संत.मरकुस 6
6
नासरत रे ईसु के ठोकराव लियाकु
(संत.मत्ती 13:53–58; संत.लुकास 4:16–30)
1ईसु होंड़े तरअः उडुंग केते अपन राईज हीःग नेनाय, तेकर हुनी आलकु चेला होअः ओतोङ आगु लियाकु। 2तेकर हुनी सथाअ हिला बिनती ओड़ाअ रे बुधी उदूः कु केनाय, हेतरअ ढेर होड़ आयुम केते मोकाव नेनाकु तेकर, “नुई नोःआँ लुर-बुधी के ओका तरअः नाम लःअय? नोःआँ एतान गुन हेके जे नुई के एमा तदिया कु? एतान लकान नोःआँ सवांग रअः काम हुयाअः ताना? 3नुई हुनी बाढ़ी आली होपोन नलागे एतान? जे मरियम आली होपोन, हेतरअ याकुब, जोहन जहुदा तेकर सिमोन आली बोको नलागे? तेकर नुई आलकु बहिन आबु ताला रे काकु ताहिनोआँ एतान?” हिना लःअय हुंकू हुनी बारे ठोकोर कु जोम लआ।
4 #
सं.जोह 4:44
तेकर ईसु हुंकू के “आगमजानीकु के अपन राईज, अपन घराईता, तेकर अपन ओड़ाअ के बाई केते, जामा दुबाःड़े माईन हुयाअः,” बेता लिकुआय।
5हुनी होनाःड़े सवांग रअः काम काय कामी दाड़ी लआ, कटिःग केन बेमार होड़ भाईर के छुवाँव केते बेस लिकुआय। 6तेकर हुनी हुंकू आला अनबिसवास के नेल केते ताजुक नेनाय, हेतरअ हुनी गोटे तअः डिही रे सेन-सेन बुधी उदूः कु केनाय।
सिद लिनकु बारा चेला के भेजाव लिकुआय
(संत.मत्ती 10:5–15; संत.लुकास 9:1–6)
7हुनी बारहों चेला के आएंग दुबाःड़े रअः लिकुआय तेकर हुंकू के बनहोंड़-बनहोंड़ केते भेजाव लिकुआय, तेकर असुध आतमाकु के जोजोला लःअय हक एमा लिकुआय। 8तेकर हुनी होरा लःअय, “हापा के बाई केते एतान होअः आलपे ईदी के, ना लाःड आउर ना थाईलः तेकर ना बटुवा रे ढिबुवा, 9बकिर खड़पा सोलोंगेपे, बाबारीया गेन्दरअ आलपे ईदी के” बेता लिकुआय। 10तेकर जे ओड़ाअ रिनकु आपे के बेसोः पेरेदो कु, होना ठाँव तरअः अनौरी बिदायोः जगुत हेनेन ओड़ाअ रेपे ताहिनोः। 11#प्रे.कामी 13:51#सं.लुका 10:4–11तेकर “जे ठाँव रिनकु काकु बेसोः पेरेदो, तेकर आपे आला काकु आयुमेरे दो, होनाःड़े तरअः ऊड़ुङोः तुली आपे आला तरवा रेनअः धुड़ी के हुंकू के चेतावनी एमोअ लःअय झाड़राव तुपे,” बेता लिकुआय।
12तेकर हुंकू सेन केते पाप तरअः मन रूवाड़ेपे मेन केते परचार ऊ लिकुआकु। 13#याकु 5:14हेतरअ ढेर मुवाँ आतमा के उडुंग जोला लिकुआकु, तेकर ढेर बेमार होड़ के सुनूम ओजाः केते बेस लिकुआकु।
जोहन बतिस्मा एमोई के गोएःग लियाकु
(संत.मत्ती 14:1–12; संत.लुकास 9:7–9)
14 #
