1 Xa̱bo̱ Korínto̱ 2
2
Ajngáa ga̱jma̱á numuu Krísto̱ tsí waꞌdujmaa
1Ikhaa jngó a̱ngui̱nꞌ, nákhí nika gátha̱nꞌlaꞌ awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú, tájmulo̱ꞌ ajngáa rí ma̱makualaꞌ gáꞌne o ga̱jma̱á ajngúún xa̱bo̱ tsí na̱ma̱ñúú guéño ná numbaa mbo̱ꞌ. 2Numuu ni̱ꞌgí-mina̱ꞌlo̱ꞌ rí awúun mbiꞌi rí xtáá ga̱jma̱á nindxa̱ꞌlaꞌ, ma̱xátha̱nꞌlaꞌ numuu i̱mba̱, rí i̱ndo̱ó máꞌ ga̱jma̱á numuu Jesukrísto̱ tsí waꞌdujmaa ná ixe̱ krúsi̱ ma̱ja̱ñúu. 3Xkuaꞌnii wabúún nixtáá ga̱jma̱á nindxa̱ꞌlaꞌ, asndo naguꞌwúún rí namíñuꞌlo̱ꞌ. 4Ído̱ ni̱tha̱nꞌlaꞌ jamí ni̱tha̱n-ráꞌalaꞌ, táne̱ rí ma̱ne̱-rájáanꞌlaꞌ ga̱jma̱á ajngóꞌ xómá ene̱ xa̱bo̱ numbaa, rí i̱ndo̱ó máꞌ Xu̱u̱ꞌ Ana̱ꞌlóꞌ nisngájma ga̱jma̱á ski̱yu̱u̱ꞌ rí gakon rí na̱tha̱nlo̱ꞌ. 5Xkuaꞌnii kajngó ma̱we̱je̱ a̱kia̱nꞌlaꞌ ná tsu̱du̱u̱ ski̱yu̱u̱ꞌ Ana̱ꞌlóꞌ, ra̱ꞌkhá ná tsu̱du̱u̱ rí na̱ma̱ñúú xa̱bo̱ numbaa.
Ana̱ꞌlóꞌ nasngájma awan drígo̱o̱ ga̱jma̱á majñu̱u̱ Xu̱u̱ꞌ
6Gakon máꞌ rí nu̱tha̱nxo̱ꞌ xómá xa̱bo̱ tsí na̱ma̱ñúú ná inúú tsí nikhi̱in máꞌ ná inuu Ana̱ꞌlóꞌ. I̱ndo̱ó máꞌ numuu rí ra̱ꞌkhá xómá rí na̱ma̱ñúú xa̱bo̱ ná numbaa ríge̱ꞌ, o xómá rí na̱ma̱ñúú xa̱bo̱ ñajun tsí na̱ka̱-rayámba̱ ski̱ñu̱ú mbo̱ꞌ. 7Xómáꞌ ikháanꞌxo̱ꞌ, nu̱tha̱nxo̱ꞌ rí na̱ma̱ñuu Ana̱ꞌlóꞌ, awan drígo̱o̱ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ asndo nákhí máꞌ xóó nda̱a̱ numbaa. Ga̱jma̱á majñu̱u̱ rí na̱ma̱ñuu Ana̱ꞌlóꞌ niꞌgí-mine̱e̱ꞌ ma̱ꞌnii̱ rí maphú ma̱gi̱ꞌdoo numalóꞌ. 8Nimbáa xa̱bo̱ ñajun tsí nixtáa ná numbaa ríge̱ꞌ táfroꞌo̱o̱ rí na̱ma̱ñuu Ana̱ꞌlóꞌ. Xí numuu rí nifruꞌúu̱n ne̱, ni miꞌtsú túdujmaa̱ ná ixe̱ krúsi̱ Táta̱ tsí ninújngoo gíꞌdoo numuu. 9A̱ꞌkhue̱n gakon, xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:
«Ana̱ꞌlóꞌ neꞌne-mújúun rí maxnúú tsí nandúún juyáa̱,
rí táꞌyoo nimbáa xa̱bo̱ ga̱jma̱á iduu,
ni máꞌ tádxawuun ga̱jma̱á ñaꞌwuun, ni máꞌ táju̱mu̱u̱ mbá jayu».#2.9 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 64.4.
