Matthew 13
13
Muchi Kaworpa Chongminkhi
(Mk 4:1-9; Luk 8:4-8)
1Khawa nikhuo takkhan Jisu'n inn kha amathaanna asuok ah tuidiil khamtiang aleisi, khawakhan ama'n kaminchu sik ah alei in-ong.
2Mipui katamtak ama koolla inlei inchun khawa jarra ama'n rakuong inkhat suungnga aluut ah alei in-ong, halli mipui katamtak in tuikham khan inleingir. Luk 5:1-3
3Khawa khan Jisu'n chongminkhina aneiya chong angjet inmani diang aleirilpi.
“Enru, leikaneipa kha amuchi kawor sik aheisuok jei. 4Ama'n leiya muchiru aheiwor pha, lekkhat in lamsirra achul, halli wa ngai inheiwa ah inruut li inbak. 5Aru lekkhat in lung chungnga neipil toomna mun ngaikhan achul, neipil inthuukmak jarra aru kha innottheiya ahongkek. 6Takkha kani hongsa phakhan achiak teii ngaikha inwuoi jei; ajarchu arajung kha inthuuk ah leisimak, khale inruoiya achiak ngaikha innot ah acharjei. 7Aru lekkhat in raling karra achul, ahongmoong takkha achiak kha raling in amakhujei. 8Aru lekkhat in neipil hoina khan achul, halli lekkhat in rajakhat, lekkhat in soomruk, khat-um lekkhat in soomthum ahong inra.””
9Halli Jisu'n ahekna ah ati, “Akuor indou ama khan rangai rase!””
Chongminkhina Ajar
(Mk 4:10-12; Luk 8:9,10)
10Khawasuo khan siamruoi ngai'n Jisu diang inhongnga inleirakel. “Angsikme nang in mipui ngaidiang chongnaril pha chongminkhina nineiman?””
11Halli Jisu'n aleimasang, “Marwaan Rengram jarra inthup ngai jetnasik nangni diang innapejei, takkha inmani diang chu emak.””
12Ajarchu mi kaneipa diang khan kheella inpedel sik eii; takkha iteii akaneimak mipa ama diangnga inphut inei lekteii kha um inkhaidel sik eii. Matt 25:29; Mk 4:25; Luk 8:18; 19:26
13Kei'n chongminkhina kaneimanna inmani diang karilna ajarchu inmani'n in-en, takkha mumu, inrangai, takkha jetmu emakli ngaidon matormu.
14Halli Isaiah chongril kha inmani diang pui ahongtung jei:
Hiwa mi ngai'n rangai chu rangai inte, takkha jetnunu;
inmani'n enchu en inte, takkha mununu, Isa 6:9,10
15ajarchu inmani malungnga jetzootmu,
inmani inkuor khan rangai zootmu
halli inmit kha inkasiingdel.
Kha emak inchu, inmani inmit in inmusik eii,
inkuor khan inrangai sik eii,
inmalung khan injetsik eii,
Pathian in ati, inmani kei diang inhong inletsik eii,
halli kei'n inmani kamindam sik eii.
16“Nangni sik ah chu, angtuk ningrawaan kathame! Ning mit in amu halli ning kuor in ajet. Luk 10:23,24
17Nangni diang inthiangnga kei'n karil khachu Pathian chongkachoi ngai li mi katuun ngai'n angme nangni imu kha inleimu zoot, takkha leimu matormu, halli angme nangni ijet ngaikha leijet matormu.
