TI GƐ́Ɛ́ HAÍTII 11
11
Pítɛ i volú haa léni Jɛlúsɛl̃ɛ Yalá fɛ́li mbélaitii ma
1Ngalángi géélaitii ɛ́ɣɛ ti mbála Yalá fɛ́li mbélaitii ti ɣɛ́i Judíya lataí h̃u, tí mɛniní ngáá kɛ sítii taa ngáá Júsua bɛ́lɛ tí lókoheinga Ngalá ndaa wói wú. 2Ná Pítɛ í lɛ́ɛ́ni Jɛlúsɛl̃ɛ taa walái h̃u, Júsuai sítii í ɣɛ́i ti gi má ngáá kɛ ti sítii tɔve pɛlɛ vólu taa ngáá Júsua tɔɔ ɣɛ́a pɛlɛ Ngala fɛ́lima, ti vɛ́lɛni Pítɛ wa, 3ti ɣɛ́ ma, “Yí liingɔ́ nungái sítii ti vɛ́lɛi wu ti lɔ́vengɔ láá le pɛ́lɛ vólu, wáá laaỹɛ́ wáá tiyéni.” 4Kɛ Pítɛ i tɔkúla héinga í faí sí kpɛ́lɛɛ súúɣɛ ngáá ti ye jɔ́ kíya nɔ́ɔ í híyani.
5I ɣɛi ti w̃a, “Ná ngí ɣɛ́i Jɔ́pa taí h̃u ngáá Ngala fɛ́li, kɛ ngí gélunga ngí ŋani tá lɔ kɛ kíya kula walá í na, njeingɔ́ i ɣɛi lá áá gúla ngeleya, í hitɛ ndɔwɔlɔ́i wa mbéi ngi ɣɛ́i na, kulangɔ́ ngáá ŋani áá ɣɛ́ hóuni ngolí ya nááningɔi wa. 6Ngí wɔ́lɛni su, ngí suwa híí kínɛi tɔ́ su ɛ́ɣɛ ndɔbɔ húwaitii ɛ́ɣɛ kaaliáitii ɛ́ɣɛ w̃ɔniáitii kpɛ́lɛɛ ti su. 7Kɛ ngí ngoo tá ỹɛ́ninga, i ɣɛ má, ‘Pítɛ, yooɣé, yí suwaí sítii paa, yí mɛ.’ 8Kɛ ngí ngi ná yápotenga, ngí ɣɛ ma, ‘Tɔɔỹáá hááw̃a, Kɛɛɣɛ́ Ngalá, ngáá kɛ́ma! Nápa ngáá nɛ́ɛ́ kpaló mba wɔ́li mɛ́ni.’ 9Kɛ ngoí i mɔɔ lengá ma, ‘Yálaa ŋani fíli tóli ngáá kpaló mba wɔ́li sí Ngalá ngɛ́i tolí ngáá kpaló mba wɔ́li.’ 10Faí sí i hiyandáá ɣɛ́ni kɛ sáwa, aáva kɛ ngɛíngi ná kulangɔ́ í ɣɛ́i la ngáá kula, i yangáimanga múl̃ɔ ngeleí ya. 11Ngamá nɔ́ɔ, kɛ siỹɛ sáángɔi sítii Kɔníliya í ti lɔ́veni ngéle, tiyɛ́i ti gúlani Sɛsɛ́liya taa h̃u, tí váánga, tí lo pɛlɛ́i sí la ngí ɣɛ́i mbu. 12Hɛ́ɛ́ma Ỹínangi í ndé ma ngáá ngálaa ngáli pú gɔwɔ́ h̃u lii haáw̃a naá tiyéni. Aáva mu mbála Yalá fɛ́li mbélaa ngɔ́hitangɔi sítii, naá tiyéni ní liiní, ní lɛ Kɔníliya vɛ́lɛi wu. 13Kɛ i suuɣɛngá ngáá ni ye kíya Ngalángi w̃áleka í gúlangɔ ngaah̃ú ngi vɛ́lɛi wu, ná vólu, kíya ná í ndéni ma, i ɣɛ ma, ‘Keelá lɔ́ve Jɔ́pa taa h̃u Sáimɔ vomá lɛ́i ndaahéi pékai í ngáá Pítɛ. 14Aá lɔɔ vá ngáá keela woó wú yéle sí áá va kɛ́ma ngáá háwu yá ɛ́ɣɛ í vɛ́lɛ lowaí, wú wúmaa áá wo.’ ” 15Pítɛ i ndíni ngú ma ngáá laa wóó, i ɣɛ ta, “Ná nɔ́ɔ léi ngí tɔkúla héini ngáá yɛpɛndáá ti yelé, Hɛ́ɛ́ma Ỹínangi i vuni ti h̃u kíya nɔ́ɔ muỹá bɛ́lɛ í vúni mu h̃u hése wɔlɔ. 16Kɛ kí ngí hítɛnga sí wa Ndemɔí Ngalá ngí ndéni, í ɣɛ́i ta, ‘Njɔú i nguyaí wóni ngáá njɛí, kɛ́ Ngalá tɔɔ vá nguyaí wóma ngáá wú ye ngáá ngi Hɛ́ɛ́ma Ỹínangi.’ 17Faalɔ, ná wɔli Ngalá ngáá ngi hémbɛ wɔlingí sí í féni mu yaá ná mu láni ngáá Ndemɔí Jísu Kílisitii áa fe ti yaa, kɛ ele wáá ngáá ngé ngáá ló Ngalá ndaa wu?”
