MÁFIYU 8
8
Jísu i siỹɛndópo yiláá mbáloni nduwu w̃aa heebɛ́ ỹɔ́u ỹɔungí í ɣɛ́i ma
(Máa 1:40-45; Lúu 5:12-16)
1Ná Jísu i híɣeni ngihéi góóɣaka w̃á, faŋa walá i hitɛí polú. 2Kɛ siỹɛndópo yiláá nduwu w̃aa heebɛ ỹɔ́u ỹɔungí í ɣɛ́i ma, i vaangá Jísu yelé, í lá mbɛ, i ɣɛ ma, “Kawálai, ngí kɔ́lɔ yáá hómbo yí mbálo ná yáá ɣɛ́ loí yí kɛ.”
3Kɛ Jísu i loko h̃úúhulombonga, í lúba siỹɛndópoi ná wa, i ɣɛ ma, “Ngí lúw̃aa ngáá ngí í wálo. Faalɔ, wálo.” Aáva ngamá nɔ́ɔ siỹɛndópoi ná i walóni ngáá nduwu w̃aa heebɛ́ ỹɔ́u ỹɔungí ná í ɣɛ́i ma. 4Kɛ Jísu i ɣɛa ma, “Yaá fái sí le nuu fíli má. Kɛ́ lí Ngala sááɣa gula mɔ́i yelé, í í hɔ́bɛ. Ná ná áá ɣɛ́, yáá sááɣai sí gúla náa kɛ kíya Ngala sávai í fengɔ́ Muusé yaá í ndéngɔ. Ná lɔ́ áá kɛ nungáitii kpɛ́lɛɛ taá ɣɛ́ kɔlɔ́ ngáá kɛ yí wálonga.”
Jísu i Lóómi hóya nuu walaí bɔ́ilopoi walóni
(Lúu 7:1-10)
5Ná Jísu í lɛ́ɛ́ni Kapɛ́ɛ́niya taí h̃u, Lóómi hóya nuu wala yiláá i vaaní ngelé. Lóómi hoya nuu walaí ná, i ɣɛi sóya hɔ́ndɔ ngiláá mááh̃u. I vaaní í Jísu w̃aanɛ́ɛ́nɛ ngáá Jísu í bɔ́mba. 6I ɣɛi Jísu w̃a, “Kawálai, ní bɔ́ilopoi lɔ pɛlɛí la mɛŋɛl̃ɛ́ngɔ áá héébɛ, aáva nduwú yá tɔ́ɔ́ húúlɛ ngwala.”
7Kɛ Jísu i ɣɛa ma, “Nyá lɔɔ vá ngí mbaló.”
8Kɛ́ Lóómi hóyai ná i ɣɛi Jísu w̃a, “Kpóó, Kawálai, kpéle! Ngáá kúlaɣɛi ngáá nuu yáá vá ní vɛ́lɛ la. Nde nɔ́ɔ léi ngáá í wálo, aáva ní bɔ́ilopoi aa waló. 9Sífaa, nyá ɣéle tɔ nyá lɔ sóya nuu wala walaítii mbu, nyá bɛ́lɛ nɔ sóyaitii tɔ mbú. Ngáá ɣɛ́ sí w̃a, ‘Lí!’ aáva í lí, ná vólu, ngáá ɣɛ́ peka w̃a, ‘Vá!’ laáva í vá. Ngí mɔ́ɔ́ ɣɛ ní bɔ́ilopoi w̃a, ‘Sí ɣɛ!’ aáva í kɛ́.”
10Ná Jísu í sóya w̃ɔ́i sí woo ỹɛ́nini, i gɔɔlaí mba ngwala, kɛ i ɣɛa nungái ma ti ɣɛ́i polú, “Ngí tɔɔỹái le wú w̃a, ngeleí sí kpɛ́lɛɛ mbú, ngáá nɛ́ɛ́ nuu lɔ́ni nda ngwála ɔ́ɔ́ ɣɛ́ su kíya síí ndái ɣɛ kíli í na Ísulɔ yeláitii kéle tɔ ndiiwáá. 11Ngí nde wú w̃a, nuu bíh̃iw̃aa lɔɔ vá vaamá táá híɣe ỹanda kpɛ́lɛɛ kpɛ́lɛɛ ngeleí sí wu, tí kooh̃unɛ́ɛ́ lááỹɛ mbo ỹandá yílaa Ngalá ngelé taa Lébilah̃au ɛ́ɣɛ Áiseni ngaa Jékɔni. 12Nungái nátii pa kule í ɣɛ́ngɔ ti w̃a ti ɣɛ́ Ngalá ngéle, Ngalá ngáá nátii pili kpindíi h̃u, mbéi taa ɣɛ́ na táá wɔ́lɔ, táá laangɔ́lu yámɛ.” 13Kɛ Jísu i ɣɛa sóya w̃ɔ́i ná w̃a, “Lí! Í béɣema hái vá í ɣɛ́ í yɛ́ kíya nɔ́ɔ í lángi í na.”