सं.मत्ती 16:14; सं.मर 8:28; सं.लुका 9:19 ईसु आला नुमू गोट्टाते छितयाव ताहीना लःअय हेरोद राजा होअः आयुम ताही लःअय। आधा होड़ “हुनी जोहन बतिस्मा एमोई गोएःग केते जिवीःड तनाय हिना लःअय हुनी सवांग रअः काम कामी तनाय” मेनोः केनाकु।
15तेकर एटाअ होड़ दो, “नुई इलियस हेके” मेनोः केनाकु।
हेतरअ आधाकु दो, “आगमजानी हेके चाहे दो, आगमजानीकु रे जाहें मिहोंड़ आगमजानी लकान एदानिया” मेनोः केनाकु।
16नोःआँ के आयुम केते हेरोद राजा, “हुनी जे जोहन आला बोहोअ के मांअ खाँड़ाअ ची ताही लिकुईंङ, हिनी जिवीःड बिरिःड तनाय!,” मेन लःअय। 17#सं.लुका 3:19,20हेरोद होड़ भेजाव केते जोहन के सःब ची केते जेहेल ताही लियाकु। एता लःअय ची हेरोद अपन बोको फिलिप्पुस आली गोमकाईन ते हेरोदियास लोः बिहा ताहिनाय 18तेकर “आम के अपन बोको आली गोमकाईन के ईईका उचित कनोआँ,” मेन केते जोहन हेरोद के कंहड़ी एकाई केनाय।
19हिना लःअय हेरोदियास जोहन आला खीस दोहोय केनाय, तेकर हुनी के गोएःग चियींग मेनोः केनाय, बकिर काय दाड़ी लिया। 20हेरोद दो जोहन के धरमी तेकर पबितर होड़ मेन केते बोरोई केनाय, तेकर काय एतानी केना। हेतरअ हुनी आला कंहड़ी के आयुम केते आकबकाव जुनोः केनाय, सेरे होअः हुनी आला कंहड़ी के बेस केन आयुमे केनाय।
21तेकर मुसिङ ठीके मोका हीःग नेना, जे हिला हेरोद आएंग आला जनम दिन हिला, आएंग आलकु अधिकारीकु हेतरअ सिपाहीकु आलकु सेनापति, तेकर गलील रिनकु बड़े होड़कु लःअय जोजोम लःअय बनाव लःअय। 22हिमीन रे हेरोदियास आली माई भीतरी बोलो नेनाय तेकर जतरा केते हेरोद हेतरअ हुनी लोः दुड़ूः ऊनकु के रिझ चील कुआय। हेतरअ राजा हुनी कुड़ी के, “जे चहाआम होना कोयमे, ईङ आम के एमा मिईङ,” बेता लियाय। 23तेकर हुनी किरया जोम केते, “ईङ अपन राईज रअः आधा हिस्सा जगुत आम जे कोयाम, ईङ एमा मिईङ” बेता लियाय।
24तेकर हुनी कुड़ी बाहरी उडुंग केते एंगा तेके, “एतान कोयीङ,” मेन केते कुली लियाय।
तेकर हुनी “जोहन बतिस्मा एमोई आला बोहोअ कोयमे बेता लियाय।”
25तेकर हुनी तुरते राजा दुबाःड़े भीतरी बोलो केते राजा एड़े बिनती लःअय, “ईङ चहाअ तानिङ ची नहाअः गी जोहन बतिस्मा एमोई आला बोहोअ के मियांड थरिया रे आगु केते एमाईङ मे।”
26राजा आयुम केते हदियाव नाय, बकिर आएंग आला किरया हेतरअ आएंग आलकु गुतिया रअः चलते, हुनी आला बिनती के काय टलाव लआ 27हेतरअ राजा, मियांड सिपाही के जोहन आला बोहोअ के मांअ आ-आगु लःअय तुरते आचु लियाय। हुनी जेहेल ओड़ाअ सेन केते हुनी आला बोहोअ के मांअ खांड़ा आगु लःअय, 28तेकर मियांड थरिया रे दोहो केते आगु लःअय हेतरअ हुनी कुड़ी के एमा लियाय तेकर हुनी कुड़ी एंगा तेके एमा लियाय। 29तेकर आयुम केते जोहन आलकु चेला हीःग नेनाकु हेतरअ हुनी आला होड़ो के ईदी केते मारघटा रे दोहो लअकु।
