TI GƐ́Ɛ́ HAÍTII 16
16
Tímoti i bahaní Pɔ́ɔni ngaa Sáilɔ wa
1Kɛ Pɔ́ɔ i liingá Dɛ́bi taa h̃u, i gúla na, í lí Lésitula taa h̃u. Naa lɔ í Jísu volú w̃ɔ́ɔ́ yiláá mááleni na taa ɣɛ́ ma Tímoti. Tímoti sí ngi njéé i ɣɛi ngáá Júsu w̃ɔɔ aáva ndangɔ́ ngáá Jísu. Kɛ́ Tímoti kɛ́ɛ́ɣɛ i ɣɛi ngáá Gilísi w̃ɔɔ. 2Ngala fɛ́li mbélaitii ti ɣɛ́i Lésitula ɛ́ɣɛ Ekóniya taa h̃u, ti yɛ́pɛni kɔwɔ́ato Tímoti wa ngáá pangɔ́. 3Pɔ́ɔ i ɣɛi loí í ngeɣé taá laá ti lí siyangí w̃a. Faalɔ, i tɔvení pɛ́lɛ vólu, bɔw̃álale Júsuaitii ti ɣɛ́i héini tataí ná h̃u, ti ɣɛ́i faa wɔ́lɔ mba ngáá kɛ Tímoti ngi kɛ́ɛ́ɣɛ lɔ ngáá Gilísi w̃ɔɔ. 4Kɛ kíya fíli tɔ́ɔ́ lɛ́ taítii su, tɔ́ɔ́ savaítii nde nungáitii ma ngáá ti gólo mbu. Savaí sítii ngi ɣɛi ngáá sí Ngalángi géélaitii taá kele ɣelé mbélaitii Ngala fɛ́li mbélaitii faaw̃a tí kpátɛni Jɛlúsɛl̃ɛ. 5Faalɔ, Ngala fɛ́li mbélaitii ti h̃úú í ɣɛ́i áá ba ti lángitii su, aáva ngele fíli ɔ́ɔ wó, ta ɔ́ɔ́ báha ti wa.
Pɔ́ɔ gelúndai Túlowa
6Pɔ́ɔni ngaa ngi híya polu yeláitii ti lɔ́ve tɔvéni tataí sítii su taa ti lolí ngáá Felíjiya ɛ́ɣɛ Galésiya, bɔw̃álale Hɛ́ɛ́ma Ỹínangi aa kɛní tɔɔ́ Ngalá ndaa wói le Ésiya lataí h̃u. 7Ná tí vááni Mésiya bandoí w̃a, tí yakpáni ngáá ti lɛ́ Bɛtíniya lataí h̃u. Kɛ́ Jísu Ỹínangi aa kɛní tɔɔ́ lɛ́ na. 8Faalɔ, ti lɔ́veni Mésiya lataí h̃uu w̃á, ti li Túlowa taa h̃u. 9Pɔ́ɔ i geluní kpindíi ná, i Mɛsedóniya lataí h̃u h̃íỹɛndopo yiláá tɔ́ lóóni áa maanɛ́ɛ́nɛ, áá ɣɛ́ ma, “Vá Mɛsedóniya lataí h̃u, yí bɔ́ ni wa.” 10Ná fái sí í gúlani su, ni#16:10 ni Taíngi na h̃u va kɔlɔí sí vɔ́nɛ mɔ́i Lúu í bahaní Pɔ́ɔni mba ti li tataí sí h̃u taa ɣɛ ma Mɛsedóniya. wúyoɣeni náa ngamá ní pele hóu ngáá liilaá Mɛsedóniya. Ní ndení naá ngáá kɛ Ngalá tɔ í ni lolíngɔ na ngáá ni Ngalángi gééla woo vandaí le ti w̃a.
