MWAMBĨLĨLYO 40
40
Yosevu aialyũla ndoto sya ovwa
1Na kweethĩwa ĩtina wa maũndũ asu, mũnengani wa mbinyu wa mũsumbĩ wa Misili na mũui wake wa mĩkate mamwĩw’ĩthya woo, mwĩaĩi woo, mũsumbĩ wa Misili. #Nee 1.11. 2Na Valao amathilĩkĩla ala anene elĩ ma kwake, mũnene wa anengani ma mbinyu, na mũnene wa aui. 3Nake amekĩa ũsũvĩonĩ nyũmbanĩ ya kavuteni wa nguthu ya asũvĩi, nthĩnĩ wa kolokolo, vala Yosevu wovewe. #Mwa 37.36; 39.20. 4Na kavuteni wa asũvĩi amwia Yosevu ĩũlũ wa asu, nake amathũkũma: nao mekala ũsũvĩonĩ ĩvinda. 5Nao maota ndoto me elĩ, kĩla mũndũ ndoto yake, ũtukũ o ũmwe, kĩla mũndũ kwĩanana na ũalyũlo wa ndoto yake, mũnengani wa mbinyu na mũui wa mũsumbĩ wa Misili, ala mooviwe kolokolonĩ. 6Na Yosevu athĩ vala maĩ kĩoko, na amona, na, sisya, maĩ na woo. 7Nake akũlya anene ma kwa Valao ala maĩ vamwe nake ũsũvĩonĩ nyũmbanĩ ya vwana wake, akyasya, Nĩkĩ mũkwoneka mwĩ na woo ũmũnthĩ? 8Na mamũsũngĩa, Nĩtũotie ndoto, na vai ũmwe ũtonya kũmĩalyũla. Na Yosevu amea, Moalyũlo ti ma Ngai? Nĩngũmwĩsũva, ndavyai syo. #Nda 2.28.
9Na mũnenganĩ mũnene wa mbinyu atavya Yosevu ndoto yake, na amwĩa, Ndotonĩ yakwa, sisya, mũsavivũ waĩ mbee wakwa; 10na mũsavivũnĩ kwaĩ mbonge itatũ: naw’o wailyĩ ta ũũete wenze, na malaa maw’o malaũka; na ĩtũngo syaw’o syasyaa nzavivũ mbĩu: 11na kĩkombe kya Valao kyaĩ kw’okonĩ kwakwa; nakwa noosa nzavivũ, navivĩĩa kĩkombenĩ kya Valao, nakwa nanengane kĩkombe kw’okonĩ kwa Valao. 12Na Yosevu amwĩa, Ũalyũlo wayo nĩ ũũ: ila mbonge itatũ nĩ matukũ atatũ; #Mwa 41.26,27; Nda 2.36. 13o ĩtina wa matukũ atatũ Valao akookĩlya mũtwe waku, na akakũtũnga wĩanĩ waku: naku ũkanengane kĩkombe kya Valao kw’okonĩ kwake, o tondũ weekaa mbee yĩla waĩ mũnengani wake wa mbinyu. #Sav 3.3; Yel 52.31. 14Ĩndĩ nĩngũkwĩsũva, ũkandilikane nyie yĩla kwaku kwĩĩthĩwa kũseo, ũkambĩke nesa, na ũingweta kwa Valao, na kũnumya nyũmbanĩ ĩno: 15nũndũ nĩ w’o noyiwe kuma nthĩ ya Aevelania: o na kũũ ndyaaĩka ũndũ nĩ kana nĩkĩwe kasũmbanĩ ke nthĩnĩ wa nthĩ. #Mwa 37.28; 39.20.
16Mũui mũnene oona kana ũalyũlo waĩ mũseo, amwĩa Yosevu, Nakwa naĩ ndotonĩ yakwa, na sisya, ikavũ itatũ sya imũtũ nzaũ syĩĩ mũtwenĩ wakwa: 17na kĩkavũnĩ kĩla kĩĩ ĩũlũ kĩĩ lĩu mũue wa mĩthemba yonthe kwondũ wa Valao; na nyũnyi syaĩĩa kĩkavũnĩ ĩũlũ wa mũtwe wakwa. 18Na Yosevu asũngĩa na asya, Ũalyũlo wayo nĩ ũũ: ila ikavũ itatũ nĩ matukũ atatũ; 19o ĩtina wa matukũ asu atatũ Valao akookĩlya mũtwe waku kuma kwaku, na akakũsũsya mũtĩnĩ; na nyũnyi ikaya nyama syaku mwĩĩnĩ waku.
20Na kweethĩwa mũthenya wa katatũ, mũthenya ũla waĩ wa kũsyawa kwa Valao, amavokea athũkũmi make onthe mboka: na ookĩlya mũtwe wa mũnengani mũnene wa mbinyu na mũtwe wa mũui mũnene katĩ wa athũkũmi make. #Mt 14.6; Mko 6.21. 21Na atũnga mũnengani mũnene wa mbinyu wĩanĩ wake wa kũnengane mbinyu; nake anengane kĩkombe kw’okonĩ kwa Valao: #Mwa 40.13; Nee 2.1. 22ĩndĩ asũsya mũui mũnene: o tondũ Yosevu wamaalyũlĩle. #Mwa 40.19. 23Ĩndĩ mũnengani mũnene wa mbinyu ndaamũlilikana Yosevu, ĩndĩ oolwa nĩwe.
ที่ได้เลือกล่าสุด:
MWAMBĨLĨLYO 40: Mbivlia
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
