संत.मरकुस 10

अपन आउराईत हेरेल लोः बाईयोः रेनअः ईसु आला सिकछा

(संत.मत्‍ती 19:1–12; संत.लुकास 16:18)

1ईसु होनाःड़े तरअः उडुंग केते जरदन नाई होना पखी जाहुदिया राईज रे सोदोर नेनाय, तेकर मुरुक तुन्दरा होड़ आउर गी हुनी दुबाःड़े जवार नेनाकु, हेतरअ पहिल लकान गी हुनी उउदूः लगाव नाय।

2तेकर फरीसीकु हुनी दुबाःड़े हीःग केते प-परीकछा लःअय, “अपन आउराईत के बाबाई मरदानाकु लःअय उचित एदनाअ एतान?” मेन केते कुली लियाकु। 3हुनी, “मुसा आपे के एतान आचु तदपेआय?” मेन केते कंहड़ी रूवाड़ लःअय।

4 # कन 24:1–4; सं.मत्‍ती 5:31 हुंकू, “मुसा दो बाबाई रेनअः चिठी लिखा केते बाबाई आचु तदलेआय,” मेन लअकु। 5ईसु, “आपे आला कठोर मन रअः चलते हुनी नोकान हुकूम लिखा तदाय,” बेता लिकुआय। 6#एहेः 1:27; 5:2“दुनिया रेनअः सुरू तरअः गी, जाईसन मारी धरम पुथी रे लिखा लअः एदनाअ ‘परमेसर आउराईत हेतरअ हेरेल केते हुंकिन के सिरजाव ताद किनाय। 7#एहेः 2:24हिना लःअय हुंकिन अपन एंगा-आपा लोः जुदा केते अपन गोमकाईन लोः साँघे ताही कोआकिन।#10:7 नोःआँ धरम पुथी रेनअः, एहेःब 2:24 रे लिखा लअः एदनाअ। 8तेकर हुंकिन मियांड होड़ो कोआकिन, हिना लःअय हुंकिन नहाअः दो बरिया कोवान मियांड होड़ो हेके।’ 9हिना लःअय परमेसर जे लोः जुड़ी जुमाव तादकी नाय हुंकिन के मनवा आलकु जुदा किनकु,” मेन केते कंहड़ी रूवाड़ोः लिकुआय।

10ओड़ाअ रे चेला ताय नोःआँ बारे आउर गी ईसु के कुली लियाकु। 11#सं.मत्‍ती 5:32; 1 कुरि 7:10,11“जाहें होअः अपन गोमकाईन के बाई केते एटाअ के ईकाइयाय होले, हुनी पहिल रिनी गोमकाईन रआ बिरोध रे ब्यबिचार कामीआय। 12तेकर गोमकाईन ताय कोड़ा तेके बाई केते एटाअ कोड़ा लोः ढुकूयोआय होले, हुनी आउराईत पहिल रिनी कोड़ा रआ बिरोध रे ब्यबिचार कामीयाय,” मेन केते कंहड़ी रूवाड़ लःअय।

ईसु चेंगाकु के आसीस लिकुआय

(संत.मत्‍ती 19:13–15; संत.लुकास 18:15–17)

13मुसिङ चेंगाकु तेङ रे तीः दोहो केते असीस एमा कुआय, मेन केते हुनी दुबाःड़े आगु कु केनाकु, बकिर दो चेला ताय हुंकू के डपटाव लिकुआकु। 14ईसु हुंकू के नेल केते खीस नेनाय हेतरअ “चेंगाकु के ईङ दुबाःड़े हीःग चिकुपे, आलपे बधराव कु, परमेसर आला राईज नीकु लकान आला गी हेके,” बेता लिकुआय। 15#सं.मत्‍ती 18:3“चेंगाकु लकान जे, परमेसर आला राईज के, काय तेलाया हुनी ओका लकान रे होः होंड़े एरे बोल दड़ीआ, ईङ आपे के सचेगी कंहीड़ोः दिपीईङ,” मेन लःअय। 16तेकर हुनी हुंकू के हामुःड लिकुआय हेतरअ तीः दोहो केते आसीस एमा लिकुआय।