Sóya w̃ɔ́i ná bɔ́ilopoi vá i walói nɔ́ɔ táingi ná kái kái má Jísu i ngói ná léi.
Jísu i nuu bíh̃iw̃aa wáloni
(Máa 1:29-34; Lúu 4:38-41)
14Jísu i liiní Pítɛ vɛ́lɛi la. Ná í lɛ́ɛ́ni pɛlɛ́i wu, kɛ i Pítɛ njéé w̃ɔi lɔngá lááni mbeteí ya, bɔw̃álale kɔɔlɛ́hulai lɔ í ɣɛ́i ma. 15Faalɔ, Jísu í lubaí tokoí wa, kɛ kɔɔlɛ́hulai i benga nyah̃ápoi ná wa, í wuyoɣé, í mɛɛni hé Jísu yɛ.
16Ná kpindí í vɛ́lɛni, nungáá tí vááni ngáá nuu bíh̃iw̃aa ỹína nyɔí í ɣɛ́i ti volú. Jísu va i ndení ỹína nyɔítii ma ngáá ti levé ti volú aáva ti lévei ti volú. Ná vólu, i seebɛ́ yeláitii kpɛ́lɛɛ mbáloni. 17Jísu i sí ɣɛ́ni kɛinɔɔ́ faí sí Ngalá ndaa háá lé mɔ́i Aisáya í ndéni, í hítɛ nga ngáá sí í ɣɛ́i ta, “I ni héébɛitii kpɛ́lɛɛ mbáloni ni wa.”
Sítii ti ɣɛ́i loní ti ɣɛ́ ngáá Jísu volú yélaa
(Lúu 9:57-62)
18Ná Jísu i faŋaí ya tɔ́ni w̃a, kɛ i ndengá volú yélaitii ma ngáá ti lí Galéli Yɛ Walaí vólu. 19Naa h̃u kpéiŋ, kɛ kaamɔí ta Ngala sávai hááw̃a, i vaangá Jísu yelé, i ɣɛ ma, “Kaamɔ́ɔ́, nyá lɔ́ɔ to í wá mbéi fíli yáá lí na.”
20Kɛ Jísu i ngoo yápotenga, i ɣɛ ma, “Kpuulúa lɔ ndandátoa yɛ, ná vólu, taangáá tí w̃ɔníaitii mbɛ, kɛ́ ỹandá fíli aa nuí síí w̃ɔ́i yɛ taa ɣɛ́ ma Nuu Búsa Goo H̃ú Loí ɔ́ɔ́ wu ndá na.”
21Ná vólu, Jísu volú w̃ɔ́i ta yiláá, i ɣɛi Jísu w̃a, “Kaamɔ́ɔ́, bɛlɛ́ nɛ́nɛ hése ngí lí ngí ní kɛ́ɛ́ɣɛ bɔ́lu.”
22Kɛ́ Jísu i ngoo yápotei, i ɣɛ ma, “Hitɛ pólu, bɛlɛ́ sítii taa ndɛɛh̃u gítei h̃u ti sáá yélaitii kpɔ́lu.”
Jísu i fɛfɛ ngákpangɔi yanjéini
(Máa 4:35-41; Lúu 8:22-25)
23Kɛ Jísu i vilingá kélengi h̃u, polú yélaitii bɛ́lɛ ti víli su. 24Ngamá nɔ́ɔ kɛ fɛfɛ ngákpangɔ aá tɔ áá vá Galéli Yɛ Walái ná ya, faalɔ, njɛ lákpa lákpangi i ɣɛi áá kélengi w̃aabɔ́le. Kɛ́ Jísu va i ɣɛi nyii h̃u. 25Kɛ polú yélaitii tí líínga, tí maáleve, ti ɣɛ́ ma, “Kaamɔ́ɔ́, mu w̃ááwalo, bɔw̃álale a muỹá lɔ́ náa saa lowá la!”
