Makị 6
6
Isi Nke Isin
Ndị Obodo Nazarẹtị A Jụ Jizọsị
(Mat 13.53-58; Luk 4.16-30)
1Jizọsị a gha ebẹhụ pụ, ọ nọ shi obodo ọ nọ sue wụ Nazarẹtị#6.1 Obodo ọ nọ sue., ndị nsọnmazụụn a nọ sọnmẹ ẹ. 2O ru Ụhụọhịn Ezumikẹn, ọ nọ kuzimẹ imẹ ụlọ-ofufe. Ọ tụ ndị bu ọda rị a nụn'a ẹnya, wẹ hụ a sị, “Elebe kẹ okẹnnyẹni nọ nwọnhẹn ihiẹn ndịnị ile? Elee ụdị amamihiẹn kẹ wẹ ye ẹ ihiẹnni? Elebe k'ọ nọ nwọnhẹn ikẹn o gi a rụn okẹn ọrụn-atụmẹnya ndịnị ọ rị a rụn? 3Ọnwan ẹlẹ Kapịnta, nwa Meri? Ọnwan ẹlẹ nwẹnẹ Jemisi lẹ Josisi#6.3 Josẹfụ. lẹ Judasị lẹ Saịmọnụ? Ẹlẹ ẹnyi lẹ umunẹ-ẹ-ikpoho rị ebeni?” Ya wẹ nọlẹni kweyen'ẹ.
4Jizọsị nọ sị wẹ, “W'a gbaye onyẹ-amụma agbaye ebe ọwụlẹ wezụka imẹ obodo ẹ lẹ imẹ igunrun ndị nke wẹ lẹ imẹ ezi-lẹ-ụlọ a.”
5Ọ sanị ẹka rụn ọrụn-atụmẹnya ebẹhụ wezụka ndị bulẹni ọda emu rị a kụ o bu ẹka kwasị zụọ. 6Ọ hụ a tụ a ẹnya nị enwọn wẹ okukwe.
Jesu E Zipụ Ndị-ozi Pụ-ichẹn Mmẹbụọ
(Mat 10.5-10; Luk 9.1-6)
Ya kẹ Jesu nọ jẹnsọnmẹmẹ ụmụ-alị rị ẹgbẹrẹ hụ, a kuzi wẹ. 7Ọ nọ kpọ ndị nsọnmazụụn a mmẹbụọ hụ, zipụ wẹ mmadụ ẹbụọ-ẹbụọ, ye wẹ ikẹn w'e gi a chụpụ eje-mmọn. 8Ọ sị wẹ ewerilẹ ihiẹn ọwụlẹ wẹ jẹnkọnị mmanị ọkpọ: wẹ ewerilẹ ihiẹn-oriri mọbụ egho, wẹ ebulẹ ẹkpa. 9Wẹ yiri akpụkụ; kanị wẹ ewerilẹ ẹwuru ọzọ cheni hụn wẹ yi. 10Ọ sịzị wẹ, “Ụlọ ọwụlẹ ụnụ banye, nọdị nị ebahụn d'e ru mgbe ụnụ gha obodo hụ pụ. 11Kanị, obodo ọwụlẹ nabanhanlẹni ụnụ mọbụ jụ nị egọnkọ wẹ ụnụ ntịn, ụnụ pụkọnị, kpukpupụ nị ẹjan rị ụnụ ụkụ tọnị wẹ — n'ọ wụrụ ihiẹn wẹ gi shịagbu wẹ ẹri.”
12Wẹ nọ jẹnmẹ d'e kumẹ oku-Chuku, a sị wẹ rogharị; 13a chụpụ wẹ eje-mmọn bu ọda, a tankpu ndị emu rị a kụ udẹn-olivu, a zụọ wẹ.
Ọnwụn Jọnụ Hụn E Mẹ Mirin-Chuku
(Mat 14.1-12; Luk 9.7-9)
14Eze wụ Hẹrọdụ nọ nụ ihiẹn ndịnị Jesu rị e mẹ — makẹni ẹfan Jesu a kpọgbarịọlẹ. O nwọn ndị rị a sị, “Jọnụ hụn e mẹ mirin-Chuku rọ, ọ ghagụọ ọnwụn lihi, ya haịn o gi nwọn ikẹn o gi a rụn ọrụn-atụmẹnya ndịnị.” 15O nwọn ndị sị, “Ẹlaịja rọ.” Ndị ọzọ sị, “Onyẹ-amụma nọ kẹ ndị-amụma mbụ rọ.” 16Kanị, ogẹn Hẹrọdụ gi nụ a, ọ sị, “Jọnụ hụn m bepụ isi a ghaọlẹ ọnwụn lihi.”
