KU̧U̧NAŊMƆ 15
15
Sɔ̧ nɔɔ tɔk in Abram
1Ɗoŋ o mɔɔ nɔ‘i, GASA WAN tɔ̧ɔ̧ wen ha̧ Abram tɛ ɔɔ-zu hee mɔ'ɔ ga: «Ká mɛ́ de kíì na, Abram. Mi nɛ ŋgee kɔ-mɛ, mɔɔ-oi-tom kɔ-mɛ tɛ duk nɛ̀ gasa-a nyɛmna.»
2Abram kifa nú: «GASA WAN Sɔ̧, nɛ́ ge ɛ̀nɛ̀ tɛ ha̧ ha̧‘m ge? Mi tɛ fe, bem bo na, ɓɛɛ wi nɛ̀ tɛ́ kai mɔɔ-oi-am nɛ́ Eliɛzɛr be Damas. 3Ɛ́nɛ́ há̧ ŋma bezaŋ ha̧‘m na, ɓɛɛ nɛ́ géé bíí nutua kɔ‘m a̧ tɛ́ kai mɔɔ-oi-am.»
4GASA WAN kifa nú ha̧ a̧ hee mɔ'ɔ ga: «Bó nɛ́ a̧ a̧ tɛ́ kai mɔɔ-oi-mɛ na, ɓɛɛ nɛ́ bezaŋ-mɛ a̧ tɛ́ kai mɔɔ-oi-mɛ.» 5A̧ mgbɔɔ Abram si zan, ɓɛɛ a̧ tɔ̧: «Mɛ̀ zɔ́k yí-zan, mɛ̀ zɔ́k o sɔra; mɛ́ nyɛma mɛ́ tɔr wa nde? O bezaŋ-mɛ tɛ́ dɔk hegɔ.»#Rɔm 4.18; Heb 11.12
6Abram kɔ̧ɔ̧ ɗɔaa ha̧ GASA WAN, ɓɛɛ GASA WAN zɔk a̧ hee wi-de-mɔ nɛ yuwar-a ga wen zu mɔ‘i.#Rɔm 4.3; Gal 3.6; Jk 2.23
7A̧ tɔ̧ɔ̧ ha̧ a̧: «Nɛ́ mi GASA WAN a̧ baa mɛ gbonɛ nɛ Ur, nù ko o be Kaldee wen ha̧a̧ fara’ɛ ha̧ mɛ nɛ̀ kɔ-mɛ.»
8Abram kifa nú: «GASA WAN Sɔ̧, nɛ́ ge a̧ tɛ usi'e nù'ɛ tɛ duk nɛ́ kɔ‘m ge?»
9GASA WAN tɔ̧ɔ̧ ha̧ a̧: «Mɛ̀ há̧ be-zɔŋa ndai, zɔŋa gbadua, be vala sami lɛŋ nɛ a̧a̧ nɛ pɛ taar, gbaku̧i in be pola ha̧‘m.» 10Abram kaia o saɗi nɔ‘i lɛŋ nɛnɛ ti Sɔ̧, ɓɛɛ a̧ gba wa tan see-a, ɓɛɛ kai a zɔk nɛ̀ ŋmaa; a̧ mbaŋ o nɔ̧́í̧ na. 11O ŋga nɔ̧́í̧ aa zu wɔr, ɓɛɛ Abram ndak wa yinɛ.
12Ŋgimbi yee-wese, Abram tika ya, ɓɛɛ ŋma gasa kíì in gasa tum tik zu a̧.#Job 4.13,14 13GASA WAN tɔ̧ɔ̧ ha̧ Abram: «Mɛ̀ íŋ nɛ de-a ndé, o bezaŋ-mɛ tɛ ɔ tɛ ŋma nù nɛ bo nɛ nù kɔ-wa na. Wa tɛ de bara, ɓɛɛ o bíí tɛ usi bɔnɛ ha̧ wa tɛ pɛ gɔŋmaa-naar.#Gboa-a 1.1-14; Tom 7.6 14Mi tɛ duk nɛ́ wi-gɔn-kita zu dukbíí nɛ tɛ de wa nɛ bara. Ɓɛɛ wa tɛ gbo yak nɛ̀ dɔka kpaamɔ nyɛmna.#Gboa-a 12.40-41; Tom 7.7 15War kɔ-mɛ, mɛ tɛ si ɗoŋ nɛ de-a nɛ́ɛ̀ kpa nɛ o dáà kɔ-mɛ, mɛ tɛ sɔk, ɓɛɛ wa baa mɛ gun nɛ de-a. 16O bezaŋ-mɛ tɛ ko ɗoŋ ŋmaa war taar, sɛka o mbe bezaŋ-mɛ pia ɗoŋ pii hɛ̧ɛ̧ wen ɗaŋmɔ ko o be Amɔr tɛ kaɗi hɔ̧ɔ̧ na.»
17Wese yea ɓɛɛ ɗoŋ nɛ tum baa nu, ŋma wee kɔ̧ lɔk in leɓe-wee yaka nɛ mgbara o kpoo saɗi n'aa gɔna'i. 18Wese'i, GASA WAN nɔɔ tɔk in Abram, ɓɛɛ tɔ̧: «Mi ha̧a̧ nù'ɛ ha̧ o bezaŋ-mɛ, ku̧u̧naŋ-a nɛ nana-yì Egiptɛ hɔ nɛnɛ ɗoŋ gasa yí Efrat.#Tom 7.5 19Mi tɛ ha̧ nù ko o be Kɛn in o be Keniz, o be Kadmɔŋ, 20o be Hit, o be Periz, o be Refaim, 21o be Amɔr, o be Kanaŋ, ko o be Girgas in o be Jebus ha̧ o bezaŋ-mɛ.»
ప్రస్తుతం ఎంపిక చేయబడింది:
KU̧U̧NAŊMƆ 15: GB11
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.