ईसु पाँच हजार होड़ के लाःड खियाव लिकुआय
(संत.मत्ती 14:15–21; संत.लुकास 9:11–17; संत.लुकास 6:1–14)
30प्रेरितकु ईसु दुबाःड़े जवार नेनाकु, हेतरअ जे हुंकू ईया ताही लअकु तेकर उदूः ताही लिकुआकु, होना के उदूः लियाकु।
31होनाःड़े मुरुक होड़ हिजोः-सेनोः केनाकु, तेकर जोजोम लःअय होअः मोका काकु नाम दाड़ी केना लःअय, हुनी हुंकू के “आपे रिड़िगया ठाँव रे सेन केते, कटिःग साथाःपे” बेता लिकुआय। 32हिना लःअय आकु एकला डोंगा रे रकाःब केते रिड़िगया ठाँव रे सेन नेनाकु।
33ढेर होड़, हुंकू के सेनोः नेल केते थिताव लिकुआकु, तेकर गोटे तअः डिही टोला रिनकु जुमाव केते होनाःड़े नेकान ओत-ओत नीर सेन नेनाकु, तेकर हुंकू तरअः पहिल सेन सोदोर नेनाकु। 34#गन 27:17; 1 राजा 22:17; 2 इति 18:16; जहेज 34:5; सं.मत्ती 9:36तेकर हुनी डोंगा तरअः अड़गु केते मुरुक तुन्दरा होड़ नेल लिकुआय, तेकर हुंकू आःड ऊनकु भेंड़ा लकान ताही नेनाकु लःअय, हुनी के हुंकू तेङ रे सोग आदा लिया, हेतरअ ढेर कंहड़ी उदूः दिकुआय। 35तेकर आयुःब साँझ नेना हिमीन रे चेला ताय हुनी दुबाःड़े हीःग नेनाकु, हेतरअ “नोःआँ रिड़िगया ठाँव हेके तेकर मुरुक आयुःब साँझ ना,” बेता लियाकु। 36“नुकू के बिदा कुमे, नुकू गोटे तअः डिही टोला रे सेनाकु हेतरअ आकु जोजोम लःअय जहान कुन किरिङेआकु,” बेता लियाकु।
37तेकर हुनी, “आपे गी नुकू के जोजोम लःअय एमा कुपे,” मेन केते कंहड़ी रूवाड़ोः लिकुआय, हुंकू “आले बार साय चाँदी ठर्ड़रा #6:37 बार साय चाँदी ठर्ड़रा दो साव दिन रेनअः हाजरी बराबईर रेनअः दामरअः लाःड किरिङ आगु केते, हुंकू के जोजोम लःअय एमा कुआले एतान?” बेता लियाकु।
38“ऊकिन केन आपे दुबाःड़े लाःड एदनाअ? जु आपे नेलेपे,” बेता लिकुआय, तेकर नेल केते “पाँच गोड़ लाःड हेतरअ बरिया हाकु होअः” बेता लियाकु।
39तेकर हुनी जामाकु के हरियार बीर रे धाईर-धाईर चेला ताय के दु-दुड़ूः आचु लिकुआय, 40तेकर हुंकू मीमी धाईर रे पाँच-पाँच कुरी हेतरअ बार कुरी दस-दस झन केते दुड़ूः नेनाकु। 41तेकर हुनी, पाँच गोड़ लाःड हेतरअ बरिया हाकु के ईदी लिकिनाय हेतरअ सिरमा के साँगील केते हुनी होना लाःड लःअय परमेसर के धन्यवाद एमा लियाय, हेतरअ केचाअ केते चेला ताय के हाहाटीङ लःअय एमा लिकुआय, तेकर बरिया हाकु केहोः हुंकू जामाकु लःअय हाटिङोः लिकुआकु। 42तेकर जामाकु जोम केते बीः नाकु। 43हेतरअ चेला ताय सारेःग ओना केचाअ लाःड के बारा दाऊड़ा हलांग केते पेरेःग लअकु हेतरअ कटिःग हाकु केहोः। 44तेकर जे लाःड जोम लअकु, हुंकू रे पाँच हजार हेरेल होअः ताही नेनाकु।
