Juan 1
1
Suxi Kristo ïr go Diuxi Ñokidï tïgidukami dai ïr Diuxi ïpï
1-2Tukamïrï aidïxi mai kia tipukatadai oidigi kaxi oidakatadai Diuxi Maradï. Dai Diuxi ïmadï dakatadai Diuxikatai ïgai ïpï. Ïgai ix makïdï Diuxi ïmadï dakatadai dai ïr Diuxi ïpï ïr Diuxi Maradï dai Diuxi Ñokidï tïgidu. 3Ïgaikïdï aatadui Diuxi daidi idui bïïxi aïkatai ix tumaxi oidaga. Ï Diuxi Ñokidï tïgidukami ïr ïgai ix makïdï idui bïïxi aïkatai tudu. 4Dai ïgai gamaakai ibhïkidï bïïxi aïkatai ix tumaxi ïr duakakami. Ïgai mai mosïkaxi Diuxi ñokidï tïgidu. Kudagi tïgidu ïgai ïpï ïmo kudagi gï dukamikatai ïgai odami bïïtarï. Ga kukudadai ïgai odami iibhïadïrï sai maatï kaïkana odami ix tumaxi ïr buaboi. 5Ga kukudadai ïgai xako kabami tukamuga dai go tukamudagai tomarhi ïmo imidagai maiti ixtutuidikïi ix tusagi.
6Dai ïmo imidagai Diuxi otoi ïmo kïïrhi Juan tïgidukami sai maakana ñoki go odami. 7Dai dibia ïgai dai gamaakaiña ñoki aagaitai go ix makïdï Kudagi tïgidu. Ga mamaakaiña ïgai ñoki ipïrhiditai sai odami buaboitudagi go ix makïdï Kudagi tïgidu. 8Go Juan maiti ïr go Kudagi tïgidukami, mos aagaiña ïgai. 9Go ix makïdï buaboikïdï ïr go Kudagi ïr ïgai ix makïdï didibai dai kukudadai bïïxi óídakami maatïturhitai ix tumaxi ïr buaboi.
10Ï Kudagi tïgidukïdï ïr kïïsakami oidigi dai dibia ïgai tami oidigi daama. Dïï mos go oidigi daama óídakami mai máí dibiakai ïgai. 11Tomaxi ïïgi dïbïragadïrï dibia ïgai bïïxkïrï go bamioma muidukïdï aaduñdï mai miadïgidiña, 12dïï ïïmadutai gia. Dai bïïxkatai ix makïdï miadïgidi maa Diuxi oigaragai saidi ïr maamaradïkana, go ix makïdï buaboitudai ïgai tudu. 13Ïgai ix makïdï buaboitudai ïpamu uutudui bubuakïi dai ka Diuxi maamaradï bipiïyi. Dïï gia maiti ïr Diuxi maamaradïkana odami mos bubuakïkai oidigi daama ix dukai bubuakïi bïïxi odami tukugadïkïdï tudu. Dai mai utudui bubuakïi odami mos ipïldakai ïgai. Bhaiyoma Diuxi ïgai dai podukai gï tïgito dai utuduturhi odami buaboitudakai ïgai sai podukai ïr maamaradïkana.
14Daidi go Diuxi Ñokidï tïgidukami ïmo odami busai dai biatu tukuga ïpïamaaxkami ix makïdï bia aatïmï dai bhodïrï óídakami saagida oidatu. Sïïrhikïdï kïï tuiga ïgai dai kïïga gïr maatïturhi ix tumaxi ïr buaboi. Dai aanï Juan ix makïdï ibuayi idi ojai ïmadï jaa mui kïïga nïidi ïgai ix makïdï Diuxi Ñokidï tïgidu. Dai aatïmï ïr nïijadami xïïxi ïr gïdukami ïgai dai xïï kïï tiodi ïgai Diuxi maradïkatai. Diuxi maradï ïmadugakïdï ïgai tudu.
15Dai dibia go Juan dai gïgïrï aagaimi xorai ïr go Diuxi Ñokidï tïgidukami. Potïtïdaiña ïgai go odami,
—Buaboi tudu sai aanï ïpïgioma ïr busaikami tami oidigi daama ix bhai go ix makïdï Diuxi Ñokidï tïgidu. Ïgai gokiïrioma busai ix aanï. Dïï tomaxi aanï ïpïgioma ïr busaikami bïïxkïrï tomax dukai ïgai kaxi ïr oidakamikatadai ïïki abhiadïrï aidïxi mai kia tipukatadai aanï. Kaxkïdï ïgai bamioma ïr namïakami ix aanï— itïtïdaiña Juan go odami.