18Ná ti sí ỹɛ́nini, faa véka fíli aa mɔɔ ɣɛi ti la tɔɔ́ nde. Kɛ́ ti ɣɛ́i nɔ́ɔ taá Ngalá ndaaw̃áálɛ, táá ɣɛ́ ta, “Ngalá ngí kɛngá ngáá háwu sítii taa ngáá Júsua bɛ́lɛ táa volú yáfe faa ỹɔ́i wa, táa ndɛɛh̃u níína w̃aahɔ́lɔ sí í ngáá kúnafɔ lɛ́ɛ́h̃ui.”
Átiyɔ taí h̃u Yála fɛli mbélaitii
19Sítii ti langɔ́ ngáá Jísu ti vahá fáhangɔ i ɣɛi lá su kɔwɔ́ato faa bángi wa í láni ti w̃a ná h̃u nungáitii tí Sitívi vaaní. Ti lɛ́ingaa ti liiní Fɔnísiya lataí h̃u ɛ́ɣɛ Sáipulɔ lɔwɔlɔí h̃u ɛ́ɣɛ Átiyɔ taa h̃u táa Ngalangí gééla woí le Júsuai séɣe héɣe má. 20Kɛ́ ná fíli su, siỹɛngái sítii ti langɔ́ ngáá Jísu ti lɛ́ingaa gúlani Sáipulɔ ɛ́ɣɛ sítii ti gúlani Saílini taa walái h̃u, tí lííni Átiyɔ, tí pɛ́lɛ keela wóo vándai léma sítii ma taa ngáá Júsua tiyá bɛ́lɛ ma kɔwɔ́ato Ndemɔí Jísu wa. 21Aáva Ndemɔí Ngalángi yákpangi i ɣɛi ti h̃u. Faalɔ, nuu bíh̃iw̃aa ti vóteni, tí la ngáá Ndemɔí Jísu.
22Ná Jɛlúsɛl̃ɛ Yála fɛ́li mbélaitii tí fái sítii maa woo ỹɛ́nini, ti Bánaba lɔvení Átiyɔ. 23Ná í foloní na, í tɔní kíya Ngalá ngi ɣɛ́i áa bɔ́ ti wa ngwala, i kooh̃unɛ́ɛ́ni, aáva i nduwúh̃ulɛi ngáá ti kpɛ́lɛɛ ngáá ti lo Ndemɔí Jísu ndá gákai w̃a tɔɔỹái h̃u ngáá ti liítii kpɛ́lɛɛ. 24Bánaba i ɣɛi ngáá nuu vánda Hɛ́ɛ́ma Ỹínangi i polú, nda ngí su ngwala. Aáva nuu yambɔ́ɔ́lɔngɔ wala ti vóteni Ndemɔí Jísu wa.
25Kɛ Bánaba i liingá Tásɔɔ taa h̃u ngáá í Sɔ́ɔ wɔlí. 26Ná í tɔ́ni, i liiní lá Átiyɔ. Faalɔ, fowó yílaa sú kínɛi Bánabani ngaa Sɔ́ɔ tɔ́ɔ maakpɔ hóu taá taí ná h̃uu Yalá fɛ́li mbélaitii táa nuu bíh̃iw̃aa galámbo. Aáva Átiyɔ hése tɔ tí ndaaheí pɛ́lɛni na Jísu volú yélaitii ma ngáá Kílisitii vóngaitii.
27Ná h̃uu vá Ngalá ndaa háá lé mbélaitii tɛingáá ti gúlani Jɛlúsɛl̃ɛ tí lí Átiyɔ. 28Ti tá yiláá sí ndaahéingi i ɣɛi ngáá Agábɔ i wuyoɣéni, í ló Hɛ́ɛ́ma Ỹínangi yákpangi h̃u, sí í ɣɛ́i áá va ɣɛ́ma, í nde, í ɣɛ ta, “Ndɔlɛ walá lɔɔ vá gulamá, í híya hiyá Lóómi ndɔwɔlɔí sí kpɛ́lɛɛ sú.” Aáva sí i hitɛní nga naa h̃u siỹɛndópoi sí tɔ́ɔ ɣɛ́ ma Kulɔ́diyasi ngi w̃ásandai h̃u. 29Kɛ́ Jísu volú yélaitii ti faa h̃uubatɛ́ mbóni ngáá sí fíli ti yákpangi áá hómbo ma bɛ́kpɛ tí fe, tí tɔve ti mbála Yalá fɛli mbélaitii sítii ngelé ti ɣɛ́i héini Judíya lataí h̃u ngáá nátii ti lóko bɔmba. 30Tiyá vá ti yaa wɔ́lingaitii féni. Aáva tí tɔvení ngáá Bánabani ngaa Sɔ́ɔ Judíya Yalá fɛ́li mbélai ti géle ɣele mbeláitii ngéle.
ప్రస్తుతం ఎంపిక చేయబడింది:
TI GƐ́Ɛ́ HAÍTII 11: KNNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bandi New Testament © Bible Society in Liberia, 2000