Lédiya vótendai Ngala fái wa Félepa
11Ná ni gúlani Túlowa wa, ní liiní yívoi la, ni víli na keléngi h̃u ní li tííŋ ỹandái ná naa w̃ááyele mbélengɔ ngáá njɛí, taa tolí ngáá Samɔtíle. Ná ngele vekái í wóni, ní liiní naá Niyapóle taa h̃u. 12Ná ni gúlani naa wa, ní liiní Félepa taa h̃u mbéi Lóómingai ti ɣɛ́i naa loní. Aáva laá lɔ í ɣɛ́i maifɔ́lɔ tíngi h̃u Mɛsedóniya lataí ná h̃u. Aáva ní foló lɛ́ingaa ɣɛ́ni na. 13Ná í ɣɛ́i ngáá Ndɛ́ɛ́lɛmbo Ngála Fɛ́li Fóloi w̃a, ni gúlani taí wá, ní li njɛí la mbéi í ɣɛ́i ni gi má ngáá Ngala fɛ́li máá lɔ́ na. Ni héini, ní tɔ́kula héi ngáá yɛpɛndáá nyah̃áitii ngelé ti yatɛ́ngɔ í ɣɛi la mba na. 14Nyah̃ái nátii su ti ɣɛ́i taá wolílo, nyah̃ápo yiláá i ɣɛí na taa ɣɛ́ ma Lédiya. Laáva nyah̃ápoi sí i ɣɛi ngáá kula biỹa maa híya mɔ́ɔ. I gulaní taa walái ná h̃u taa tolí ngáá Tayatálɔ. Aáva i ɣɛi laní ngáá Ngala. Ndemɔí Ngalá i ki mái laawóni kɛinɔɔ́ í wolílo keela woí sí w̃a Pɔ́ɔ í ɣɛ́i áá nde. 15Ná í nguyaí w̃aahɔ́lɔni taá ngi vɛ́lɛ lowaí wúu yélaitii, i ni lolíni ngi vɛ́lɛi wu, i ɣɛ ni w̃a, “Ná wáá ɣɛ́ ngéɣengɔ ngáá kɛ Ngala fɛ́li mɔ́ɔ waa ngáá ngé Ndemɔí Jísu w̃aa véle w̃á, a vá wú ɣɛ́ ní vɛ́lɛi wu.” Aáva, i ni gi mái vóteni, ní lí.
Pɔ́ɔni ngaa Sáilɔ ti ɣɛ́i kpindi vɛlɛ́i wu Félepa
16I ɣɛi ngáá hɔ́wɔ ta, ná ni ɣɛ́i naa lií ỹandái ná í ɣɛ́i ngáá Ngala fɛ́li mái, kɛ ní w̃ɛɛ́nga naá nduwɔ lopó ỹah̃álou yiláá lɛí ỹína nyɔí í ɣɛ́i polú sí ɔ́ɔ́ kɛ ngáá háwu nyah̃alói ná í sítii nde tɔ́ɔ́ ɣɛ́ taa vá ɣɛ́ma. I ɣɛi áá naholó bíh̃iw̃aa w̃aahɔlɔ ngi wú su lɔngí h̃u sítii mbɛ í ɣɛ́i ti wu ngáá nduwɔ lopó. 17Nyah̃alói sí i hitɛní ni volú naá Pɔ́ɔni áá woo lɛ́, áá ɣɛ́ ta, “Siỹɛngái sítii tiyá lɔ ngáá Ngutuwɔ́ Yála Ngwalaí yénge mbelaa. Tiyá lɔ táa yɛ́pɛ wú yéle kɔwɔ́ato peleí wa nuu áá ngumaawóngi w̃ááhɔlɔ la!” 18Nyah̃alói i ɣɛi nɔ́ɔ kélei ni volú foló bíh̃ingɔ hááw̃a aa ngoo yílaangi sí le. Ngapúmai náa, Pɔ́ɔ lií i ɣɛ́i náa