Jisu'n Muchi Kaworpa Chongminkhi kha rilcheen
(Mk 4:13-20; Luk 8:11-15)
18“Hanchu, muchi kaworpa chongminkhi in angme iti kha rangairu halli inchuru. 19Tu ennum Rengram jarra chong kha ajetli akangaidon tungmak ngai kha hiwa lamkoolla kachul muchiru khale in ang. Akathamak kha aheiwa ah inmani malung suungnga inwor muchi kha aleikhaipi. 20Lungkarra kachul muchi khachu tuka-ang in chong kha injetli innot ah karok ah kakeiluut ngaikha tina eii. 21Takkha inmani diang arajung kha inthuukmak jarra soot leidei matormu, Khawa chong jarra poongna emakli raalna aheiwa pha khan, inmani innot ah inmangjei. 22Halli raling karra kachul muchiru ngaikhan tuka-ang chong kha kajet; takkha hiwa ringkhuo jarra poongna le neile nung manuomna ngaikhan chong kha adiip ah, inmani kakara mak ngaikha atina eii. 23Halli neipil hoina munna inwor muchiru ngaikhan tuka-ang chong kha rangai li kajet: lekkhat in rajakhat, lekkhat in soomruk, halli lekkhat in soomthum kakara ngai tina eii.””
Leiharra Chongminkhina
24Jisu'n chongminkhi inkhat arilla aleiti: “Marwaan Rengram khachu miring inkhat in muchiru katha kha aleiya iwor khale in-ang. 25Halli zaankhat, mi rakip inzaal pha, ama inhalpuipa kha aheiwa ah halli gehu karkhan leiharru aworra aleisijei. 26Achiak ngaikha ahonglok halli abuo ahongsuok pha khanchu leihar ngai kha um indangjei. 27Mipa suok ngaikhan ama diang inheiwa ah inti, “‘Ocha, nang in naleiya muchiru katha niwor emak abe? honname hiwa leihar ngai kaheiwa hi?’’ 28“‘Hichu naka enzootmak lekkhat itho eii,’’ tia ama'n aleimasang. “‘Asuok ngaikhan amadiang inrakel, keini kinsili leihar ngai kinjuochuon sik hi namanuom be?’’ 29Ama'n aleimasang, “‘Chuonmaru,’’ “‘ajarchu nangni'n leihar ningchuon kaalkhan gehu lekkhat um inphoidel acha. 30Gehu le leihar kha inniya inrakhool maklaiseng moongsuom tarasu. Kei'n leikarakhool ngai diangkhan tipitakte ma-insa ah leihar kha khoomchun inlang haal sik ah khitchunru, halli gehu kha khomchun inlang kei sapang khan juothunru.’’ ””
Anchamru ah Chongminkhina
(Mk 4:30-32; Luk 13:18,19)
31Jisu'n inmani diang chongminkhina khat apenook ah ati: “Marwaan Rengram khachu miring inkhat in anchamru kha aleili ama leiya iwor hile in-ang. 32Hiwahi muchiru rakip karra akasiin khet kha eii, takkha ahongmoong pha khanchu, thingchiak ngai karra akalok khet thingkuung ahong eii. Khawajarra lairalak ah wa ngai'n inheiwali abaak ngaikhan inrabu inhong phan.””
Cholla Chongminkhina
(Luk 13:20,21)
33Jisu'n inmani diang chongminkhina inkhat arilnook ah ati: “Marwaan Rengram khachu, numeisa inkhat in chol lekkhat aleiya waipooldi saida inthum khan minchella chol hongthei maklaiseng ida khale in-ang.””
Jisu'n Chongminkhina ngai Neiman
(Mk 4:33,34)
34Jisu'n hiwa rakip ngaihi chongminkhina kha aneimanna mipui diang aleiril; ama'n chongminkhina neiman lekleiya iteii um inmani diang leirilmak. 35Ama'n hiwa itho ngaihi Pathian chongkachoipa ileiril kha huui tungnasik eii,
“Chongminkhina neimankata kei'n inmani diang chong karilsik eii;
Nuoipilchung inbool makheiya inthup rakip ngaikha inmani diang kei'n karilsuok sik eii.”” Minpkla 78:2
Jisu'n Leihar ru ah Chongminkhina Irilcheen
36Jisu'n mipui ngai ada ah inn suungtiang aluut pha, ama siamruoi ngai inheiwa ah ama diang injuoti, “Leihar ruwa chongminkhina hin angme tina keini diang narilpiro.””