16Dai go Diuxi Ñokidï tïgidukïdï kïïga bia bïïxi aïkatai ixtumaxi gïr biïgakana. Sïïrhikïdï kïï tuiga ïgai gïr bïïtarï dai dudatai gïr urhiñdi naana maaxi soiñi. 17Daiñi go Moiseskarukïdï gïr maatïturhi Diuxi ïmo ixtumaxi kïïgadukami. Gïr maatïturhi go sïïrhikami ojixikami. Dïï gia Suxi go Ga Tïanïdamikïdï gïr maatïturhi Diuxi ixtumaxi gïïpi bamioma kïïgadukami. Ïgaikïdï gïr maatïturhi Diuxi xïï kïï tuiga ïgai dai xïï kïï sïïrhi ñokai. 18Buaboi tudu sai tomarhi ïmo imidagai mai tipu ïmai xorai nïijadagi Diuxi. Mosïkaxi Suxi Kristo ix makïdï ïr Diuxi Maradï ïmadugakïdï, ïgai gia ïmadï dakana. Kïïga ïïmadai ïgai Diuxi dai gïr tïtïïgidiña ix tuiga.
Juan go bapakonadami aagidi odami xorai ïr Suxi Kristo
19Ïmo imidagai go fariseos Jerusalenïrï óídakami gatïkaka ïrhiditadai go Juan as tuma sïïrhikami biakami ïgai. Ga tïkaka ïrhiditadai dai otoi dadaxdadami ïmadï ïpï jaa kiupiïrï aatabuadami sai mïï gatïkakana. Dai go ix makïdï iji dai gatïkaka agai bïïxkatai ïr go Lebikaru pipiixaradïkatadai. Daidi itïtïdai ïgai go Juan,
—¿Borai aapi dai ix tuma sïïrhikami biakami aapi?— itïtïdai.
20Daidi go Juan kïï sïïrhi aagidi aidï daidi po tïtïdai,
—Aanï maiti ïr Ga Tïanïdami. Aanï maiti ïr go Kïïgakïrï Bubiadami ix makïdï Diuxi otosa agai tudu— itïtïdai.
21Daidi ix makïdï Jerusalenañdïrï dada dai gatïkakaimi itïtïdai aidï,
—¿Borai aapi aidï?— itïtïdai. ¿Aapi pïxi ïr go Eliaskaru?— itïtïdai.
—Cho— itïtïdai Juan.
—¿Aapi pïxi ïr go aagadami Diuxi ñokidï ix makïdï nïnïraka aatïmï judidiu?— itïtïdai go gaa.
—Cho— itïtïdai Juan. —Aanï maiti ïr ïgai— itïtïdai.
22Daidi go gaa itïtïdai aidï,
—Gïr aagidañi tuduidï xorai aapi dai ix tuma sïïrhikami biakami aapi, tai mïï aagida aatïmï ïgai ix makïdï gïr otoi— itïtïdai.
23Daidi go Juan potïtïdai aidï,
—Aanï mosïkaxi ïr ibuadami ixdukatai gïr aagidi go Isaiaskaru ïïki ix makïdï ïr ïmo aagadami Diuxi ñokidï. Aanï tudu ïr ïgai ix makïdï gïgïrï iñakaiña oidigana aimïraitai dai aagidiña aanï odami sai ïma dukai gïn tïgitokana sai podukai bhai gïn dukana xudu dibiagi Gïr Nukadakami— itïtïdai go Juan.
24Ïgai ix makïdï gatïkakai ïr ojotosadï go Fariseos. 25Daidi gatïkaka ïgai go Juan daidi itïtïdai aidï,
—¿Ix aapi maiti ïr go Ga Tïanïdami ix makïdï Diuxi otosa agai tuixi gabapakonai aidï odami?— itïtïdai. —Dai pokaiti aapi sai maiti ïr go Eliaskaru dai tomarhi maiti ïr go aagadami Diuxi ñokidï ïpï ix makïdï nïnïraka aatïmï judidiu. ¿Ix tuixidï gabapakonai aapi odami?— itïtïdai.