súpulu sɛpɛlɛ́ koo h̃u, kɛ i votengá, í nde ỹína ỹɔí w̃a, i ɣɛ ma, “Jísu Kílisitii laahéingi h̃u, ngí ndengá í w̃á ngáá yí léve nyah̃alói sí vólu.” Ngamá nɔ́ɔ, kɛ ỹína ỹɔ́i i levénga nyah̃alói volú. 19Sítii nyah̃alói sí í ɣɛ́i ti wu ngáá nduwɔ lopó, ná tí ngátɔni ngáá kɛ ti náholo hɔ́lɔ pélei ti gitóngɔ í ɣɛ́i lá mba maa í levénga, ti Pɔ́ɔni ngaa Sáilɔ houní, tí kpá tí w̃a ngáá kule, tí lí ngáá ti ye ngití wálai ya masangái ngelé ti gɔsɔ́ fááw̃a. 20Tí lííni ngáá ti ye masangái ngelé, ti ɣɛ́ masangái ma, “Siỹɛngái sítii tɔ ngáá Júsua, aáva tí vaá kpɔɔlɔ wála laa lévema mu lái h̃u. 21Ná wáá ngáá kalambongí táá mbo aa pele w̃a mu hávai h̃u ngáá tɔɔ́ mbo. Kule áá mu w̃a muỹɛ́i mu ngáá Lóómingai mɔɔ́ lokohéi mbu kɛlaa mɔɔ híya lá.” 22Faŋaí i bahaí nungái sítii mba táa Pɔ́ɔni ngaa Sáilɔ wu ndɔmbú fái sí h̃u. Masangái tí ndéni sóyaitii ma ngáá ti Pɔ́ɔni ngaa Sáilɔ w̃aagúla, tí tí léve. 23Ná tí tí léveni pánda vanda, tí tí vílini náa kpindi vɛlɛ́i wu. Masangái tí ndéni kpindi vɛlɛ́ w̃ááh̃u béle mɔ́i w̃á ngáá ngaah̃ú í ɣɛ́ gíte ti wa ngáá pangɔ́. 24Ná ti ná léni kpindi vɛlɛ́ w̃ááh̃u belé mɔ́i w̃a, i Pɔ́ɔni piliní lííwaa lómui h̃u í ɣɛ́i kpindi vɛlɛ́i ná wu, í ti víli kpeléwɔi ya.
25Kuyá liiwái i ɣɛi nɔ́ɔ áá foló ma, kɛ Pɔ́ɔni ngaa Sáilɔ tiyá tɔ taá Ngala fɛ́li táa Ngalá ngúleitii sɔɔlɛ́. Aáva pelésina vekaítii ti ɣɛ́i taá wolílo ti w̃a. 26Ngamá nɔ́ɔ, kɛ ndɔwɔlɔí laa tɔ́ áá bɛ́li kpíli bili ngwala ngáá pɛlɛ́ gɔ́wɔi ɣéle tɔ íwaa bɛ́li. Ngaah̃ú w̃a nɔ́ɔ, kɛ kóngitii kpɛ́lɛɛ ti laa í wongá aáva njɔlɔwɔítii ti ɣɛ́i pelésinaitii mba kpɛ́lɛɛ i gula kuláni í vú. 27Kɛ kpindi vɛlɛ́ w̃ááh̃u béle mɔ́i i wuyoɣénga, aáva ná í tɔ́ni kpindi vɛlɛ́i laa góngitii ndaawó ndááwongɔ, i ngi wóɣai lálani taangí ya ngáá í bɔwɔ́ váa, bɔw̃álale i ɣɛi ki má ngáá kɛ pelésinaitii ti lɔ́ɔ́wunga. 28Kɛ́ Pɔ́ɔ i woo gúlani, i ɣɛ ma, “Yaá ỹanda héi bɔwɔ́ wa. Ni kpɛ́lɛɛ niỹá lɔ mbéi!”