17Hẹrọdụ ku ẹnịna makẹni Hẹrọdụ lẹ enwẹn ẹ zi wẹ d'a nwụnrụn Jọnụ, kẹn ẹ ẹgbụn, kpọkin ẹ ye ụlọ-ngan, makẹ ufiri Hẹrọdịasị nwunyẹ Filipu nwẹnẹ Hẹrọdụ hụn Hẹrọdụ jẹn d'a lụma, 18hụn Jọnụ gi a sị Hẹrọdụ, “Iwu Osolobuẹ ekwerini n'i weri nwunyẹ nwẹnẹ i lụma.”
19Iwe Jọnụ hụ e we okpoho hụ wụ Hẹrọdịasị; ọ hụ a chọ n'o gbu Jọnụ, kanị ọ sanị ẹka, 20makẹni egun Jọnụ a tụ Hẹrọdụ atụ, Hẹrọdụ a marịnghọ nị Jọnụ wụ onyẹ ezi-omumẹ lẹ onyẹ rị nsọ; Hẹrọdụ anịnị wẹ gbu ẹ. Ọ sụọ Hẹrọdụ n'o gọn ntịn ihiẹn Jọnụ rị e ku ọsụọn'a n'o gbu ẹ mgbu obi ogẹn ọwụlẹ o gi nụ a.
21Ụhụọhịn wẹ gi a nyanhan ọmụmụ Hẹrọdụ e ru, Hẹrọdịasị nọ hụn oghere ọ chọkọ.
Hẹrọdụ kpọ okẹn-oriri ụhụọhịn ahụn, kpọ ndị-isi Ọrụn lẹ ndị ọkị-agha lẹ ndị wẹ marịn amarịn imẹ Galili oriri hụ. 22Nwa okpoho Hẹrọdịasị nọ pụha, tẹn egu: ọ sụọ Hẹrọdụ lẹ ndị ọbịa a ọda-ọda; Hẹrọdụ nọ sị nwata hụ, “Rịọ m ihiẹn sụọn'ị, m jẹnkọ d'e ye i y'ẹ.” 23Ọ nọ kunn'ẹ iyi, sị, “Ihiẹn ọwụlẹ i rịọ m, m sikọ d'e ye i y'ẹ, ọsụọn'a ahanmahan alị-eze m.” 24Nwata okpoho hụ nọ jẹn d'a jụ nnẹ ẹ, sị, “Kị m'a rịọ a?” Nnẹ ẹ nọ sị, “Isi Jọnụ hụn e mẹ mirin-Chuku.” 25Nwata hụ nọ gbakin ebe eze rị ozigbo, sị a, “M chọ n'ị gi mgbadọn#6.25 Afẹrẹ. ye m isi Jọnụ hụn e mẹ mirin-Chuku kikẹnni-kikẹnni!” 26Ihiẹnni nọ fụ eze; kanị ufiri iyi o kun lẹ ndị ọbịa a, ọ nịn'a sị nwata-okpoho hụ mba. 27Ọ nọ zi onyẹ-agha ohu e che ẹ nche d'e behẹ isi Jọnụ. Onyẹ-agha hụ nọ jẹn imẹ ụlọ-ngan, bepụ Jọnụ isi, 28gi mgbadọn buhẹ ẹ, bu ẹ ye nwata-okpoho hụ, ọ nọ bu ẹ jẹnni nnẹ ẹ.
29Ogẹn ndị nsọnmazụụn Jọnụ gi nụ ihiẹnni, wẹ nọ bịa d'e buru ẹhụ a li.
Jesu E Ye Igunrun Hi-ogbe Ihiẹn-oriri
(Mat 14.13-21; Luk 9.10-17; Jọn 6.1-14)
30Ogẹn ndị-ozi hụ pụ-ichẹn gi lụa, wẹ nọ fihunmẹ Jizọsị, gwa a ihiẹn ile wẹ rụn lẹ ihiẹn ile wẹ kuzi. 31Ọ nọ sị wẹ, “Pụha nị, nị ẹnyi shi ebe ịhịan bilẹni nị ụnụ d'e zu ikẹn ẹkẹrẹ!” Jesu ku ihiẹnni makẹni ndị bu ọda rị a bịa, a la, nke wụnị ya lẹ ndị nsọnmazụụn a ahụndẹni efe ri ihiẹn-oriri. 32Ịya lẹ wẹ sụọ nọ banye ụgbọ-mirin, shi ebe ịhịan bilẹni. 33Ndị bu ọda hụn wẹ kẹ wẹ jẹnkọ, wẹ nọ marịn nị uwẹ rọ, ya wẹ nọ gha obodo ichẹn-ichẹn weri ụkụ gbama ọsọ, buni wẹ ụzọ ru ebahụn. 34Ogẹn Jesu gi nwan gha imẹ ụgbọ pụha, ọ hụn igunrun ahụn hi-ogbe, omikẹn wẹ nọ mẹ ẹ, makẹni wẹ nọ kẹ atụnrụn nwọnlẹni onyẹ-ndu; ọ nọ kuzimẹ wẹ ihiẹn bu ọda.
