Yowani 9
9
Yisu miibeeloso inzimana hi imbutala-ngu
1Bu Yisu haakavyoho mu nzila, nde amoni inzimana hi imbutala-ngu. 2Bayihi ba nde baafuuli nde: «Rabi, mu hima baabuta muutu mo wunuuwu inzimana. Mu toni masumu ma nde mwakulu, vo ti mu ma taata na ma ngu a nde?» 3Yisu afutili: «Huba nde, buuve ngu a nde na taata a nde a baasumihi ve. Ka nde ali inzimana hi imbutala-ngu, mana mavanga ma Nzambi mamonehele mu nde. 4Bisu a benu lafwana ukuhasa mavanga ma wu atsindaha me, bu busi bukini bwakya. Bu busi buuyila, muutu ubwetwala usala ve. 5Bu me kini mu tsi, me ndi liyalala la baatu boosi.»
6Nde amana buuna uleele, nde atuuli maate mu toto. Na nde avangi libonzi mu maate ma nde. Titswene, nde akili lo mu miisu ma inzimana. 7Na nde ni uleele: «Yene yaswaha mbalanga hu idiinga hya Silowa#2Pf 20.20; Esa 8.6 .» Silowa, mbinduli ni ti, «muutu wu baatsindaha». Nde ayeni, ayaswaha mbalanga, na bu hayafutaha, miisu ma nde maadibumi. 8Ba baaba ŋa pedu a nde na ba baakamono nde mu uvondo baatu mbongo, baakaleele: «Wunuuwu, a ni muutu wu akatsahala ŋa toto na ubaavondo mbongo ve?» 9Bamosi baakaleele: «Ni nde.» Bakima baakaleele: «Naana, a nde ve! Ka wunuuwu na ikeboso hya nde.» Ka nde mwakulu akaleele: «A ni me hwa me!» 10Buuna, bo baabwefuula nde: «Ka buni miisu ma we mamiidibuma?» 11Nde afutili: «Muutu nga nduhi a Yisu vangi libonzi, kili me lo mu miisu, na leeli: “Yene yaswaha mbalanga a we hu idiinga hya Silowa.” Bu me nzatswaha mbalanga, miisu ma me ni ŋa madibumi!» 12Bo ni ufuula nde: «Ka muutu mowuuna huni a li?» Nde afutili: «Me a hanzabi ve.»
13Bo baabiti wu aba inzimana huli Bafarisi. 14Kahu aba ilumbu hya saba, ŋa Yisu havangi libonzi na hadibuli nde miisu. 15Ni buuna, Bafarisi kaka bafuuli nde buni miisu ma nde maadibumi. Na nde ayabisi bo: «Nde akili me libonzi mu miisu. Bu me anzatswaha mbalanga, miisu ma me ni udibuma.» 16Bafarisi bamosi baakaleele: «Muutu mo wu miivanga bunuubu, utwala uba wa Nzambi ve. Mu toni ati, nde a hubaakinza mukele a ilumbu hya saba ve.» Bakima baakaleele: «Buni muutu nga masumu hutwala usa biliimbu bya kimuhili biniibi? Ni mubuuna, kabuhili ya monihili ŋa hati la bo.» 17Bafarisi baabwefuula inzimana: «Ka we buni li mu uleele mu nde wu midibula miisu ma we?» Nde afutili: «Nde Mumbihuli ali.»
