Mlk 10
10
Isaliya aliko la maŋana
(Mat 19.1-12; Luk 16.18)
1Yesu apasi ango la nchwa e wooni ba Yudɛya, nende boleka onkinɛ ba losi ba Yɔlɔdani. Boloi bɔmɔɔ baanto bosaŋani lonkinɛ mɛ landako la oke manja mbobaekya, ŋango akɛisa ndako biina lalikuli.
2Lonkinɛ, Bafalisayɔ bamɔɔ ba sukami sukɛlɛ la Yesu aliko la mbo waambela lilonga. Bawuumboli: «Isaliya yaso imbolɔnda nte mpame ombo koka mbita waajande»?
3Yesu obauchisa wiingo mumbola yaɔ: «Isaliya nke yakochikeli nyo Musa?» 4Bake nɔnda: «Musa atosimeli nte, mpame aonake mbita waajande awaandikele balowa ba maŋana la mbowiita».
5Yesu aasimeli: «Musa akwandikeli nyo ingo isaliya, aliko la basolo banyo nkulu. 6Kinaki, katango Kanamombe aombi bikambwa lalikuli, la aombi mpame la wainto.#10.6 Ɔsɔmɛ Otango 1. 27; 5.2» 7Aliko laingo, mpame akondotika isɛnde la nyaŋɛndɛ la njala kaama kamɔɔ la waajande. 8La bako ba phee bakondoyalaka bionge bimɔɔ#10.8 Ɔsɔmɛ Otango 2.24. Lonkinɛ bachiki baphee kinaki bionge bimɔɔ. 9Nte ingo eoŋanisha Kanamombe kotayalake bonto aɔsɔna maŋanya.
10Ango aiki baeki* otema ba lulu, bauumboli lonkinɛ ele Yesu weengo besao. 11Yesu abauchisa: «Iya mpame ombwita waajande la nsɔnga onkinɛ, ombo kɛɛ litola ele ongo aotamboka; 12Ŋango ako, iya wainto ombo pasa ele bome ande, la nsɔngwa la onkinɛ bome, ombo kɛɛ litola ele ongo bome ande otango.»
Yesu ombo chwela bana bochwako
(Mat 19.13-15; Luk 18.15-17)
13Luina lɔmɔɔ, banto bawɛɛlisa Yesu bana aliko la mbwaapheya bakasa, kinaki baeki* bake mbwa phangwela. 14Ango aɛni Yesu ingo, oke momala nkɛlɛ la nɔnda la baeki bande: «Lɛla bana baande kami! Kota asimbake nyo, aliko la ekeleka e Kanamombe* kelende ele banɛ bale phoke bako. 15Mbokosimela nyo, kolende sɔlɔ: Ɔnɛ ole phaimiya besao be ekeleka e Kanamombe* phoke bɔna, phaɔsɔna jɛ mingela kako.» 16Lonkinɛ, Yesu aakombesanyi bana, aachweli bochwako ombo baapheya bakasa.
Yesu la bonto boso nombo
(Mat 19.16-30; Luk 18.18-30)
17Ango Yesu aanjisa lonkinɛ lɔkɛndɔ, bonto ɔmɔɔ aandi loango la mbwi yoka la nkɔma balwe otamboka lande la mbowuumbola: «Weekisi bɔlɔti, lemi nkɛɛ ŋaande aliko lamba luiko la tiiti»?
18Yesu aosimeli: «Aliko laanke emombelela wɛɛ bɔlɔti? Koo bonto ole bɔlɔti ila Kanamombe nɛmɛlɛ! 19Ombweya ŋango isaliya ilɔndaka: ‹Kojakake, Kokɛɛkɛ litola; Mbiya; Usuula ba bolimbo, Kolɔndake bolimbo; ila kucha isɛɛ la nyɛŋɛɛ.#10.19 Ɔsɔmɛ: Mpasa 20.12-16; Kumbukumbu 5.16-20›» 20Ongo bonto obuchisa: «Weekisi, nkɛɛka bingo lalikuli oomponjo bami.» 21Yesu aolendi la baiso ba nanga, la aosimeli: «Kombokopheka ekambwa ɛmɔɔ, chwaka nsombya lalikuli bile wɛɛ la bɛko, la mbɔya baso boola bengo ombwikicheya bokombe e loola, lonkinɛ aka oningite lemi».
22Kinaki ango aoki ongo bompojo bingo, alɛmi ɛlongi la achwe ataomala, aliko wiiki la besanga ike. 23Yesu alendi baeki* bande, baiki bata otimbe la mbwasimela: «Kolende koolo ele baso nombo mingela weekeleka e Kanamombe»!
24Baeki* bake nsebalala la bosao bande. Kinaki Yesu aasimeli lonkinɛ: «Bana ami, kolende koolo mingela weekeleka e Kanamombe*! 25Kolende koolo o ngamia mingela e mpuku e nsingɛ, kinaki kolende koolo lonkinɛ boso nombo mingela weekeleka e Kanamombe*».
26Baeki* ba Yesu baoki lonkinɛ ingo basebalali, la mumbolana bamɔɔ la bankinɛ iya ŋaanɛ: «Nani lonkinɛ okakolamaki»?
27Yesu oalendi la aasimeli: «Kolende nkulu ele banto, kinaki jɛ ele Kanamombe, aliko lalikuli bimbosana ele ndako».