35Eki e gimẹ, ndị nsọnmazụụn a nọ bịa d'e kunrun ẹ, sị, “Onwọnni onyẹ bi ebeni ẹnyi rị bụ ọhịhị a gbamagụọ; 36gbashịa ndịnị nị wẹ shi alị-ọfịa lẹ ụmụ-alị rị ẹhụ ebeni d'e ṅọnrin ihiẹn-oriri.” 37Jesu nọ sị wẹ, “Ye ni wẹ ihiẹn-oriri.” Wẹ nọ jụ a, “Nị ẹnyi d'e gi egho-ọrụn akpọhịn ọgụn-iri ṅọnye ndịnị ile brẹdi ri?” 38Jesu nọ sị wẹ, “Ogbe brẹdi ole kẹ ụnụ gi? D'e lele ni.” E lele wẹ, wẹ nọ sị a, “Ogbe isẹn lẹ azụn ẹbụọ.” 39Jesu nọ sị ndị hụ wẹ nọdị alị ọkụdụ-ọkụdụ elu irurue ndụn rị ebẹhụ.
40Igunrun hụ nọ nọdịsọnmẹ ọkụdụ-ọkụdụ: o nwọn ndị rị ọgụn-isẹn, ọgụn-isẹn, o nwọn ndị rị iri-kwasị-ọgụnnaị, iri-kwasị-ọgụnnaị. 41Jesu nọ weshi ogbe brẹdi isẹn hụ lẹ azụn ẹbụọ hụ enu, lee ẹnya elu-igwee, kpanmịn Osolobuẹ. O bebe brẹdi ndị hụ buye ndị nsọnmazụụn a d'e ye wẹ. O kezikwọnị wẹ azụn ẹbụọ hụ.
42Wẹ ile nọ rijun ẹfọ. 43A tụtụkomẹ wẹ brẹdi lẹ azụn wẹ rihọdụ, o jun ụkpalị mmẹbụọ. 44Ikẹnnyẹ rị imẹ ndị ri ihiẹn-oriri hụ wụ mmadụ nnụ-uku isẹn.
Jesu E Jẹn Ijẹn Elu Mirin
(Mat 14.22-23; Jọn 6.15-21)
45Jesu nọ chụ ndị nsọnmazụụn a ye imẹ ụgbọ ozigbo-ozigbo sị wẹ nje Bẹtisaịda nfetu ohimin n'ọ lala. Ọ nọ gi ẹka a gbashịa igunrun hụ. 46Ọ gbashịagụ wẹ, ọ nọ shi elu ugu d'e mẹ ekpere.
47O ru ẹnyasị, ụgbọ e rugụọ etintinnaị mirin ahụn; Jesu sụọ rị akpakalị. 48Ọ hụn a nị ụgbọ rị a fụ wẹ ọrụn ịnyanshi ihun makẹni ufere rị e bukin wẹ azụụn. Ihiẹn rịkẹ ọkụrọkụ ẹtọ ụzụtụntụn biribiri, ọ nọ jẹnhẹn ijẹn elu mirin d'e kunrun wẹ. O te chọ n'ọ ghafe wẹ. 49A hụn w'a k'o jẹnkọ ijẹn elu mirin, wẹ nọ ro ni onyẹ-mmọn rọ, ya wẹ nọ yi oro — 50makẹni egun tụma wẹ ile kẹ wẹ hụn a. Jesu nọ kuyeni wẹ oku ozigbo, sị, “Mmẹ rọ, atụlẹ ni egun!” 51Ya ọ nọ banyeni wẹ imẹ ụgbọ, ufere hụ nọ kụsị. Ọ nọ tụ ndị nsọnmazụụn a ẹnya ọda-ọda, 52makẹni aghọtanị wẹ ọrụn-atụmẹnya ahụn o gi brẹdi rụn. Obi wẹ ze e ze.
Emu Jesu Zụọ Imẹ Gẹnẹsarẹtị
(Mat 14.34-36)
53Ogẹn wẹ gi fetugụ mirin hụ, pụha Gẹnẹsarẹtị, wẹ nọ limẹ ụgbọ-mirin wẹ ebẹhụ. 54Hụn wẹ gihụ gha ụgbọ-mirin pụha, ndị rị ebẹhụ nọ marịn nị Jesu rọ. 55Wẹ nọ gi ọsọ ghagbama ẹgbẹrẹ hụ ile, gi ute buhẹmẹ ndị emu rị a kụ ebe ọwụlẹ wẹ nụ nị Jesu rị. 56Ebe-lẹ-ebe Jesu jẹn — kẹ obodo mẹ ntịn kẹ hụn shịa ẹfọ kẹ alị-ọfịa; wẹ hụ e bu ndị emu rị a kụ a tọ imẹ afịa, a rịọ Jesu nị wẹ mẹtụhụ ntịn ẹwuru ẹ ẹka. Ndị ile hụn mẹtụ a ẹka hụ a dịnhịn.
ప్రస్తుతం ఎంపిక చేయబడింది:
Makị 6: ikkBI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.