Luka 21
21
Hamnta sǝr Mwala Kuɗǝghum
(Mar 12:41-44)
1Yɛsu ka haɓǝti kǝrari, dzǝ ka wula bǝrba yarɛ ada pu sǝr hamntar dar akwa bitǝmbal nǝr fǝr Hyal. 2Ba dzǝ wula mwala kuɗǝghum laka nam ngudi nam tara pu anini sǝɗɛ. 3Dzǝ ka nkǝrɛ, “Dzǝr dzǝri Yi ada gha ala gǝri, kuɗǝghum ǝni ngudi ni pu sǝ hang ta sanga ndzi damwa. 4Kadǝbar sanga ndzǝ yarɛ ni dar hamnta akwa ntsa hang nam tǝ dar akǝr; ama mwala ni akwa ngudikurni dzǝ hamnta sanga sǝ nam tǝ dzǝ akǝri nam tǝ dzǝ ata ndzai ati.”
Par Sǝ yarɛ Nǝr Dǝntar Zaman
(Mat 24:1-2; Mar 13:1-2)
5Laka ndzǝr nuwurni yarɛ ada nkǝr su ata kǝra dakwaikur paya yarɛ nam tǝ ndǝ dzǝgu fǝr Hyal akǝr ba sǝr hamnta nam tǝ ndǝ la Hyal. Ama Yɛsu ka nkǝrɛ, 6“Sanga sǝ yarɛ nam tǝ gǝri ada wula ni, saka ata si nam kura paya duku ata ndzai ata kǝra kǝmani, kǝlara duku akwa ntsa dar nam kura awa ɗǝghǝl ta kǝra kǝmani adi wɛ.”
7Dar ka yu tǝni, “Malǝm nama tǝ sǝ yarni ata 'ya? Ba sǝr mi nam ata tsanti apǝri dar angwada baditsǝni 'ya?”
8Dzǝ ka sǝnau ala dar: “Ka gǝri vǝdzǝ hankal ta ndǝ ta zǝlanta tǝ gǝri. Akuya ndzǝ hang ata si akwa thlǝmawai, ka kǝtǝ apǝri, ‘Yi ani dza’ ba, ‘Saka kǝ 'ya kudzǝghɛ.’ Ta gǝr ta nu tǝ dar. 9Sakatǝ gǝr ngati mpa yarɛ kaka sǝwa sǝ yarɛ, ta ɗǝfa gǝri ta dli tǝ gǝri. Kǝ ndzai ntsakǝr tar ma sǝ yarni 'ya kǝma, ama dǝntari ta si kwataku wɛ.”
10Antǝ dzǝ ka nkǝrɛ ala dar: Di ata ɗǝkǝr ata kǝra di, ba kuhyikur ata kǝra kuhyikur. 11Ndǝ ata 'ya kǝngǝr di yarɛ nam dzau, mi yarɛ ba kasuwa yarɛ akwa vui yarɛ pam-pam, ba sǝr hyivǝr yarɛ ba ndzǝ ata wula dzǝli parsu yarɛ nam ngga-ngga atahyal.
12“Ama kabutu tǝ sǝ yarni sang ata 'ya, ndzǝ ata ngǝti tǝ gǝri, ka dar tsanti ala gǝri bwanai, dar ata mwari aka gǝri akwa fǝr aduwar dar akuya haka ba dar ata mwari aka gǝri akwa fǝrsǝna, ka dar ɓakta mwari aka gǝri akǝma kuhyi yarɛ ba gumna yarɛ kadǝbar thlǝmawai. 13Əni ata ndzai ala gǝri whalǝr sakǝidatsǝni tǝra. 14#Luk 12:11,12Ama ka gǝri ɗǝmhǝi hankala gǝri ta gǝri ta ɗǝnga akwa ɗǝfa gǝri ata kǝra whal nam tǝ gǝri ata hamnta ndǝrɛ ka mbuli kǝr gǝri wɛ. 15Akuya Yi ata la gǝri labar ba bǝrkawakur nam tǝ sanga dǝgunmar gǝri yarɛ adi ata mǝzi ka ndalnta wala ɓǝlnta pǝrta wɛ. 16Ndzǝ ata ɓǝlai tǝ gǝri wala atar ndzǝr yar gǝri yarɛ, madar mama gǝri yarɛ, ndzǝliyir gǝri yarɛ, kaka pazǝr gǝri, ba dar ata hau ka ndǝ dlǝnta laka ndzi akwa ntsa gǝri. 17Sanga ndzi ata ngǝla tǝ gǝri akuya ka thlǝmawai. 18Ama sǝsǝr kǝra gǝri wala duku ma adi ata 'yantadzi wɛ. 19Ma gǝri hyati ɓaɓal gǝri ata ɓui mbatǝdzi.
