YOHANA 6
6
Yesu ghoang'aata fih sagalamnyooji muut
(Mat 14:13-21; Mar 6:30-44; Luk 9:10-17)
1Iing'ata ng'asheesu ghoaghaawa Yesu basooda Galilaya, was basooda Diberiya. 2Ghwaat geeshta eemeeda aba gideaba saawa nidaah gwadeagwajeega sissa fuga miyeani. 3Hean gwading'da Yesu giijeeda, ak goopteada sea ginealangaaschi. 4Abeeda ea nineekiit ghweelmeeda Basaaka, bea fuga Yahudi. 5Ang'wearda ghwadaah eemeeda nea ghapka headaanyi ak gwayeesha Yesu Filipo, “Gajeashaahana yeenu mukaatajeega jea ghwaak fiisu?” 6Gwarukuta ng'asheanji nea gwasim, nea ghwanal niny gichea gwasin. 7Ghwasha Filipo nea gwayeesha, “Dinaaraji bughalaji iyeenya moamu ghwasha mukaatajeega deayeat eara eelakiisa fiisu gil mwanang'.” 8Gwayeesha orjeanagi was giinealaneadaanyi siguura Andreya bea geenyea Simon Betaro, 9“Gwanda hiji jeabwagi mideawa mukaataji muut bea shayiiri ea ghweayi iyeenya; ak gaygwarachi naaha suh aba fuga saang'a deenu?” 10Gwayeesha Yesu, “Anung' goobiitpiit buuneeda.” Abeeda gwanda hoowa nyeega saang'a; hean goobiitpiit headiga nyiit sagalamnyooji muut. 11Gageanu Yesu mukaatajeegiga ama ng'ata gabadiischeesa ASEETA ak gwalakiisa fuga abiitpiit; gwahindunu eara ghweayeegiga, ak gaba siisi siitaw gidagasiida. 12Iidu nea ning'ata agiischooda nea nilang'u buuneeda, gwayeesha ginealangaaschi, “Ooweamni gheaptanga silach adaghwaroat eara gil.” 13Hean ghoawaam banajanga mukaatajeegiga bea shairiin ghwanyawa lach fuga siing'aataan, ak ghoanyiit sooscheew damaniyeenya. 14Daah buuneeda gwadeagooda sin gwayi, “Aba huumwa siisi sibaneeda jea ghwahidu jeeda ng'eanyiida!”
15Jeeng'u gideaba geegasa eang'waay eayaat aba uurda ghoah sugoocheanda, gooheeli geaw Yesu buuneeda ak gabiikta gicha uhuuda giijeeda nea goodeayi geaw.
Yesu ghabeawa badayda beega
(Mat 14:22-33; Mar 6:45-52)
16Iidu nea ghoah shing'ada ghwararang'aada Ginealangaaschi ea gaweay ghuuta basooda, 17gwading'da maleambooda ghoaghaawa basooda gaweay ng'eanyiida Gapernaumu. Gamisaniit nea Yesu ea miighwahita heanyaawa. 18Gabalaksa basooda ak gooyuuk jeameeda ng'waan. 19Hean ghamwanmwan maleambooda beata geanu aseedeanagi, ak ghwadaah Yesu nea ghwaan aba badayda beega ak gwariiksa maleambooda ak ghabeal, 20gwayeesha saawa, “Adoabeali, siida aniini.” 21Hean gang'weela ak gagasa goodiing'sa jeeda maleambooda, ama deagheata ea nihita maleambooda ng'eanyiida ghajaam gwachi weay.
Fuga gaseadayi Yesu
22Iimuchu ghwadaah fuga heeta sinung'wa giigheawda basooda meatkweeda niirjean, gideaba sinung'wa hoowa maleamboonagi, nea Yesu gwachi ea mading'da maleambooda sea Ginealangaaschi, abeeda giinealanga gaweay nea gabwageat. 23Nea abeeda ea nihidu maleambajeega leabu ng'eanyiida Diberiya ea ghwahita heeda neekeewa heeda aksa buuneeda mukaate, heeda ghayi moasha Ng'utamiida ghawooda. 24Hean iidu nea ghwadaah buuneeda gideaba Yesu ea ginealangaaschi manda hiji, gwading'da maleambajeega gaweay ng'eanyiida Gapernaumu nea gagaseadayi Yesu.