26Daidi go Juan potïtïdai aidï,
—Aanï mos ïr bakoanadami odami sudagiïrï dïï go gaa saagida oidaga ïmai ix makïdï aapimï mai maatï. 27Ïgai gokiïrioma gï aaga agai aaduindadï ix aanï dïï bïïxkïrï ïgai bamioma ïr namïakami ix aanï. Sïïrhikïdï ïr gïdukami ïgai. Aanï mai bia sïïrhikami tomarhi ix upandagi susakadï gigiaradï ïmo pioñigadï dukai mos ïï gïdukatai ïgai— itïtïdai Juan.
28Ïmo arhi kiiki Betania tïgidukamiïrï dajatadai go Juan ix ami dada go gatïkakadami ix tumaxi. Go Jordan akiïrï gabapakonaiña Juan odami. Go Jordan maigobai miadïrï bipiïyi go Betania.
Suxi Kristo ïr otosadï Diuxi ïmo kañiru dukami daxdaragai bïïtarï
29Xadiko go Juan tïï go Suxi ix no imïitadai daidi itïi tïïgakai,
—Daiñi bhodïrï imïi ix makïdï ïr Diuxi otosadï kañiru gï dukami. Ïgai oigïrhi biamu soimaaxkamigadï oidigi daama óídakami— itïi go Juan.
30—Gobai tudu ïr ix makïdï agaitadai aanï ïkioma. Aidï po tïtïdai aanï odami sai aanï ïpïgioma ïr busaikami tami oidigi daama ix bhai gobai ix makïdï gin gokiïrï dibia. Dïï tomaxi aanï ïpïgioma ïr busaikami bïïxkïrï ïgai gïïpi bamioma namïga ix aanï. Aidïxi busai aanï ïgai kaxi ïr oidakamikatadai kaxkïdï.
31Ïkioma mai maatïkana aanï xorai ïr Diuxi otosadïka agai. Dïï tomax dukai gabapakonaiña aanï odami dai gamamaatïturhiña aanï bïïxi go Israelitas sai podukai otoma maatïna ïgai Diuxi otosadï mos tïïgakai. Podukai maatïtuldiña aanï tomaxi aanï mai kia nïiditadai Diuxi otosadï ïpï dai mai kia maatïkatadai aanï xorai ïgai— ikaiti go Juan.
32-33Dai Juan oidi aatagidï daidi kaiti ïpï,
—Ïkioma mai maatïkatadai aanï xorai ïr Diuxi otosadï kia. Dïï gia Diuxi gin otoi ansai bapakonana odami dai Diuxi gin tïtïdai sai ix makïdï nïijada aanï ix tïbandagi Diuxi Ibhïgadï dai daama biiyagi ïgaipïrï ïr ix makïdï nïnïraka aatïmï. Ïgai bapakonadamu odami Diuxi Ibhïgadïkïdï, gin tïtïdai Diuxi. Dai gokiïrï aidïxi utudan bakoitadai aanï go Suxi sai tïï aanï Diuxi Ibhïgadï ix ïmo tugu maaxkami tïbai tïbagiañdïrï dai dama bii ïgai. 34Nïidi aanï Diuxi Ibhïgadï ix tïbai Suxi Kristo daama. Kaxkïdï kïïga maatï aanï sai ïgai ïr Diuxi Maradï dai xibi gïn aagidimi aanï sai ïgai ïr Diuxi Maradï sai aapimï kïïga maatïkagi ïpï— itïtïdai Juan go odami.
Tami aagai go tukamïrï mamaatïrdamigadï Suxi Kristo
35Dai xadiko no kïakatadai Juan ïmadï goka mamaatïrdamigadï 36dai tïï ïgai go Suxi ix no imïitadai daidi itïtïdai ïgai go gaa,
—Daiñi bhodïrï imïi Diuxi Otosadï Kañiru— itïtïdai.
37Dai ï goka mamaatïrdamigadï Juan oi go Suxi mos kaïkatai ix kaiti go Juan. 38Daidi kia no imïi go Suxi dai aa nïnïaba dai tïï ï goka mamaatïrdami ix oidi daidi potïtïdai,
—¿Mïx tuma agaimi?— itïtïdai.
