YOHANA 5
5
Giiheapta siida aba ghuuta dabascheanda
1Ng'ata damandida ghwahidu ghweelmeeda fuga Yahudi, nea abeeda ghwascheang'da Yesu gawa Yerusalemu. 2Aba hoowa bea Yerusalemu neekeewa gidaghuuta gisilgean gwanda dabascheanda siguura aba iita Ebraniya Betsata, nea gwandeawa doodoonung'weaka muut. 3-4Gwanda jeeni fuga saang'a miyeani nea gwalil, fuga ng'oowi, ea fuga badoojiga, ea fuga abitu damealga. 5Abeeda gwanda hoowa siyagi ghayi miyaan gweanyeew diktam ea damasis. 6Hean dea Yesu siidida nea gwalil aba hoowa ak ghwanal gideaba niibiida hoowa gili geaw, ghoanyaash nea gwayeesha, “Gigasayi haabwa?” 7Ghwasha siidida miyaaniin nea gwayeesha, “Siida mureeda, aniini meandeawani siichea ghoabuutanaan jeeda dabascheanda iing'ata giing'oolda beega, iissa iyeagasayi daabita jeeda goosheeda siinuut ghoabita.” 8Gwayeesha Yesu niny, “Ng'eada, geanda muundaang'u ak guwi.” 9Miighoah gil ghahaap siidida ak gageanda muundaanyi ak ghang'eat gawa. Nea abeeda eaweedida ea Sabaatohi. 10Iidu gwayeesha fuga Yahudi siidida siihaabiin, “Askweareani eaweeda Sabaato gil, ak ea mamiiseey gideaba gaysareana muundaang'u.” 11Ghwasha niny nea gwayeesha, “Siida ghwanyawa ahaabwan dea eeshiinean, ‘Sareana muundaang'u ak guwi.’” 12Geanyaash niny, “Siida eeshiineey, ‘Sareana muundaang'u ak guwi ng'eaha’?” 13Ea mwanala niny siida ghwanyawa ahaap, aba gideaba Yesu aba damandida ning'amwa hoowa aba gideaba nibassa geat hoowa eemeeda. 14Iidu ghwanyasa Yesu niny jeeda gheeda sibata ASEETA ak gwayeesha, “Asi daaha nihaabi! Adagudubiikta sina riing'eeda, adiidu gabiikta ghwanyasnyi ng'asheanda muy naawa nih.” 15Gawa Siidida ak gwarukusa fuga Yahudi gideaba siida ahaabwan Yesu gil. 16Hean ghoah gidasawassa fuga Yahudi Yesu, aba gideaba gwasin ng'asheanji eaweeda Sabaato. 17Ng'ata gwayeesha Yesu saawa, “Bwaabwa gudugagadiyi eara ghamneawa, ak eara aniini geagadiiyi.” 18Iidu aba badaydeaba ng'asheesu gagasa fuga Yahudi naweeda jea gwanuusa; nea meakna gideaba gwanuus deaweedeeda Sabaato ak ghwahit, ghabwada gideaba gwayi ASEETA ghwaan gil, aba sareani hean ea niideenyi geaw sea ASEETA.
Gheambalmeeda Orjeeda
19Gwayeesha Yesu saawa, “Aba huumwa, aba huumwa, geayeeshiineegwa, Orjeeda moamu gwasin gida nea gaba geaw ghoamu gwasin gidida dea nea gwasin Ghwaaniin; aba gideaba gidida sin Ghweandean, eara Orjeeda abeeda gaygwasin. 20Aba gideaba Bwaabwa ghabwariiy Orjeeda, ak iissa goohiimsa haleanjeeda sean sin niny, ak abeeda gaygoohiimsa ng'asheega hees madeenacheewana suh, ak abeeda gajahamwa ng'eanyi. 21Gawuurji gidida aduutiideayda Bwaabwa fuga meewa ak gabiikta ghoadaw eaweegean, eara Orjeeda iissa ghoadaw eaweega fugiga gassean. 22Bwaabwa maygoorgweaksa eara siida, ng'asheega sean bea girgweaksinda buuneeda niyiin geatinga Orjeeda, 23abeeda gwasissa buuneesean mureeda Orjeeda gawuurji gidasiniisiinda mureeda Bwaabwa. Siida masisiina Orjeeda mureeda masisiina mureeda Bwaabeeda ghayi ajeagu niny.