Yesu mukaateeyda eaweega
25Iidu nea geanyasa giigheawda basooda meatkweeda niirja geanyaash nea geeyeesha, “Rabi, gihidu eeju hiji?” 26Ghwasha Yesu nea gwayeesha saawa, “Aba huumwa, aba huumwa, geayeeshiineegwa, moogaseadayean, aba gideaba ghayi noadaayi gwadeagooda, googassean aba gideaba ghayi ghoayaaji mukaate ak goolang'uuchi. 27Adiidu goodeawiichi aba hamita jea gabay gamuudean, adeawiisiina hamita jea gwanyagu eaweega manda muudeanooda, jea gagooneegwa Orjeeda Siida; aba gideaba nigeawiit gooroor ASEETA was Ghwaan.” 28Hean geeyeesha, “Gajeesna naaha iijea eamuusa eesina gadiyeeda ASEETA?” 29Ghwasha Yesu nea gwayeesha, “Gadiyeeda ASEETA nihi, gideaba amwasa siida ajeagu niny.” 30Hean gwayeesha saawa, “Gisini ana gwadeagu jea eadaaha ak geamwascheey, Gaysina ana gadiya? 31Ghweanigaasa ghayi ghwaak hamita siguura maana aba dareapcheeda aba gissing'oarda, ‘Ghoadaw mukaateeyda leabu humng'eeda ghwaak.’” 32Gwayeesha Yesu saawa, “Aba huumwa, aba huumwa, geayeeshiineegwa, mii Musa gil dea gooneegwa mukaateeyda leabu humng'eeda; Bwaabwa dea gooneegwa mukaateeyda huumwa leabu humng'eeda. 33Aba gideaba mukaateeyda ASEETA diita rarang'aana humng'eedean gil ak ghoadaw ng'eanyiida eaweega.” 34Geeyeesha niny, “Ng'utamiida, gooneasa mukaateehean galeagasean.”
35Gwayeesha Yesu saawa, “Aniini geawooschi mukaateeyda eaweega; siida wuh heedeanyu mayghwayeachih, nea siida mwasan ea mayghwaak muwoash earahay. 36Ak geayeeshiineegwa earapeadi noadaayaan moamwasaan. 37Fugiga sean goonan Ghweandean gayghapka heedeanyu; nea dea wuh heedeanyu ea mayghanyi dajaksa jarooda. 38Aba gideaba mwaararang'aanani humng'eeda doan dasin gideagasayi aniini, ghaawunyi dasin gidagasa dea ghayi ajeaknean; 39nea gidagasa dea ajeaknean ea nih gil, gideaba ea meahutani earagi aba jeeda geagoonan, geaghus deaduudu eaweeda huuydean. 40Aba gideaba gidagasa Bwaabwa nih gil, gideaba siida nyooh ghwadaah Orjeeda ak ghamwas abeeda ghwanyas eaweega manda muudeanooda, ak gaydeaduudu eaweeda huuydean.”
41Hean gabiissa ghoaniikgh fuga Yahudi aba gideaba gwayi, “Aniini geawooschi mukaateeyda leabu humng'eeda.” 42Gwayi saawa, “Neada siisi ea mii Yesuheeda was orjeeda Yosefu, anda geanali ghwaan ea ghaamwat? Abeeda ghoamuustaan gideaba gaygwayi, ‘Ghaararang'aani humng'eeda’?” 43Ghwasha Yesu nea gwayeesha saawa, “Adooniikiisi geat. 44Manda siida ammu ghwaan heedeanyu iimagisna Bwaabeeda ghayi ajeaknean ak abeeda geaduudu aba eaweeda huuydean. 45Geang'waar aba jeeda sibanga gideaba, ‘Gayghoanaal ASEETA sean.’ Siida wassean aleeysiit nea ghoanaal Bwaabwa, gayghoan heedeanyu. 46Aba seareani mii gideaba gwanda siida nidaah Bwaabwa gil geaghus diita leabu heeda ASEETEAN; nih siida nidaah Bwaabwa. 47Aba huumwa, aba huumwa, geayeeshiineegwa, siida mwas gwandeawa eaweega manda muudeanooda. 48Aniini geawooschi mukaateeyda eaweega. 49Ghweanigeagwa ghwaak hamita siguura maana aba dareapcheeda ak gameewa. 50Nih ea mukaateeyda rarang'aana humng'eeda, nea siida wassean iiyak ea mayghami. 51Aniini geawooschi mukaateeyda eaweega rarang'aana humng'eeda; siida wassean iiyak mukaateeheeni, gayghwashng'u eaweega manda muudeanooda; nea mukaateeyda jea daadaw aba badayda eaweega ng'eanyiida ea saseedeanyu.”
