Génesis 35
35
Yuus Jacobon Betelnum wantintukmau
1Yuus Jacobon chicharuk: Amina yatsum Esaú ashamakum weamin wii wantintukmiajam nui, Betelnum weme pujusta. Tumam wina emematrakum tagku maa patasa epeatin najanata, tusa tinaiti. 2Tama Jacob nina nuwe ainan, uchiri ainajai, tura nina patai ainajaimak chicharuk: Atum yuusrimattsa najanamu aina nuka ashi utsagtarma. Tumarum entsa maakrum jaanch yapajmamkatarma, tusa tinaiti. 3Tumawakrumin Betelnum wearmi. Tura ai jeaan: Wii iturchatnum pujai, tura wekamunmasha wina uyuntusua nuna ememattinan tagku aina maa patasa epetain najanatjai, tusa tinaiti.
4Takai yuusrimattsa najanamu ainan, tura arete ainajaimak ashi yaruakar Jacobon susaruiti. Turam ni juki númi encina tutai Siquemnum jeattak wajamunam tai chumpia yutuawaiti. 5Tura Jacob nina patai ainajai Betelnum wenakaisha, ashamainak patatukcharti tusa Yuus timau asar, patatukcharu ainawai. 6Jacob nina patai ainajai Canaán nugkanam yaakat “Tsaaptin” tutain Betel anaikauwa nui jeawaruiti. 7Tuma tagku aina maa patasa epetain najana nu nugkan “El-betel” anaikauwaiti. Nina yachin ashamak tsekegki wesa kintamuk kanittamaun karanam Yuus wantintukmau asa, tu anaikauwaiti. 8Nuiyasha Rebecan kuitamajaku Débora naartin jakamtai, númi encina tutai Betelnum jeattak wajamunam ikusaruiti. Tura nu numinka Kuntuts enentaimramu tu anaik ikuknaiti.
9Jacob Padán-aramnum pujau Betelnum jeamtaisha Yuus ataksha wantintuk pegkernum chicharuk: 10Amina naarmeka Jacobowaiti. Turasha yamai nagkamsamka amina naarmeka Israel atatui, tusa tinaiti. Yuus Jacobon naarin yapajtua 11chicharuk: Yuus ashi senchirtinnaka Wiyaitjai. Tumau asan amee weantu ainasha nukap pampaararti. Tura amee weantu ainaka apusha artinaiti. 12Nugkan Abrahaman, tura Isaackan susauwaitaj nunaka yamaika amina susatjame. Tura ame jakaakmin amina uchiram ainan susartinaitjai, tusa tinaiti.
13Yuus Jacobjai chichas umik waketkinaiti. 14Tumamtai Yuusjai chichasmau tutai atii tusa, kayan juki awajas aceitejai ukattrauwaiti. 15Tura nu nugkan Betel anaikauwaiti.
Raquel jakamu
16Betelnumia jiinki yaakat Efratanam jeattak wesa, Raquel uchin jureruiti. Turasha uchi jeen ajapatajkama tujinkauwaiti. 17Tumamtai nuwan ujerin chicharuk: Ashamkaipa aishmag jurerume, tusa tinaiti. 18Tura pegke jak uchin Benoni anaik jakauwaiti. Turasha apari anaiyak, Benjamín anaikauwaiti. 19Raquelka tu jakauwaiti. Tumamtai Efrata jintanam ikusaruiti. Tura nu yaaktan naarinka yamaika Belén anaikaruiti. 20Tura Jacob Raquel ikusmaunam kayan ayaanas awajsauwaiti. Nu turamua nuka yamaiya juisha Raquel ikusmaun iwainawai. 21Tura Israel Raquelan ikus ikuak, jiinki wea weakua Migdal-eder tutain nagkaiki jeashat pujusuiti. 22Tura nui Rubén apari nuwen Bilhan takasuiti. Turamun Israel nekaa senchi kajekuiti.
Jacobon uchiri aina
(1Cr 2.1-2)
Jacobon uchiri ainaka doce ajakaruiti. 23Lea jurermau aina: Rubén, Simeón, Leví, Judá, Isacar, tura Sabulón nu ajakaruiti. 24Raquel jurermau ainaka: José, tura Benjamín nu ajakaruiti. 25Raquela inatairi Bilha jurermau ainaka: Dan tura Neftalí nu ajakaruiti. 26Lea inatairi Zilpa jurermau ainasha: Gad tura Aser nu ajakaruiti. Nu ainaka Padán-aramnum akiinkaru ainawai.
Isaac jakamu
27Yaakat Mamré Arbá tura Hebrón tutainam Abraham pujujakmaunam nina apari Isaac pujau asamtai, Jacob iistasa wuwaiti. 28Isaacka ciento ochenta uwí ejé pujus jakauwaiti. 29Tuma nina uuntri jina ainajai iruuntrauwaiti. Antsu nina iyashinka uchiri aina Esaú Jacobjai jukiar ikusaruiti.
ప్రస్తుతం ఎంపిక చేయబడింది:
Génesis 35: hubDBL
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© 2010, Wycliffe Bible Translators, Inc. All rights reserved.