संत.मरकुस 15
15
पिलातुस दुबाःड़े ईसु के ईदी लियाकु
(संत.मत्ती 27:1–2,11–14; संत.लुकास 23:1–5; संत.जोहन 18:28–38)
1आँगा-पोटाअ बड़े पुरोहितकु हेतरअ मुखियाकु तेकर धरम पुथी सि-सिखावकु, हेतरअ जामा पंचाईत रिनकु होड़ मत लआकु आउर ईसु के तोल चिलयाकु हेतरअ हुनी के तुरते राजपाल पिलातुस दुबाःड़े ईदी केते हुनी के जिमा लियाकु। 2तेकर पिलातुस ईसु के कुली लियाय, “आम जाहुदीकु आली राजा हेके एतान?” तेकर ईसु जबाप एमा लियाय “आम गी कंहड़ी तनाम।”
3तेकर बड़े पुरोहित हुनी रे ढेर बात रे दोस लगाय केनाकु। 4पिलातुस फिन हुनी के कुली लियाय “आम एतान लःअय नुमिन बात रेनअः जबाप काम एम दा? नेल कुमे तो आम के उकिन बात रे दोस एमाअ देमेआकु!”
5सेरे होअः ईसु मियांड-मिन बात के होअः काय कंहड़ी रूवाड़ लआ, हिना लःअय पिलातुस मुरुक मोकाव नाय।
ईसु के गोगोएःग आचु लियाकु
(संत.मत्ती 27:15–26; संत.लुकास 23:13–25; संत.जोहन 18:39; 19:16)
6तेकर राजपाल आएंग आला नेग मोताबिक पासका परब हिला, जेके परजा चहाअ केनाकु, हुनी के हुंकू लःअय आड़ागी केनाय। 7तेकर बराब्बस नुमू रिनी मियांड होड़, बिदोरोहीकु लोः जेहेल ताहिनाय, जे राज्य दोरोह रे होड़ के गोएःग ताही लिकुआय। 8तेकर तुन्दरा होड़ तेङ रकाःब केते पिलातुस तरअः गोहरअ केनाकु, पहिल लकान आम मिहोंड़ के आड़ागी केनाम हिना लकान मिहोंड़ के आले लःअय आड़ागीमे। 9पिलातुस कंहड़ी रूवाड़ोः लिकुआय “ईङ आपे लःअय जाहुदीकु आली राजा के आड़ागीयीङ एतान?”
10हुनी के बड़े पुरोहितकु हिसंगा ते सःब ची ताही लियाकु के पाड़ी केनाय।
11बकिर बड़े पुरोहितकु तुन्दरा होड़कु के एटेःग किद कुआकु ची आले लःअय बराब्बस के गी आड़ागीमे। 12पिलातुस नोःआँ बात के आयुम केते कुली लिकुआय, “दो आपे जेके जाहुदीकु आली राजा कंहड़ीआपे हुनी के एतानीयिङ खान।”
13हुंकू गुल लअकु, हुनी के “कुरूस खुंटा रे ठोकाई मे!”
