GENESIS 8
8
Parapa samarusqanmanta
1Diosqa manam qonqarurqachu Noeytaqa nitaq buquepi paywan kaqkunatapas nitaq tukuy rikchaq purun animalkunatapas nitaq uywa animalkunatapas chaymi kay pachapi yakukunapa hawanman wayrata pukuchimuptin yakukuna asllayarqa. 2Lamar qochapa ukunmanta yakukuna toqyamuqpas sosegarqam chaynataq cielokunapi llapa yakukunapas, tanirurqataqmi cielomanta sinchi para chayamuqpas. 3Hinaptinmi kay pachapi yakukuna aswan-aswan asllayaspa chintirqa pachak pichqa chunkan punchawpi. 4Chaymi buque tiyarurqa Ararat orqopi qanchis kaq killapa chunka qanchisniyoq punchawninpi. 5Chaymantam chunka kaq killakama yakukuna aswan-aswan chintirqa. Chunka kaq killapa qallariy punchawninpim rikurirurqa orqokunapa puntan.
6Tawa chunka punchaw pasaruptinmi buquepi rurasqan ventananta Noey kicharqa. 7Hinaspam cuervo sutiyoq pawaq animalta kacharirqa, chaymi kayman-chayman pawarqa kay pachapi yakukuna chakinankama. 8Chaymantañataqmi huk palomata kacharirqa allpapi yakukuna asllayasqanta Noey yachananpaq. 9Ichaqa chay palomam mana maypipas tiyaykunanpaq kaptin buqueman kutiramurqa yaku kay pachapa hawanpi hinallaraq kasqanrayku. Chaymi palomata Noey hapiykuspan buqueman kutiykachirqa.
10Qanchis punchawtawanraq suyaspanmi palomata kasqallan kacharirqa buquemanta. 11Chaymi Noeyman tardeykuqtaña kutimurqa aceitunas sachapa rapinta apamuspan. Chaymi Noey yacharurqa kay pachapi yakukuna asllayasqanta. 12Qanchis punchawtawanraq suyaspam huktawan chay palomata kacharirqa ichaqa palomam manaña kutimurqañachu.
13Soqta pachak hukniyoq watanpi Noey kachkaptinmi punta kaq killapa qallariynin punchawpi yakukuna chakirurqa. Chay punchawpim Noey buquepa qatanta kicharqa, qawaykuptinmi allpaqa chakiña kachkasqa. 14Iskay kaq killapa iskay chunka qanchisniyoq punchawninpim kay pachaqa chakiña karqa. 15Chaymi Noeyta Dios nirqa:
16—Buquemanta lloqsiy warmikipiwan, lloqsichuntaqyá churikikunapas warmintinkama. 17Horqoytaq qanwan kuska kaq tukuy rikchaq animalkunatapas, alton pawaqkunatapas, uywa animalkunatapas chaynataq allpapi qasqonpa puriqkunatapas. Lloqsispankuyá sinchita miraspa kay pachaman huntachunku —nispa.
18Noeymá lloqsirqa warmintin chaynataq churinkunapas warmintinkama. 19Buquemantaqa lloqsirqataqmi castantinkama llapallan animalkunapas, qasqonpa puriq animalkunapas, alton pawaqkunapas chaynataq allpapi puriq llapallan animalkunapas. 20Chaymantam Tayta Diospaq Noey perqarqa altarta hinaspam Diosman ofrecena llapallan animalkunamanta hapirqa wakin animalkunata, hapirqataqmi Diosman ofrecena llapallan alton pawaqkunamantapas hinaspam altarpa hawanpi chay animalkunata wañuchispa lliwta kañarqa. 21Chay kañasqanpa miskillaña asnariyninta Tayta Dios muskiykuspanmi hawkayarurqa hinaspam piensarurqa:
—Runakunaraykuqa manañam yapatawanqa allpa pachataqa ñakasaqñachu. Runaqa warma kasqanmantam mana allin piensaqlla. Kayna castigasqayta hinaqa manañam wañuchisaqchu llapallan rurasqay kawsaqkunataqa.
22Kay pacha kanankamaqa kanqapunim
tarpuypas, cosechapas chaynataq chiriwan rupaypas.
Kay pacha kanankamaqa kanqapunim
poqoypas, usyaypas chaynataq tuta punchawpas.
ప్రస్తుతం ఎంపిక చేయబడింది:
GENESIS 8: QUEAYA87
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి