Makị 5
5
Isi Nke Isẹn
Jesu A Zụọ Okẹnnyẹ Eje-mmọn Rị Imẹ ẹ
(Mat 8.28-34; Luk 8.26-39)
1Wẹ nọ fetu mirin Galili, pụha obodo ndị Gẹrasa#5.1 Gadara mọbụ Gẹgasa..
2Hụn Jizọsị gihụ gha imẹ ụgbọ hidan, okẹnnyẹ ohu eje-mmọn rị imẹ ẹ nọ gha ikpẹkpẹ pụha d'e kunrun ẹ. 3Ikpẹkpẹ ebahụn k'o bi; onwọnni onyẹ a s'ẹka e kwọndọn ẹ, ọsụọn'a nị wẹ kpọma a ẹgan. 4Makẹni mgbe ole-lẹ-ole kẹ wẹ te kpọma a ẹgan ụkụ lẹ ẹka: o tibepụ ẹgan, o gungwọnpụ aba rị a ụkụ. Onwọnni onyẹ a saẹka e kwọndọnn'ẹ. 5Ọ wahunmẹ ikpẹkpẹ lẹ ugu rịsọnmẹ ebẹhụ, e yi oro, e gi ọmụma a dọkịka enwẹn ẹ ẹhụ, kẹ ukinkin kẹ efinnaị.
6O lecheni nwan Jesu, ọ nọ gbaburu ẹ, gbun'ẹ osekpu. 7Ọ hụ e gi okẹn olu e yi, “K'i sikọ d'e gi m mẹ, Jesu Nwa Chuku kachanrịnnị#5.7 Chuku ahụn kachanrịnnị.? M rị e gi ẹfan Osolobuẹ a sị ị, eyelẹ m afụnfụn!” 8O ku ihiẹnni makẹni Jesu rị a sị a, “Ịyụ wụ eje-mmọn, gha imẹ okẹnnyẹ ahụn pụha!”
9Ya kẹ Jesu nọ jụ a, sị, “Kị wụ ẹfan ị?” Ọ nọ sị, “Ẹfan m wụ Igunrun, makẹni ẹnyi bu ọda.” 10Ya ọ nọ rịọ Jesu ọda-ọda y'a chụpụlẹ wẹ ẹgbẹrẹ hụ.
11Igwee ezin rị elu okee nọkunmẹ ebahụn, a kpa nni. 12Eje-mmọn ndị hụ nọ rịọ a, sị, “Chụ ẹnyi ye imẹ ezin ndịnị; nị ẹnyi ban imẹ wẹ.” 13Ọ nọ nị wẹ; ya eje-mmọn ndị hụ nọ gha imẹ okẹnnyẹ hụ pụha, banyesọnmẹ imẹ ezin ndị hụ, ezin ndị hụ ile nọ gbama ọsọ, kpọtu, zụnban imẹ mirin Galili ebahụn, ragbu enwẹn wẹ. Ezin hụ ile rị ihiẹn nọkẹ nnụ isẹn (2,000).
14Ndị-ndu ezin ndị hụ nọ gbajẹn d'a gwa ndị obodo wẹ lẹ ndị bi ụmụ-alị rị ẹgbẹrẹ hụ ihiẹn mẹni. Wẹ ile nọ pụha d'e lee ihiẹn mẹni. 15Ya wẹ nọ bịa d'e kunrun Jesu; wẹ nọ hụn onyẹ hụ igunrun eje-mmọn te rị imẹ ẹ: ọ nọdịhụ alị, o yihụ ẹkwa, o gihụ ezigbo uche ẹ. Ya kẹ egun nọ tụma wẹ. 16Ndị o mẹye ẹnya nọ gwa wẹ ihiẹn mẹ okẹnnyẹ hụ eje-mmọn te rị imẹ ẹ lẹ ezin ndị hụ.
17Ya wẹ nọ rịọma Jesu n'ọ gha ẹgbẹrẹ wẹ pụ.
18Ogẹn Jesu gi bankọ imẹ ụgbọ, okẹnnyẹ hụ eje-mmọn te rị imẹ ẹ nọ rịọ a n'o sọnmẹ ẹ.
19Kanị Jesu nọ jụ, sị a, “Laburu ndị nke i d'a gwa wẹ okẹn ihiẹn lẹ omikẹn Osolobuẹ mẹni i.”
20Ya okẹnnyẹni nọ pụ, ghagbama obodo iri hụ nọgbamanị wụ Dikapolisi, a gwa wẹ ihiẹn Jesu mẹn'ẹ. Ọ tụ wẹ ile nụn'a ẹnya.