29Kɛ kpindi vɛlɛ́ w̃ááh̃u belé mɔ́i i lámbo maalólinga, í wála kpindi vɛlɛ́i wu ngáá viliỹɛ́, í h̃úndɛ Pɔ́ɔni ngaa Sáilɔ gakála suu áa bɛ́li. 30Kɛ i gulangá ngáá ti ye ngitíí ya, í ti w̃ɔ́ɔ́ni, i ɣɛ ti w̃a, “Ní káwalani, ndeé lɔ kule í ma ngáá ngí kɛ ngí ngumaawóngi w̃ááhɔlɔ?”
31Kɛ nátii tí ngoo yápotenga, ti ɣɛ́ má, “Lá ngáá Ndemɔí Jísu aáva yáá ngumaawóngi w̃ááhɔlɔ, wáá í vɛ́lɛ lowa wuu yélaitii.” 32Kɛ tí keela wói lengá ma taá ngi vɛ́lɛ lowa wuu yélaitii kpɛ́lɛɛ kɔwɔ́ato Ndemɔí Jísu wa. 33Táingi ná kái káima kpíndii ná, kpindi vɛlɛ́ w̃ááh̃u béle mɔ́i i liiní ngáá ti ye, í ti válaitii ngangúya. Ngamá nɔ́ɔ, laá p̃ɛ́ɛ́ ɛ́ɣɛ ngi vɛ́lɛ lowa wuu yélaitii kpɛ́lɛɛ ti nguyaí w̃ááhɔlɔni. 34Kpindi vɛlɛ́ w̃ááh̃u béle mɔ́i i liiní ngáá ti ye ngi vɛ́lɛi wu, í mɛɛní gúla kɛlɛ́ma ti yɛ. Aáva ngi vɛ́lɛ lowa wuu yélaitii kpɛ́lɛɛ ti góóh̃unɛɛngɔ i ɣɛi la ngwála bɔw̃álale ti ɣɛ́i náa laí ngáá Ngalá.
35Ná ngele í wóni, kɛ masangái tí bɔ́ilopoai tɔvengá kpindi vɛlɛ́ w̃ááh̃u béle mɔ́i yelé ngáá tí nde ma ngáá í lókogula siỹɛngái nátii su.
36Kpindi vɛlɛ́ w̃ááh̃u belé mɔ́i i ndení náa Pɔ́ɔ w̃a, i ɣɛ ma, “Masangáitii tí ndengá má ngáá ngí lókogula náá wú h̃ú wáá Sáilɔ. Faalɔ, faa áá mɔɔ wú wa, a lí náa. A lí ndiilɛí h̃u!”
37Kɛ́ Pɔ́ɔ i ndení bɔ́ilopoai ma, i ɣɛ ti w̃a, “Taá ni gɔsɔ́ngɔ aáva tí ni léve kpɔ ndííwaa kíya bɛ́lɛ ni ngáá Lóómingaa, ná vólu, tí ni víli kpindi vɛlɛ́i wu. Sí h̃uu lɔ náa ti longɔ́ tí bé ni wa ndɔɔwu h̃ú? Aa pele w̃a! Bɛlɛ́ masangái kíte, ti vá, tí ni gúla.”
38Bɔ́ilopoai ti sí lení masangái ma. Aáva ná masangái ti sí ỹɛ́nini ngáá kɛ Pɔ́ɔni ngaa Sáilɔ tiyá lɔ ngáá Lóómingaa, ti h̃úú í bɛ́lini. 39Tí vááni, ti Pɔ́ɔni ngaa Sáilɔ w̃aanɛ́ɛ́nɛ, tí tí gúla kpindi vɛlɛ́i wu, tí nde ti w̃a ngáá ti gúla taí ná wa. 40Ná Pɔ́ɔni ngaa Sáilɔ ti gúlani kpindi vɛlɛ́i wu, tí liiní náa Lédiya vɛ́lɛi wu, tí tí mbála Yalá fɛli mbélaitii maalé na, aáva tí nduwúh̃ulɛni ngáá ti ye, ná vólu, ti gúlani naa wa, tí lí.
