ÂTHAONA 19
19
Sawdawmâ Kawmawrâ paraona
1Vâlyuhchâpa pano cha zâlâ ta Sawdawmâ khih#19.1 Abarahâ yna Hebraw nata Sawdawmâ likawh cha noh no lâsie a châ. tlô ei ta. Lawta cha Sawdawmâ khih thokhy chhikao liata a vaw tyuh thlâh ha ta. Lawta ta âmo cha a vaw hmô nahta, dy awpa ta a duah ta, a hmia alei lâ a khupa ta a bôh ta. 2Lawta ta, “Ei zibeipa saih u, ei châ haw ei, ngiachhiepa ta châ chakaotuhpa o liata vaw tlô u la, a rie u la, nama pheizy a si teh u. Mydi ta thyu aw ei chi ta, nama sie nawpa lâ cha si lah vâ ei chi,” tah ta.
Âmo ta, “Châ vei, khiliah liata tlao eimâ rie aw,” tah ei ta.
3Châhrasala Lawta ta thata â hawpa vâ ei ta, ano cha pazi ei ta, a o lâ a ngia ha ei ta. Lawta ta âmo châta pati pahâhpa a chhuanoh ta, thinô pahlao leipa viahchhâ tao ta, nie ei ta.
4Amâ zia hlâta, khihpi chyhsa, Sawdawmâ khihsawzy ta o cha vaw dôh ei ta. Vaih to tawhta satliapa nata pawhrâhpazy amâ vaw ki khai haw. 5#Rrt 19.22-24Lawta cha awsao ei ta, “Tazâ ta na o liata a vaw tlôpa chyhsazy kha khataih liata ama y? Âmo kha kaw papua teh, eima ykhei aw,” tah ei ta. 6Lawta cha âmo a hmô awpa ta khôtho lâ pua ta, ochhi khaw ta, 7ama hnohta, “Unawh saih u, ei châ haw ei, cha hawh ngâsâ ta molei khah u. 8Moh teh u, chapaw a pahno beih leipa sawchanô pano ei hnei. Âmo cha nâmo lâ kaw papua aw ei na ta, pha nama tahpa hawhta ama chô liata tao teh u. He chyhsazy chô liata deikua cha, ei o vâphuh abohna ry liata a vaw ngia hapa châ ei ta, khâpa hmah tao cheita khuh vy,” tah ta. 9Châhrasala, “A hnei teh” tah ei ta. Khihsawzy chata, “He chyhsa bao hra heta, he liata a vaw paih ta, tahmâ cha ryureituhpa ta y â chhuah he! Âmo eima tao chhiepa hlâta chhie viapa ta eima cha taochhie aw,” tah ei ta. Lawta cha chatitha ei ta, ochhi parao awpa ta a vaw hnia ei ta. 10Châhrasala o chhôh liata chyhsazy ta ama ku ta kaw pazapa ta, Lawta cha a daophi ei ta, ama hnohta o chhôh lâ a ngiakhei ei ta, ochhi cha ama khaw haw.
11 #
2 Abei 6.18
Ochhi thaby liata chyhsa a ypazy cha, a lai a chyh ta ama mo pachaosa ei ta, thachhâpa ta ochhi hmô thei khao leipa ei ta.
12Vâlyuhchâpazy ta Lawta hnohta, “He liata chyhsa hropa na hnei khao ma? Na piahpazy, na sawchapawzy, na sawchanôzy, khihpi chhôh liata na sanawh maih, he su tawhta puakhei khai ha mah y. 13He su he eima pahleipadia aw. Abeipa hmiakô liata a khih chyhsazy kyh ama reipa a rarôh y ngaita ta, chavâta pahleipadia awpa ta Abeipa ta miah a za tuah,” tah ei ta.
14Chatanachata Lawta cha a sawchanôzy a hnei awpa#19.14 Lawta sawchanôzy kha a pahawhpa châ ei ta, vahpa deikua hnei mâh veih ei. Hlâno Izarei sawzy phoryhpa liata cha, a hnei awpa ta paryhsa hapazy cha lapinô/vahpa tahpa ta aw theipa ama châ. Chavâta Lawta sawchanôzy a hnei awpazy chhao kha a piahpa tahpa ama châ. a piahpazy lâ vawh ta, ama hnohta, “Thyu u la, he su tawhta pua teh u. Abeipa ta he khihpi he a pahleipadia aw,” kei tah ta. Châhrasala a piahpazy ta sai a sohpa hawhta pachâ ei ta.
15My khih a vaw dei nahta, vâlyuhchâpazy ta Lawta cha para ei ta, “Thyu la, he liata a ypa na lapinô nata na sawchanô panozy he puakhei teh. Chataleipatala, he khihpi hriena liata namâ hlao pathlei aw na,” tah ei ta. 16#2 Pit 2.7Châhrasala chhôhmohpa ta y thlâh ha ta. Abeipa ta Lawta cha a ngiachhiepa vâta, vâlyuhchâpazy ta ano nata a lapinô nata a sawchanô panozy cha ama ku ta patupa ta a chhi ei ta, khihpi khôtho lâ â bohpa ta ama puakhei haw. 17Khôtho lâ ama puakhei tawhta, vâlyuhchâpa pakha ta, “Na hro nawpa ta a râ teh. Na hnôh lâ a heih leipa la, bypi khataih su lia rai ta a duah hra khah y! Tlâhzy lâna khi ta a râ mah y. Chataleipatala na leidia pathlei aw,” tah ta.
