Luka 22
22
Yahuda Iskaryauti Lu ka Dzǝ Ɓǝlai Yɛsu
1 #
Sǝb 12:1-27
Kulini Wudzǝr Mantsǝkǝl nam kura Thlǝlam, nam tǝ ndɛ ada ka tǝ Wudzǝr Ngǝmba, kǝ si kudzǝghɛ, 2antǝ nggar fǝrist yarɛ ni ba mǝlǝmǝr mabari yarɛ ni dar ada bara whal nam tǝ dar awatsi Yɛsu, akuya dar ada hyivǝr ndzi.
3Antǝ Satan ka lǝkwa Yahuda, nam tǝ ndɛ ada ka tǝ Iskaryauti, pathlu akwa ntsa kum kapu sǝɗɛ yarