Yowani 7
7
Baana ba ngu a Yisu a bali mu usa nde imiinu ve
1Humbisa a maana, Yisu akatangili itanzi hya Ngalili. Ka nde a hakatondo udyenge mu itanzi hya Yude ve. Mu toni ati, lituma li Bayudaayo, laakasaha uduba nde. 2Ka mukungi Bayudaayo wu bitudu#7.2 Mukungi bitudu aba mukungi wu akadinga limiingu li litindala. Nde akakwelene na mukungi wu baakakukaha. Mu mukungi mowuuna, baatu baakayibwala monyi mu tangu yi Isereli hyaba mu kumu. Baatu baakabwamina mu bitudu nate bu mukungi mowuuna hakafwa. Bayudaayo boosi baakaya hu Yeruselemi mu usambila. Lev 23.34-36; Pfu 16.13. aba aka bebele. 3Na baana ba ngu a Yisu baaleeli nde: «Mata ŋaniŋa, na yene hu tsi a Yude, mana bayihi ba we kaka bamono mavanga ma we li mu usa. 4A hu li na muutu wu ubaasa mavanga mu tswehi ve, tso nde tondi uyabahana. Bu we li mu usa mavanga ma manene, nyaha we yabahana huli baatu boosi.» 5Ka baana ba ngu a nde bo mwakulu, a baakasa imiinu mu nde ve.
6Yisu aleeli bo: «Tangu a me a yamato kini ve, ka uto ti mu benu, pasi tangu yili yimbwe. 7Baatu ba tsi utwala ubelele benu ve. Ka bo baabelele me. Mu toni ati, me umbaata imbangi ti mavanga ma bo mali mamabi. 8Benu, yenaani hwa benu hu mukungi. Me a unzyene hu mukungi mowuuna ve, mu toni ati, ya me tangu kini a yatodi ve.» 9Bu nde hamani uleele bo maana, nde asaali hwa nde hu Ngalili.
Yisu miiyene hu mukungi bitudu
10Ka bu baana ba ngu a nde baayeni hu mukungi, nde kaka ayeni huuna hwavele uyabisa baatu, na uvelemonehele ŋa kungi la baatu. 11Mu tangu mukungi mowuuna, batumi ba Bayudaayo baakasaha nde na baakafuula: «Nde huni ali?» 12Na mutso makonge ma baatu, hwaba na wadi-wadi mu nduhi a nde. Bamosi baakaleele: «Nde muutu nga mavanga mamabwe.» Bakima ti: «Naana! Nde baatu ubaasoho.» 13Ka muutu tso mumosi a hakatoyo mu nde payalala ve, mu toni a boomo bu Bayudaayo.
Yisu li mu ulongese mu nzo a Nzambi
14Mukungi aba aka hahati, Yisu ayeni hu nzo a Nzambi na nde abandihi ulongese. 15Bayudaayo baakimuhi na baakalelesene: «Nde buni hayaaba mambu ma baasonehe ma Ngidi maniima, nde wu aveleyiha muhanda?» 16Yisu afutili bo: «Ndongisili yi me ndi mu upa, a yili yi me ambaha ve. Ka yo yili ya Nzambi wu atsindaha me. 17Tso muutu tondi ukuhasa litondo la Nzambi, nde utsikaha tso ndongisili a me yili mu umata huli Nzambi, buve ti yo yili mu umata mu matsimi ma me mwakulu. 18Muutu wu ubaatoyo mu nde mwakulu, ubaasaha ndulu muyusu a nde. Ka pasi nde wu ubaasaha muyusu a nde wuuna wu atsindaha nde, ubaaleele imbuli. A hu li na upfuta mu nde tso hoole ve. 19Moose aviidi benu Mikele. Ka muutu tso mumosi mu benu a hali mu ukinza myo ve. Mu hima benu lili mu usaha uduba me?» 20Konge a baatu yaafutili bunuubu: «We na tengo! Na li mu usaha uduba we?» 21Yisu afutili: «Mu ipadi ndulu himosi hi me miitsa, benu boosi limiikimuha! 22Tsimaani a ti: Moose atuma benu mu ubaakete baana ba bahala. Ka, a Moose avoli kesili moyiina ve. Kesili moyiina yaamata huli bakaaha#Mba 17.10-13; Lev 12.3 ba bisu ba tsomi. Benu lili mu ukete baatu mu ilumbu hya saba. 23Benu lili mu usa buuna mu ukiinza Mikele mya Moose. Mu ki toni benu lili mu ukwiila me kesi, ŋa me miimbeloso muutu wu mutindala mu ilumbu hya saba? 24Nyahaani usilasa misamu mu monihili a mu misu. Ka baasilasaani misamu bu hwafwana#Lev 19.15; Esa 11.4 .»