गीरहत होड़ हेतरअ का-अन्तोः जिनगी

(संत.मत्‍ती 19:16–30; संत.लुकास 18:18–30)

17ईसु होरा रे सेनोः केनाय हिमीन रे मियांड होड़ हुनी दुबाःड़े नीर हीःग नेनाय हेतरअ हुनी के जोहार केते कुली लियाय, “ए जामाकु तरअः बेस गुरू, ईङ का-अन्तोः जिनगी जिवीडोः लःअय एतानेईङ?”

18“आम ईङ के जामा तरअः बेस गुरू एतान लःअय कंहड़ी तनाम? परमेसर के बाई केते ओके होअः बेस कानी कुआ,” ईसु बेता लियाय। 19#उइठ 20:13; कन 5:17; उइठ 20:14; कन 5:18; उइठ 20:15; कन 5:19; उइठ 20:16; कन 5:20; उइठ 20:12; कन 5:16आम हुकूम के दो पड़ीआम, “होड़ गोएःग कोवान, ब्यबिचार को-कोवान, चोचोर कोवान, झुठ गोवाह एमोअ कोवान, चालांकोः कोवान चाही, हेतरअ एंगा-आपा आला कंहड़ी के आ-आयुम,” नोकान लिखा लअः एदनाअ।

20हुनी, “ए गुरू, नोःआँ कुन केदो, छोटे तरअः गी मनाव हीःग तानिङ,” बेता लियाय।

21ईसु, हुनी के जिवाईन लुड़ीःग केते दुलार लियाय तेकर, “आम के मियांड बात रेनअः घटी एदनाअ,” मेन केते, “जु आम आला जे एदनाअ होना के आखरिंग केते रांगेःग होड़ के एमा गुल ताकुमे, आम के सिरमा रे धन भेटाव कोआ, तेकर आम हीःग केते ईङ लोः गतीयोःमे,” बेता लियाय। 22नोःआँ बात रआ चलते हुनी आला मेःड मुहांड़ ताय नुर ना हेतरअ हुनी हदियाव केते सेनोः नाय, एता लःअय ची हुनी मुरुक गीरहत ताहिनाय।

23ईसु तमानते लुड़ीःग केते, “गीरहतकु के परमेसर आला राईज रे बोलोयोः ऊकिन मसकिल एदनाअ,” मेन केते चेला ताय के बेता लिकुआय।

24चेला ताय ईसु आला बात के आयुम केते मोकाव नाकु, बकिर ईसु, हुंकू के आउर गी कंहड़ीओ लिकुआय, “ए कोड़ाकु, परमेसर आला राईज रे बोलोयोः मुरुक मसकिल एदनाअ! 25गीरहत होड़ के परमेसर आला राईज रे बोलोयोः तरअः, सुई रेनअः टोकरा रे ऊँठ के परोम जुनोः सेबाआ।”

26तेकर हुंकू मुरुक गी आकबकाव नाकु हेतरअ तब “दो ओके आला उधार हुयाव कोआ खान?” मेन केते आकु-आकु कंहड़ी लअकु।

27ईसु, हुंकू पखा जिवाईन लुड़ीःग केते “होड़ लःअय का दाड़ी योआ, बकिर परमेसर लःअय दाड़ी योआ, परमेसर लःअय दो जामा हुयाव दाड़ी योआ।”

