SAN JUAN 17
17
Jesús mañapun yachachisqasnimpaj
1Jesús kay tukuy imata parlarqa, janaj pachata qhawarispataj, nerqa: Tatáy, hora chayamunña; Churiykita jatunchay, qantapis Churiyki jatunchasunampaj. 2Churiykiman atiyta qorqanki, tukuy runasta kamachinampaj; wiñay kausaytataj paykunaman qonampaj, pikunatachus payman qorqanki, chaykunaman. 3Kaymin chay wiñay kausayqa: Qan k'ata cheqa Diosta rejsisunanku, kachamusqayki Jesucristotapis.
4Noqa kay pachapi alabarqayki, tukuchaniñataj ruwanasta qowasqaykitaqa. 5Kunantaj Tatáy, qayllaykipi jatunchaway, jaqay janaj pacha k'anchaywan, mayqenchus tiyapuwarqa qanwan kashajtiy, manaraj mundo ruwakushajtin.
6Sutiykita rejsicherqani mundomanta qowasqayki runasman. Qampata karqanku, qopuwarqankitaj, paykunataj palabraykita waqaycharqanku. 7Kunanqa yachankuña, tukuy ima qowasqaykeqa qanmanta kasqanta. 8Chay palabrasta qowasqaykitaqa paykunaman qorqani, paykunataj jap'ikorqanku. Qanmanta jamusqantapis cheqamanta yachanku, creenkutaj qan kachamuwasqaykita.
9Noqa paykunarayku mañakuni; mana mundoraykuchu, astawanqa, qan qowarqanki chaykunarayku. Paykunaqa qampata kanku. 10Tukuy noqajta kajtaj qampata. Qampata kajtaj noqajta. Paykunanejtataj jatunchasqa kani.
11Noqa manaña mundopichu kasaj. Paykunataj mundopi qhepakonqanku, noqataj qanman jampusaj. Sumaj Tatáy, noqapi creejkunata sutiykipi waqaychay, paykuna uj sonqolla kanankupaj, qanwan noqawan ujlla kanchej, ajinata. 12Kay mundopi paykunawan kashaspaqa, sutiykipi paykunata waqaycharqani; pikunatachus qowarqanki chaykunata. Manataj mayqempis chinkarqachu, chinkanampaj churasqalla chinkarqa, Escritura junt'akunampaj.
13Kunanqa qanman jamushani; mundopi kashaspa kay imasta parlani, paykuna kusiywan junt'asqas kanankupaj. 14Palabraykita paykunaman willarqani; mundotaj paykunata chejnerqa, imaraykuchus paykuna mana mundojtachu kanku, noqapis manallataj mundojtachu kani. 15Mana mañakunichu paykunata mundomanta pusakapunaykita, astawanqa mañakuni paykunata sajramanta waqaychanaykita. 16Paykuna mana mundojtachu kanku, noqapis manallataj mundojtachu kani. 17Paykunata llimphuchay cheqa kajpi; palabraykeqa cheqapuni. 18Imaynatachus qan mundoman kachamuwarqanki, ajinallatataj paykunata mundoman kacharqani. 19Paykunarayku noqa kikiyta qanman entregakuyki, paykunapis cheqa kajpi qanman entregakusunankupaj.
20-21Mana paykunallapajchu mañakuni, astawanqa paykunaj palabranrayku, noqapi creenqanku chaykunapajpis. Mañakuyki tukuyninku ujlla kanankupaj; imaynatachus, Tatáy, qan noqapi kashanki, noqataj qampi, ajinata paykunapis noqanchejwan ujlla kanankupaj; chay jinamanta kay mundo qan kachamuwasqaykita creenampaj. 22Allin k'anchayta qowasqaykita paykunaman qopuni, ujlla kanankupaj noqanchej jina. 23Noqa paykunapi kashani, qantaj noqapi; paykuna uj yuyayllawan allin junt'asqas kanankupaj; mundo yachanampaj qan kachamuwasqaykita, paykunatataj munakusqaykita, imaynatachus noqatapis munakuwanki ajinata.
24Tatáy, munani qowasqayki yachachisqasqa, maypichus noqa kashani, chaypi noqawan kanankuta. Janaj pacha k'anchayta qowasqaykitapis rikunankupaj. Kay mundo manaraj ruwasqa kashajtin, munakuwarqankiña. 25Cheqan kaj Tatáy, mundoqa mana rejsisorqachu, noqataj rejsiyki, paykunataj yachankuña qan kachamuwasqaykita. 26Paykunaman sutiykita rejsicherqani, astawanraj rejsichisajpis, ima munakuywanchus munakuwarqanki, chay munakuy sonqonkupi kanampaj, noqataj paykunapi.
ప్రస్తుతం ఎంపిక చేయబడింది:
SAN JUAN 17: QCHSB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Qheshwa Biblia DC © Sociedades Bíblicas Unidas, 1986.