52Hean gabiissa gwasheang'nyi fuga Yahudi nea gaba geat, nea gwayi, “Gayghoamuustaan siisi gideaba gaygagooneasa saseadaanyi ak geayaaji?” 53Gwayeesha Yesu saawa, “Aba huumwa, aba huumwa, geayeeshiineegwa, iimoayaagi saseeda Orjeeda Siida, ak ghoaleayi foojeandaanyi, ea maygwanda jeesingeagwa eaweega; 54siida ak saseedeanyu nea ghwali foojeandeanyu gaygwandeawa eaweega manda muudeanooda, nea abeeda gaydeaduudu niny eaweeda huuydean. 55Aba gideaba saseedeanyu gichea eayaak bea huumwa, ak eara foojeandeanyu ea gichea eali bea huumwa. 56Siida iiyak saseedeanyu ak ghwali foojeandeanyu gaygoobiida jeedeanyu, nea eara aniini gaydeabiida jeadaanyi. 57Gida ajeakteaydanean Bwaabeeda mideawa eaweega, eara aniini geandeawi eaweega aba badayda Bwaabwa, gwasunu eara siida ak saseedeanyu gayghwanyas eaweega aba badaydeanyu. 58Asi nih mukaateeyda rarang'aana humng'eeda, mawuurji sea dea ak ghweaniga ak gameewa; siida iiyak mukaateeheeni gayghwanyas eaweega manda muudeanooda.” 59Gwarugu ng'asheesu nea goonealshi aba jeeda ghooriida siinealshacheewa aba ng'eanyiida Gapernaumu.
Ng'asheega eaweega manda muudeanooda
60Iing'shi gea saang'a aba jeeda ginealangaaschi gwayi, “Ng'asheesu suh eahang'oonyi; gayghoamu ng'eaha gooleeysiit?” 61Gwajeeng'u Yesu aba jeadaanyi gideaba ghoaniikgh ginealangaaschi aba badaydeaba ng'asheanji, gwayeesha, “Ng'asheanji gwaruuseegwa? 62Abeeda gaygawuurjiin iyoadaayi Orjeeda Siida nea ghwascheang'da gawa heeda ghayi mida bea aba mwadi? 63Guroorooda dea eatu eaweega gil, aba gideaba saseeda manda gidammu; ng'asheesu earukuneegwean guroorooda gil ea eaweega. 64Eara ghamneawa gwanda jeedeang'wa fuga mamwasa.” Ghang'eada mwadi Yesu ghayi gwarugu ng'asheesu nea gabean ghwanal gideaba geabeang'a gil fugiga mamwasaan, ak ea ng'eaha siida jea ghwala bwadaw niny. 65Hean ng'ata gwayi, “Nih gidearukuneegwa gideaba manda siida jea ghoamu ghwaan heedeanyu iimwanung' Bwaabwa ghwaan.”
66Ng'ata gabiikta bwadaw gea saang'a aba jeedeaba ginealangaaschi ak ea mudu ghwaat geeshta. 67Gwayeesha Yesu fugiga atamaniyeenyean, “Eara agooga googasayi aweayeena?” 68Ghwasha Simon Betaro ak gwayeesha, “Ng'utamiida, ak gajeeweaya heedeabeang'a? Ang'iing'i gindeawi ng'asheega eaweega manda muudeanooda; 69aseasa simwaschi, ak geanali gideaba ang'iing'i guwoosi dea Ghaydit bea ASEETA.” 70Ghwasha Yesu nea gwayeesha, “Aniini miidagwalneegwa nea goowooschi damaniyeenya, nea siyagi aba jeedeang'wa ea mii meang'nyeandeendea?” 71Nea abeeda gabaloola badayda Yuda, orjeeda Simon Iskariyote, aba gideaba niny gaba jeedeaba giinealangiga atamaniyeenyean, ak ea dea jea ghwala bwadawi.
ที่ได้เลือกล่าสุด:
YOHANA 6: BG15
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible in Datooga © Bible Society of Tanzania, 2015.