37Jisu'n aleimasang, “Muchiru katha kaworpa kha Miring Sapa kha eii; 38lei khan nuoipilchung hi eii; muchiru katha ngaikhan Rengram mi ngaikha in eii; leihar ngaikhan Akathamakpa sangai kha in eii; 39Halli inhalpui leiharru kaworpa ama khan Seitan kha eii. Saangrakhool pha khan nuoipilchung hekni kha eii, halli saangkarakhool ngaikhan marwaan tirton ngaikha in eii. 40Leihar ngaikha inkhoomchunna meiya inhaalle in angrip ah, nuoipilchung hekni khannum hi angnga alasuoksik eii: 41Miring Sapa in ama marwaan tirton ngaikha juotirta mi ngai manu ah kamachul ngaile thomaksik katho ngai rakip ama Rengram makheiya alaminchunsik eii, 42halli inmani kha meisuungnga indeengluutsik eii, khawamun khan inmani chap le hakarialna inlanei sik eii. 43Pa Rengram khan Pathian mi ngai'n kani angnga inlawar sik eii. akuor indou ama khan rangai rase!
Inthup Amankatam Neinaak Chongminkhina
44“Marwaan Rengram hi, Miring inkhat in leiya inphuumma kaom amankatam neinaak inmu khale in-ang. Ama'n amakhudella karok ah asiya ineirakip ajuorra, halli akirra lei kha ajuo incho jei.
Lungman katamma Chongminkhina
45“Halli Marwaan Rengram hi, Mi inkhat in lungman katamkhet iratok khale in-ang, 46ama'n lungmankatam amu pha, ama asiya, inei rakip kha ajuorra halli khawa lungman katam kha ajuo incho jei.
Leenna Chongminkhina
47“Woikhat um, marwaan Rengram hi, ngaphung rakip kasur ngakasurmi lekkhat in tuidiil suungnga inmani leen inwor khale in-ang. 48Leen kha asip pha, inmani'n tuikham tiang inkeisuo ah halli in-in ongnga nga katha seng kha paisuungnga inthun halli kathamak sengkha inkalekjuon jei. 49Nuoipilchung hekni um hiwa laka ang sik eii: marwaan tirton ngaikhan lajuo inta mi katha ngai diangnga inphut mi kathamak ngai kha lathen inta 50halli inmani ngaikha meisuungnga inlahiailuut sik eii, khawa munkhan inmani chap le hakarialna inneisik eii.
Akathar li Amaruo neinaak
51“Hiwa rakip hi nangni ningjet jeibo?”” tia Jisu'n inmani diang aleirakel.
“Kinjetjei”” tia inleimasang.
52Halli khan ama'n aleimasang, “Hiwa tinachu, marwaan Rengramma siamruoi ka eii Sinadan ocha rakip ngai'n ama neinaak bukna makheiya inphut phur kathar li maruo heikakeisuo inn-pupa khale in-ang.””
Nazareth ah Jisu Inzootmak
(Mk 6:1-6; Luk 4:16-30)
53Jisu'n hiwa chongminkhina arilsuo pha, ama'n khawa munkha aleimathaan jei 54halli ama'n akhuo tiang akirnook jei. Inmani Synagogue khan aleiminchu, halli ama minchuna kajet rakip in inleingak ah inti, “Huwa makheiya ama'n hinnakati singwar imume?”” Inmani'n inleirakel. “Halli chuon inlak ngai hile imume? 55Amahi thingchuon kathopa sapa emak abe? Anu Mary, James, Joseph, Simon khat-um Judas anai ngai emuwabe? 56Asar ngai rakip um einile hin niomsuom emak abe? Hunname hiwa rakip ama'n imu hi?”” 57Khan intia inmani'n ama kha leizootmu jei.
Halli Jisu'n inmani diang aleimasang, “Pathian chongkachoi inkhat hi amun rakip ah khoya intho takkha akhuo li a innsuungkhur mi ngai inchu khoya thomu.”” Jn 4:44
58Ajarchu inmani'n leingamnamu jarra, khawakhan ama'n chuon-inlak kha katamma leithomak.
ప్రస్తుతం ఎంపిక చేయబడింది:
Matthew 13: KHMNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The New Testament in Kharam © The Word for the World International and NECTAR, 2021.