Luuka 3
3
Yowani Mutondihi akalongese baatu hutso a kumu a nzala
Mataayi 3.1-6; Malako 1.2-6; Yowani 1.19-23
1Hwaba ilima hya kumi na bitanu, hi Kayisaali Tiberiyu haba mutumi matsi moosi ma Looma. Ponse Pilaato aba mutumi a tsi a Yuda, mu ilima mohiina. Eloode aba pfumu itanzi hya Ngalili, na mwana a ngu a nde Filipo, pfumu itanzi hya Iturya na Takonita. Lisanyasi aba pfumu itanzi hya Abilena. 2Ane na Kayifa baaba bakuutu ba banganga ba Nzambi. Mu tangu moyiina, Yowani mwana a Zakariya aba mutso a kumu a nzala. Nzambi ayabisi nde mambu ma nde. 3Ni mu buuna, Yowani hatangili itanzi hyosi hya Yolodani, mu ubaalongese bunubu: «Yakaani tondihili, mana benu limwese ti benu laamiikingula mitima na usobo mbiili, mana Nzambi atsindula masumu ma benu.»
4Ni we bu baasonehe mu muhanda a mambu ma mumbihuli Esaya:
«Ni ndaha a muutu wuna wu uli mu ufulaha mutso a kumu a nzala:
Vangaani luuha la Pfumu,
sungahani misoho mya nde.
5Kisalaani mitsundu myosi,
syengaani bisyelo na bitukidi bikituha bidede.
Sungahani manzila ma maatengeme,
na syengaani misoho mimilahi mi mabaku.
6Buuna baatu boosi bu umono liyobolo la Nzambi.#Esa 40.3-5»
7Konge a baatu yayidi huli Yowani, mana nde atondehe bo. Nde akaleele huli bo: «Ibandu hi bapili, na alongese benu mu ubata kesi a Nzambi? 8Ni mu buuna, butaani mbutu yi yi ukaata imbangi ti benu limisobo mbiili a benu. Na a lilelesene mu mitima mya benu ve ti: “Bisu lili na taata a bisu Abrahami.” Ka me ndeele benu ti, mamanya momanima, Nzambi utwala ukitusa mo baana ba Abrahami. 9Paa pibi bamiivangimasa mu ukwanga muti mu manganzi. Ni mu buuna, pasi muti wu uvelebuta mbutu yimbwe, bu ukwanga nde na ubwaha nde hu mbaahu.»
10Konge a baatu yakafuula nde: «Bisu hima lafwana usa?» 11Nde afutili bo: «Nyaha muutu wu uli na biyunga byole, akaba imosi huli wu avele na hyo. Na wu uli na byudya, akabila bana.»
12Hwayidi kaka bakuk ihi ba limandu, mana batondehe bo, na bo baafuuli Yowani: «Mulongisi, bisu hima lafwana usa?» 13Nde aleeli bo: «A linono bibyafulala ŋa yulu a bi baava benu muswa ve.» 14Masadaadu kaka maayafuula nde: «Ka bisu kaka, hima lafwana usa?» Nde aleeli bo: «A lipatula mbongo a muutu ve, a lileele dyambu li upfuta mu muutu ve, ka baatalaani ndulu pfuta a benu.»
Yowani Mutondihi ayabisi wuna wu uli mu uya
Mataayi 3.11-12; Malako 1.7-8; Yowani 1.24-28
15Baatu bu baaba mu ukeele na hiitu hyosi, boosi baakafulasana byuhu bo mwakulu hutso mitima mya bo, tso Yowani ni Masiya. 16Yowani afutili huli boosi: «Me, me ndi mu utondehe benu mu mamba. Ka, wu uli mu uya, afulala me matwala, na me a handi tso wu akuha mu uba muviha, mu unyangula midi mi bikodi bya miilu mya nde ve. Nde wuuna utondehe benu mu Livupu la Ngidi na mu mbaahu. 17Nde li na iyengese hya nde ŋa hoho, mu ukahula mbutu na biimbu. Nde ukukaha muhunu hutso iswehili hya nde, ka nde utsuha biimbu hu mbaahu yi yi uveledima.»
