JUAN 4
4
Samaria huarmihuan Jesús parlanacushcami
1“Jesusca achca yachacujcunatami charin, Juanta yallimi bautizacun” nijta fariseocuna yachashcatami Mandaj Jesusca yacharca. 2(Jesusca mana bautizarcachu, paipaj yachacujcunami bautizarca). 3Chashna nishcata Jesús yachashpaca, Judeamanta llujshishpami Galileaman cutin rirca. 4Galileaman ringapajca Samariatami pasana carca. 5Samariaman rishpaca Sicar nishca shuj pueblomanmi chayagrirca. Chai puebloca, yaya Jacob paipaj churi Joseman cushca allpa c'uchullapimi carca. 6Chai allpapica Jacobpaj pugyumi tiyarca. Jesusca shaicuita shamushcamantami chai pugyu c'uchupi tiyarirca. Ña chaupi punlla shinami carca.
7Chaimanca, Samariamanta shuj huarmimi yacuta huishinaman chayarca. Paitami Jesusca:
–P'ichilla yacuta ubyangapaj cuhuai– nirca. 8(Paipaj yachacujcunaca, Sicar pueblopi micunata randinamanmi rishcacuna carca). 9Chaimi Samaria huarmica:
–Ñucaca Samariamanta huarmimi cani. Canca judiomi cangui. ¿Ima nishpataj ñucataca yacuta cuhuai ninguiyari?– nirca. (Judiocunahuan samariacunahuanca mana apanacuj cashcamantami chashna nirca).
10Chaimi Jesusca:
–Taita Dios canman cusha nishcata yachashpaca: “Yacuta ñucaman cuhuai” nicujca pi cashcata yachashpaca, canmari paitaca yacuta cuhuai ninguiman. Paica causaita cuj yacutami canmanca cunman– nijpimi,
11chai huarmica:
–Amito, imahuan huishinatapish mana charinguica, pugyupish ucujtamari. ¿Maimantataj causaita cuj yacutaca cunguiyari? 12¿Canca, cai pugyuta cuj yaya Jacobtapish yalli jatunchari canguiyari? Paipish, paipaj churicunapish, animalcunapish cai pugyumantami ubyajcuna cashca– nircami.
13Chaimi Jesusca:
–Maijanpish cai yacuta ubyajca, cutin yacunachingallami. 14Maijanpish ñuca cushca yacuta ubyajca, manataj yacunachingachu. Ñuca cushca yacuca huiñai causaita cushpa huiñaita llujshicungallami– nijpimi,
15chai huarmica:
–Amito, ama cutin yacunachingapaj, caipi huishinaman ama shamungapaj, chai yacuta ñucaman cuhuai– nirca.
16Chaimi Jesusca:
–Ri, cambaj cusata cayamugri– nijpi,
17chai huarmica:
–Mana cusayuj canica– nirca.
Chaimi Jesusca:
–“Mana cusayuj canica” nishpaca, mana llullanguichu. 18Canca pichca cusatami charishcangui. Cunan canhuan causacujpish, mana cambaj cusachu. Caitaca mana llullashpami nishcangui– nircami.
19Chaimi chai huarmica:
–Amito, canca Taita Dios huillachishcata huillajmi yuyachingui. 20Ñucanchij ñaupa yayacunaca, cai urcupimi adorajcuna carca. Ashtahuanpish cunan cancunaca, Jerusalenllapimi adorana ninguichijmi– nircami.
21Chaimi Jesusca cashna nirca:
–Huarmi, mana cai urcullapi, mana Jerusalenllapi Yaya Diosta adorana punlla shamucujta criyari. 22Cancunaca pita adoracushcatapish mana yachanguichijchu. Ñucanchijca pita adoracushcataca yachanchijmi. Quishpichijca judiocunamantami shamun. 23Yaya Diostaca Espíritu yuyaita cushca shina, mana nij tucushpalla adorana punlla chayamunami carca. Chai punllamari ña chayamun. Yaya Diosca chashna adorajcunatami munan. 24Taita Diosca Espiritumi. Chaimanta paita adorajcunaca paipaj Espíritu yuyaita cushca shina, mana nij tucushpallami adorana– nircami.
25Chaimi chai huarmica:
–Cristo nishca Mesías shamuna cashcataca yachanimi. Pai shamushpami ima shina cashcata tucuita alli huillanga– nirca.
26Chaimi Jesusca:
–Canhuan rimacuj ñucamari chaica cani– nirca.