ప్రస్తుతం ఎంపిక చేయబడింది:
TI GƐ́Ɛ́ HAÍTII 16: KNNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bandi New Testament © Bible Society in Liberia, 2000
TI GƐ́Ɛ́ HAÍTII 16
16
Tímoti i bahaní Pɔ́ɔni ngaa Sáilɔ wa
1Kɛ Pɔ́ɔ i liingá Dɛ́bi taa h̃u, i gúla na, í lí Lésitula taa h̃u. Naa lɔ í Jísu volú w̃ɔ́ɔ́ yiláá mááleni na taa ɣɛ́ ma Tímoti. Tímoti sí ngi njéé i ɣɛi ngáá Júsu w̃ɔɔ aáva ndangɔ́ ngáá Jísu. Kɛ́ Tímoti kɛ́ɛ́ɣɛ i ɣɛi ngáá Gilísi w̃ɔɔ. 2Ngala fɛ́li mbélaitii ti ɣɛ́i Lésitula ɛ́ɣɛ Ekóniya taa h̃u, ti yɛ́pɛni kɔwɔ́ato Tímoti wa ngáá pangɔ́. 3Pɔ́ɔ i ɣɛi loí í ngeɣé taá laá ti lí siyangí w̃a. Faalɔ, i tɔvení pɛ́lɛ vólu, bɔw̃álale Júsuaitii ti ɣɛ́i héini tataí ná h̃u, ti ɣɛ́i faa wɔ́lɔ mba ngáá kɛ Tímoti ngi kɛ́ɛ́ɣɛ lɔ ngáá Gilísi w̃ɔɔ. 4Kɛ kíya fíli tɔ́ɔ́ lɛ́ taítii su, tɔ́ɔ́ savaítii nde nungáitii ma ngáá ti gólo mbu. Savaí sítii ngi ɣɛi ngáá sí Ngalángi géélaitii taá kele ɣelé mbélaitii Ngala fɛ́li mbélaitii faaw̃a tí kpátɛni Jɛlúsɛl̃ɛ. 5Faalɔ, Ngala fɛ́li mbélaitii ti h̃úú í ɣɛ́i áá ba ti lángitii su, aáva ngele fíli ɔ́ɔ wó, ta ɔ́ɔ́ báha ti wa.
Pɔ́ɔ gelúndai Túlowa
6Pɔ́ɔni ngaa ngi híya polu yeláitii ti lɔ́ve tɔvéni tataí sítii su taa ti lolí ngáá Felíjiya ɛ́ɣɛ Galésiya, bɔw̃álale Hɛ́ɛ́ma Ỹínangi aa kɛní tɔɔ́ Ngalá ndaa wói le Ésiya lataí h̃u. 7Ná tí vááni Mésiya bandoí w̃a, tí yakpáni ngáá ti lɛ́ Bɛtíniya lataí h̃u. Kɛ́ Jísu Ỹínangi aa kɛní tɔɔ́ lɛ́ na. 8Faalɔ, ti lɔ́veni Mésiya lataí h̃uu w̃á, ti li Túlowa taa h̃u. 9Pɔ́ɔ i geluní kpindíi ná, i Mɛsedóniya lataí h̃u h̃íỹɛndopo yiláá tɔ́ lóóni áa maanɛ́ɛ́nɛ, áá ɣɛ́ ma, “Vá Mɛsedóniya lataí h̃u, yí bɔ́ ni wa.” 10Ná fái sí í gúlani su, ni#16:10 ni Taíngi na h̃u va kɔlɔí sí vɔ́nɛ mɔ́i Lúu í bahaní Pɔ́ɔni mba ti li tataí sí h̃u taa ɣɛ ma Mɛsedóniya. wúyoɣeni náa ngamá ní pele hóu ngáá liilaá Mɛsedóniya. Ní ndení naá ngáá kɛ Ngalá tɔ í ni lolíngɔ na ngáá ni Ngalángi gééla woo vandaí le ti w̃a.
