Juan 6
6
Jesusqa ashkha runaman mikhuchin
(Mt 14.13-21; Mc 6.30-44; Lc 9.10-17)
1Chay qhepata Jesús Galilea qochaj chimpanman rerqa. Chay qochaj ujnin sutin Tiberias karqa. 2Ashkha runataj Jesuspa qhepanta rerqanku, imaraykuchus rikorqanku pay runaj mana jayk'aj rikusqan t'ukunata ruwaspa onqosqakunata qhaliyachisqanta. 3Chantá Jesús uj moqoman wicharispa, yachachisqankunawan khuska chaypi tiyarikorqa. 4Chaypacha judiokunaj Pascua rayminkuman qayllallaña kasharqa. 5Jesustaj qhawarispa, ashkha runata payman jamushajta rikorqa. Jinapi Felipeta nerqa: Kay chhika runapaj, maymantataj t'antata rantimusunchejri? nispa.
6Chayta Jesús nerqa Felipe imatachus yuyashasqanta yachananpaj, imaraykuchus Jesús imatachus ruwananta yacharqaña. 7Felipetaj Jesusman kuticherqa: Sichus pusaj killa qolqe ganasqanchejwan t'antata rantisunman chaypis, manachá sapa ujman uj chhikallantapis qoyta atisunmanchu ari, nispa.
8Chantá Jesuspa yachachisqankunamanta ujnin, Simón Pedroj wawqen Andrés nerqa: 9Uj ch'iti kaypi kashan, paytaj phishqa cebada t'antata, iskay challwa kankatawan jap'ishan. Chaywanpis, imataj chay kanman kay chhika runaman qonapajri? nispa.
10Jesustajrí nerqa: Runakunata tiyarachiychej, nispa. Chaynejqa sumaj q'omer pampa karqa. Chaypi tiyarakojkunamantataj qharikunalla 5.000 jina karqanku. 11Jesustaj chay t'antata jap'ispa, Tata Diosta pachis nerqa. Chantá, yachachisqankunaman t'antata jaywarqa, paykunataj runakunaman jaywarqanku, jinallatataj challwatapis, sapa runa mashkhatachus munasqanman jina. 12Runakuna mikhuspa sajsakojtinkutaj, Jesús yachachisqankunata nerqa: Puchojta oqhariychej, ama usunanpaj, nispa.
13Jesuspa yachachisqankuna chay phishqa cebada t'antamanta puchojta oqharispa, chunka iskayniyoj canastaman junt'acherqanku. 14Mikhojkunatajrí, Jesús runaj mana jayk'aj rikusqan t'ukuna ruwasqanta rikuspa, nerqanku: Cheqapuni kay runaqa Diosmanta sut'inchaj, pichus kay pachaman jamunan karqa, chay, nispa.
15Jesusrí chay runakuna munajta mana munajta kuraj kamachejninkuta jina churayta munashasqankuta reparaspa, watej orqoman kutirerqa sapallan kananpaj.
Jesús yaku patata purin
(Mt 14.22-27; Mc 6.45-52)
16Ch'isiyaykushajtinña Jesuspa yachachisqankuna qocha kantuman urayk'orqanku. 17Uj boteman yaykuspataj, Cafarnaún llajtaman qochanejta chimpasharqanku, imaraykuchus ñapis laqhaña karqa. Jesustajrí manaraj orqomanta kutimusqarajchu. 18Jinapi sinch'ita wayrasqanrayku, qochaqa qhollchoqeyayta qallarerqa. 19Yachachisqankunataj uj legua kurajta jina botepi risqankumantaña, Jesusta yaku patata boteman qayllaykamushajta rikorqanku, mancharikorqankutaj. 20Jesustajrí paykunata nimorqa: Noqa kani, ama mancharikuychejchu, nispa.
21Chantá paykuna Jesús boteman wicharinanta munarqanku, wicharejtintaj, botepi usqhayllata maymanchus risharqanku, chayman chayarqanku.
Runakuna Jesusta mask'anku
22Q'ayantin, qochaj chimpanpi qhepakojkuna repararqanku Jesuspa yachachisqankunalla risqankuta, uj k'ata bote kasharqa, chaypi, Jesustajrí mana paykunawanchu risqanta. 23Chaykamataj, Tiberias llajtamanta waj botekuna chayamorqanku, maypichus Jesús t'antamanta Diosta pachis nisqa, runakunataj chayta mikhusqanku, chaynejman. 24Ajinaqa Jesús, chantá yachachisqankuna ima manaña chaypi kashasqankuta yachaspa, runakuna chay botekunaman yaykorqanku. Chantá Cafarnaunman Jesusta mask'aj rerqanku.
Jesús t'anta jina kasqanta nin
25Chay runakunaqa qocha chimpaman chayaspa, Jesusta tariytawan, nerqanku: Yachachej Wiraqochi, jayk'ajtaj kayman jamorqankiri? nispa.