28“आले दो जामा जिनीस बाई केते आम के ओतोङ तदमेआले,” मेन केते पतरस कंहीड़ोः लियाय।

29ईसु, “ईङ सचेगी कंहीड़ोः दिपीईङ, जे, ओड़ाअ दुवार चाहे बोको-बोयहा चाहे एंगा-आपा चाहे चेंगाकु चाहे ओत के ईङ तेकर बेस खभाईर लःअय बाई तदाकु, 30दो, निआँ जुग रे गी बिपाईत सहाव केते, ओड़ाअ दुवार, बोको-बोयहा, एंगा-आपा, चेंगाकु, हेतरअ ओत के साव गुना केते नाम केआकु, हेतरअ हिजोअः जुग रे का-अन्तोः जिनगी होअः नाम केआकु। 31#सं.मत्‍ती 20:16; सं.लुका 13:30बकिर जामा मड़ांग रिनकु तयोम कोआकु, हेतरअ तयोम रिनकु मड़ांग कोआकु,” कंहीड़ोः लिकुआय।#10:31 नहाअः जे नाम तदाकु, हुंकू तरअः होअः जादे नाम केआकु।

अपन गोएःग केते जिवीःड बिरिडोः बारे पे खेप ईसु आला उउदूः

(संत.मत्‍ती 20:17–19; संत.लुकास 18:31–34)

32तेकर हुंकू जिरोसलेम होरा रे सेनोः केनाकु, हेतरअ ईसु मड़ांग ताहिनाय, चेला ताय मोकाव#10:32 मोकाव घबराव ऊनकु ताहिनाकु। ताहिनाकु, तेकर ओतोङ ईदी केनाकु हुंकू बोरो ताहिनाकु। तेकर हुंकू बारह चेला ताय के एटाअ ते ईदी केते आएंग रे हिजोअः बात के उदूः कु केनाय। 33हेतरअ नेलेपे, “आबु जिरोसलेम तोराबुआ तेकर होड़ होपोन के धोखा एम केते बड़े पुरोहितकु हेतरअ धरम पुथी सि-सिखावकु आला तीः रे सःब चिकियाकु तेकर हुंकू हुनी के गो गोएःग रअः डांड़ एमा किकुआकु हेतरअ एटाअ जाईत #10:33 एटाअ जाईत एटाअ जाईत, जे जाहुदी काकु ताहिनेना। होड़कु आला तीः रे जिमा एमा किकुआकु। 34हुंकू, हुनी के लान्दअ ऊ कियाकु हेतरअ बेःग तेपेःड कियाकु, तेकर हुनी के कोड़राव कियाकु तेकर गोएःग कियाकु, हेतरअ पे रोज तयोम हुनी जिवीःड बिरिःड कोआय” बेता लिकुआय।

याकुब हेतरअ जोहन आला गोहरअ

(संत.मत्‍ती 20:20–28)

35जबेदी आलकिन होपोन याकुब हेतरअ जोहन, ईसु दुबाःड़े हीःग केते, “ए गुरू, आलिंग जे आम तरअः कोयालिङ होना एमा लिङ मे,” बेता लियाकिन।

36“आबेन एतान नाम ताना बेन, जे ईङ एमा बेनिंग,” बेता लिकिनाय।

37“आलिंग रे मिहोंड़ आम आला जोम पखा हेतरअ मिहोंड़ कोन्जरा पखा, परमेसर आला महिमा रअः राईज रे, राईजे आम हिमीन रे दुड़ूगोआ लिङ,” मेनोः ताना लिङ, बेता लियाकिन।

38 # सं.लुका 12:50 “आबेन काबेन पाड़ी ताना एतान कोय दाबेन के? जे दुख रअः डुभनी नुनू वाला एदानिङा होना के आबेन नु दाड़ी केआबेन एतान? हेतरअ जे बतिस्मा ईङ ई ईदी लःअय एदानिङा होना के ईदी दाड़ी के आबेन?” मेन केते ईसु, हुंकिन के बेता लिकिनाय।

39हुंकिन “हाँ आलिंग नु दाड़ी केआलिङ, बेता लियाकिन।” ईसु हुंकिन के बेता लिकिनाय, “जे डुभनी रेनअः नुनू लःअय एदानिङा होना के नु याबेन, हेतरअ जे बतिस्मा ई ईदी लःअय एदानिङा होना के ईदी याबेन। 40बकिर जेकर लःअय तेयार लेनअ एदनाअ, हुनी के बाई केते, जाहें के अपन जोम पखा हेतरअ कोन्जरा पखा दु दुड़ूः ईङ आला काम नलागे, होना परमेसर आला काम हेके,” बेता लिकिनाय।