14पिलातुस कुली लिकुआय “एता लःअय, नुई एतान गुनाह लःअय जे?” बकिर हुंकू आउर जोड़ से गुल केते, “नुई के कुरूस खुंटा रे ठोकाई मे,” मेन लअकु।
15तेकर पिलातुस होड़ के रिझ ची लःअय बराब्बस के हुंकू लःअय बाई लियाय, हेतरअ ईसु के कोड़रा रे कोड़राव ची केते, हुनी के कुरूस रे ठोठोकाव लःअय जिमा एमा लिकुआय।
पलटनकु ईसु के लान्दअ लियाकु
(संत.मत्ती 27:27–31; संत.जोहन 19:2–3)
16तेकर सिपाहीकु राज्यपाल आला बंगला भीतरी रेनअः राच रे ईसु के ईदी लियाकु, तेकर जामा पलटन के राअः जुमाव लिकुआकु। 17तेकर हुंकू हुनी के जरलया घतीक, राजाकु आला झुला लकान के सोलोंग ऊ लियाकु, हेतरअ जानुम रेनअः मुकूट गलाङ केते बोहोअ ताय रे सोलोंग ऊ लियाकु। 18हेतरअ हुनी के चेगड़ाव केते बेताअः दियाकु “ए जाहुदीकु आली राजा जोहार!” 19तेकर हुनी के ढुढ़ी ठेंगा रे बोहोअ ताय के टेंपाव ईदी लियाकु हेतरअ बेःग तेपेःड लियाकु तेकर ईकड़ुम केते जोहार लियाकु। 20तेकर हुंकू हुनी लोः लन्दा ठठ्ठा केते जरलया घतीक जिलीङ झुला के उडुंग लअकु हेतरअ आएंग आला झुला के सोलोंग ऊ लियाकु तेकर हुनी के कुरूस खुंटा रे ठोठोकाव लःअय बाहरी ते ईदी लियाकु।
ईसु के कुरूस खुंटा तेङ रे ठोकाव लियाकु
(संत.मत्ती 27:32–44; संत.लुकास 23:26–47; संत.जोहन 19:17–27)
21 #
रोमी 16:13
कुरेन सहर रिनी सिकेन्दर आउर रुफुस आली आपाते सिमोन, डिही पखा तरअः हिजोअः केनाय, होरा रे हुंकू लोः भेटाव नेनाय, हेतरअ सिपाहीकु हुनी के ईसु आला कुरूस के गोः ईइदी लःअय सःब केते रेंड़हा लियाकु। 22हेतरअ हुनी के गुलगुता नुमू रेनअः ठाँव रे, जेकर माने “खपरोही ठाँव हेके” ईदी लियाकु। 23होनाःड़े बथा ओ-ओहराव वाला मीर नुमू रेनअः दावा मेसा लअः अंगुर रस के नु-नु लःअय ईसु के एमा लियाकु, बकिर हुनी काय नु लआ। 24#सिरिंग 22:18तेकर हुनी के कुरूस खुंटा तेङ रे ठोकाव लियाकु, आउर हुनी आला गेन्दरअ के हा हाटिङ लःअय चुटका कु साला लआ, आउर हुनी आला गेन्दरअ हाटिङ लअकु। 25निदवा बेरा रअः नांव बजे हुनी के कुरूस खुंटा तेङ रे ठोकाव लियाकु। 26हेतरअ हुनी तरअः तेङ रे दोस चिठी “जाहुदीकु आली राजा” लिखा केते लटकाव लअकु। 27#जसा 53:12बनहोंड़ रे-रेःग किन केहोः ईसु लोः मिहोंड़ के हुनी आला जोम पखा हेतरअ मिहोंड़ के कोन्जरा पखा कुरूस रे ठोकाव लिकनाकु 28[हिना लकान ईसु “मुदाई कु लोः लेखा नेनाय,” होना धरम पुथी रेनअः लिखा लअः पुराव नेना।]#15:28 आधा पुथी रे नोःआँ पद का भेटाअः।
29-30 #
सिरिंग 22:7; 109:25;
सं.मर 14:58; सं.जोह 2:19 हेतरअ होरा रे हिजोः-सेनोः होड़कु बोहोअ डोबोः-डोबोः “ओहो! बड़े बिनती ओड़ाअ धाधासावी हेतरअ पे रोज रे बा-बानावी, कुरूस तरअः अड़गु केते अपन के बंचाव कोओमे,” मेन केते निन्दा लियाकु।
31निआँ लकान बड़े पुरोहितकु हेतरअ धरम पुथी सि-सिखावकु होअः ठठ्ठा लअकु, हेतरअ “एटाअ होड़ के दो बंचाव लिकुआय, बकिर आएंग के काय बंचाव दड़ीआ,” कंहड़ी तनाकु। 32“इसराइलीकु आली राजा ख्रीस्त, नहाअः कुरूस तेङ तरअः अड़गुनाय होले नेल केते बिसवासे आले।” हेतरअ जे हुनी लोः कुरूस रे ठोकाव ताही लिकनाकु, हुंकिन होअः निन्दा लियाकिन।
