TƏŊMORFANNE 4
4
Kain ne Abel
1So Adam swǝ ne mawin ah Ewa. Gbǝ ɓilli, byaŋ we worre, faa: Me byaŋ we wor ne swah Dǝɓlii. So ɗii ko ne Kain. 2So byaŋ we wor maki ahe, a ɗii ne Abel. Ne cok Abel mo joŋ dǝɓlii, a pii gwii, amma Kain a pǝpǝǝ.
3Comki Kain ge ne fakpãhpǝǝ nyi nyi Dǝɓlii. 4Abel ɓaŋ we gwii ma byaŋ kǝpel mor mah ah kǝsyil ŋgaɓ fan ahe, so ge ne nǝm yak ahe. Dǝɓlii laa pǝ'nyah ne Abel ne fan nyi ahe. 5Amma laa pǝ'nyah ne Kain ne fan nyi ah ya. So Kain ɓaŋ kpãh pǝlli, woo zahpel ne ko. 6Dǝɓlii faa nyi Kain: Mo ɓaŋ kpãh mor fẽene? Mo woo zahpel tǝ ɓǝ fẽene? 7Mo joŋ kǝnah ɓo pǝsãh ɓe, mo ka syel zahpel ya ne? Amma mo joŋ ɓo pǝɓe', faɓe' ɓo uu ɓo tǝ byak mo tǝgbana fafyãhe, tǝ kyeɓ ka kaa swah tǝ ɓo, amma sai mo kaa swah tǝl ahe.
8Fahfal ah Kain faa nyi naa mah ah Abel: Na ge lal ɗao. Ne cok mo ge daira 'wahe, Kain ur tǝ naa mah ah Abel, i ko pǝ wulli.
9Dǝɓlii faa nyi Kain: Naa ma ɓo Abel kẽne? Kain zyii faa: Me tǝ ya, ame ye pa byak naa ma ɓe ne? 10Dǝɓlii faa: Mo joŋ fẽe ɓo mai ne? Kyaŋ syim naa ma ɓo tǝ cii tǝ sǝr gin wo ɓe, tǝ fii faŋ valle. 11Zǝzǝ̃ǝko mo yea ne tǝkẽawãkke, me ga nĩi mo pǝ sǝr masãh mai mo gbǝr zah zwǝ syim naa ma ɓo jol ɓo ga lalle. 12Mo tǝ pǝǝ sǝr ɓe, ka ga joŋ fan nyi mo ya, mo ka lwaa cok 'yak kpee ya. 13So Kain faa nyi Dǝɓlii: Bone ɓe pǝyǝk kal tǝtǝl ɓe ɓe, me ka gak ɓaŋ ya. 14Mo ẽe ɗǝ, mo nĩi me tǝ'nah gin pǝ sǝr masãh mai ɓe, me ga muŋ suu ɓe pel ɓo pǝɗǝkki, me ga kyãh tǝ sǝr haihai. Koo zune mo lwaa me, a ga i me pǝ wulli. 15Dǝɓlii zyii faa nyi ko: Ka nai ya. Koo zune mo i mo ɓe, a ga faŋra val ɓǝ ɓo zahlǝŋ rǝŋ. So Masǝŋ kan lamba tǝ Kain, ka dǝɓ mo lwaa ko ɓe, mo i ko pǝ wul ka. 16So Kain zol gin pel Dǝɓlii kalle, ge kaa pǝ sǝr Nod nǝfah kǝmorcomzah'nan Eden.
Morsǝ̃ǝ Kain
17Kain kan mawinni, gbǝ ɓil byaŋ we worre, a ɗii ne Enok. Comki Kain vuu yaŋ, so ɗii yaŋ ah ne tǝɗii wel ah Enok. 18Enok byaŋ Irad. Irad byaŋ Mehujael, Mehujael byaŋ Metusyael, Metusyael byaŋ Lamek. 19Lamek woo ŋwǝǝ gwa, ma kǝpel ah a ɗii ne Ada, patǝ gwa ah ɗii ne Zilla. 20Ada byaŋ Jabal. Ako ye pah za ma ne faɓalle, a kaara pǝ julli. 21A ɗii naa mah ah ne Jubal, ako ye pah za ma joŋra kyẽm ne tǝnjuŋ ne jakle. 22Zilla byaŋ Tubal-Kain, ako ye pah za ma coora vãm syẽ ne vãm fuu. Naa mah Tubal-Kain mawin a ɗii ne Naama.
23Lamek faa nyi ŋwǝǝ ah Ada ne Zilla: We laa zah ɓe. Ŋwǝǝ Lamek, we syii sok tǝ ɓǝ faa ɓe. Dǝɓ ki kan syim wo ɓe, me i ko ɓoo ge lalle. 24A ga faŋra val ɓǝ Kain zahlǝŋ rǝŋ, amma mǝ Lamek a ga faŋra zahlǝŋ jemma rǝŋ tǝtǝl rǝŋ.
Set ne Enos
25Comki Adam kaa ne mawin ahe, byaŋ we wor maki ah ne ki. Mawin ah faa: Masǝŋ nyi we nyi me pǝ cok Abel mai Kain mo i ɓe. So ɗii ko ne Set. 26So Set ge byaŋ we ta, ɗii ko ne Enos. Ne cok ah za tǝŋ juura pel ne tǝɗii Dǝɓlii.
ప్రస్తుతం ఎంపిక చేయబడింది:
TƏŊMORFANNE 4: MUAR
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible Moundang © Alliance Biblique du Tchad, 1996.