26Jísu i ti woo yápoteni, i ɣɛ ti w̃a, “Ndeénii le wáá lúwa ngwala? Wú lángi h̃uu gulo kw̃ɛ́ɛ́ngɔɔ lé!” Kɛ i wuyoɣénga, í ndé ngáá ngakpá fɛfɛ ngakpangɔ́i ɛ́ɣɛ njɛ lákpa lákpangi w̃a ngáá ti ya njéi. Kɛ tí ya njénga, naa vá ngí ɣɛ́ málo málo.
27Maa hái i polú yélaitii kíndaa i vílini táa ɣɛ ta, “Ndeé w̃ɔ́ɔ́ lɔ ngáá sí? Fɛfɛngí ɣéle tɔ ɛ́ɣɛ njɛ lákpa lákpangi taá goló mbɛ!”
Jísu i ỹína nyɔítii tevéni siỹɛ́ félengɔ volú
(Máa 5:1-20; Lúu 8:26-39)
28Kɛ Jísuni tí Galéli Yɛ Walaí ná lévenga, tí lí tataí ná h̃u taá naa lolí ngáá Gádala. Naa lɔ í siỹɛngáá félengɔ w̃aaleí na. Ti gúlani kambáhangi h̃u, táá vá ngáá Jísu yelé péle. Ỹína nyɔítii ti ɣɛ́i siỹɛ́ félengɔi nátii pólu. Ti ɣɛ́i ngáá mal̃a kula mbélaa. Ná vá tɔ í kɛ́ni nuu fíli ɛ́i béle híya ngáá peleí na. 29Ná nɔ́ɔ léi siỹɛ́ félengɔi nátii ti Jísu lɔní, ngamá nɔ́ɔ kɛ tí woo gúlaa gbél̃eiŋ, ti ɣɛ́ ma, “Ndeé lɔ í lóngɔ yí kɛ ngáá ni ye yɛ́i yí ngáá Ngalángi H̃íỹɛndou Loí? Yí váa ngáá yí faa bá ndá ni w̃a p̃ɛ́ɛ́ kuí ɣéle ɔ́ɔ́ ɣɛ́a folóma ɣéla?”
30Mbéi vá ti ɣɛ́i na, naa áá ɣɛ́i gooh̃á mbéi wa búbu bíh̃i bíh̃ingai ti ɣɛ́i na, táá laaỹɛ́. 31Kɛ ỹína nyɔítii ti Jísu w̃aanɛ́ɛ́nɛnga, ti ɣɛ́ ma, “Ná yáá ɣɛ́ yáá vá ni levéma siỹɛ́ félengɔi sítii polú, kɛ ni lɔ́ve kái ni víli búbuaitii su.”
32Jísu va i ɣɛ ti w̃a, “A léve siỹɛngái sítii polú!” Ti levéi náa siỹɛ́ félengɔi nátii polú tí lí ti víli búbuaitii su. Ná ná vá í ɣɛ́i, kɛ búbuaitii kpɛ́lɛɛ ti víliỹɛnga, tí lí ngihé ngá sɛ́lɛ sɛ́lɛngɔi ya, ti víli njɛ wálai wu, tí ló mbu.
33Kɛ siỹɛngái sítii ti ɣɛ́i taá búbuaitii maah̃ú belé, ti víliỹɛnga tí lí taí h̃u, tí naa híya velé h̃úúɣɛ ɛ́ɣɛ mɔ́ɔ́ tí sí h̃úúɣɛ í ɣɛ́i ngáá siỹɛ́ félengɔi nátii ỹína nyɔítii ti ɣɛ́i ti volú. 34Náá hááw̃a nungáitii kpɛ́lɛɛ ti ɣɛ́i taí ná h̃u tí lííni ngáá ti Jísu laaw̃ɛ́ɛ́, aáva ná tí tɔ́ni, tí maanɛ́ɛ́nɛni ngáá í gúla ti látai h̃uu wa.
ప్రస్తుతం ఎంపిక చేయబడింది:
MÁFIYU 8: KNNT
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bandi New Testament © Bible Society in Liberia, 2000