26Jesustaj kuticherqa: Kayta sut'ita niykichej: Mask'ashawankichej, mana qankuna runaj ni jayk'aj rikusqan t'ukunata ruwasqay ima niytachus munasqanta yachasqaykichejraykuchu. Manachayqa mask'ashawankichej t'antata mikhuspa sajsakusqaykichejraykulla. 27Ama tukukoj mikhunata tarinaykichejraykullaqa chhikatapuni phutikuychejchu. Aswanpis qankunaqa wiñay kawsayta mask'anaykichejpaj tukuy sonqoykichejta churaychej. Chayta noqa Runaj Churillan qoyta atiykichej, imaraykuchus Tata Dios chaypaj churawarqa, nispa.
28Chantá Jesusta taporqanku: Imatataj ruwaykuman Diospa munasqanta ruwanaykupajri? nispa. 29Jesustaj paykunaman kuticherqa: Diosqa kayllata ruwanaykichejta munan: Kachamusqan Churinpi atinikunaykichejta, nispa.
30Chantá paykuna taporqanku: Qan runaj mana jayk'aj rikusqan t'ukunakunamanta imatataj ruwanki, chayta rikuspa noqayku qanpi atinikunaykupajri? Imatataj ruwankiri? 31Ñawpa tatanchejkunaqa ch'inpi maná nisqa t'antata mikhorqanku. Diospa Qhelqachisqanpitaj nin: Moisés paykunaman janaj pachamanta t'antata mikhucherqa,#Ex 16.4,15; Neh 9.15; Sal 78.24; 105.40. nispa.
32Jesustaj paykunata nerqa: Noqa sut'ita niykichej: Janaj pachamanta t'antataqa mana Moiseschu qorqa, manachayqa Tatay. Kunantaj pay cheqa kaj t'antata janaj pachamanta qankunaman qoyta munasunkichej. 33Jinataj Diospa qosqan t'antaqa janaj pachamanta urayk'amuspa, runakunaman wiñay kawsayta qon, nispa.
34Chantá nerqanku: Wiraqochi, chay t'antata sapa p'unchay qowayku ari, nispa.
35Jesustajrí paykunata nerqa: Noqamin kawsayta qoj t'anta kani. Pillapis noqaman jamojqa mana jayk'ajpis yarqhachikonqachu, nillataj noqapi atinikojqa jayk'ajpis ch'akichikonqachu.
36Nerqaykichej jina, qankuna rikushawaspapis, mana noqapi atinikunkichejchu. 37Chaywanpis Tataypa tukuy qowasqan runakuna noqaman jamonqanku, noqataj pikunachus noqaman jamojkunata mana qhesachasajchu.#Jn 10.29; 17.6-9,24; 18.9. 38Noqa mana munasqayta ruwanaypajchu janaj pachamanta urayk'amorqani, astawanqa Kachamuwajniypa munasqanta ruwanaypaj. 39Kachamuwaj Tata Diosqa munan tukuy qowasqan runakunamanta mana ujllatapis chinkachinayta. Pay munallantaj kay pachaj tukukuynin p'unchaypi noqa paykunata wañusqamanta kawsarichinayta.#Jn 10.28-29; 17.12; 18.9. 40Tatayqa munan pillapis Churinta qhawaspa paypi atinikojqa wiñay kawsayniyoj kananta. Chantá noqa kikiy qhepa kaj p'unchaypi chay runata wañusqamanta kawsarichisaj, nispa.
41Chayraykumin chay judío kurajkuna Jesuspaj thutuyta qallarerqanku kay jinata nisqanrayku: Noqamin janaj pachamanta urayk'amoj t'anta kani, nispa. 42Chantá nillarqankutaj: Manachu kay runaqa Joséj churin Jesuslla? Manachu tatanta, mamantawan rejsinchej? Jina chayqa, imaraykutaj nishan: Janaj pachamanta urayk'amuni, nispari? nispa.
43Jesustaj nerqa: Chayta nisqayrayku amaña thutuychejchu. 44Mana pipis noqaman jamuyta atinmanchu kachamuwaj Tatay mana pusamojtenqa.#Jn 6.65; Mt 11.27; Lc 10.22. Noqataj chay jamojkunata kay pachaj tukukuynin p'unchaypi wañusqamanta kawsarichisaj. 45Diosmanta sut'inchajkunaj qhelqasqankupi nin: Diosqa tukuyninkuman yachachenqa,#Is 54.13; Jer 31.34. nispa. Ajinaqa pikunachus Tata Diosta uyarispa yachaqakunku, chaykuna noqaman jamunku.