Bai go ix makïdï oiditadai itïtïdai,
—Aapi mamaatïtuldiadami, ¿Pako gï urhiñaka aapi?— itïtïdai.
39Tai ïgai itïtïdai,
—Timïda tudu bai nïida aapimï xako gin urhiñaka aanï— itïtïdai Suxi aidï.
Saidi ïgai oi. Dai ka urui oidigi sai kaxkïdï amaxi kokoi ïgai xako gï urhiñakatadai Suxi. 40Andïrïxi tïgidu ïmoko ix makïdï oidi. Sukurhidï ïgai go Ximuñi.
41Dai otoma jii ïgai dai mïï aagidi Ximuñi daidi itïtïdai,
—Ka tïï aatïmï go Ga Tïanïdami ix makïdï nïnïraka aatïmï— itïtïdai.
42Dai otoma baidaja ïgai go Ximuñi sai nïidana go Suxi. Daidi Suxi mos tïïgakai go Ximuñi potïtïdai,
—Aapi ïr Ximuñi dai gï oga Juan tïgidu dai aapi Cefas gï aagamu odami xibi bhaitiakoga— itïtïdai Suxi. Piduru busakïi go Cefas tïtiaradï tudu dai itïiya ïrhidi aiti.
Suxi báí go Pirhi ïmadï Natanael sai oidana
43-44Xadiko Galileamu imi agai Suxi dai no xibhï tïï ïgai go Pirhi. Go Pirhi ïr Betsaidïrï oidakami ïmadï go Andïrïxi dai Piduru. Dai Suxi potïtïdai go Pirhi tïïgakai,
—Gin oidañi— itïtïdai.
45Daidi go Pirhi bhai aagai ix oidagi dai mïï gaagamu go Natanael daidi itïtïdai,
—Ka tïï aatïmï ïgai ix makïdï Moiseskaru aagaiña ïïki ojadïrï. Dai ix makïdï go gaa aagadami Diuxi ñokidï aagaiña ïpï ïïki— itïtïdai. —Suxi tïgidu ïgai daidi ïr Nasaretïrï oidakami. Maradï ïgai go Jose— itïtïdai.
46Daidi Natanael itïtïdai,
—Xadïrï ïr soiñikana ïmo Nasaretïrï oidakami— itïtïdai.
Daidi Pirhi itïtïdai,
—Tinda tudu pai ïïgi nïida aapi daidi maatïkagi— itïtïdai.
47Dai mai kia ayi Natanael xako dajatadai go Suxi sai go Suxi ka tïï daidi itïi,
—Bhodïrï imïi ïmo kïïrhi ix makïdï buaboikïdï ïr ïmo Israelita kïï tuigakatai gobai. Gobai gia mai buirumadai odami— itïi Suxi tïïgakai go Natanael.
48Dai go Natanael kaï daidi itïtïdai,
—¿Dukatai mos ïï kïïga gin maatï aapi?— itïtïdai.
Dai go Suxi itïtïdai,
—Aanï gï nïidi aidïxi mai kia gï baidakai Pirhi, aidïxi ïmo igoxi uta kïakatadai aapi— itïtïdai.
49Dai Natanael itïtïdai aidï,
—Gïr Mamaatïtuldiadamiga, aa gia ïr Diuxi Maradï aapi— itïtïdai. —Daidi ïr Reygadï aatïmï Israelitas— itïtïdai.
50Daidi Suxi itïtïdai aidï,
—¿Mos ïï laachkïdï pïx kaxi gin buaboitu aapi?— itïtïdai. —¿Mos gï aagidakai aanï ix gï tïï aanï igoxi uta kïakatai aapi?— itïtïdai. —Aanï aagai sai kia gïgïrdukamioma ixtumaxi nïijadamu aapi ix bhai gobai ix makïdï nïidi aapi xibi. 51Dukami, nïijadamu aapi ix kupiokomu go tïbagi dai tïtïsadamu dai tïapañimu Diuxi tïtïañikarudï aanïkïdï dai podukai ayimu xako dakamu aanï. Aanï ïr ix makïdï kïïga odami busai dai aanï poduñimu ix duu aagai aanï ix aapi nïijadamu— itïtïdai Suxi.
ప్రస్తుతం ఎంపిక చేయబడింది:
Juan 1: NTP
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Copyright: Ethnos360 Sanford, Florida