MÂKA 16
16
Thyuheihna
(Mat 28.1-10; Lka 24.1-12; Zhn 20.1-10)
1Pahânoh a chhâ nahta, Mâri Mâdali, Zâmie nô Mâri nata Salawmi zy cha, Zisu sathawthu awpa ta ropahâhpa chalei ei ta. 2Hâta noh hmiatuapa mydi ta, noh a chhi tawhta thlâ lâ vawh ei ta. 3“Thlâ pamaina alô kha ahy ma miah a pasiepa aw tly?” tahpa ta reih laih ei ta. 4Kaw moh ei ta, alô lai ngaitapa cha â pasie hapa hmô ei ta. 5Thlâ chhôh lâ a ngia ei ta, satlia pakha poh diehpa a bupa ta, a ri aziana chachâh lâta a tyuhpa hmô ei ta, ama noâh ngaita ta. 6Ano ta ama hnohta, “Nama noâh khah sy. Nâzari khihpa Zisu, ama khaipâpa kha nama tlua tahpa ei pahno. A thyu haw. He liata y khao vei. Moh teh u, ama paziana hih. 7#Mat 26.32; Mka 14.28Sie u la, a pachupazy nata Pity hnohta, ‘Nama hnohta a reipa hawhna tlai khata, nama hmia lâta Kâlili lâ a sie hai, cha liata nama hmô aw,’ tahpa ta kei chho teh u,” tah ta. 8Noâh ngaitapa nata achalyuna chôta pua ei ta, thlâ tawhta a râ ei ta, ama chipa vâta, ahy hnohta hmahta khâpa bie hmah reih leipa ei ta.
Zisu aluahna
(Lka 24.13-35; Zhn 20.11-18)
9Hâta noh hmiatuapa mydi ta a thyuheih nota, a chhôh tawhta ahripa pasari a papuapa Mâri Mâdali hnohta a luah tua chai ta. 10Mâri Mâdali cha Zisu hnohta a y tyhpazy lâ vawh ta, mâchhiesapa ta a cha ngâpazy hnohta Zisu a hmôna thâtih kei chho ta. 11Zisu cha hroh ta, Mâri Mâdali ta a hmô tahpa ama theipa chhao ta, zo leipa ei ta. 12Cha hnôhlâ ta, ama hry liata chyhsa pano, khitaw lâ ama sie hai nota, hmia nanopa ta ama hnohta a luah heih ta. 13Âmo cha kua ei ta, pachupa hropazy kei chho ei ta, châhrasala âmo chhao cha zo leipa ei ta.
Tuana rônahpa
(Mat 28.16-20; Lka 24.36-53; Zhn 20.19-23)
14Cha khai tawhta, pahrawh hleikhazy tlâhkhai liata pati ama dôh hai nota, ama hnohta a luah heih ta. A thyuheih tawhta a hmôtuhpazy bie ama zo leipa vâta nata amâ ngiapâleina nata ama palôh kuhchhana vâta âmo cha ra ta. 15#Hmt 1.8Ama hnohta, “Khizaw zydua liata sie u la, hmotaopa zydua hnohta thâtihpha chho teh u. 16A ngiapâ ta bâti a châpa cha pachhapa ta y aw ta, a ngiapâ leipa deikua cha thaileichâpa ta a y aw. 17He ngianazy heta ngiapâtuhpazy cha a zi lymâ aw: Ei moh ta ahripazy papua aw ei ta, reih thiehpa ta reih aw ei ta, 18ku ta parihzy patu aw ei ta, thina châmaih kheihawhpa rai doh hra ei sala, âmo pasasa aw vei. Tlâhleipazy chô liata ama ku pahnieh aw ei ta, ama tlâh lymâ aw,” tah ta. 19#Hmt 1.9-11Chatanachata Abeipa Zisu cha ama hnohta bie a reih khai nahta, vârâh lâ a chhipa ta y ta, Khazohpa chachâh lâta a kaw tyuh ha ta. 20Pachupazy cha sie ei ta, su to liata bie chho ei ta. Abeipa ta âmo cha hriakhei ta, ama bie chhopazy pa-i nawpa ta, ngiana hmonoâhpazy ta a pazi lymâ ei.#16.9-20 Châh 9-20 taih he hlâno kuropa Biehrai thokha liata y vei.
ప్రస్తుతం ఎంపిక చేయబడింది:
MÂKA 16: MARVBSI
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
The Bible Society of India
© 2023, Used by permission. All rights reserved.