46Mana pi runapis Tata Diosta rikorqachu, manachayqa Diosmanta jamojlla.#Jn 1.18. 47Noqataj kayta sut'ita niykichej: Pichus noqapi atinikojqa wiñay kawsayniyoj. 48Noqamin kawsayta qoj t'anta kani. 49Ñawpa tataykichejkuna maná nisqa t'antata ch'innejta jamushaspa mikhorqanku. Chaywanpis aswan qhepaman wañorqankupuni. 50Noqarí janaj pachamanta urayk'amoj t'antamanta parlashaykichej. Pillapis chay t'antata mikhojtaj mana wañonqachu. 51Noqamin janaj pachamanta urayk'amoj kawsayta qoj t'anta kani. Pillapis kay t'antamanta mikhojtaj wiñaypaj kawsanqa. Noqa qosaj, chay t'antaqa ukhuymin. Noqataj ukhuyta qospa wañusaj runakunaman wiñay kawsayta qonaypaj, nispa.
52Jesús chayta nejtin, judiokunaj kurajninkukuna paykunapura siminakorqanku: Imaynatataj pay ukhunta mikhunanchejpaj qowasunmanri? nispa.
53Chantá Jesús paykunata nillarqapuni: Kayta sut'ita niykichej: Manachus noqaj ukhuyta mikhunkichej, nitaj yawarniytapis ujyankichejchu chayqa, qankuna mana wiñay kawsayniyojchu kankichej. 54Pillapis ukhuyta mikhoj, yawarniytataj ujyajrí wiñay kawsayniyojña, noqataj kay pachaj tukukuynin p'unchaypi payta wañusqamanta kawsarichisaj. 55Ukhuypis, yawarniypis sumaj mikhuna jina, chaytaj mikhojman, ujyajman ima kawsayta qon. 56Jinallataj pichus ukhuyta mikhoj, yawarniytataj ujyajqa, noqaman ujchasqa kawsan, noqataj payman ujchasqa kawsani.#Jn 15.4-10; 1 Jn 3.24. 57Kachamuwaj Tatayqa kawsajmin, noqataj paynejta kawsani. Ajinallatataj noqata mikhuwajqa noqanejta kawsanqa. 58Kaymá janaj pachamanta urayk'amoj t'antaqa, manataj, tataykichej mikhusqanku, chay maná nisqa t'anta jinallachu. Ñawpa tataykichejkunaqa chayta mikhuspapis wañorqanku. Kay t'antata mikhojrí wiñaypaj kawsanqa, nispa.
59Chay tukuyta Jesús yachacherqa Cafarnaunpi kaj tantakuna wasipi.
Jesuspa yachachisqankunamanta ashkha ripunku
60Jesuspa parlasqanta uyarispa, yachachisqankunamanta ashkha nerqanku: Chay nisqanqa mana jap'ikunapaj jinachu. Pitaj payta kasuyta atinmanri? nispa.
61Jesustajrí yachachisqankuna thutushasqankuta reparaspa, taporqa: Kay nisqayraykuchu saqerpariwaspa kutipuyta munashankichej? 62Sichus Runaj Churinta rikuwajchej, maypichus karqa, chayman wicharishajta chayqa, imatataj yuyawajchejri? 63Diospa Espiritullan wiñay kawsayta qon. Runarí atisqanta ruwashaspapis, mana ni imatapis tarinmanchu. Qankunaman nisqay simikunaqa Diospa Espiritunmanta jamun, kawsaytataj qon. 64Chaywanpis qankunamanta wakin mana noqapi atinikuyta munankichejchu, nispa. Jesús chayta nerqa, imaraykuchus qallariymantapacha yacharqa pikunachus paypi mana atinikunankuta, jinallatataj pichus payta wasanchaspa, jap'ichinantapis. 65Chantá Jesús nerqa: Chayrayku nerqaykichej: Manachus Tatay noqaman pusamusunkichejman chayqa, mana pipis noqaman jamuyta atinmanchu, nispa.
66Chaymantapacha Jesuspa yachachisqankunamanta payta ashkha saqerparerqanku, manañataj paywanchu purerqanku. 67Jinapi Jesús chunka iskayniyoj yachachisqankunata taporqa: Qankunapis ripuyta munallankichejtajchu? nispa.
68Chantá Simón Pedro kuticherqa: Wiraqochi, pimantaj riyta atiykumanri? Qanpa parlasqaykeqa wiñay kawsayman pusawayku. 69Noqaykoqa qan kawsaj Diospa Churin kasqaykita yachayku, jinallataj Diospa ajllasqan kasqaykitapis, nispa.#Mt 16.16; Mc 8.29; Lc 9.20.
70Jesustaj kuticherqa: Chunka iskayniyojta ajllarqaykichej. Chaywanpis qankunamanta ujniykichejqa Supaymin, nispa. 71Chayta Jesús nisharqa Simonpa churin Judas Iscariotemanta, imaraykuchus pay Jesusta jap'ichinan karqa, chunka iskayniyoj yachachisqankunamanta ujnin kashaspapis.
ప్రస్తుతం ఎంపిక చేయబడింది:
Juan 6: DQDC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.