GENESIS 7
7
An Baha
1Tinaraman nin Kagurangnan si Noe, “Lumaog ka sa arka kaiba an bilog mong pamilya huli ta ika sana an nahiling kong naggigibo nin matanos sa henerasyon na ini. 2Magdara ka nin pitong pades, sarong lalaki asin sarong babae, kan lambang klase nin malinig na hayop alagad saro sanang pades kan maating hayop. 3Magdara ka man nin pitong pades kan lambang klase nin gamgam. Giboha ini tanganing mabuhay asin magdakul giraray sa daga an gabos na klase nin hayop asin gamgam. 4Huli ta pitong aldaw poon ngunyan, papauranon ko sa laog nin kwarentang aldaw asin banggi tanganing mawara an gabos na nabubuhay na ginibo ko.” 5Sinunod ni Noe an gabos na ipinagboot saiya nin Kagurangnan.
6Kan magbaha sa kinaban, seis syentos na taon na an edad ni Noe. 7Luminaog siya sa arka, kaiba an saiyang agom, an saiyang mga aki asin mga manugang, sa pagdulag sa baha. 8-9Kaiba man ni Noe sa arka an sarong lalaki asin sarong babae kan lambang klase nin hayop asin gamgam, malinig man o maati, siring sa pagboot nin Kagurangnan. 10Dangan pakalihis nin pitong aldaw, uminabot an baha.
11Kan ikadyes y syeteng aldaw kan ikaduwang bulan, kan an edad ni Noe seis syentos na taon na, nagpurutok an gabos na burabod nin tubig sa irarom kan daga, asin nagkaburuksan an mga bintana kan kalangitan, 12kaya nag-uran sa kinaban sa laog nin kwarentang aldaw asin banggi. 13Kan aldaw na iyan luminaog sa arka si Noe asin an saiyang agom kaiba an saindang mga aki na si Sem, si Ham asin si Jafet sagkod an saindang mga agom. 14Kaiba man ninda an gabos na klase nin hayop, manso asin lalaw, dakula asin sadit, saka an gabos na klase nin gamgam. 15Sarong lalaki asin sarong babae kan lambang klase nin linalang na may buhay an naglaog sa arka kaiba ni Noe 16siring sa ipinagboot nin Dios. Dangan sinerahan nin Kagurangnan an pinto kan arka.
17Nagpadagos an pagbaha sa laog nin kwarentang aldaw dangan naghararom an tubig sagkod na luminataw an arka. 18Padagos an pagrarom kan tubig alagad naglataw-lataw sana an arka sa ibabaw kan katubigan. 19Naghararom pa an tubig sagkod na matahoban an pinakahalangkaw na bukid; 20nagpadagos pa sa pagrarom an tubig sagkod na malabawan kaini nin pitong metros an alitoktok kan mga bukid. 21Daing natadang may buhay sa kinaban—nagkagaradan an lambang gamgam, hayop asin tawo. 22An gabos sa kinaban na naghahangos nagkagaradan. 23Tinunaw nin Kagurangnan an gabos na nabubuhay sa kinaban—mga tawo, hayop asin gamgam. Si Noe sana asin an mga kaibahan niya sa arka an nagkatarada. 24An tubig nagdanay sa ibabaw nin daga sa laog nin syento singkwentang aldaw.
ప్రస్తుతం ఎంపిక చేయబడింది:
GENESIS 7: BPV
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Philippine Bible Society, New Testament © 1981, Bible © 1992