Luka 20
20
Ndzǝ ada Yuwɛ ata Kǝra Nggakur Yɛsu
(Mat 21:23-27; Mar 11:27-33)
1Vǝr laka tǝ dzǝ ada hyipɛ ala ndzi akwa babalǝr fǝr Hyal, tǝ dzǝ ada 'ya ala dar ndǝrǝr Hyal nam sǝɗa, antǝ nggar fǝrist yarɛ ba malǝmǝr mabari yarɛ, ba ndzi ngga-ngga yarɛ ka sǝngui kudzǝghɛ adzǝni. 2Dar ka nkǝrɛ alari, “Nkǝrɛ ala yar aka wada madi tǝ gǝ ada 'ya sǝ yarni, kǝna wa tara la gǝ wada ni?”
3Antǝ dzǝ ka sǝnau ala dar, “Yi ma Yi ata yu tǝ gǝri. Nkǝrɛ mɛ alai, 4bamtizǝma nam tǝ Yawhana tara 'ya ni, hyati atahyal kǝna, hyati aka ndɛ?”
5Antǝ dar ka 'ya sawari akwa ɓwanga dar, dar ka nkǝrɛ apǝri, “Ma apǝri, mur nkǝrɛ, ‘Atahyal,’ dzǝ ata nkǝrɛ apǝri ‘Kami kura gǝri ta mbǝrsa aka dza?’ 6Ma apǝri tsuwɛ mur nkǝrɛ apǝri, ‘Nǝr ndɛ,’ sanga ndzi ata ɗǝgal tǝ muri, kadǝbar dar kurtaka zǝndi apǝri Yawhana dzǝ nabi.”
7Ani dar ka sǝnau alari, “Yar ta zǝndi vui nam tǝ dzǝ hyati akwa wɛ.”
8Yɛsu ka nkǝrɛ ala dar, “Ani apani Yi ma Yi adi ata nkǝrɛ ala gǝr, tar aka wada madi tǝ Yi ada 'ya sǝ yarni wɛ.”
Karabu ata Kǝra Ndzǝr Kǝl Fwaku ka Agǝri
(Mat 21:33-46; Mar 12:1-12)
9 #
Isa 5:1
Dzǝ lǝkǝma aka nkǝrɛ karabu ǝni ala ndzǝ yarni: “Ndǝ laka adai tara thlǝkati fwakǝr inabi, dzǝ ka la ndzǝ laka ka dar tsǝwhɛ, dzǝ ka tǝra akwa mǝlmǝ laka tǝ dzǝ ka sǝkar. 10Ata sakar ɗǝm madarari dzǝ hyanti zǝr kǝiyirni ala ndzǝr tsǝwhɛ yarɛ ǝnda, ka dar lar bwarni akwa madar inabi yarari. Ama ndzǝr tsǝwhɛ yarɛ ni ka dlaɓu tǝni, ka kǝdlǝnta tǝni aka tsi ɓǝrtu. 11Dzǝ ka ɓakta hyanti zǝr kǝi damwa, dzǝ ma dar ka dlaɓu tǝni, tǝ dar ka hau tǝni akwa sǝlai, dar ka kǝdlǝnta tǝni aka tsi ɓǝrtu. 12Dzǝ hyanti nǝr makǝrkur kadamwa, ba dar ka 'yanta tǝni, dar ka kǝdlǝba tǝni.
13“Antǝ thlakǝr fwaku ni ka nkǝrɛ apǝri, ‘Mǝ tǝ Yi ata 'ya? Yi ata hyanti zǝrna nam tǝ Yi yiɗɛ. Pakat dar ata vǝkǝr sǝlai alari.’
14“Ama sakatǝ ndzǝr tsǝwhɛ yarni wula tǝni, dar ka gha ala kǝma dar apǝri, ‘Əni ani ndǝr sǝm wartari,’ ndǝ dar. ‘Ngyar ka mur tsi tǝni, ka wartari ndzai nǝmuri.’ 15Ani dar ka ɗalba tǝni abǝla ata hǝiya fwaku ni dar ka tsi tǝni.