18Ka, batumi ba Bayudaayo a baasiidi imiinu ve ti muutu mo wunuuwu aba inzimana, na nde aka mu umono. Ni mubuuna, bo baatsihi ngu na taata a nde. 19Bo baafuuli bo: «Nde wunuuwu mwana a benu, wu benu lili mu uleele ti nde inzimana baabuuti? Ka buni loloyi, nde aka mu umono?» 20Ngu na taata a nde baafutili: «Bisu liyaabi ti nde mwana a bisu ali, na ti bisu laabuti nde inzimana. 21Ka mu uyaaba buni nde aka mu umono loloyi, bisu a liyaabi ve. Buuve mu ayaba na adibula nde miisu, bisu a liyaabi kaka ve. Fuulaani nde mwakulu! Nde amiibuuha mu uyabisa benu mambu ma mayiili nde.» 22Bo baaleeli buuna mu toni ati bo baaba na boomo bu batumi ba Bayudaayo. Batumi ba Bayudaayo baayuhisini mu ubinga mu nzo lisambulu yi Bayudaayo, pasi muutu wu usilasa ti Yisu ni Kristo. 23Ni mubuuna, ngu na taata a nde baaleeli: «Nde amiibuuha, fuulaani nde mwakulu!»
24Bafarisi baabwetsiha muutu wu aba inzimana, tsiha la moole na baaleeli nde: «Yuusa Nzambi mu uleele imbuli. Bisu liyaabi ti bahala moliina, nga masumu ali.» 25Nde afutili bo: «Tso nde li nga masumu, me anzaabi hwa me ve. Li me nzaabi nduli dyambu limosi: me mbeedi inzimana, loloyi me ka mu umono.» 26Bo baafuuli nde: «Hima nde asiidi we? Buni nde adibuli we miisu?» 27Nde afutili: «Me mbeedi amiindeele benu lo, na benu aliyuhi ve. Muhima benu litondi ubweyuha musamu mowuuna? Benu kaka bayihi ba nde litondi uba?» 28Bo baatuhi nde na baaleeli: «Muyihi a nde ni we! Bisu bayihi ba Moose. 29Bisu liyaabi ti Nzambi ayambili na Moose. Ka nde wunuuwu, bisu a liyaabi nde huni hamata ve.» 30Bahala mo ni ufutala bo: «La kimuhili ni liniili: Benu a liyaabi nde huni hamata ve, ka nde miidibula me miisu. 31Bisu liyaabi ti Nzambi a hubaayuhala banga masumu ve. Ka nde ubaasiingala pasi muutu wu ubaakiinza nde na wu ubaasa litondo la nde#Mkg 34.16; 66.18; Esa 1.15; Mak 15.29. 32Bisu a laamayuha ve ti muutu amiidibula miisu ma inzimana hi imbutala-ngu. 33Ka tso muutu mo wunuuwu a hamata huli Nzambi ve, nde a hakiitwala usa dyambu la buuna ve.» 34Bo baafutili nde: «Bu baabuta we, we li nga masumu umata hu mutswe te hu miilu, na we tondi ulongese bisu?» Buuna bo baabingi nde mu nzo a Nzambi.
35Yisu ayuha ti bo baabingi nde mu nzo a Nzambi, nde ayabwana nde na aleeli: «We li mu usa imiinu mu Mwana a Muutu?» 36Nde afutili: «Pfumu, Mwana a Muutu na ali, mana me tsiila nde imiinu?» 37Yisu aleeli nde: «We miimono nde. Wu li mu utoyo na we, ni nde.» 38Nde aleeli: «Pfumu, me ndi mu utsiila we imiinu.» Na nde akongimini ŋa busu bwa Yisu. 39Titswene, Yisu aleeli nde: «Me miinza mu tsi moyiniyi, mana binzimana bimono, na ba bali mu umono, bakituha binzimana. Tsuundusu a me ni yiina.» 40Mwana kabu li Bafarisi ba baaba ŋa pedu a nde, ba baayuhi mambu momaana, ni ufuula Yisu: «Bisu kaka binzimana lili?» 41Yisu afutili bo: «Tso benu libeedi binzimana, benu a likiiba na masumu ve. Ka benu lili mu uleele: “Bisu lili mu umono.” Ni mu buuna, benu luukwilala banga masumu.»
ప్రస్తుతం ఎంపిక చేయబడింది:
Yowani 9: TSA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© (Active), Wycliffe Bible Translators, Inc. All rights reserved.