मति कितबवाक परिचय
कितबवाक परिचय
इअ कितबवा मति नाउँ भेल मन्से लिखले हखिय। उअ येसुजिक बारह जन चेलवानिमधे एक जन रहलिय (मति १०:३, मरकुस ३:१८)। उअ येसुजिक चेला हखलिसे यागा कर उठावेके काम करिय (मति ९:९)। वकर दोसर नाउँ लेवि रहलइ (मरकुस २:१४)।
मति येसुजिक जिवन, हुनेक करलि सेवाकाइ, येसुजिक मरलि हसे मरलिसे फेरि जिउते भेलि बारेमा लिखले बडिय। याको तिन जन लेखकसभ, मरकुस, लुका हसे युहन्ना फेनि येसुजिक जिवनक बारेमा लिखले बडइ। मति खास करके इअ कितबवा यहुदि मन्सावानिक तहिँया लिखले हखिय।
इअ कितबवामा परमेस्वरक वाचा करल मुक्तिदाता येसुजि हखसि। पुरान नियममा परमेस्वर यहुदियानिक तहिँया एगुडा मुक्तिदाता पठादेबहिँ कहके वाचा करले रहलसि। परमेस्वर येसुजिके इअ संसारमा पठाके करलि वाचा पुरा करलसि।
मति येसुजिक जनमसे सुरु करके हुनेक बप्तिस्मा, परिछा गालिलमा हुनेक करलि काम हसे परचारक बारेमा लिखलिय। हुने यरुसलेम गेलसि, हुनेक जिवनक अन्तिम हप्तामा घटलि घटना, क्रुसमा मरलि हसे तिसरि दिनवामा फेरि जिउते भेलि बतवा कितबवामा बडइ।
इअ कितबवामा येसुजि पहडावामा देलि उपदेस (मति ५-७ अध्याय) मा लिखाइल बडइ। स्वरगक राज नागरिक हखेके गुड, स्वरगक राजक बारेमा हुनेक कहलि दृस्टान्त नहिँया मुख्य सिछा लिखाइल बडइ।
बिसय सुचिक रुपरेखा
येसु ख्रिस्टक वंसावलि हसे जनम १:१–२:२३
बप्तिस्मा देलाहर युहन्नाक सेवाकाइ ३:१-१२
येसुजिक बप्तिस्मा हसे परिछा ३:१३–४:११
येसुजिक गालिलमा करल सेवाकाइ ४:१२–१८:३५
गालिलसे यरुसलेमलइ १९:१–२०:३४
यरुसलेममा हुनेक याखिर हप्ता २१:१–२७:६६
येसुजि मरलिसे जिउतलसि हसे चेलवानिक बिचा परकट भेलसि २८:१-२०
ప్రస్తుతం ఎంపిక చేయబడింది:
मति कितबवाक परिचय: CTHR
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023, Wycliffe Bible Translators, Inc. and Nepal Bible Society