ZAWHÂNA 5
5
Tipo liata patlâhna
1Cha hnôhlâ ta Zuzy kyhchhi miakha y ta, Zisu cha Zerusale lâ khy ta. 2Zerusale liata Mietaku Ochhi kiapâh liata tipo y ta, cha cha Hebrai reih ta Bethesdâ#5.2 He liata Bethesdâ he hlâno kuropa Biehrai thokha liata cha Besaidâ tahpa a châ. tah ei ta, okah miapangawh a hneipa a châ. 3Chazy liata tlâhleipa hluhpi, mochaopazy, pheisypazy nata asihpazy a zia ei ta. Ti chatlaopa hâ tyh ei ta. 4Daihti raopa liata, Abeipa vâlyuhchâpa cha tipo lâ a zupa ta, ti cha chatlaosa tyh ta. Ti â chatlao khai tawhta tipo liata â ny tuachaipa cha, kheihawhpa pasana rai patlâhpa a châ tyh. 5Cha liata kô sythôh nata kô charie a pasapa chyhsa pakha y ta. 6Cha liata â ziapa cha Zisu ta hmô ta, cha hawhta bohpi a y hapa a pahno nahta, a hnohta, “Patlâh na khoh ma?” tah ta. 7Tlâhleipa chata a chhy ta, “Pâpuh, ti â chatlao nahta, tipo liata nâ ny awpa hnei leipa na ta, ei vaw hai nota mohropa ta eina chhao ha tyh ei,” tah ta. 8Zisu ta a hnohta, “Thyu la, na hmohphaw la la, phei ta sie teh,” tah ta. 9Cha chyhsa cha thlai vaw tlâh ha ta, a hmohphaw la ta, sie ha ta. Cha noh cha Pahânoh châ ta. 10#Neh 13.19; Zer 17.21Zuzy ta a tlâh hapa hnohta, “Pahânoh a châ hih, na hmohphaw la awpa ta ryhpa ta pasaih vei,” tah ei ta. 11Ano ta âmo cha a chhy ta, “Nâ patlâhtuhpa ano tlai ta ei hnohta, ‘Na hmohphaw la la, phei ta sie teh,’ eina tah,” tah ta. 12Âmo ta a hnohta, “‘Na hmohphaw la la, phei ta sie teh,’ châ tahtuhpa cha ahy maw?” tah ei ta. 13Châhrasala chyhsa a tlâh hapa ta a patlâhtuhpa cha ahy ma a châ tahpa pahno leipa ta, cha liata zawpi ama hluhpa vâta, Zisu hra cha sie ha ta. 14A noh hropa ta Zisu ta ano cha Achhyna o liata hmô ta, a hnohta, “Moh teh, na tlâh ha hih! Molei khao khah y. Chataleipatala hmopha lei viapa na chô liata a vaw tlô pathlei aw na,” tah ta. 15Cha chyhsa cha sie ta, a patlâhtuhpa cha Zisu a châzie Zuzy kei chho ta. 16Pahânoh ta cha hawhpa hmozy cha a taopa vâta, Zuzy ta Zisu cha taolapa ta, thie a chhuah ei ta. 17Zisu ta âmo cha a chhy ta, “Ei Paw cha tahmâ taihta rai hria lymâ ta, kei chhao ei hria lymâ hra,” tah ta.
18Cha vâna chata Zuzy ta Zisu cha thie a chhuah via rili ei ta. Pahânoh a paraopa vâ dei châ leipa ta, Khazohpa cha “Ei paw” tah ta, Khazohpa tlu ta â taopa vâta a châ hra.
Sawchapawpa biehneina
19Zisu ta ama hnohta, “Hmeiseihta ta, hmeiseihta ta ei cha chho ei, Sawchapawpa ta ano rei sai ta khâpa hmah tao thei vei. Paw hmotaopa a hmôpa deita a tao tyh. Paw ta a taopa maih cha, Sawchapawpa chhao ta a tao tyh. 20Paw ta Sawchapawpa kyh pachâ ta, a hmotaopa maih a pahmô tyh. Chazy hlâta hmotao rônah viapa chhao pahmô aw ta, nama no a âh ngaita aw. 21Paw ta athihpazy pathyu ta, a pahropa hawhta, Sawchapawpa chhao ta a khopa maih a pahro tyh. 22Paw ta ahy hmah pachia vei, pachiana zydua cha Sawchapawpa hnohta a pie khai haw. 23Chatanachata chyhsa zydua ta Paw ama zapa hawhta, Sawchapawpa chhao ama za hra aw. Ahy rai Sawchapawpa a za leipa cha, ano tuahtuhpa Paw a za leipa a châ. 24Hmeiseihta ta, hmeiseihta ta ei cha chho ei, ahy rai ei bie thei ta, nâ tuahtuhpa a ngiapâpa cha, chhâzaw hrona a hnei haw. Thailei pachâsapa châ leipa aw ta, thina tawhta hrona lâ tlao â ngia haw.
