Juan 11
11
Lázaro wañupun
1Uj runa, Lázaro sutiyoj onqosqa kasharqa. Paywan, panankuna Mariawan, Martawan ima Betaniamanta karqanku. 2Aswan qhepanejman Lázaroj panan Mariaqa Tukuyta Kamachej Jesuspa chakinta sumajta q'apashaj jawinawan jawisqa, chantá chujchanwan ch'akichisqa. Chay Lazaromin onqosqa karqa. 3Jinapitaj Lázaroj panankunaqa Jesusman willacherqanku: Wiraqochi Jesús, munasqa kawsaqeyki onqosqa kashan, nispa.
4Chantá Jesús chayta uyarispa, yachachisqankunata nerqa: Chay onqoyqa mana wañunanpajchu, manachayqa Dios jatunchasqa kananpaj. Chay onqoynejta noqa Diospa Churinpis jatunchasqallataj kasaj, nispa.
5Jesusqa Martata, ñañanta, chantá Lazarotapis mayta munakorqa. 6Jinapis Lázaro onqosqa kasqanta yachaspa, Jesús maypichus kasharqa, chaypi iskay p'unchaytawanraj qheparikorqa. 7Chaymantataj yachachisqankunata nerqa: Jaku, Judeaman uj kutitawan rinachej, nispa.
8Yachachisqankunarí nerqanku: Yachachej Wiraqochi, qanimpalla chaypi tiyakojkuna rumiwan ch'anqaykusuyta munarqanku. Ujtawanchu jaqayman riyta munashallankitaj? nispa.
9Jesustaj paykunata nerqa: Manachu uj p'unchayqa chunka iskayniyoj phaniyoj? P'unchaypi purejqa mana misk'anchu, imaraykuchus kay pachaj k'anchayninta rikun. 10Tutan purejrí misk'an, k'anchay mana kasqanrayku, nispa.
11Chayta niytawantaj, Jesús yachachisqankunaman nillarqataj: Lázaro kawsaqenchejqa puñushan, noqataj payta rijch'arichimoj risaj, nispa.
12Chantá Jesuspa yachachisqankuna nerqanku: Wiraqochi, puñushallanchus chayqa, walejyaponqachá, nispa.
13Jesús chayta nisqa Lázaro wañusqanmanta, yachachisqankunatajrí Lázaro puñushasqanmanta parlashasqanta yuyarqanku. 14Chaymanta Jesús sut'incharqa: Lazaroqa wañupun. 15Noqarí chaypi mana kasqaymanta kusikuni, imaraykuchus chayqa allinniykichejpaj kanqa, qankuna astawan noqapi atinikunaykichejpaj. Jaku, payta watukamoj rina, nispa.
16Jinapi Tomás, pichus Dídimo sutiwan rejsisqallataj karqa chay, yachakoj masinkunata nerqa: Noqanchejpis rinallataj, Jesuswan khuska wañunanchejpaj, nispa.
Jesús wañusqakunaman mosoj kawsayta qon
17Jesús Betaniaman chayajtin, Lázaro tawa p'unchaytaña p'ampasqa kasqanta willarqanku. 18Betania llajtaqa Jerusalenmanta kinsa kilometropi jinalla karqa. 19Chayrayku ashkha runakuna Martata, Mariatawan ima watukoj jamusqanku, turanku wañupusqanmanta paykunata sonqochayta munaspa. 20Jinapi Martaqa Jesús chayamushasqantaña yachaytawan, payta taripaj llojserqa. Mariatajrí wasillapi qhepakorqa.
21Jesusta taripaspa, Marta nerqa: Tukuyta Kamachej Jesús, kaypichus kawaj karqa chayqa, turay mana wañupunmanchu karqa. 22Chaywanpis noqa yachani, imatachus Diosmanta mañakunki, chayta pay qosunanta, nispa.
23Chantá Jesús payman kuticherqa: Turayki kawsarimonqa, nispa.
24Martataj nerqa: Arí, kay pachaj tukukunan p'unchaypi kawsarimunanta yachani, mayk'ajchus wañusqakuna watejmanta kawsarimonqanku, chaypacha, nispa.
25Jesustajrí payta nerqa: Noqamin wañusqakunata kawsarichej kani, kawsayta qojtaj. Pichus noqapi atinikojqa, wañuchunpis kawsanqa. 26Pillapis kawsashaspa noqapi atinikojtaj mana jayk'aj wañonqachu. Chay nisqayta jap'ikunkichu? nispa.
27Chantá Marta nerqa: Arí, Tukuyta Kamachej Jesús, noqa tukuy sonqo yachani qanqa Diospa Churin kasqaykita, pitachus Dios kay pachaman kachamunan karqa, chay Cristo, nispa.
Jesús Lázaroj wañusqanmanta waqan
28Chayta niytawan, Martaqa María ñañanta wajyaj rerqa. Chantá sapallanta Mariata nerqa: Yachachej kaypiña kashan, wajyashasunki, nispa. 29Mariataj chayta uyariytawankama, usqhayta sayarispa, Jesusta taripaj rerqa.
30Jesús manaraj llajtaman yaykusqachu, manachayqa maypichus Marta taripasqa, chayllapiraj kasharqa. 31Jinapi pikunachus wasipi Mariata sonqochaspa kasharqanku, chay judiokuna payta usqhayllata llojsishajta rikuspa, nerqanku: Panteonman waqaj rishan, nispa. Qhepantataj rerqanku.