Lédiya vótendai Ngala fái wa Félepa
11Ná ni gúlani Túlowa wa, ní liiní yívoi la, ni víli na keléngi h̃u ní li tííŋ ỹandái ná naa w̃ááyele mbélengɔ ngáá njɛí, taa tolí ngáá Samɔtíle. Ná ngele vekái í wóni, ní liiní naá Niyapóle taa h̃u. 12Ná ni gúlani naa wa, ní liiní Félepa taa h̃u mbéi Lóómingai ti ɣɛ́i naa loní. Aáva laá lɔ í ɣɛ́i maifɔ́lɔ tíngi h̃u Mɛsedóniya lataí ná h̃u. Aáva ní foló lɛ́ingaa ɣɛ́ni na. 13Ná í ɣɛ́i ngáá Ndɛ́ɛ́lɛmbo Ngála Fɛ́li Fóloi w̃a, ni gúlani taí wá, ní li njɛí la mbéi í ɣɛ́i ni gi má ngáá Ngala fɛ́li máá lɔ́ na. Ni héini, ní tɔ́kula héi ngáá yɛpɛndáá nyah̃áitii ngelé ti yatɛ́ngɔ í ɣɛi la mba na. 14Nyah̃ái nátii su ti ɣɛ́i taá wolílo, nyah̃ápo yiláá i ɣɛí na taa ɣɛ́ ma Lédiya. Laáva nyah̃ápoi sí i ɣɛi ngáá kula biỹa maa híya mɔ́ɔ. I gulaní taa walái ná h̃u taa tolí ngáá Tayatálɔ. Aáva i ɣɛi laní ngáá Ngala. Ndemɔí Ngalá i ki mái laawóni kɛinɔɔ́ í wolílo keela woí sí w̃a Pɔ́ɔ í ɣɛ́i áá nde. 15Ná í nguyaí w̃aahɔ́lɔni taá ngi vɛ́lɛ lowaí wúu yélaitii, i ni lolíni ngi vɛ́lɛi wu, i ɣɛ ni w̃a, “Ná wáá ɣɛ́ ngéɣengɔ ngáá kɛ Ngala fɛ́li mɔ́ɔ waa ngáá ngé Ndemɔí Jísu w̃aa véle w̃á, a vá wú ɣɛ́ ní vɛ́lɛi wu.” Aáva, i ni gi mái vóteni, ní lí.
Pɔ́ɔni ngaa Sáilɔ ti ɣɛ́i kpindi vɛlɛ́i wu Félepa
16I ɣɛi ngáá hɔ́wɔ ta, ná ni ɣɛ́i naa lií ỹandái ná í ɣɛ́i ngáá Ngala fɛ́li mái, kɛ ní w̃ɛɛ́nga naá nduwɔ lopó ỹah̃álou yiláá lɛí ỹína nyɔí í ɣɛ́i polú sí ɔ́ɔ́ kɛ ngáá háwu nyah̃alói ná í sítii nde tɔ́ɔ́ ɣɛ́ taa vá ɣɛ́ma. I ɣɛi áá naholó bíh̃iw̃aa w̃aahɔlɔ ngi wú su lɔngí h̃u sítii mbɛ í ɣɛ́i ti wu ngáá nduwɔ lopó. 17Nyah̃alói sí i hitɛní ni volú naá Pɔ́ɔni áá woo lɛ́, áá ɣɛ́ ta, “Siỹɛngái sítii tiyá lɔ ngáá Ngutuwɔ́ Yála Ngwalaí yénge mbelaa. Tiyá lɔ táa yɛ́pɛ wú yéle kɔwɔ́ato peleí wa nuu áá ngumaawóngi w̃ááhɔlɔ la!” 18Nyah̃alói i ɣɛi nɔ́ɔ kélei ni volú foló bíh̃ingɔ hááw̃a aa ngoo yílaangi sí le. Ngapúmai náa, Pɔ́ɔ lií i ɣɛ́i náa