25 “Hmeiseihta ta, hmeiseihta ta ei cha chho ei, a daihti a vaw tlô daihmâ, tahmâ chhao a vaw tlô haw. Cha tita athihpazy ta Khazohpa Sawchapawpa ao thei aw ei ta, a theipa maih ama hroh aw. 26Paw cha hrona hnawh a châpa hawhta, Sawchapawpa chhao hrona hnawh châ awpa ta a tao. 27Chyhsa Sawchapawpa a châpa vâta, a hnohta pachiana biehneina a pie. 28Chazy cha nama noâh khah sy, a daihti a tlô daihmâ. Cha tita thlâ liata a ziapa zydua ta a ao thei aw ei ta, 29#Dân 12.2ama kaw thyu khai aw. Hmopha a taopazy cha hrona to awpa ta thyu aw ei ta, moleina hmo a taopazy deikua cha, thailei châ awpa ta ama thyu aw.
Zisu pahnokheituhpazy
30 “Keima kho ta khâpa hmah tao thei va na. Nah ta ei theipa hawhta pachia na ta, ei pachiana cha â do, keima rei sai ta y a chhuah leipa na ta, nâ tuahtuhpa rei sai ta y ei chhuahpa vâta. 31Ei thâtih he kei deita pahnopa a châ khiahta cha, ei thâtih ei pahnosapa cha a do aw vei. 32Ei thâtih nâ pahnokheituhpa pakha y ta, ei thâtih a pahnopa cha â do tahpa ei pahno. 33#Zhn 1.19-27; 3.27-30Zawhâna lâ chyhsa tuah ei chi ta, ano ta bie hmeiseihpa pahnokheina bie a vaw reih haw. 34Pahnokheina ei daopa kha, chyhsapa tawhta ei daopa châ leipa ta, pachha nama châ thei nawpa ta, cha biezy cha ei reipa a châ. 35Zawhâna kha meiôh khaihpa nata khaih ngaitapa châ ta, a khaihna ry liata thaphapa ta y chy awpa nama khoh kaw. 36Châhrasala pahnokheina ei hneipa he Zawhâna pahnokheina hlâta rônah viapa a châ. 37#Mat 3.17; Mka 1.11; Lka 3.22Nâ tuahtuhpa Paw cha ei thâtih nâ pahnokheituhpa a châ. A ao thei beih leipa ei chi ta, a hmia hmô beih hra veih ei chi. 38A tuapa namâ ngiapâ leipa vâta, a bie chhao nama palôh liata a vao veih ei chi. 39Biehrai bie nama tlua tyh, a chhôh liata chhâzaw hrona a y tahpa nama pangiasapa vâta. Cha Biehrai tlai cha nâ pahnokheituhpa a châ. 40Chatanachôta hrona hnei awpa ta kei lâ a vy khoh veih ei chi. 41Chyhsapa palyupalihna a pyh va na. 42Nâmo deikua cha ei cha pahno ei, nâmo liata Khazohpa kyhpachâna hnei veih ei chi. 43Ei paw moh ta a vy na ta, nâ pyh veih ei chi. Mohropa la ano moh ta a vy sala, namâ pyh aw. 44Nâmo nata nâmo a reithai raihrie ei chi ta, Khazohpa hmeiseihpa a y chhôhpa tawhta â vypa reithaina hmâchhâh nama tlua vei khiahta cha, kheihta namâ ngiapâ thei aw? 45Kei ta Paw lâ ei cha leih awpa ei pangiasa khu vy. Nâmo châ leihtuhpa pakha a y, nama ngâpa Mawsi khawh. 46Mawsi nama zo khiahta cha, kei chhao eina zo awpa ei chi a châ. Mawsi cha keima thâtih a rohpa a châpa kha. 47Mawsi bie ropazy nama zo vei khiahta cha, kheihta ei biezy nama zo thei aw?” tah ta.
ప్రస్తుతం ఎంపిక చేయబడింది:
ZAWHÂNA 5: MARVBSI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society of India
© 2023, Used by permission. All rights reserved.