Popodalaina 2
2
1Ego ko qai taroiti vaokoto sa na oka beto na abana beto doru vaiminetai sakasa pa leodi.
2Ego ko pa rane vinavitu na Tamasa sa tei vaokotia tu sa na ona roiti sa kole roitiniria, ko pa rane vinavitu sa minereniria isa sira doru ona roiti sa roitiniria. 3Beto sa manania na Tamasa sa na rane vinavitu beto sa vamadia sisa ura pa rane isa sa sa minereniria isa sira doru ona roiti vavapodaka sa roitiniria.
Na Tinoni Momoe beto Na Rereko
4Aipira sa na vavakatodi na oka beto na abana totonai qai tavapodaka.
Ego totonai sa roitinia i Iahova Tamasa na abana beto na oka- 5perangana sa qai oqoro bola votupa abana sa doru mumuqu beto doru umuma pa mumuqu qai oqoro pidoko sae, ura i Iahova Tamasa sa oqoro vagore tarinia na okoro sa na abana beto kepore na tinoni bi roitia na peso, 6ba na rovu kolo sa iolo votu pa abana ko sa vabukua sa na are doruna na peso. 7Beto sa bolobakilinia i Iahova Tamasa pa kovuruna na peso sa na tinoni beto sa singo tarinia na singo toana sa na isuna poni sa votu tinoni toana sisa.
8Ego i Iahova Tamasa sa umai sa kai inuma pa Idini pa kale sagere tapo, ko ketakoi sa vasuverenia isa sa na tinoni sa bolobakilinia. 9Beto sa vapidokoria i Iahova Tamasa pa peso sa doru gogou qai babata jonga beto qai gagani jonga. Ko pa korapana na inuma isa sa turu sa na gou vaivatoana beto na gou vaivagigalaina na jongana beto na ikerena.
10Ego kai ovuku sa votu koko vei pa Idini ko sa vabukua sa na inuma, beto koko ketakoi sa sa pikata ko sa made kae batu ovuku. 11Na isongona na ovuku momoe sa pa Pisoni, isa sa vividulai tututia sa na ia doruna pa Havila ketakoi sa kole na qolo. 12(Na qolo pa ia ketakoi sa na qolo jongana; na duki otata umumanga jonga beto na patu jojonga ba qai kole tugu ketakoi.) 13Na isongona na ovuku vinarua sa pa Qihoni, isa sa vividulai tututia sa na ia doruna pa Kusi. 14Na isongona na ovuku vinaue sa pa Tiqirisi, isa sa rerege vei kale sagere tapona pa Asua. Beto ko na ovuku vinamade sa isa pa Eupareti.
15Ego sa tekua i Iahova Tamasa sa na tinoni ko sa vasuveria pa inuma pa Idini ko mi roitia beto mi kopunia sau. 16Beto sa ule vania i Iahova Tamasa sa na tinoni, pira saunia, <<Ira doru gou pa inuma muna boka teku gaganimua vuadi sao, 17goto pa gou vaivagigalaina na jongana beto na ikerena sa muneke teku gania na vuana, ura na ranena tugu muna teku gania ao na vuana sa muna mate sosoto>>, saunia.
18Beto sa paranga si Iahova Tamasa, <<Sake jonga sa na tinoni mina suvere meka. Mana roiti vania kai tinoni vaitokai isa mina vavaburoa sisa>>, sau.
19Ego sa tei bolobakiliniria tu i Iahova Tamasa perangana pa peso sa doru mamanugu pirudi pa mumuqu beto doru mamanugu tatatava pa vavagalo eqa. Ko sa toni lameniria tana tinoni ko mi batiria beto na sa mina vakukuniria sau. Ko ai isongo sa vakukuniria na tinoni sira na okokoto mamanugu toadi sa isa tugu sa na isongodi. 20Ko sa vakukuniria na isongo na tinoni sa doru mamanugu papausu, doru mamanugu tatava pa vavagalo eqa beto ko doru mamanugu mamade nene pirudi pa mumuqu. Ba na tinoni sa sake batia sa kai tinoni vaitokai bi boka vavaburoa sisa.
21Ko sa vagorenia kai puta muma lavata i Iahova Tamasa sa na tinoni, ko totonai sa korapa puta isa sa sa unusu tekua sa kai pupuda pa raraqona na tinoni beto sa tako liguni masana. 22Beto sa varoitia i Iahova Tamasa sa na pupuda sa tekunia tana tinoni ko sa vavotuni rereko, beto sa toni laonia tana tinoni.
23Poni sa paranga sa na tinoni,
<<Kopira tu api sa!
Na pupudana na pupudaqu,
Beto na masana na masaqu!
Api sa mina isongona na maqota,
Ura tana marene sa taunusu teku sapi>>, #2.23 Pa paranga Hiburu <<na maqota>> sa na paranga <<issah>> goto <<na marene>> sa na paranga <<is>>. Ko qai vaiqiro sa karu paranga aipira. sau.
24Ko pa ginugua vei isa sa na marene mina loai na tamana beto tinana ko mina togasa lao tana maqotana, ko mai mekarai kai tinidi sira karu.
25Ego ko ira karu na tinoni beto na maqotana sa na gagadodi beto qaike vaikea sira karu.
ప్రస్తుతం ఎంపిక చేయబడింది:
Popodalaina 2: LGA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2024, Islands Bible Ministries. All rights reserved.