súpulu sɛpɛlɛ́ koo h̃u, kɛ i votengá, í nde ỹína ỹɔí w̃a, i ɣɛ ma, “Jísu Kílisitii laahéingi h̃u, ngí ndengá í w̃á ngáá yí léve nyah̃alói sí vólu.” Ngamá nɔ́ɔ, kɛ ỹína ỹɔ́i i levénga nyah̃alói volú. 19Sítii nyah̃alói sí í ɣɛ́i ti wu ngáá nduwɔ lopó, ná tí ngátɔni ngáá kɛ ti náholo hɔ́lɔ pélei ti gitóngɔ í ɣɛ́i lá mba maa í levénga, ti Pɔ́ɔni ngaa Sáilɔ houní, tí kpá tí w̃a ngáá kule, tí lí ngáá ti ye ngití wálai ya masangái ngelé ti gɔsɔ́ fááw̃a. 20Tí lííni ngáá ti ye masangái ngelé, ti ɣɛ́ masangái ma, “Siỹɛngái sítii tɔ ngáá Júsua, aáva tí vaá kpɔɔlɔ wála laa lévema mu lái h̃u. 21Ná wáá ngáá kalambongí táá mbo aa pele w̃a mu hávai h̃u ngáá tɔɔ́ mbo. Kule áá mu w̃a muỹɛ́i mu ngáá Lóómingai mɔɔ́ lokohéi mbu kɛlaa mɔɔ híya lá.” 22Faŋaí i bahaí nungái sítii mba táa Pɔ́ɔni ngaa Sáilɔ wu ndɔmbú fái sí h̃u. Masangái tí ndéni sóyaitii ma ngáá ti Pɔ́ɔni ngaa Sáilɔ w̃aagúla, tí tí léve. 23Ná tí tí léveni pánda vanda, tí tí vílini náa kpindi vɛlɛ́i wu. Masangái tí ndéni kpindi vɛlɛ́ w̃ááh̃u béle mɔ́i w̃á ngáá ngaah̃ú í ɣɛ́ gíte ti wa ngáá pangɔ́. 24Ná ti ná léni kpindi vɛlɛ́ w̃ááh̃u belé mɔ́i w̃a, i Pɔ́ɔni piliní lííwaa lómui h̃u í ɣɛ́i kpindi vɛlɛ́i ná wu, í ti víli kpeléwɔi ya.
25Kuyá liiwái i ɣɛi nɔ́ɔ áá foló ma, kɛ Pɔ́ɔni ngaa Sáilɔ tiyá tɔ taá Ngala fɛ́li táa Ngalá ngúleitii sɔɔlɛ́. Aáva pelésina vekaítii ti ɣɛ́i taá wolílo ti w̃a. 26Ngamá nɔ́ɔ, kɛ ndɔwɔlɔí laa tɔ́ áá bɛ́li kpíli bili ngwala ngáá pɛlɛ́ gɔ́wɔi ɣéle tɔ íwaa bɛ́li. Ngaah̃ú w̃a nɔ́ɔ, kɛ kóngitii kpɛ́lɛɛ ti laa í wongá aáva njɔlɔwɔítii ti ɣɛ́i pelésinaitii mba kpɛ́lɛɛ i gula kuláni í vú. 27Kɛ kpindi vɛlɛ́ w̃ááh̃u béle mɔ́i i wuyoɣénga, aáva ná í tɔ́ni kpindi vɛlɛ́i laa góngitii ndaawó ndááwongɔ, i ngi wóɣai lálani taangí ya ngáá í bɔwɔ́ váa, bɔw̃álale i ɣɛi ki má ngáá kɛ pelésinaitii ti lɔ́ɔ́wunga. 28Kɛ́ Pɔ́ɔ i woo gúlani, i ɣɛ ma, “Yaá ỹanda héi bɔwɔ́ wa. Ni kpɛ́lɛɛ niỹá lɔ mbéi!”
