Juan 2
2
Caná llajtapi casaraku
1Kinsa p'unchayninman Galilea jap'iypi Caná llajtapi casaraku karqa, Jesuspa mamantaj chaypi kasharqa. 2Jesús, chantá yachachisqankuna ima chay casarakuyman rinankupaj wajyarisqa karqanku. 3Jinallapi vino tukurparikojtin, Jesuspa maman payta nerqa: Vino tukukapun, nispa.
4Jesustajrí kuticherqa: Mamáy, imaraykutaj chayta niwankiri? Pichus noqa kasqayta rejsichikunay p'unchay manaraj chayamunchu, nispa.
5Mamanrí kamachikunata nerqa: Tukuy imatachus nisqanta ruwaychej, nispa.
6Chaypi rumimanta ruwasqa sojta jatuchaj p'uñukuna karqa yakuta churanapaj, judío usuman jina mayllakuspa llimphuchakunankupaj. Sapa p'uñumantaj qanchis chunka litro yaku yaykorqa. 7Jesustaj kamachikunata nerqa: Kay p'uñukunaman yakuta junt'arachiychej, nispa. Paykunataj junt'aracherqanku.
8Chantá Jesús nerqa: Kunanqa uj chhikata wiserqospa, mayordomoman llaminanpaj apaychej, nispa. Paykunataj aparqanku.
9Jinapi mayordomoqa yakumanta ruwasqa vinota llamirerqa, mana yachaspa maymantachus apamusqankuta. Chaytaqa yakuta wisej kamachikunalla yacharqanku. Chantá mayordomoqa casarakojta wajyaspa, nerqa: 10Pillapis ñawpajtaqa sumaj vinotaraj jaywan. Casarakuman wajyarisqa macharisqaña kashajtinkutaj, mana walej vinollataña jaywan. Qanrí kunankama aswan sumaj vinota jallch'asqanki, nispa.
11Jesús Galilea jap'iypi Caná llajtapi yakuta vinoman tukuchisqanqa ñawpaj kaj t'ukuna ruwasqan karqa. Ajinata Jesús may jina atiyniyoj kasqanta rejsicherqa, yachachisqankunataj paypi astawan atinikorqanku.
12Chaymantataj Jesús Cafarnaún llajtaman rerqa mamanwan, wawqenkunawan, chantá yachachisqankunawan ima. Chaywanpis mana unaytachu chaypi karqanku.
Jesús qhatojkunata Templomanta qharqon
(Mt 21.12-13; Mc 11.15-18; Lc 19.45-46)
13Judiokunaj Pascua rayminkuman qayllallaña kashajtin, Jesús Jerusalenman rerqa.#2.13 Juanpa qhelqasqan evangelioman jina, Jesús ruwananta ruwashaspaña, kinsa Pascua raymita pasasqa. 2.23; 6.4; 11.55. Mateo, Marcos chantá Lucas ima evangeliokuna ninku Jesús uj Pascua raymillata pasasqanta. Ex 12.1-27; Dt 16.1-8. 14Chantá pikunachus wakakunata, ovejakunata, urpikunata ima Temploj pationpi qhatojkunata rikorqa, jinallataj qolqe chhalajkunata ima. 15Jinapi Jesús lazomanta seq'onata ruwaspa, tukuyninkuta Temploj pationmanta wijch'orqa, jinallataj ovejakunata, wakakunatapis. Chhalajkunaj qolqenkutapis pampaman qhallirparispa, mesankuta tijrararqa. 16Urpikunata qhatojkunatataj nerqa: Tukuy chaykunata kaymanta orqhoychej. Tataypa wasintaqa ama qhatuna wasiman tukuchiychejchu, nispa.
17Chaypacha yachachisqankuna Diospa Qhelqachisqanpi imatachus nisqanmanta yuyarikorqanku: Diosníy, yupaychana wasiykita anchatapuni munakusqayrayku sonqoy lawrarin,#Sal 69.9. nispa.
18Chaywanpis judiokunaj kurajninkunaqa Jesusta taporqanku: Kayta ruwanaykita pitaj kamachisorqari? Dioschus kamachisorqa chayqa, runaj mana jayk'aj rikusqan t'ukunata ruway ari, yachanaykupaj, nispa.
19Jesustaj paykunata nerqa: Kay templota urmachiychej, noqataj kinsa p'unchayllapi watej sayarichisaj, nispa.
20Chayta uyarispa, judío kurajkuna kuticherqanku: Kay Temploqa tawa chunka sojtayoj watapi ruwasqa karqa. Qanrí kinsa p'unchayllapichu sayarichiyta atiwaj? nispa.
21Jesusrí: Templo nispaqa, kikin ukhunmanta parlasharqa. 22Chayrayku yachachisqankuna Jesuspa nisqanta yuyarikorqanku, maypachachus Jesús wañusqamanta kawsarimporqa, chaypacha. Chantá Diospa Qhelqachisqanpi imatachus nisqanta jap'ikorqanku, jinallataj Jesuspa nisqantapis.
Jesús runaj sonqonta rejsin
23Pascua raymipi Jesús Jerusalenpi kashajtin, ashkha runakuna paypi atinikorqanku, runaj mana jayk'aj rikusqan t'ukunata ruwasqanta rikuspa. 24Chaywanpis Jesús paykunapi mana atinikorqachu, imaraykuchus paykuna imaynachus kasqankuta rejserqa. 25Manataj pay runamanta imatapis pi willanantarajchu suyarqa, imaraykuchus pay runaj sonqonpi imachus kasqanta yacharqaña.
ప్రస్తుతం ఎంపిక చేయబడింది:
Juan 2: DQPC
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Revisión Biblia Quechua Boliviano © Sociedad Bíblica Boliviana, 2017.