ข้อพระคัมภีร์ยอดนิยมจาก ወንጌል ዘዮሐንስ 15

แบ่งปัน

አነ ውእቱ ጕንደ ወይን ወአንትሙሂ አዕጹቂሁ ዘነበረ ብየ ወአነሂ ቦቱ ውእቱኬ ዘይፈሪ ብዙኀ እስመ ዘእንበሌየሰ አልቦ ዘትክሉ ገቢረ ወኢምንተኒ።

ንበሩ ብየ ወአነሂ ብክሙ ወበከመ ዐጽቅ ኢይክል ፈርየ ባሕቲቱ እመ ኢሀሎ ውስተ ጕንደ ወይኑ ከማሁ አንትሙኒ ኢትክሉ ፈርየ ለእመ ኢነበርክሙ ብየ።

ወእመሰ ነበርክሙ ብየ ወነበረ ቃልየ ኀቤክሙ ኵሎ ዘፈቀድክሙ ትስእሉ ወይከውን ለክሙ።

አኮ አንትሙ ዘኀረይክሙኒ ወሤምክሙኒ አላ አነ ኀረይኩክሙ ወሤምኩክሙ ወእሬስየክሙ ከመ ትሑሩ ወፍሬ ትፍረዩ ወውእቱ ፍሬክሙ ይነብር ለዓለም ከመ እመቦ ዘሰአልክምዎ ለአብ በስምየ ኵሎ ይሁበክሙ።

አልቦ ዘየዐቢ ወይኄይስ እምዝ ፍቅር ከመ ብእሲ ዘይሜጡ ነፍሶ ቤዛ ነፍሰ ቢጹ።

ወለኵሉ ዐጽቅ ዘኢይፈሪ በላዕሌየ ይገዝምዎ ወያአትትዎ ወለኵሉ ዐጽቅ ዘይፈሪ ያስተናጽሕዎ ከመ ብዙኀ ይፍረይ።

ወዛቲ ይእቲ ትእዛዘ እንቲኣየ ከመ ትትፋቀሩ በበይናቲክሙ በከመ አነ አፍቀርኩክሙ።

ወበዝንቱ ይሴባሕ አቡየ እምከመ ብዙኀ ፍሬ ትፈርዩ ወትከውኑኒ አርዳእየ።

አነ ውእቱ ሐረገ ወይን ዘጽድቅ ወአቡየ ተካሊሁ ውእቱ።

ወእመቦ ዘኢነበረ ብየ ይገድፍዎ አፍኣ ከመ ዐጽቅ ይቡስ ወያስተጋብእዎ ወያውዕይዎ በእሳት።

ወነገርኩክሙ ዘንተ ከመ የሀሉ ልብየ ወፍሥሓየ ወፍቅርየ ኀቤክሙ ከመ ፍጹመ ይኩን ፍሥሓክሙ።

ወእመሰ ታፈቅሩኒ ዕቀቡ ትእዛዝየ ወሀልዉ በፍቅረ ዚኣየ በከመ ዐቀብኩ አነ ትእዛዞ ለአቡየ ወእሄሉ በፍቅሩ።

ወዘንተ እኤዝዘክሙ ከመ ትትፋቀሩ በበይናቲክሙ።

ሶበሰ እምዓለም አንትሙ እምአፍቀረክሙ ዓለም እስመ ዓለም ያፈቅር እሊኣሁ ወባሕቱ እስመ ኢኮንክሙ እምዓለም አላ አነ ኀረይኩክሙ እምውስተ ዓለም ወበእንተ ዝንቱ ይጸልአክሙ ዓለም።