24Aba huumwa, aba huumwa, geayeeshiineegwa, siida iiy ng'asheanji iteanyuun, ak ghamwas siida ghayi ajeaknean, gwandeawa eaweega manda muudeanooda; nea majeergweaksa earahay aba gideaba ninaawa miyeeda ak gawa jeeda eaweega. 25“Aba huumwa, aba huumwa, geayeeshiineegwa, ghwaan damanda ak ghamneawa gwanda, ak gaygabiisa ghwayiiy fuga nimeewa ghuuta Orjeeda ASEETA, amadu fugiga jea gwayiing'shiin gayghwanyas eaweega. 26Gawuurji gidida mideeyeata Bwaabwa eaweega aba jeadaanyiin, gwasunu niidaw Orjeeda eaweega aba jeadaanyi, 27ak gabiissa ghoadaw gheambalmeeda jea goorgweaksiina buuneeda, aba gideaba niny Orjeeda Siida gil. 28Adaghahameagwa ng'eanyi aba badaydeaba ng'asheesu; aba gideaba ghwaan damanda jea ghwayiinya buuneesean mida jeesinga bung'eadinga ghuutaanyi 29abeeda gaygwaduutu fuga ghayi sina ng'asheega miyaasiin ak ghwanyas eaweega, ak gaygwaduutu fuga ghayi sina ng'asheega munyas ak geergweaksa.
Muushoodiga Yesu
30“Aniini mwammuusi dasin gil aba gheambalmeedeanyu nea geabwaageaw; aniini geargweakiisi buuneeda aba gidayiinyi, nea girgweageedeanyu ea doabiiwaat, aba gideaba meagassi dasin gideagasayi aniini geaghus dasin gidagasa siidida ghayi ajeakneaniin. 31Iyeamuuwu ng'asheegeasu, aniini abeeda muuwuunoodeanyu ea maba huumwa; 32ak gwanda siinuut muuwu ng'asheega badaydeanyu, ak ghaanali gideaba ng'asheega sean muuwu aba badaydeanyu gaba huumwa. 33Agooga ghayi goocheakti Yohana, ak gamuuwu ng'asheega huumwa. 34Aniini mwaakghusi muuwuunooda buuneeda; gearugu ng'asheesu aba gideaba geagasayi anyasa lealeanooda. 35Niny ghayi gheaboong'nyeanda yeat ak ghoabwaay gil, amadu ghoabwariinyi agooga weeshindaanyi gil nuwaas. 36Amadu muuwuunooda eandeawi eahaweewa dea Yohana; aba gideaba gadiyoojiga easinyi gea ghayi goonan Bwaabwa dasin, ak ea gadiyoojiga ghamneawa easinyiin gil, ak gamuuwu gideaba ghayi goojeaknean Bwaabwa. 37Ak eara Bwaabwa ghayi ajeaknean gamuuwu ng'asheega badaydeanyu. Ak ea moang'wa ayiinya ghuutaanyi nea niny ea moang'wa adaaha; 38nea eara ng'asheandaanyi ghanyea manda jeesingeagwa, aba gideaba moamwasi siida ghayi ajeagu. 39Agooga goosikiideawi ng'ooruutka nea ghoaghanyi gili aba jeenyaawa goondeawi eaweega manda muudeanooda; ak ea dea muuwu ng'asheega badaydeanyu; 40eara agooga ghanyea moogassi apkaani heedeanyu ak ghoanyaschi eaweega. 41Aniini mwaanyasi giigheambiita aba heeda buuneeda. 42Ak ghaanali gideaba agooga manda jeesingeagwa bariinyeega ASEETA. 43Aniini ghaawuni gheawunga Bwaabwa, ak ea moadeaptanaan; ama wuh siinuut aba gheawungaaschi niny gajadeapta. 44Abeeda gajamwastaan, siida nyasa giigheambiita hichpa siinuut ak ea magassa giigheambiita leabu heeda ASEETA? 45Adiidu gooyeeshi geat aniini gaydaahaaktaneagwa aba heeda Bwaabwa; Musa siida jea ghoahaaktaneegwa gil, nea siida ghayi oararji. 46Inyeeda ghayi ghoamwaschi Musa ghwanyawa gajamwasaan eara aniini, aba gideaba ghang'oar ng'asheega badaydeanyu. 47Amadu iimoamwasi ng'asheega ghayi ng'oar, abeeda gajamwastaan ng'asheegeasu?”
ที่ได้เลือกล่าสุด:
YOHANA 5: BG15
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible in Datooga © Bible Society of Tanzania, 2015.