“Sǝr mi tǝ thlakǝr fwaku ni ata 'ya ala dar? 16Dzǝ ata si ka kurnta ndzǝr tsǝwhu yarɛ ni, ka dzǝ la fwaku ni ala ndzǝ damwa.”
Sakatǝ ndzi ngati apani, dar ka nkǝrɛ, “Ta dzǝli sǝ ahani ta saga 'ya!”
17 #
Zab 118:22
Yɛsu ka wul tǝ dar nging, dzǝ ka yu tǝ dar, “Antǝ sǝr mi dzá tǝ sǝ nam tǝ ndǝ rǝbwai ǝni ada nkǝrɛ:
“ ‘Paya nam tǝ ndzǝr tsa fǝr yarɛ tara ngǝla
kǝ siya ndzai payar kuɗǝma’?
18Kǝlara ndǝ nam tara ɗi ata kǝra paya ni, dzǝ ata ɓǝgǝludzi ɗǝɗǝhyu, ama ndǝ nam tǝ paya ni tara ɗǝkǝr alari, dzǝ ata ghyaɓuntadzi.”
19Malǝmǝr mabari yarɛ, kaka nggar fǝrist yarɛ, ka bara whal nam tǝ dar awa ngǝti Yɛsu tǝnyi-tǝnyi, kadǝbar dar zǝndi apǝri, ata kǝra dar tǝ dzǝ gha karabu ni, ama dar ada hyivǝr ndzi.
Nkyɛ Tsǝmɛ ala Kaisar
20Dar ada wul tǝni tǝ hankal, dar ka hyanti ndzǝr mbǝla, nam tǝ dar mǝrti kǝr dar apa dar ndzǝ nam ɗaku. Dar hau akwa ɗǝfa dar apǝri dar ada ngǝti Yɛsu akwa sǝ yarɛ nam tǝ dzǝ gha, ani ka dar hamnta tǝni ala dǝna ba wadar gumna. 21Ani ndzǝr mbǝla yarɛ ni ka yu tǝni: “Malǝm, yar zǝndi labar ngɛ aka hyipǝr ngɛ sang dzǝri, Ba gǝ kǝtǝ sanga ndzi kal-kal, ama gǝ ada hyipǝ whalǝr Hyal akwa whal nam dzǝri. 22Kǝ 'ya kal-kal ya ka yar pu tsǝmɛ ala kaisar kǝna a'a?”
23Dzǝ zǝndi pǝndǝlkur nam akwa ɗǝfa dar, ba dzǝ ka nkǝrɛ ala dar, 24“Tsantamɛ alai dinariyus ni. Ənǝni par wa ba rǝbwar wa ani ati?”
25Dar ka nkǝrɛ alari, “Nǝr Kaisar.”
Dzǝ ka nkǝrɛ ala dar, “Antǝ ka gǝri la Kaisar sǝ nam nǝr Kaisar, ba ka gǝri la Hyal sǝ nam nǝr Hyal.”
26Dar ta mǝzi ngǝti tǝni ata kǝra sǝ yarɛ nam tǝ dzǝ nkǝrɛ akǝma ndzi wɛ. Ani dar ka ndatǝdzi aka sǝnau nam tǝ dzǝ 'ya, dar ka ndzai kǝɗǝk.
Hyati akwa Ntǝnti ba Kǝldzi
(Mat 22:23-33; Mar 12:18-27)
27 #
'YaSu 23:8
Ndzǝr Saduki yar laka dzǝ nam ada nkǝrɛ apǝri hyati akwa ntǝnti adi wɛ dar si adzǝ Yɛsu aka sǝr yuwɛ. 28#Mab 25:5Dar ka nkǝrɛ, “Malǝm, Musa rǝbwai ala yar akwa mabari apǝri, ma ndǝ tǝ zǝrangǝri nti, tǝ dzǝ ngyar mwalarni kura aka zǝr, kǝ ntsakǝr dzi ka zǝrangǝri kǝtǝ kuɗǝghum ni ka dzǝ yaba madausai ala zǝrangǝri! 29Yau, madar mama murfwɛ adai. Yar kǝmari ka kǝtǝ mwala, dzǝ ka nti kura dzǝ ta ɓui zǝr. 30Nǝr sǝɗǝkur 31ba nǝr makǝrkur kǝl tǝni, ani apani sanga dar murfwɛ ni ka kurntadzi kura madar. 32Aghǝla ǝni mwala ǝnari yɛ ka nti. 33Kulini dzá, vǝr hyati akwa ntǝnti dzǝ ata ndzai mwalar wa akwa ntsa dar, Kadǝbar sanga dar murfwɛ ni dar kǝl tǝni?”