32Chantá Mariaqa, maypichus Jesús kasharqa, chayman chayarqa. Payta rikuytawantaj, ñawpaqenman qonqoriykukuspa, nerqa: Tukuyta Kamachej Jesús, qanchus kaypi kawaj karqa chayqa, turay mana wañunmanchu karqa, nispa.
33Chaypacha Jesús Mariata, jinataj paywan jamoj runakunatapis waqajta rikuspa, sonqon nanarqa, llakikorqataj. 34Jinaspataj, paykunata taporqa: Maypitaj Lazarota p'amparqankichej? nispa. Paykunataj nerqanku: Wiraqochi, jamuy ari, rikunki, nispa.
35Jinapi Jesús waqarikorqa. 36Chayta rikuspataj, chay runakuna nerqanku: Qhawariychej má, Lazarota anchatapuni munakusqa, nispa. 37Wakinkunatajrí nisharqanku: Kay runaqa ñawsaj ñawinta qhawaricherqa. Chaychu Lázaro ama wañunanpaj mana imatapis ruwayta atinman karqa? nispa.
Jesús Lazarota wañusqamanta kawsarichin
38Jesús sonqon nanasqallaraj kashaspa, maypichus Lázaro p'ampasqa kasharqa, chayman qayllarqa. Chay aya p'ampanaqa chhankapi ruwasqa karqa, jatun rumiwan wisq'asqataj. 39Chantá Jesús nerqa: Chay rumita ithirichiychej, nispa. Martataj nerqa: Tukuyta Kamachej Jesús, ayaqa tawa p'unchayña p'ampasqa, asnashanñachá, nispa.
40Jesustajrí payta nerqa: Manachu nerqayki, sichus noqapi atinikunki chayqa, Diospa atiynin imaynapunichus kasqanta rikunaykita? nispa.
41Chantá rumita tanqarqanku. Jesustaj patata qhawaspa, nerqa: Tatáy, uyariwasqaykimanta pachis niyki. 42Noqa yachani qanqa uyariwasqaykitapuni. Chaywanpis kaypi kashaj runakunaj allinninkurayku jatunmanta parlaspa kayta nishani, qan kachamuwasqaykita jap'ikunankupaj, nispa.
43Jinata niytawantaj, Jesús sinch'ita qhaparerqa: Lázaro, chaymanta llojsimuy, nispa.
44Jinallapi Lázaro aya p'ampanamanta llojsimorqa, makin, chakin mayt'usqa, uyantaj qhatasqa. Jesustaj chaypi kajkunata nerqa: Payta phaskaraychej purinanpaj, nispa.
Jesusta wañuchinankupaj fariseokuna yachachinakunku
(Mt 26.1-5; Mc 14.1-2; Lc 22.1-2)
45Chaypacha Mariata watukoj runakunamanta Jesuspi ashkha atinikorqanku, imaynatachus Lazarota wañusqamanta kawsarichisqanta rikuspa. 46Wakin runakunarí fariseokunaman rispa, Jesuspa ruwasqanmanta willamorqanku. 47Chantá kuraj sacerdotekuna, fariseokuna ima Jatun Juntapi tantakuspa, nerqanku: Imatataj kay runawan ruwasunri? Payqa runaj mana jayk'aj rikusqan ashkha t'ukuna imakunata ruwashan. 48Jinata ruwajtachus saqellasun chayqa, tumpamantawan tukuy runakuna payman kutirikonqanku. Romamanta soldadokunataj jamuspa, kay Templonchejta, chantá suyunchejta ima chinkachenqanku, nispa.
49Jinapi paykunamanta ujnin Caifás sutiyoj, pichus chay watapi kuraj kaj sacerdote karqa, chay nerqa: Qankuna mana imatapis yachankichejchu. 50Manallataj imatapis allinta reparankichejchu. Noqanchejpajqa allin kanman uj runalla tukuyninchejrayku wañunan, tukuy suyunchej chinkachisqa kananmanta nisqaqa, nispa.
51Caifás mana payllamantachu chayta nerqa. Manachayqa chay watapi kuraj kaj sacerdote kasqanrayku, Dios paynejta sut'incharqa Jesús tukuy judiokunarayku wañunanta. 52Jesusrí mana judiokunallatachu qhespichinanrayku wañunan karqa, manachayqa Diospa wawankuna tukuynejpi ch'eqerasqa kajkunata tantananpaj.#Jn 10.16; Is 11.12; Jer 23.3. 53Ajinaqa chay p'unchaymantapacha judiokunaj kurajninkukuna Jesusta wañuchinankupaj parlanakorqanku.
54Chayrayku Jesusqa judiokuna ukhupi manaña sut'itachu purerqa. Aswanpis Judea jap'iymanta llojsispa, ch'innej qayllapi Efraín llajtaman riporqa, chaypitaj yachachisqankunawan qhepakorqa.
55Chaypacha judiokunaj Pascua rayminkuman qayllallaña kasharqa. Chayrayku ashkha runakuna tukuynejmanta Jerusalenman chayamorqanku Diospa ñawpaqenpi llimphuchakunankupaj, manaraj Pascua raymi kashajtin. 56Chantá Jesusta mask'arqanku, Templo chaynejpi kashaspataj, paykunapura ninakorqanku: Ima ninkichejtaj qankuna? Jesús Pascua raymiman jamunmanchu, manachu? nispa.
57Chaywanpis kuraj sacerdotekuna, chantá fariseokuna ima kamacherqanku, pillapis Jesús maypichus kashasqanta yachanman chayqa, paykunaman willanankuta, payta jap'ispa wisq'aykunankupaj.
ప్రస్తుతం ఎంపిక చేయబడింది:
Juan 11: DQPC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.