Markus Kitab tae ni fanfanna
Kitab tae ni fanfanna
Abar Mafia: Kitab Markus tae, jaga tu, “Abar Mafia” (B. Ind: Injil). Ni caritana Jou Lahatalla ncula Yesus Kristus nlafo mali dunia tae, ga ise be ta ndela I, smat cia ni dosana osta nduk ampung fare i osta ntub re Jou Lahatalla denabe lali.
Smat ta nlefo kitab tae: Lal smat ta rto Kitabna du, ta nlefo Kitab tae Markus. Markus cia, Petruse ni del i. Markuse nlonga Yesuse ni caritana lal mali Petrus i. Markuse ngahnyo nesana Yohanes (Kis. 12:12). Markus tae smat ta nderera farerer re Paulus fare Barnabas bo n'gali si oras ta si rfanna laspa taga bahnga tina bo rfabinga Yesus Krsituse ni Abar Mafia (Kis. 12:25). Mali kitab ta nesana, Pauluse nu bena, Markus cia smat ta n'gali i oras ta i npei Jou we ni karajanna (2Tim. 4:11).
Kitab tae bo ise:: Kitab Markus tae rlefo i bo smat ta rteteam potalil mali batang ta Yesuse nfanye ni karajanna, ga si tina smat Yahudi si pa. Si tane dema re mtari pilupa mfalaisa Yesuse ntubna, fare farumi ta Yesuse npeie tona. Gabe si tane rcangnangna gaole, ningalena Markuse nlefo tane bo npo si, fare laina, si rto Yesus gabe rdela I.
Sogaro mali kitab tae: Mali kitab tae, Markuse nafetang Yesuse ni kawasana. Nafetang Yesuse nfamafia smat ta dowilna, nfapaling hawe smat ta rmatna, nampung smat ta rbaradosa, fare ta nesana hawe. Markuse nlefo farumi carita tina, bo smat ta dem Yesus pana, bisa rto farumi mujizat fare fafayal ta Yesuse npei bo nfaeme Jou Lahatalla ni kawasa. Re laina, si rto, Yesus cia Lahatalla ntu I fare I cia Kolano ta nfasalamate smatca (Mrk. 1:1, 11, 24, 3:11, 5:7, 8:29, 9:7, 14:61-62, 15:39). Markuse nlefo kitab tae bo nfasangnang si hawe bo ahai ta si rbona, si rderera be Yesus (Mrk. 8:34-38, 10:29-31).
Ga mali cicapo kitab tae, Markuse nafetang mfalaisa ta rfaboboko agama Yahudina diyawa lalinge bo rpun famat Yesuse. Markuse ma nafetang hawe mfalaisa smatna riri le Yesusna, rfakangela i, fare rcalip I denabe nmat (Mrk. 15). Ga mali wol ta faicolica, Yesuse npaling hawe, fare hola tina I nfaemi mali smat ta rderera Ina, taga ncula ni muritna rfan lali farumi dunia tae bo rfabinga Abar Mafia mali Jou Lahatalla i mali farumi smat (Mrk. 16).
ప్రస్తుతం ఎంపిక చేయబడింది:
Markus Kitab tae ni fanfanna: BZQ
హైలైట్
కాపీ
సరిపోల్చండి
షేర్ చేయి
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
2026 Indonesian Bible Society