34Yɛsu sǝnau, “Ndzǝr zaman ǝni dar ada kǝl mwala ba pwarnta nkwa ala sal. 35Ama ndzǝ nam ata mǝzi tǝ Hyal ata hyanti tǝ dar akwa ntǝnti ka ndzai akwa zaman ǝnda, dar adi ata kǝl mwala wala pwarnta nkwa ala sal wɛ. 36Ba dar tsu adi ata ntǝ kǝra wɛ; akuya dar apa ndzǝr hyantǝr Hyal. Dar madar Hyal akuya ka dar madar hyati akwa ntǝnti ni. 37#Sǝb 3:6Ama akwa ndǝrɛ ata kǝra sakatǝ zǝr fwɛ ada mba akwa ntaku ni wala Musa ma tsanti apǝri ndzǝ ntǝnti dar hyati, akuya tǝ dzǝ ka Thlaku ni ‘Hyalǝr Ibrahim ni, ba Hyalǝr Isaku ni, ba Hyalǝr Yakubu ni.’ 38Dzǝ adi Hyalǝr ndzǝ ntǝnti wɛ, ama Hyalǝr ndzǝ nam aka mpikɛ, akuya alari sang ndzǝ yarni aka mpikɛ.”
39Laka malǝmǝr mabari yarɛ ka sǝnau, “Malǝm, gǝ gha kal-kal!” 40Ndɛ adi nam tara mǝzi ka ɓakta yu tǝni sǝr yuwɛ yarɛ kǝra wɛ.
Kǝrsti ni Dzǝ Zǝr Wa?
(Mat 22:41-46; Mar 12:35-37)
41Antǝ Yɛsu ka nkǝrɛ ala dar, “Mǝmi tǝ dar ada nkǝrɛ apǝri Kǝrsti ni dzǝ Zǝr Dauda? 42#Zab 110:1Akuya Dauda tǝ kǝrni nkǝrɛ akwa kakadǝr zabura:
“ ‘Thlaku ni nkǝrɛ ala Thlakǝrna:
“Ndzai tǝbwar tsisǝmawai
43tar ma Yi mǝrti dǝgunmar ngɛ yarɛ
sǝr vǝ thlǝlɛ ala gɛ.” ’
44Dauda ka tǝni ‘Thlaku.’ Mǝmi dzá tǝ dzǝ awa ndzai zǝrǝrni?”
45Sakatǝ sanga ndzi ada sǝthlǝmɛ alari. Yɛsu nkǝrɛ ala ndzǝr nuwurni, 46“Vǝdzamɛ hankal ala malǝmǝr mabari yarni. Dar yiɗǝ nuɗɛ aka lǝkutu dzǝgam, ba dar yiɗǝ ka ndǝ thlawar tǝ dar akwa vui kasuku yarɛ, ba dar ada yiɗɛ vui ndzai nam dangaram akwa fǝr vǝkǝr sǝlai ba vui ndzai nam akwa vui gyali tǝ ndǝ ada hǝm hǝmɛ. 47Dar ada sǝnya kǝiyir kuɗǝghum yarɛ, ba dar ada 'ya aduwa yarɛ dzǝgam akuya ka ndǝ wula. Dzǝli ndzǝ yarni ata ɓui haka nam dzau.”
ที่ได้เลือกล่าสุด:
Luka 20: CKL
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©2023 Seed Company in collaboration with Language Developers and Bible Translators Association