10Xómáꞌ Ana̱ꞌlóꞌ neꞌne rí mu̱ꞌne̱-nuwiin ikháánꞌlóꞌ rúꞌkhue̱n ga̱jma̱á majñu̱u̱ Xu̱u̱ꞌ. Numuu rí Xu̱u̱ꞌ ndaꞌyoo mbá xúgíí, asndo rí ríga̱ ngu̱ꞌwo̱o̱ ná awúun a̱kui̱in Ana̱ꞌlóꞌ. 11Tsáa xa̱bi̱i̱ tsí ndaꞌyoo rí ríga̱ ná awúun a̱kui̱in i̱mba̱a̱ꞌ xa̱bo̱ rá. Nimbáa, rí i̱ndo̱ó máꞌ a̱kuii̱n ndaꞌyoo. Xkuaꞌnii máꞌ nimbáa tsíꞌyoo rí ríga̱ ná awúun a̱kui̱in Ana̱ꞌlóꞌ, rí i̱ndo̱ó máꞌ Xu̱u̱ꞌ Ana̱ꞌlóꞌ ndaꞌyoo. 12Jamí ikháánꞌlóꞌ túdrígúlóꞌ rí na̱ju̱mu̱ú xa̱bo̱ numbaa, rí ni̱dríguíilóꞌ Xu̱u̱ꞌ Ana̱ꞌlóꞌ, kajngó ma̱goo ma̱fraꞌa̱ꞌlóꞌ rí nixnálóꞌ Ana̱ꞌlóꞌ. 13Ído̱ rí nu̱tha̱nxo̱ꞌ numuu rúꞌkhue̱n, tsítha̱nxo̱ꞌ ga̱jma̱á ajngáa gisngáá rí na̱ma̱ñúú xa̱bo̱ numbaa, rí ga̱jma̱á ajngáa rí naꞌsngáá Xu̱u̱ꞌ Ana̱ꞌlóꞌ. Nu̱tha̱n-makaxo̱ꞌ rí naꞌsngáá Xu̱u̱ꞌ Ana̱ꞌlóꞌ ná inúú tsí xtáa máꞌ Xu̱u̱ꞌ ikhaa̱ ga̱jma̱á nindxu̱ún. 14Xa̱bo̱ tsí na̱nguá xtáa Xu̱u̱ꞌ Ana̱ꞌlóꞌ ga̱jma̱á nindxu̱u̱ tsígrui̱guíi̱ rí naꞌsngáá Xu̱u̱ꞌ Ana̱ꞌlóꞌ, numuu rí tsiskágu̱nꞌ ñajuun ne̱ iꞌyoo̱ rí ikhaa̱. Jamí tsíꞌngo̱o̱ gáfroꞌo̱o̱ ne̱, numuu ndaꞌyóo rí ma̱froꞌo̱o̱ ne̱ ga̱jma̱á majñu̱u̱ Xu̱u̱ꞌ Ana̱ꞌlóꞌ. 15Xómáꞌ xa̱bo̱ tsí xtáa Xu̱u̱ꞌ Ana̱ꞌlóꞌ ga̱jma̱á nindxu̱u̱ rá, mbá xúgíí nandoo na̱ra̱jwe̱e̱ꞌ rí ikhaa̱, jamí nimbáa xa̱bo̱ tsíꞌngo̱o̱ gára̱jwa̱ꞌ ga̱jma̱á numuu̱ ikhaa̱. 16Numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:
«Tsáa ndaꞌyoo rí nandxaꞌwá-mina̱ꞌ Táta̱ róꞌ,
Tsáa ma̱ꞌngo̱o̱ maꞌsngóo̱ róꞌ».#2.16 Ajngáa ríge̱ꞌ na̱ꞌkha̱ ná I̱yu̱u̱ꞌ Isaía̱s 40.13.
Xómáꞌ ikháánꞌlóꞌ, nu̱ndxa̱ꞌwa̱-mijnálóꞌ xómá nandxaꞌwá-mina̱ꞌ Krísto̱.
ప్రస్తుతం ఎంపిక చేయబడింది:
1 Xa̱bo̱ Korínto̱ 2: tcf
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2025 SIL Global. Creative commons license CC BY-SA.