28Pɛtɛlɛ aosimeli: «Oka, totiki beko lalikuli aliko la nkolingita.» 29Yesu abuuchisa: «Mbokosimela nyo kolende sɔlɔ: iya bonto ombo tika lulu lande, ao baotwa lande la batamba bande la nyɛŋɛnde la bana ande la bibeli bende, aliko lami la besao be Kanamombe*, 30Obaaki mala miya weeleko ɛnɛ etayale iso nkaanɛ: akondoba mbulu, baotwa, betamba, ba lele, bana la bibeli. Koonga ŋango akondo baaka twakola aliko lami. La luina loandaki, akondo baaka luiko ba tiiti. 31Kinaki ike banɛ bale otamboka asamba nyo lɛlɔ, bakondoyalaka ɔɔkɔngɔ. La banɛ bale ɔɔkɔngɔ bakondoyaka otamboka».
Yesu ombolɔnda mala e isato aliko la libwelo la ntondwa yande
(Mat 20.17-19; Luk 18.31-34)
32Ango aiki Yesu la Baeki* bande e mboka e nchwa Yɛlusalɛma, Yesu aiki atakɛndɛ otamboka la bako, baeki baiki batasebalala la bango baolingitaki baiki la wɔɔma. Yesu okemeli lonkinɛ baeki* bande joomu la aphee la njala ataasimela bingo bi wiiyelaki. 33La Yesu aasimeli: «Oka nyo, tombuulela e Yɛlusalɛma, engo lemi Bɔna a Onto lakondo phakemaka ele bakɛndi* la Baekisi ba isaliya. La bako, bakondo mphaka waapakano aliko la linjaka. 34Banɛ bakondo mbelolelaka, bakondo nchwela lɔsɔi, bakondo mphola behapho la linjaka. Kinaki, e biina isato, lakondo tondwaka».
Nɔmba ya Yakɔbɔ la Yɔani
(Mat 20.20-28)
35Lonkinɛ, bana ba phee ba Sɛbɛdayɔ, Yakɔbɔ la Yɔani baandi ele Yesu la mboosimela: «Weekisi, tombolanga oto kɛɛlɛ bingo bikɔlɔmba iso.» 36Yesu abaumboli: «Atalange nko kɛɛlɛ nyo nke?» 37Bawuuchisa: «Ango ayalaka wɛɛ weeje ɛbɛ eukuchu, ɔtɔya iso kaama ka njala boleka abɛ, ɔmɔɔ boleka ba loome labɛ la onkinɛ e loali labɛ.» 38Kinaki Yesu aasimeli: «Phaeye nyo binɛ bitalɔmbɛ nyo, aɔsɔna nyo nywa bokoyo ba twakola bɔnɛ baona lemi nywa? Ao aba lemi ubatiso ba twakola lanyo aɔsɔna mbatisiwa ŋango?» 39La bawuuchisa: «Taɔsɔna.» Yesu aasimeli: «Kolende sɔlɔ: Akondonywa nyo bokoyo bɔnɛ baona lemi nywa ba toakola la ubatiso ba toakola yaba lemi akondobaaka nyo ŋango ako. 40Kinaki, kapha lemi kaasɔna mpanga ɔnɛ asɛlɛlaka e loome lami la loali lami; kango kaama kalende ele bango Kanamombe pa mbwakicheya.» 41Ango aoki bango bankinɛ baeki* joomu bingo, baomali nkɛlɛ aliko la Yakɔbɔ la Yɔani. 42Lonkinɛ, Yesu aeleli Baeki* bande lalikuli la mbwasimela: «Ombweya nyo nte, bango bataɛni nyo phoke Bɛkɔta be anto bataakonja la nkulu, la banɛ bale wiijee batabaɛnya twakola. 43Kinaki, ingo phayayale lonkinɛ asamba nyo. Aliko, iya ɔmɔɔ anyo alangake njala waiyolo, kasana ayale bokambi anyo. 44La iya ɔmɔɔ anyo alangake njala otamboka la nyo, aɔsɔna njala bɔkwɛɛ* baanto lalikuli. 45Aliko lemi Bɔna a Onto, koo manda aliko la mbwikambela, kinaki, laandi nde nkambelana la mpaka luiko lami aliko la nkakola baanto ike.»
Yesu ombo wiikya bontongo Balatimayɔ
(Mat 20.29-34; Luk 18.35-43)
46Yesu la Baeki* bande baiyisa wɔɔsɛngɛ ba Yɛliko. Apasi bako woongo ɔsɛngɛ, boloi bɔmɔɔ baanto baalingiti. Bonto ɔmɔɔ aiki ontongo ataelelama Balatimayɔ, bɔna a Time, aiki atasɛlɛla e mpamba la mboka la nɔmbanɔmba. 47Ango aoki ndako nte olende Yesu a Nasalɛti kataete, oke mbwikicha ataokoma la nɔnda: «Yesu Bɔna a Daudi, ɔmɛnɛlɛ ŋandi!» 48Banto ike baophangwelaki nte akɔwɛ, kinaki, aphaphi lonkinɛ mbokoma la nkulu: «Bɔna a Daudi ɔmɛnɛlɛ ŋandi»!
49Aliko la ingo, Yesu aemali la nɔnda: «Elela nyo ndako.» Baeleli lonkinɛ ongo ontongo la mboosimela: «Kekemala, emala wɛɛ, ombo koelela.» 50Aoki ndako ŋamgo, kako nkango o phunbwe loango aphupholi esenda ende, la nchwela Yesu.
51Yesu awuumboli: «Nke elanga wɛɛ nko kɛɛlɛ» ontongo owuuchisa: «Weekisi, kɛɛ nte m'mɛni lonkinɛ.» 52La Yesu aosimeli: «Chwaka, lokani labɛ lombo koikya.» Kako nkango, ɔɛni lonkinɛ, la oolingiti Yesu.
ప్రస్తుతం ఎంపిక చేయబడింది:
Mlk 10: oml
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
2025 Forum Communautairre des Traducteurs de la bible et Alphabetisation