ईसु दाअः तेङ रे डिड़ोगोः केनाय
(संत.मत्ती 14:22–33; संत.लुकास 6:15–21)
45हुनी होड़ कुके बिबिदा तरअः पहिल रे, चेला ताय के तुरते होना पखी आएंग तरअः पहिल बैतसैदा सेनोः लःअय डोंगा रे रकाःब आचु लिकुआय। 46तेकर हुंकू के बिदा केते बि-बिनती लःअय बुरु तेङ रे रकाःब नेनाय। 47तेकर बोंगा हासुर डोंगा डाहा तलारे ताही नेना, हेतरअ आएंग एकले ओत रे ताही नेनाय। 48तेकर हुनी आलकु चेला के होय दलोम कुकेनाय, हुंकू मुरुक खिलपाईत रे डोंगा के ईदी केनाकु के ईसु नेल लिकुआय, तेकर भिनसारा हुनी डाहा रेनअः दाअः तेङ-तेङ सेन याःते हुंकू के तेबअ लिकुआय, तेकर हुंकू तरअः माड़ाङो ईङ मेनोः केनाय। 49बकिर हुनी के दाअः तेङ रे दंड़ान नेल केते मुवाँ हेके मेन केते गुल बिरिःड केदाकु। 50जामाकु हुनी के नेल केते बोरो ताही नेनाकु। हिना लःअय हुनी हुंकू के हिमीन रे गी, टोकाव लिकुआय जीव के डिढ़ेपे ईङ हेके आलपे बोर 51तेकर हुनी हीःग केते हुंकू आला डोंगा रे देःग नेनाय होले होय माटकाव लःअय, तेकर हुंकू मुरुक छकित नाकु। 52एता लःअय ची हुंकू आला मन केटेःग ताहीना हिना लःअय हुंकू पाँच हजार हेरेल के खियाव ताही लिकुआय होना बारे रे काकु समझाव ताही नेना।
गनेसरत रे बेमार होड़ के छोड़ाव लिकुआय
(संत.मत्ती 14:34–36)
53तेकर हुंकू डाहा परोम केते गनेसरत राईज रे सोदोर नेनाकु, हेतरअ डोंगा के खुटीयाव लअकु। 54तेकर ईसु के डोंगा तरअः अड़गु तोरन होड़कु चिनहा लियाकु। 55हिना लःअय, हेनाःड तअः गोटे राईज रे नीर सेन नेनाकु, तेकर हुनी जे जे ठाँव रे एदानिया मेन के आयुम केते, बेमारियाकु के खटिया रे गोः केते, होंड़े-होंड़े आगु कु केनाकु।
56हुनी डिही रे, खुड़ रे चाहे सहर रे, हुनी जहान एड़े सेनोः केनाय, होनाःड़े होड़ अपन बेमरिया के आगु केते बजार टोनांग रे दोहो केते, तेकर हुनी आला गेन्दरअ रेनअः आँचड़अ भाईर के छुवाँव चीकुमे मेन केते, गोहरअ केनाकु तेकर जे हुनी के छुवाँई केनाकु हुंकू छुटाव जुनोअः केनाकु।
ప్రస్తుతం ఎంపిక చేయబడింది:
संत.मरकुस 6: ASR
హైలైట్
షేర్ చేయి
సరిపోల్చండి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2023 NLCI CC BY-NC-ND 4.0