Mattheos 3
3
1Unkan anpetu kin hena en, Johannes baptem wicaqu ece kin he Juda tamakoce ḣewoskan ekta woyaka hi;
2Qa heya; ihduecetu po, maḣpiya wokiconze kin wanna kiyedan u ce.
3Isaya wicaśta wokcan cajeyate ciqon he dee, kaken eya; Wicaho ḣewoskan en hotanin; Itancan tacanku kin wiyeya ehnaka po, ocanku tawa kin owotanna kaga po.
4Unkan Johannes eqe tawokoyake taku wan kamel eciyapi he hin kin on kagapi, qa teḣmiso wan ipiyagkiton; unkan tawoyute kin psipsicadan qa tuḣmaga canhanpi kin hee.
5Hehan Jerusalem qa Juda qa Jordan ihdukśan tanhan owasin en hipi:
6Unkan Jordan en baptem wicaqu, woaḣtani ohdakapi.
7Unkan Pharisee qa Saddukee wicota baptem wicaqu kin en hipi wanwicayaka, hehan hewicakiya; Wamduśka wicoicage kin, wocanniye u kte cin nayecipapi kta tuwe e wahokonniciyapi he.
8Heon etanhan ihduecetupi kta iyececa waskuyeca icaḣya po:
9Qa, Abraham ateunyanpi ce, eyeciyapi kta awacinpi śni po; miye heciciyapi, Inyan kin dena etanhan Wakantanka Abraham cinca kicage kta okihi.
10Unkan wanna onspe kin can hute kin en ehnakapi; heon etanhan can otoiyohi waskuyeca waśte aicage śni kin he kawankapi qa petan eḣpeyapi ece.
11Miye nihduecetupi kta on mini on baptem cic̣upi; tuka wanji iyotan waśaka mihakam u, he tahanpe kin weciyuhe kta iyemicihantu śni; he qe Woniya Wakan qa peta on baptem nic̣upi kta.
12Icaduge nape ohna hduha, owanka tanyan hdahinte kta, qa aguyapi su kin dotopiye ohna mnakiye kta, tuka ha kin peta kasnipica śni on ḣuḣnaḣye kta.
13Hehan Jesus Galile etanhan u, qa Jordan ekta Johannes en hi, baptem qupi kta e heon.
14Tuka Johannes teḣinda qa heya; Baptem mayaqu kta iyemaceca, qa niś en mayahi he.
15Tuka Jesus ayupte c̣a heciya; Dehan iyowinyan wo; decen wicoowotanna ocowasin unśtan kta iyececa. Hehan iyowinkiya.
16Unkan Jesus baptem qupi qehan ecahankeya mini kin etanhan itawankanhde hda; unkan iho, maḣpiya kin ayuzamnipi, qa Wakantanka Taniya kin wakiyedan kaḣya kuntkiya u, qa en hiyahan, wanyaka.
17Unkan iho, maḣpiya eciyatanhan wicaho wan heya; Micinkśi waśte wakidake cin he dee, on iyomakipi ḣinca ce.
ప్రస్తుతం ఎంపిక చేయబడింది:
Mattheos 3: DAKOTANT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Copyright 2015 American Bible Society. All Rights Reserved.