18Yowani akayabisa Musamu wu Mubwe huli konge, na uva bo kwadisili kima yindahi. 19Ŋa yulu a ŋaana, Yowani asyembi mutumi Eloode wu avoli na ukwele Elodiyade, mukadi a mwana a ngu a nde. Na nde abwesyembe Eloode mu toni mavanga moosi mamabi ma nde hasiidi. 20Ŋa yulu a maana moosi, Eloode akotisi Yowani mu kondaayi.
Tondihili a Yisu
Mataayi 3.13-17; Malako 1.9-11; Yowani 1.29-34
21Humbisa utondehe baatu boosi, Yowani atondihi kaka Yisu. Na bu Yisu hakasambila, yulu laadibumi, 22na Livupu la Ngidi laakulimini ŋa yulu a nde we libembe. Na ndaha mosi yamati hu yulu: «We ni Mwana a me wu litondo, wu me umbapfulala utondo.»
Bukulu bu ibandu hya Yisu
Mataayi 1.1-17
23Bu Yisu habandihi isalu hya nde, nde aba bebele na bilima maku matatu. Baatu baakatsima ti nde aba mwana a Yosefi. Na Yosefi mwana a Eli. 24Eli aba mwana a Matati, Matati mwana a Leevi. Leevi aba mwana a Meleki, Meleki mwana a Yanayi. Yanayi aba mwana a Yosefi, 25Yosefi mwana a Matatyasi. Matatyasi aba mwana a Amosi, Amosi mwana a Nahumi. Nahumi aba mwana a Esely, Esely mwana a Nangayi. 26Nangayi aba mwana a Mahate, Mahate mwana a Matatyasi. Matatyasi aba mwana a Semeni, Semeni mwana a Yoseki. Yoseki aba mwana a Yoda, 27Yoda mwana a Yowanani. Yowanani aba mwana a Resa, Resa mwana a Zorobabele. Zorobabele aba mwana a Salatyele, Salatyele mwana a Neri. 28Neri aba mwana a Meleki, Meleki mwana a Adi. Adi aba mwana a Kosami, Kosami mwana a Elemada. Elemada aba mwana a Eri, 29Eri mwana a Yisu. Yisu aba mwana a Elyezeri, Elyezeri mwana a Yorimi. Yorimi aba mwana a Matati, Matati mwana a Levi. 30Levi aba mwana a Simeyoni, Simeyoni mwana a Yuda. Yuda aba mwana a Yosefi, Yosefi mwana a Yonami. Yonami aba mwana a Elyakimi, 31Elyakimi mwana a Meleya. Meleya aba mwana a Mena, Mena mwana Matata. Matata aba mwana a Natani, Natani mwana a Davidi. 32Davidi aba mwana a Yese, Yese mwana a Obedi. Obedi aba mwana a Booze, Booze mwana a Sala. Sala aba mwana a Nasoni, 33Nasoni mwana a Aminadabi. Aminadabi aba mwana a Adimini, Adimini mwana a Alani. Alani aba mwana a Esiloni, Esiloni mwana a Falesi. Falesi aba mwana a Yuda, 34Yuda mwana a Yakobi. Yakobi aba mwana a Isaki, Isaki mwana a Abrahami. Abrahami aba mwana a Tara, Tara mwana a Naholi. 35Naholi aba mwana a Seruki, Seruki mwana a Ragahu. Ragahu aba mwana a Faleki, Faleki mwana a Heberi. Heberi aba mwana a Sela, 36Sela mwana a Kayinami. Kayinami aba mwana a Alfasade, Alfasade mwana a Semi. Semi aba mwana a Nowa, Nowa mwana a Lemeki. 37Lemeki aba mwana a Matusalemi, Matusalemi mwana a Enoke. Enoke aba mwana a Yaleti, Yaleti mwana a Maleleheli. Maleleheli aba mwana a Kayinami, 38Kayinami mwana a Enosi. Enosi aba mwana a Seti, Seti mwana a Adami. Adami aba mwana a Nzambi.
ప్రస్తుతం ఎంపిక చేయబడింది:
Luuka 3: TSA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© (Active), Wycliffe Bible Translators, Inc. All rights reserved.