ईसु गोएःग नेनाय
(संत.मत्ती 27:45–56; संत.लुकास 23:44–49; संत.जोहन 19:28–30)
33बारा बजे तरअः तीन बजे जगुत गोटा दुनिया रे अंधार नेना। 34#सिरिंग 22:1तीन बजे ईसु भोकराव-भोकराव इयाम केते हकाव लःअय “ईलोई ईलोई लामा सबकतानी” नोःआँ रेनअः माने हेके “ए ईङ आली परमेसर, ए ईङ आली परमेसर, आम ईङ के एता लःअय बाई किंदङाम।”
35हिनाःड़े तिंगु ऊनकु आधाकु आयुम केते मेन लअकु, “आयुमी पे नुई इलियस के राअः दियाय।” 36#सिरिंग 69:21हेतरअ मिहोंड़ नीर सेन केते, रुवा लकान दाअः सोखाव वाला मियांड जिनीस के तोल लेनअ ढुढ़ी रअः ठेंगा रे, जोजो अंगुर रस रे जोबराव केते चेपेःग ची लियाय, “जाआ नुई के आआड़गु लःअय इलियस हिजोआय ची कोवान नेलीयाबु।”
37तेकर ईसु जोड़ से गुल केते जीव ताय के बाई केदाय।
38 #
उइठ 26:31–33
हेतरअ बड़े बिनती ओड़ाअ रेनअः महा पबितर ठाँव के आअलग वाला परदा गेन्दरअ तेङ तरअः लतार जगुत ताला रे ओड़ेःग ना, हेतरअ बार खांड़ा पाड़ीः ना।
39हेतरअ जे हुनी दुबाःड़े तिंगु ऊनी मि साव सिपाहीकु आली अगुवा, हुनी के हेंकान गोजोः नेल लियाय। हेतरअ हुनी मेन लःअय “नुई सथेगी परमेसर आली होपोन ताहिनाय!”
40 #
सं.लुका 8:2,3 ढेर आउराईतकु होअः लंका तरअः नेनेल केनाकु, हुंकू लोः मगदलिनी मरियम, छोटे याकुब आउर जोसेफ आली आया मरियम, तेकर सलोमी होअः ताहिनाय। 41ईसु गलील रे ताहिनाय हिमीन रे हुंकू ओतोङ ईदी केनाकु आउर सेवा-सुसारी केनाकु, हेतरअ ढेर एटाअ आउराईतकु होअः ताहिनाकु जे हुनी लोः जिरोसलेम जगुत हीःग ताहिनाकु।
ईसु के मारघटा रे दोहो लियाकु
(संत.मत्ती 27:57–61; संत.लुकास 23:50–56; संत.जोहन 19:38–42)
42हेतरअ आयुःब नेना, एता लःअय ची जाहुदीकु आला सपड़ाअ रअः दिन ताही नेना, होना आआकाम रेनअः दिन सनिचार तरअः मुसिङ पहिल सुक हिला हुयाअः केना। 43तेकर अरमतिया रिनी जोसेफ जे पंचाईत रिनी मंत्री ताही नेनाय हेतरअ हुनी परमेसर आला राईज रेनअः होरा के नेल आसरा ताही नेनाय, हुनी डिड़ केते पिलातुस दुबाःड़े सेन बोलो नेनाय, हेतरअ ईसु आला गोएःग होड़ो के कोय लःअय। 44पिलातुस, नुमिन झट के गोएःग नाय मेन केते मोकाव नाय हेतरअ सिपाहीकु आली अगुवा के राअः केते ईसु गोएःग नाय होना ढेर दिरी हुयाव ना मेन केते कुली लियाय। 45पिलातुस सिपाहीकु आली अगुवा तरअः जामा खभाईर ईदी केते ईसु आला गोएःग होड़ो के जोसेफ के एमाअ चील कुआय। 46तेकर हुनी मलमल कफन गेन्दरअ किरिङ लःअय, हेतरअ ईसु के अड़गु केते होना गेन्दरअ रे मेरहाव लियाय हेतरअ सेरेंग रे मारघटा ला बनाव लअः ताहीना होना रे दोहो लियाय, तेकर दुवार तेरे मियांड बड़ेअ केन टुकू के गुंड़राव ईदी केते तुबेःड एसेःड लःअय।
47तेकर मरियम मगदलिनी हेतरअ जोसेफ आली एंगा मरियम, दोहोई केनाय के नेनेल केनाकिन।
ప్రస్తుతం ఎంపిక చేయబడింది:
संत.मरकुस 15: ASR
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023 NLCI CC BY-NC-ND 4.0