20“Saka nam tǝ gǝri wula saudza tara dlǝti Ursalima, gǝri ata zǝndi apǝri, whuzanta dzǝrni kǝ 'ya kudzǝghɛ. 21Antǝ ngyar ndzǝ nam akwa mǝlmǝr Yahudiya, ka dar whui atǝra akwa paya yarɛ, ba nyar ka ndzǝ nam akwa kuta mǝlmɛ ka dar whuiya sǝba, ba ngyar ndzǝ nam abǝla tǝ ngwama mǝlmɛ ta dar ta si akwa kuta mǝlmɛ ni. 22#Hau 9:7Akuya ǝni ani sakar sa bwanai akuya ka ghǝiyaba sanga sǝ yarɛ nam rǝbwa-rǝbwa. 23Bwasam ala mwahyi nam aka whur ba nam tsu aka madar ata nya u'uwa akwa vǝr yarɛ ǝnda! Kǝriku nam ngga ata ɗǝkǝr ala di ni ba sǝwa ɗǝfǝr Hyal ata kǝra ndzǝ ǝni. 24Ndɛ ata dlǝnta ndzǝ yarɛ laka aka katsakar, ka ndǝ fati ndzǝ yarɛ laka ka ndǝ mwari aka dar akwa mǝlmǝr falikur akwa di damwa yarɛ. Ndzǝ kura Yahudi yarɛ ani ata nyaɓu Ursalima, har ka la kurǝr zamanǝr Ndzǝ kura Yahudi.
25 #
Isa 13:10; Izǝ 32:7; Dzay 2:31; Wul 6:12,13 “Ndɛ ata wula dzǝli parsu yarɛ laka ata dzá tsǝtsi, hya, ba tsambiya yarɛ. Ata dai, di yarɛ ata lǝkwa damitsǝnidzi ba yakatsǝnidzi akuya ka zǝmiyir yimi aka kǝngǝrǝr yimǝr manda. 26Ndzi ata mutsǝni akuya hyivǝr, ba akuya ɗǝnga ata kǝra sǝ yarɛ nam ata 'ya akwa dunya ni, akuya dǝna yarɛ ni nam atahyal ata siya kǝngǝrtǝdzi. 27#Dan 7:13; Wul 1:7Akwa saka ǝnda ani tǝ dar ata wula Zǝr Ndɛ ada si akwa dlamba aka dǝna ba nggakur. 28Saka nam tǝ sǝ ǝni yarɛ ni baditsǝni 'ya, hyatamɛ ka gǝri haɓǝti kǝra gǝri, kadǝbar pǝlidzǝr gǝri kǝ 'ya kudzǝghɛ.”
29Dzǝ ka nkǝrɛ ala dar karabu ǝni: “Wulamɛ fur kanda kaka sanga fwɛ yarɛ. 30Ma dar baditsǝni ɗǝɗa thlali, gǝri ata wula ba zǝndi tǝ kǝr gǝri apǝri andal kǝ 'ya kudzǝghɛ. 31Tsu apani, sakatǝ gǝri wula sǝ ǝni yarni ada 'ya, gǝri zǝndi apǝri kuhyikur Hyal kǝ si kudzǝghɛ.
32“Yi ada gha ala gǝri dzǝri, zaman ǝni adi ata kwatsǝni wɛ, tar ma sanga sǝ ǝni yarni 'yatǝdzi. 33Atahyal aka dai ata kwatsǝni, ama labarǝrna adi ata saga kwatsǝni wɛ.”
34“Ka gǝri 'ya hankal, ta ɗǝfa gǝri ta tǝra ka sǝm su ba sǝsa su ba damitsǝnidzi ka sǝr dunya ni, har kura aka zǝndi ka vǝr ǝnda ngǝti tǝ gǝri apa kyal. 35Akuya vǝr ǝndari ata si ata kǝra sanga ndzǝ nam ada ndzai akwa dunya. 36Kǝlara saka ka gǝri ndzai aka ɗǝmhǝdzi, ka gǝri 'ya aduwa ka gǝri ɓui dǝnar whui atǝra ka ngyar sanga dzǝli sǝ yarni nam ata 'ya, ba ka gǝri mǝzi ka hyati akǝma Zǝr Ndɛ.”
37 #
Luk 19:47
Tatang vǝri ata tsǝtsi Yɛsu ada hyipɛ akwa fǝr Hyal, avǝrvǝri tsuwɛ dzǝ ada sǝba ka lǝka pi akwa paya nam tǝ ndǝ ada ka tǝ Payar Zaitun, 38ba kula-kula mbǝk sanga ndzi ada tsaɓtsǝnidzi adzǝni akwa fǝr Hyal ka dar si thlǝma alari.
ที่ได้เลือกล่าสุด:
Luka 21: CKL
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©2023 Seed Company in collaboration with Language Developers and Bible Translators Association