Hechos 3
3
Pedroqa suchu runata puririchin
1Uj kuti Pedrowan, Juanwan Temploman risharqanku tardenpi kinsa kaj phani chayta. Chay phanitaqa judiokuna tantakoj kanku Dioswan parlarikunankupaj. 2Chaypacha K'acha Punku nisqa Temploj pationman yaykunapi uj runa tiyakusharqa, pichus paqarikusqanmantapacha suchu karqa, chay. Ayllunkunaqa sapa p'unchay chay punkunman payta apaj kanku, chaynejta yaykojkunamanta qolqeta mañakunanpaj. 3Jinapi suchu runaqa Pedrota, Juantawan Temploj pationman yaykushajta rikuspa, paykunamanta mañakorqa imallatapis qorinankuta.
4Paykuna suchuta allinta qhawarqanku, Pedrotaj nerqa: Qhawariwayku má, nispa. 5Suchu runataj paykunata qhawarerqa, yuyaspa imallatapis qorinankuta. 6Pedrotajrí payta nerqa: Mana qolqe nitaj qoripis tiyapuwanchu. Chaywanpis imachus kapuwasqanta qosqayki: Nazaretmanta Jesucristoj sutinpi sayariy, puririytaj, nispa.
7Chantá Pedroqa suchu runata paña makinmanta jap'ispa sayaricherqa. Chay kikinpachataj runaj chakinwan, moqonkunawan ima thuruyarqanku. 8Chaypacha suchu runaqa ujllata phinkispa, sayarerqa, puriytataj qallarerqapacha. Jinaspataj Jesuspa kuraj kachankunawan khuska Temploj pationman thaskispa yaykorqa, kusiywan phinkiykachaspa, Diosta jatunchaspa ima. 9Jinapi tukuy runakuna payta rikorqanku purishajta, Diosta jatunchashajta ima. 10Jinataj rejserqankupacha pay chay suchu runapuni kasqanta, pichus Temploj pationman yaykunapi K'acha Punku nisqapi mañakuspa tiyakoj, chay. Chayrayku mayta t'ukorqanku suchu runa puririsqanmanta.
Pedro Temploj pationpi parlan
11Chaypacha Pedrowan, Juanwan Salomonpa corredornin nisqapi kasharqanku. Purirej suchu runataj paykunamanta mana kacharikorqachu. Jinapi runakuna mayta t'ukuspa, imata jina chayman tantakamorqanku. 12Chantá Pedro chayta rikuspa, paykunata nerqa: Israelitakuna, imaraykutaj kay jinata t'ukushankichejri? Imaraykutaj kay jinatapuni qhawawaykuri? Ichapis qankuna yuyashankichej noqayku atiyniykuwan, chayrí k'acha runa kasqaykurayku kay suchu runata puririchisqaykuta. Mana jinachu.
13Manachayqa Abrahampa Diosnin, Isaacpata, Jacobpata, ñawpa tatanchejkunajta ima kamachin Jesusta churan may jatunpaj qhawasqa kananpaj. Qankunarí Jesusta qhesachaspa, Pilatoman jaywaykorqankichej wañuchisqa kananpaj. Pilatotaj Jesusta kacharipuyta munarqa chaypis, qankuna manapuni munarqankichejchu. 14Aswanpis qankunaqa mana juchayoj cheqan kajta ruwajta qhesacharqankichej, cuentanmantataj uj runa wañuchi kacharisqa kananta mañarqankichej.#Mt 27.15-23; Mc 15.6-14; Lc 23.13-23; Jn 19.12-15. 15Ajinata qankuna pichus tukuyman kawsayta qojta wañucherqankichej. Diostajrí payta wañusqamanta kawsarichimorqa, noqaykutaj testigo jina chay rikusqaykuta willayku.
16Jesuspa sutinpi atinikusqaykurayku Diosqa kay suchu runata qhaliyacherqa, pitachus qankuna rikunkichej, rejsinkichejtaj, chayta. Jesuspi atinikusqaykurayku ñawpaqeykichejpi kay suchu runaqa puririshan.
17Yawar masikuna, noqa kayta yachani: Jesusta wañuchispa, qankuna imatachus ruwasqaykichejta mana yacharqankichejchu, nillataj kamachejniykichejkunapis yacharqankuchu. 18Chaywanpis Diosqa paymanta ñawpa sut'inchajkunanejta sut'inchasqaña paypa kachamusqan Cristo ñak'arinanta. Diostaj chay nisqanta qankunanejta junt'arqa.
19Chayrayku Diosman kutirikuychej Jesuspi atinikuspa, juchaykichej pampachasqa kananpaj. 20Chantá Diosqa janaj pachamanta sonqoykichejta kallpachanqa, chaymantataj Cristota watej kachamonqa, pitachus qallariymantapacha qankunapaj ajllarqa, chayta. 21Kunanqa pay janaj pachallapiraj qhepakonqa, Dios watej tukuy imata mosojyachinankama. Chaymanta Diosqa ajllasqa sut'inchajninkunanejta unaymantapachaña willarqa.
22Ajinata Moisespis nillarqataj: Diosniykichej noqata jina paymanta uj sut'inchajta jatarichenqa wawqeykichej ukhumanta. Qankunataj payta kasunkichej tukuy ima nisqanpi.#Dt 18.15,18. 23Pillapis Diosmanta chay sut'inchajpa nisqanta mana kasojrí Diospa ayllunmanta wijch'usqa kanqa, nispa.#Dt 18.19.
24Kay p'unchaymantaqa ñawpajtaña Diosmanta tukuy sut'inchajkuna willarqanku, Samuelmanta qallarispa, jinallataj paypa qhepanta jamojkunapis. 25Qankunataj Diosmanta sut'inchajkunaj wawan kankichej, chantá ñawpa tataykichejkunawan Diospa trato ruwasqanta jap'erqankichej. Chaypacha Diosqa Abrahamman nerqa: Qanpa mirayniykinejta kay pachapi tukuy runakuna saminchasqa kanqanku,#Gn 22.18. nispa. 26Chayrayku Churin Jesusta wañusqamanta kawsarichimuspa, Dios payta ñawpajta qankunamanraj kachamorqa, sapa ujniykichej millay kawsayniykichejmanta Diosman kutirikuspa saminchasqa kanaykichejpaj, nispa. Ajinata Pedro chay runakunaman nerqa.
ప్రస్తుతం ఎంపిక చేయబడింది:
Hechos 3: DQPC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.