25Bisu Yeruselemi bakima baakaleele: «Nde wu, me ni wu bali mu usaha uduba? 26Monwaani: nde li mu utoyo ŋa miisu ba baatu, na baatu a bali mu uleele nde pasi dyambu ve! Buni! Bakuutu ba bisu bamiisilasa ti nde ni Kristo? 27Mu ilumbu hi Kristo huuya, muutu tso mumosi a huyaaba hu nde amiimata ve. Ka nde wunuuwu, bisu liyaabi huni nde amiimata.»
28Yisu akalongese mu litandala la nzo a Nzambi. Nde asyenuli ndaha na uleele: «Mu mbuli benu liyaabi na me ndi, na huni me miimata? Me a hanza mu lituma la me mwakulu ve. Ka wu atsindaha me wu akuha ali. Benu a liyaabi nde ve. 29Me, me nzaabi nde, mu toni ati me miimata huli nde, na ni nde atsindaha me.» 30Buuna, bo baasahi ukaanga nde. Ka muutu tso mumosi a hatwali ubembe nde ve, bu tangu a nde yaba kini a yatoodi ve. 31Ka, babalahi ŋa hati la konge a baatu, baasiili nde imiinu na baakaleele: «Ŋa Kristo huuya, nde usa bilimbu bya kimuhili bi byalutahala bi nde wunuwu ali mu usa?»
Bafarisi bamiitsindaha baatu mu ukanga Yisu
32Bafarisi baayuhi ma baatu baakaŋono mu toni a Yisu. Bakuutu ba banganga ba Nzambi na Bafarisi baatsindihi bakeedi mu uyakanga nde. 33Yisu ni uleele: «Me kini na benu mu mwana a tangu hoole, titswene me tsa nzyene huli wu atsindaha me. 34Benu sa lisaha me, na benu a luusoolo me ve. Na huuna hu me umba, benu a luutwala uyene ve.» 35Bayudaayo baalelisini: «Nde huni ali mu dwe, mana bisu luuvelesoolo nde? Nde ka huli Bayudaayo ba bubaatsahala ŋa hati li Bangeleke nde uyene, buve Bangeleke huuyalongese? 36Mambu ma nde amiipalisa maniima: “Benu sa lisaha me, na benu a luusoolo me ve” na “Huuna hu me umba, benu a luutwala uyene ve”. Hima mo mamoole matondi uleele?»
Yisu ni mamba ma monyi
37Ilumbu hya tsukusu mukungi, ilumbu hi hyafulala tsongo#Lev 23.36, Yisu atelimi, na asyenuli ndaha: «Tso muutu li na peyu a mamba, aya huli me, na anywa. 38Pasi muutu wu li mu usiila me imiinu, “banzali ba mamba ma monyi sa bapala mu mutima a nde#Zak 14.8 ”, we bu Libuku la Ngidi lili mu uleele.» 39Yisu haleeli buuna, mu toni a Livupu la Nzambi li boosi ba baasiidi imiinu mu nde, baafwana uyaka. Mu tangu moyiina, Nzambi aba kini a haviidi Livupu ve, mu toni ati Yisu aba kini a hayaki muyusu ve.
40Bu baatu ba ŋa hati la konge baayuhi mambu momaana, bamosi baakaleele: «Nde wunuuwu, mbuli ni mumbihuli mo!» 41Bakima baakaleele: «Nde ni Kristo!» Na bakima kaka baakafuula: «Kristo utwala upala mu itanzi hya Ngalili?
42Mabuuku ma Ngidi mali mu uleele ti Kristo uba wu imbisa hya pfumu Davidi na nde upala mu Beteleemi, bula bwa Davidi.»
43Na baatu baakabuhi mu toni a Yisu. 44Bamosi baakatondo ti bakanga nde, ka muutu tso mumosi a habembi nde ve.
Bakuutu bamiibisa usa imiinu mu Yisu
45Bakeedi baafutihi huli bakuutu ba banganga ba Nzambi na ba Bafarisi na baafuuli bo: «Mu hima benu livelibehe nde?» 46Bakeedi baafutili: «A hu li na muutu wu amiitoyo we bahala moliina ve.» 47Bafarisi baakaali bo: «Benu kaka limiisinga ubwa mu soho mo liniili? 48Hu li na mumosi mu bakuutu, buve mumosi mu Bafarisi, wu siili nde imiinu? 49Ka baatu mobaniba ba baaveleyaba Mikele mya Moose, ba baasinga bali!»
50Nikodemo aba mumosi mu Bafarisi ba baaba ŋaana. Nde wuuna wu ayamono Yisu hutsomi. Nde aleeli bo: 51«Mu mikele mya bisu a benu, utwala utsundasa muutu hwavele umayuha nde, na umayaaba ma nde hasa ve#Pfu 1.16.» 52Bo baafutili nde bunuubu: «We kaka musi Ngalili we li? Kengese Ma baasonehe na we sa mono ti mumbihuli tso mumosi a hupala mu Ngalili ve.» [53Titswene, muutu-muutu ayeni hu nzo a nde.
ప్రస్తుతం ఎంపిక చేయబడింది:
Yowani 7: TSA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© (Active), Wycliffe Bible Translators, Inc. All rights reserved.