29Kɛ kpindi vɛlɛ́ w̃ááh̃u belé mɔ́i i lámbo maalólinga, í wála kpindi vɛlɛ́i wu ngáá viliỹɛ́, í h̃úndɛ Pɔ́ɔni ngaa Sáilɔ gakála suu áa bɛ́li. 30Kɛ i gulangá ngáá ti ye ngitíí ya, í ti w̃ɔ́ɔ́ni, i ɣɛ ti w̃a, “Ní káwalani, ndeé lɔ kule í ma ngáá ngí kɛ ngí ngumaawóngi w̃ááhɔlɔ?”
31Kɛ nátii tí ngoo yápotenga, ti ɣɛ́ má, “Lá ngáá Ndemɔí Jísu aáva yáá ngumaawóngi w̃ááhɔlɔ, wáá í vɛ́lɛ lowa wuu yélaitii.” 32Kɛ tí keela wói lengá ma taá ngi vɛ́lɛ lowa wuu yélaitii kpɛ́lɛɛ kɔwɔ́ato Ndemɔí Jísu wa. 33Táingi ná kái káima kpíndii ná, kpindi vɛlɛ́ w̃ááh̃u béle mɔ́i i liiní ngáá ti ye, í ti válaitii ngangúya. Ngamá nɔ́ɔ, laá p̃ɛ́ɛ́ ɛ́ɣɛ ngi vɛ́lɛ lowa wuu yélaitii kpɛ́lɛɛ ti nguyaí w̃ááhɔlɔni. 34Kpindi vɛlɛ́ w̃ááh̃u béle mɔ́i i liiní ngáá ti ye ngi vɛ́lɛi wu, í mɛɛní gúla kɛlɛ́ma ti yɛ. Aáva ngi vɛ́lɛ lowa wuu yélaitii kpɛ́lɛɛ ti góóh̃unɛɛngɔ i ɣɛi la ngwála bɔw̃álale ti ɣɛ́i náa laí ngáá Ngalá.
35Ná ngele í wóni, kɛ masangái tí bɔ́ilopoai tɔvengá kpindi vɛlɛ́ w̃ááh̃u béle mɔ́i yelé ngáá tí nde ma ngáá í lókogula siỹɛngái nátii su.
36Kpindi vɛlɛ́ w̃ááh̃u belé mɔ́i i ndení náa Pɔ́ɔ w̃a, i ɣɛ ma, “Masangáitii tí ndengá má ngáá ngí lókogula náá wú h̃ú wáá Sáilɔ. Faalɔ, faa áá mɔɔ wú wa, a lí náa. A lí ndiilɛí h̃u!”
37Kɛ́ Pɔ́ɔ i ndení bɔ́ilopoai ma, i ɣɛ ti w̃a, “Taá ni gɔsɔ́ngɔ aáva tí ni léve kpɔ ndííwaa kíya bɛ́lɛ ni ngáá Lóómingaa, ná vólu, tí ni víli kpindi vɛlɛ́i wu. Sí h̃uu lɔ náa ti longɔ́ tí bé ni wa ndɔɔwu h̃ú? Aa pele w̃a! Bɛlɛ́ masangái kíte, ti vá, tí ni gúla.”
38Bɔ́ilopoai ti sí lení masangái ma. Aáva ná masangái ti sí ỹɛ́nini ngáá kɛ Pɔ́ɔni ngaa Sáilɔ tiyá lɔ ngáá Lóómingaa, ti h̃úú í bɛ́lini. 39Tí vááni, ti Pɔ́ɔni ngaa Sáilɔ w̃aanɛ́ɛ́nɛ, tí tí gúla kpindi vɛlɛ́i wu, tí nde ti w̃a ngáá ti gúla taí ná wa. 40Ná Pɔ́ɔni ngaa Sáilɔ ti gúlani kpindi vɛlɛ́i wu, tí liiní náa Lédiya vɛ́lɛi wu, tí tí mbála Yalá fɛli mbélaitii maalé na, aáva tí nduwúh̃ulɛni ngáá ti ye, ná vólu, ti gúlani naa wa, tí lí.
ప్రస్తుతం ఎంపిక చేయబడింది:
:
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bandi New Testament © Bible Society in Liberia, 2000