YOHANES 17
17
Yesus Kibedoa ha Ipengikot-pengikot
1Telas Kiurok begei ajeh, Yesus Kiceog nu langit lalu Kibedoa bagei adeh: “Menek, hunen ya lei imase. Pemulieloh Eng Kenon Jen supaye Eng pen buleh Ngpemulie Jen. 2Enjen ya Jenog Eng Ngbekuasa nu manusia supaye Eng Ngog sinui de lei ditehjeh nu dikdij sengoi de ya Jenog nu Eng. 3Sengoi de begei adehloh de naikep sinui de lei ditehjeh: Sengoi de naikenal Enjen Jenang de nek nanek ru benar, ru naikenal juga ha Eng Yesus Kristus de Jenngeng. 4Eng ya Ngpemulie Jen ku kemil bumi adeh kerana Ngpeselesei kerenjak de Jenog nu Eng. 5Menek, pemulieloh Eng hunen ya kemuliean de mong ku Har sebelom dunia adeh bibeh.
6Eng ya Ngpekenal Enjen nu dikdij sengoi de Jenog nu Eng. Enai ajehloh de Jenpeaseg ju sengoi-sengoi dunia adeh. Enai ajeh hak Jen ru ya Jenog nu Eng. Enai naijoi ha engrok Jen 7ru hunen naipanei tentang hal adeh: Dikdij ma de mong ku Eng kihol ju Jen. 8Enai naipanei tentang hal ajeh kerana Eng ya Ngperlei nu enai engrok de Jenog nu Eng, ru ya naiterima dikdij engrok ajeh. Enai ya betol-betol naipanei Nghol ju Jen ru naipecaya Jenngeng Eng nu dunia adeh.
9Eng Ngdoa ha enai. Eng pek Ngdoa ha sengoi dunia adeh tapi ha enai de ya Jenog nu Eng kerana enai hak Jen. 10Dikdij hak Eng ajeh hak Jen juga, ru dikdij hak Jen ajeh hak Eng juga. Melalui enailoh Eng bipemulie. 11Eng doh pek Nggei nij ku dunia adeh kerana doh Ngjog nu Jen, tapi enai lekat naigei ku dunia adeh. Menek de suci, jagaloh enai ya kuasa Jen de ya Jenog nu Eng supaye enai naijadi nanek sama begei ha Har. 12Mase Eng besama ru enai, Eng Ngjaga enai ya kuasa Jen de Jenog nu Eng. Jadi, pek mong numom pen ju enai de rikroj kecuali numom de patot kirikroj, supaye ma de bicot ku kateh Alkitab kitejadi.#Mzm 41:10 13Hunen Ngjog nu Jen. Tapi hal adeh Ngpasal nu enai sementare Eng lekat mong ku dunia adeh supaye sengik enai tebeg ya keremmik begei ha Eng. 14Engrok Jen ya Ngperlei nu enai, jadi enai bigetek ya sengoi dunia adeh kerana enai pek hak dunia adeh, sama begei Eng de pek hak dunia adeh juga. 15Eng pek Ngsemanj Jenperhol enai ju dunia, tapi Ngsemanj Jenjaga enai ju Ibles. 16Sama begei Eng pek hak dunia, enai pen pek hak dunia. 17Pejadiloh enai suci ya neajar de benar. Dikdij engrok Jen ajeh neajar de benar. 18Eng ya Ngngeng enai nu sengoi dunia, begei Jen Jenngeng Eng nu sengoi dunia adeh. 19Eng Ngpesuci diri LiEng ha enai supaye enai pen betol-betol bipesuci.
20Pek ha enai taleh Ngbedoa tapi juga ha dikdij sengoi de doh naipecaya nu Eng melalui engrok de naiperlei 21supaye dikdij liknai naibenanek begei Jen Jenbenanek ru Eng, ru Eng Ngbenanek ru Jen. Eng juga Ngdoa supaye enai naibenanek ru Har supaye sengoi dunia naipecaya Jenngeng Eng nu dunia adeh. 22Eng ya Ngog nu enai kemuliean de Jenog nu Eng supaye naibenanek begei Jen ru Eng de Harbenanek. 23Eng Ngbenanek ru enai, ru Jen Jenbenanek ru Eng supaye enai betol-betol naibenanek. Lalu sengoi dunia doh naipanei Jenngeng Eng nu dunia adeh, ru Jenhok enai begei de Jenhok Eng.
24Menek, Eng Nghod begei adeh: Sengoi de Jenog nu Eng naibesama ru Eng ku tempat de Ngha-et doh ru naineng kemuliean Eng de ya Jenog nu Eng kerana Jenhok Eng sebelom dunia adeh bibeh. 25Menek de benar, sengoi dunia pek naikenal Jen tapi Eng Ngkenal Jen ru dikdij sengoi de Jenog nu Eng naipanei Jenngeng Eng nu dunia adeh. 26Eng ya Ngpekenal Enjen nu enai ru Eng doh teros Ngbeh begei ajeh supaye haknok Jen nu Eng mong ku kateh sengik enai ru supaye Ngbenanek ru enai.”
ప్రస్తుతం ఎంపిక చేయబడింది:
YOHANES 17: AEH
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.