41नोःआँ के आयुम केते दस झन चेलाकु, याकुब हेतरअ जोहन के खिसोअ तनाकु।

42 # सं.लुका 22:25,26 तेकर ईसु हुंकू के आएंग दुबाःड़े राअः केते कंहड़ी ऊ लिकुआय, “एटाअ जाईतकु आली राजा, हुंकू तेङ रे राईजे आय, तेकर हुंकू आलकु हाकिम दुनिया रे राईजेआकु। 43#सं.मत्‍ती 23:11; सं.मर 9:35; सं.लुका 22:26बकिर आपे रे नोकान कनोआँ, जे आपे रे बड़े योअ चहाआय हुनी जामेकु आली धाँगड़ पड़ीयोआय। 44तेकर आपे रे जे बड़े बनाअः नामाय, हुनी जामेकु के सु सुसारी पड़ीयोः चाही। 45होड़ आली होपोन होअः सुसार चीनोः लःअय काय हीःग ताना, बकिर हुनी सु-सुसार लःअय हीःग तनाय, ढेर होड़ के छो-छोड़ाव लःअय अपन जीव एमोअ हीःग तनाय।”

ईसु मियांड आन्धरा होड़ के बेस लियाय

(संत.मत्‍ती 20:29–34; संत.लुकास 18:35–43)

46तेकर हुंकू जेरीहो सोदोर नेनाकु हेतरअ ईसु तेकर चेला ताय, हेतरअ मुरुक तुन्दरा होड़ जेरीहो तरअः ऊड़ुङोः केनाकु, हिमीन रे तिमाई आली होपोन बरतीमाई नुमू रिनी मियांड आन्धरा कोय जोमी होड़ संड़क दौंड़ी दुड़ूः ताहिनाय 47तेकर हुनी निई गी नासरत रिनी ईसु हेके मेनके आयुम केते, “ए ईसु, ए दाऊद आली होपोन, ईङ के दयाईङ मे” मेन केते हाकाई केनाय।

48हेतरअ दो जामा होड़ हुनी के चुपचाप ताहीन मे, मेन केते डपटाव लियाकु, बकिर हुनी आउर जोड़ से “ए दाऊद आली होपोन ईङ के दयाईङ मे” मेन केते हकाव लियाय।

49ईसु तिंगु केते, हुनी के राअः आगुयपे, बेता लिकुआय, तेकर होड़कु हुनी के राअः केते कंहड़ी ऊ लियाकु, “जीव ताम के डिढ़ेमे! हेतरअ बिरिःड मे! हुनी आम के राअः देमेआय, बेता लियाकु।”

50हुनी गेन्दरअ ताय के गिड़ी केते झट के बिरिःड नेनाय, तेकर ईसु दुबाःड़े हीःग नेनाय।

51तेकर ईसु हुनी के, “आम एतान नाम तनाम? एतानिंग एमा मेआ? मेन केते कुली लियाय।” हुनी आन्धरा होड़, “ए गुरू ईङ नेनेल नाम तानिङ,” मेन केते कंहड़ी रूवाड़ोः लियाय।

52तेकर ईसु, जु सेनोः जुनमे बिसवास ताम आम के छुटाव तदमेआय बेता लियाय, हेतरअ तुरते गी हुनी नेल दाड़ी केदाय, तेकर हुनी ईसु के होरा होरा ओतोङ लियाय।

ప్రస్తుతం ఎంపిక చేయబడింది:

संत.मरकुस 10: ASR

హైలైట్

షేర్ చేయి

సరిపోల్చండి

కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి

Asuri గురించి మరింత తెలుసుకోండి

संत.मरकुस 10