Talikuri nindo ang indo mga kasal-anan, kay malapit na ang paghaharì ng Dios.”#Mateo 3:2
Ang Pagtawag ni Hesus sa Upat nga Miyugpangisdà
Marcos 1:16-20; Lucas 5:1-11
18Nang nagapanaw si Hesus sa alihid ng Lawà ng Galilea, nakità niya didto ang duha ka magmanghod nga sina Simon kag Andres nga nagataktak ng pukot kay sinda hay miyugpangisdà. Si Simon hay ginatawag da nga Pedro. 19Naghambay si Hesus sa inda, “Nunot kamo sa akon kay tudluan ta kamo sa pagpangisdà ng mga tawo#4:19 Pagpangisdà ng mga tawo: Ang gusto nga hambayon ni Hesus hay day-on ang mga tawo para magsunod sinda sa Dios..” 20Adto nga daan gingbayaan ninda ang inda mga pukot kag nagnunot sa iya.
21Mintras nagapadayon pa si Hesus sa pagpanaw, nakità niya ang duha ka magmanghod nga sina Santiago* kag Juan nga mga ungà ni Zebedee. Sinda hay yadto sa dyapang* nga nagahukot ng inda mga pukot kaibahan ng inda tatay. Ging-agda sinda ni Hesus, 22kag adto nga daan gingbayaan ninda ang dyapang kag ang inda tatay kag nagnunot sinda sa iya.
Ang Pagpanudlò kag Pagpang-ayo ni Hesus
Lucas 6:17-19
23Niyan naglibot si Hesus sa bilog nga Galilea para magtudlò sa inda mga sinagoga*, magwali ng Maayong Balità* parti sa paghaharì ng Dios kag magpang-ayo ng tanan nga klasi ng sakit sa mga tawo. 24Naging bantog siya sa bilog nga Syria, nganì gingdaya sa iya ng mga tawo ang tanan nga may sarisarì nga sakit, ang mga ginasapian ng demonyo, ang mga may epilepsi kag ang mga paralisado. Gingpang-ayo sinda tanan ni Hesus. 25Nganì nagsunod kay Hesus ang kadamò nga tawo halin sa Galilea, Decapolis#4:25 Decapolis: Ang gusto hambayon hay napuyò nga banwa., Jerusalem, Judea kag sa mga lugar sa kabuak ng Subà ng Jordan.
ప్రస్తుతం ఎంపిక చేయబడింది:
Mateo 4: BKR
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2018, Wycliffe Bible Translators, Inc. All rights reserved.