Génesis 34
34
Siquem Dinan takasmau
1Lean nawantri Dina, nuwa ainan irarsattsa yaaktanam wuwaiti. 2Tumattamaun yaakta apuri heveo shuaran Hamoran uchiri Siquem wainak, nakitamaitiat achik takasuiti. 3Tura Siquem Dinan senchi wakerukuiti. Tuma nuwan wakerumtikattsa pegkeran aujsauwaiti. 4Tura aparin chicharuk: Ju nuwan nuatkattsan wakerajai, aparin weme sumartukta, tusa tinaiti.
5Jacob nawantrin Siquem takasmaun nekaawaiti. Turasha nina uchiri ainaka tagkun kuitamainak matsataina asarmatai, nita kaunkarmatai chichasartajai tusa pachikchauwaiti. 6Tuma ai Siqueman apari Jacobjai chichastasa wuwaiti. 7Tura Israelan uchiri ainasha tagkun kuitamainak matsataina kaunkar, Siquem Dinan takasmaun nekaawar, nita iismaka pegkesha nutikachminun nutika asamtai, senchi kajekaruiti.
8Turasha Hamor nitan chicharuk: Wina uchir Siquem atumi umain senchi wakerawai. Tuma asamtai wait aneasrum susatarma. 9Tumarum atumsha ina patai jastarma. Tumawakrumin wii shuar ainasha atumin nawantri ainan nuatkarti, tura atum shuar ainasha ii shuar ainan nawantrin nuatkarti. 10Tura atum pujumain nugka awai, tuma asamtai takasrum surakrum pujustarma, tusa tinaiti. 11Tura Siquemsha Dinan aparin, tura umai ainan chicharuk: Atum wait aneasrum ayu takurminka, atum wakeramu seatkurminka susatjarme, tusa tinaiti. 12Tura nuwa nuatku sutai aina nu nagkasarum seatkurmincha susatjarme. Turasha nuwanka nuatkatjai, tusa tinaiti. 13Takai Jacobon uchiri aina, Siquem Dinan takasu asamtai, Siqueman aparijai tukeneasar 14chicharainak: Shuar kati mushuken tsupikchauka sumaitsuji, nuka ii iismaka natsan amainaiti tusar tiaruiti. 15Antsu atumsha ina kati mushuke tsupiku ainaj tumasrumek atumi kati mushuke tsupikakrumnaka ayu tumainaitji. 16Tumawakrumnaka atumi uchiri ainasha ina nawantri ainajai nuwenmain ainawai. Tura ina uchiri ainasha atumi nawantri ainajai nuwenmain ainawai. Tumainakur nu shuarak matsatua numamtuk amain ainaji. 17Turasha atum nu nakitakrumnaka ina umai jukir wetatji, tusar tiaruiti.
18Tuinakai Hamor nina uchiri Siquemjai nuka metek umikmi tusar tiaruiti. 19Siquemka Jacobon nawantrin senchi wakeruku asa, kati mushuken wári tsupikuiti. Tura Siquemka chichame umirtai asa, 20nina aparijai yaakta waitirin wearuiti. Tuma jeawar shuar aishmag ainan irur chicharainak: 21Nitaka shuar pegker ainawai, yamaika ijai iruuntrar matsamsartatui. Tura nita matsamsar surumaincha nugkasha awai. Ii shuar aina nitan nawantrin nuatiartatui, tura nita uchiri ainasha ina nawantri ainan nuatiartatui. 22Turasha shuar aishmag ainaka kati mushuken ashi tsupirarti, tumawarmatai chikichik shuarak iruuntrar matsatua numamtin armi tusar wakeruinawai. 23Tura nita waríri aina, tura nita tagkuri aina nuka ashi inu artatui. Tumatin asamtai nita tuina nu umirkarmi. Tura nitasha juig matsamsartatui tusar tiaruiti.
24Tuinakai yaaktanmaya shuar aina antukar, nuka metek uminkati tuina asar, kati mushuken tsupikaru ainawai. 25Turasha Jacobon uchiri aina, Simeón tura Leví Dina umai aina tres tsawara ai yaaktanam wear, shuar aina kati mushuken tsupikaru asar, najaimainak kakaamainchau nekapena asarmatai, kuchiijai ashi maawaruiti. 26Tura Hamornasha nina uchirijai maawaruiti. Turawar Dinan Siquema jeen pujuttamaun jukiaru ainawai. 27Turawarmatai Jacobon uchiri chikich aina kaunkar, umai takarsamu asar ikmainak: 28Oveja ainan, vaca ainan, burro ainan, yaaktanam irunun, 29tura warí irununcha yarumainak: Uchi ainan, nuwa ainajaimak achirar ashi yaruakaru ainawai.
30Turawarmatai Jacob, Simeónkan Levíjai chicharuk: Atum aniakrum wake mesemar enentaimtikrarme. Wina pataar ainaka ishichkiti, tumau asaakrin cananeo aina ferezeo ainajai iruuntrar ashi mantammainaitji, tusa tinaiti. 31Takai nita aimainak: Ina umain wakerakur akikar takatia numamtuk pegkerchau takasaru asarmatai aitkaji, tusa tiaruiti.
ప్రస్తుతం ఎంపిక చేయబడింది:
Génesis 34: hubDBL
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2010, Wycliffe Bible Translators, Inc. All rights reserved.