27Chashna nicujpi, paipaj yachacujcuna chayamushpaca, chai huarmihuan parlanacucujta ricushpami mancharircacuna. Chashna mancharishpapish: “¿Imatataj tapucungui? ¿Imatataj paihuan parlacungui?” ninallatapish maijan mana nircachu. 28Chai huarmica paipaj puñuta saquishpami, puebloman rishpa chaipi cajcunaman cashna nirca:
29–Jacuchij, shuj runata ricunguichij. Paica tucui ñuca ima shinalla cashcatami huillan. ¿Manachu paica Cristo canga?– nircami.
30Chaimi tucuicuna chai pueblomanta llujshishpa Jesuspajman shamurcacuna.
31Chaicamaca Jesuspaj yachacujcunaca:
–Rabí, micupaiyari– nicurcacunami.
32Chaipimi Jesusca:
–Ñucaca cancuna mana rijsishca micunatamari charini– nijpi,
33yachacujcunaca caishuj chaishuj:
–¿Pishi caraj shamurca?– ninacurcacuna.
34Chaipimi paicunataca Jesusca:
–Ñuca micunaca ñucata cachaj Yayapaj munaita rurana, pai rurai nishcata pajtachinami. 35¿Manachu cancunaca: “Chuscu quillarajmi c'uchunapajca illan”? ninguichij. Ñucaca cashnami nini: Chagracunata huichilla ricuichij, ña yurajyashca c'uchunallami. 36C'uchujpish c'uchushcamanta pagota japinmi. Chai c'uchushcaca huiñai causaipajmi. Chashna cajpimi c'uchujpish, tarpujpish ishquindijtaj cushicunga. 37“Shujca tarpujmi, caishujca c'uchujmi” nishcami caipica chashnataj pajtan. 38Manapish cancuna tarpushcatami c'uchunaman cancunataca cacharcani. Shujtajcuna tarpushcatamari, cancunaca c'uchunguichij– nircami.
39“Tucui ñuca imalla rurashcatami huillan” nishpa huillajpica, Samaria pueblopi causajcunaca achcacunami Jesusta crircacuna. 40Samaritanocuna Jesuspajman shamushpaca: –Ñucanchijhuan saquiripai– nijpimi, Jesusca ishqui punllata chaipi saquirirca. 41Chai punllacunapica Jesusllataj huillajpipish achcacuna paita crishpami,
42chai huarmitaca:
–Can huillashcallamantaca mana crinchijchu. Ñucanchijtaj pai huillashcata uyashpami crinchij. Paica cai pachata Quishpichij Cristotaj cashcatami cunantajca ña yachanchij– nircacunami.
Mandajpaj churita Jesús alliyachishcami
43Ishqui punlla q'uipa chaimanta Galileaman rishpaca, 44chaipimi Jesusca “Maijan profetatapish quiquin llajtallapitajca, alli nishca mana cai tucunchu” nishpami huillarca. 45Galileapi causajcunaca Jerusalenman Pascua fiestaman rishpami Jesús tucui imalla rurashcacunata ricurcacuna. Chaimi Galileaman Jesús chayajpica cushicushpa chasquircacuna.
46Jesusca, ñaupaman yacumanta vinota rurashca Galileapi caj Caná pueblomanmi cutin rirca. Jesús chaipi cajpica Capernaúm pueblopimi jatun mandaj churashca mandajpaj churi ungushca cashca carca. 47Chai mandajca Judeamanta Galileaman Jesús chayamushca nijta uyashpami, Jesuspajman shamushpaca: “Ñuca churimi ungushca ña huañunalla. Jacupai alliyachipangui” nijpi, 48Jesusca:
–Pi mana ruraipajcunata, ricuchinacunata mana ricushpaca, mana cringuichijchu– nirca.
49Chaimi jatun mandaj churashca mandajca:
–Amito, ñuca churi manaraj huañujpi jacupai– nircami.
50Chaimi Jesusca:
–Ri, cambaj churica ñamari alli– nijpi chai runaca, Jesús nishcata crishpaca rircallami.
51Pai ña huasiman chayagrijpica, paipajta rurajcuna tupamushpami:
–Cambaj churica ñamari alli– nircacuna.
52Shina nijpica:
–¿Ima horataj alliyarcari?– nijpi paicunaca:
–Caina chaupi punlla yallitami fiebreca anchurca– nircacuna.
53“Cambaj churica causacunmi” nishpa, chai horas shinata Jesús nishcatami yayaca yuyarirca. Chaimantami huasipi tucui causajcunandij paica crirca. 54Judeamanta Galileaman shamushpaca caihuanca ishqui cutinmi pi mana ruraipajtaca rurashpa Jesusca ricuchirca.
ప్రస్తుతం ఎంపిక చేయబడింది:
JUAN 4: QCHI04
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Quichua Chimborazo Bible Revision 2010 © United Bible Societies, 2010.