18Lawta ta ama hnohta, “Ei zibeipa, cha hawhta châ khah sy! 19Châ chakaotuhpa he na khokheina na patosa chi ta, na zawngiahna rônahpa ei chô liata palâsapa ta, ei hrona na pabohsa ha hnohkua cha, tlâhzy lâna khi ta la a râ thei aw va na. Chhiena ta na vaw tlô thlu aw ta, ei thi pathlei aw. 20Moh teh, hao khih hao a râ khita liata y ta, a khih chhao khitaw a châ. Hao lâ hao rie na parâsa mah y, khitaw a châ huh, chatanachata ei hrona pabohsapa ta a y aw,” tah ta. 21Vâlyuhchâpa ta a hnohta, “A pha na, cha nâ hawna chhao cha ei paryhsa. Na reipa khih hao la parao aw va na. 22Hao khih lâ hao a chatliepa ta a râ mah y. Na tlô hlâlei khâpa hmah tao thei aw va na,” tah ta. Chavâta cha khih moh cha Zawâ#19.22 “Zawâ” tahpa cha, “achyhpa” tahna a châ. bipa a châ.
Sawdawmâ nata Kawmawrâ pahleipadiana
23Lawta ta Zawâ khih a tlô nahta, alei chô liata noh vaw chhi ha ta. 24#Mat 10.15; 11.23,24; Lka 10.12; 17.29; 2 Pit 2.6; Zud 1.7Abeipa ta Sawdawmâ nata Kawmawrâ chô liata vârâh tawhta mei nata kaih pasuasa ta. Vârâh liata a ypa Abeipa tawh tlai ta a zâ suahpa a châ. 25Cha khihpizy nata bypi zydua pahleipadia khai ta, khihpi liata a pahrâpa zydua nata chhaohlei liata a pyuhpazy chhao a pahleipadia khai haw. 26#Lka 17.32Hnôh lâ a chhâhpa Lawta lapinô cha hnôh lâ a heih ta, alôh tôh lâta â lie haw.
27A mylâ mydi ta Abarahâ cha thyu ta, Abeipa hmiakô liata â duana su lâ kha vawh ta. 28Sawdawmâ nata Kawmawrâ nata bypi râh zydua cha sai ta, râh tawhta meikhuh a kaw puapa hmô ta, meihôpi meikhuh hawh tlai ta a charih ngâ kaw ta.
29Khazohpa ta bypi khihpizy a parao nota, Khazohpa ta Abarahâ cha a thei thlâh ha ta. Chatanachata Lawta pahrâna khihpizy a parao nota, Lawta cha a rao haipa hry tawhta â chhi papua haw.
Lawta nata a sawchanôzy
30Lawta cha Zawâ liata y awpa a thlalôh thei leipa vâta, a sawchanô pano chhaota Zawâ cha puasai ei ta. Tlâh lâ kiah ei ta, a sawchanô pano chhaota lôpu liata pahrâ ei ta. 31A uhtheinô ta a nawhtanô hnohta, “Eima paw he machâ ha ta, khizaw zydua taozie hawhta miah a ziakhei awpa chapaw râh liata pakha hmah y veih ei. 32A vy teh, eima paw tawhta chipathla eima pazao thei nawpa ta, eima paw he kresawhti padosa sih la, a zialâh sih y,” tah ta. 33Cha zâ liata ama paw cha kresawhti padosa ei ta, a uhtheinô a ngia ta, a paw cha a zialâh ta. Â vaw ziapa nata a thyupa Lawta ta pahno vei.
34A mylâ ta a uhtheinô ta a nawhtanô hnohta, “Zâhnia zâ kha ei paw hnohta kei a zia na ta, tazâ chhao kresawhti padosa heih sih la, nâ a ngia la, a hnohta a zia hra mah y. Chatanachata eima paw tawhta chipathla eima pazao thei aw,” tah ta. 35Cha zâ chhao, ama paw cha kresawhti padosa heih ei ta. A nawhtanô cha thyu ta, a paw hnohta a kei zia ta. Â vaw ziapa nata a thyupa Lawta ta pahno vei.
36Chatanachata Lawta sawchanôzy cha ama narô ta ama paw saw phaoh ei ta. 37A uhtheinô ta sawchapaw sa ta, a moh “Môabâ”#19.37 “Môabâ” tahpa cha, “Ei paw tawhtapa” tahna a châ. a bi. Ano cha tanoh ta Môabâ mo pathlatuhpa a châ. 38A nawhtanô chhao sawchapaw sa ta, a moh “Benâmi”#19.38 “Benâmi” tahpa cha, “Ei paw sawchapaw” tahna tlyma, “Ei chhôhkhapa sawchapawpa” tahna tlyma a châ. a bi. Ano cha tanoh ta Amawna mo pathlatuhpa a châ.
ప్రస్తుతం ఎంపిక చేయబడింది:
ÂTHAONA 19: MARVBSI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society of India
© 2023, Used by permission. All rights reserved.