Okpoho Ihiẹn Rị A Gba Lẹ Nwata Nwụnhụnnị
(Mat 9.18-26; Luk 8.40-56)
21Ogẹn Jizọsị gi gi ụgbọ-mirin fetugụzị mirin ahụn, kinhẹnzi azụụn hụn-ẹbọ, igunrun hi-ogbe nọ fihunmẹ ẹ mkpẹnrẹn mirin ebahụn. 22Onyẹ ohu w'a kpọ Jaịrọsụ, onyẹ ohu imẹ ndị-isi ụlọ-ofufe, nọ bịa; ọ hụn Jesu, ọ nọ dannị Jesu alị, 23rịọ a ọda-ọda, sị, “Nwa m okpoho e d'a nwụn. Dodo d'e bu ẹka ị kwasị a n'ị zụọ a, kẹni ọ hụn ụzọ rị ndụn!”
24Ya Jizọsị nọ sọnmẹ ẹ. Igunrun hi-ogbe nọzị sọnmẹ wẹ, wẹ ile hụ a fụfa Jizọsị.
25Okpoho ihiẹn rị a gba kete ahụa mmẹbụọ rị igunrun hụ. 26Ọ hụnjungụọ ẹnya ẹka ndị idibiẹ, d'e ru ni ihiẹn a gụ a ẹka, kanị, hụn nkẹ o gi dịnhịn, ọ hụdẹ a jọwaye njọ. 27Ọ nụgụọ kẹ wẹ ku oku Jizọsị, ọ nọ gha azụụn nọkunmẹ Jizọsị imẹ igunrun hụ, mẹtụ ẹkwa a ẹka; 28ọ gwagụọ enwẹn ẹ sị, “M sahụ ẹka mẹtụ ẹkwa a ẹka, m sikọ d'a rị mma.” 29Hụn o gihụ mẹtụ ẹkwa Jesu ẹka, ihiẹn rị a gban'a nọ kụsị ozigbo; kẹ ẹhụ dọn nọ a, ọ nọ marịn n'ọ dịnhịngụọ. 30Jesu nkẹ a marịnghọ n'o nwọnọlẹ ikẹn gha imẹ ẹ pụ. O gbehutọ imẹ igunrun hụ, sị, “Onyẹ mẹtụ ẹkwa m ẹka?”
31Ndị nsọnmazụụn a nọ sị a, “Ị hụ a hụn igunrun rị a fụfan'ị, ị hụzị a jụ ‘Onyẹ mẹtụ m ẹka?’ ” 32Kanị Jizọsị hụkwọ e lehunmẹ ẹnya n'ọ hụn onyẹ ọ wụ. 33Okpoho hụ nkẹ hụ a tụ egun, a ma piripiri makẹni ọ marịngụọ ihiẹn mẹn'ẹ, ọ nọ bịa d'e gbuni Jesu osekpu, gwachanrịn a ezioku. 34Jesu nọ sị a, “Nwa m, okukwe i a zụọgụọ ị; lama, ihiẹn emẹ i; dịnhịnchanrịn emu i.”
35Ebe Jizọsị rịkwọ e ku, wẹ nọ gha iwe Jaịrọsụ bịa, sị Jaịrọsụ, “Nwa ị a nwụnhụngụọlẹ, k'ị nọzị e sọngbuni onyẹ-nkuzi?” 36Ihiẹn wẹ rị e ku e feban Jesu ntịn, kanị ọ sịkwọ Jaịrọsụ, “Atụlẹ egun, kwerihụ!”
37Jesu anịnị ndị ọzọ sọn ẹ karị Pita lẹ Jemisi lẹ Jọnụ nwẹnẹ Jemisi. 38Ogẹn wẹ gi ru iwe onyẹ-isi ụlọ-ofufe hụ wụ Jaịrọsụ, Jesu a hụn okẹn isusu lẹ ndị rị a kwan ẹkwan, e goo ọda-ọda. 39Ọ banye imẹ ụlọ, ọ nọ sị wẹ, “Kị wụ isusuni? Kị ụnụ rị a kwannị ẹkwan? Nwata ahụn a nwụnhụnnị, ọ rịhụ ụran!” 40Ya wẹ nọ mụma Jesu ẹmụ. Kanị, ọ nọ chụpụ wẹ ile ezi, weri nẹdi lẹ nnẹ nwata ahụn lẹ ndị nsọnmazụụn a ẹtọ ahụn ya lẹ wẹ wị, wẹ ile nọ wịrị banye mmughẹ nwata hụ rị. 41Ya ọ nọ kwọndọn ẹka nwata hụ, sị a, “Talita, kum!” Ya wụ, “Nwata okpoho, m sị ị lihi!”
42Ya kẹ nwata ahụn nọ lihi ọtọ ozigbo, jẹnhunmẹmẹ. (Nwata hụ wụ nwa ahụa mmẹbụọ.) Ọ nọ tụ wẹ ile ẹnya ọda-ọda. 43Jesu nọ gba wẹ mkpịnsịn-ẹka ẹnya ọhụnma-ọhụnma, sị wẹ agwakwọlẹ onyẹ ọwụlẹ ihiẹn mẹni. Ọ nọ sị wẹ ye nwata hụ ihiẹn-oriri.
ప్రస్తుతం ఎంపిక చేయబడింది:
Makị 5: ikkBI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.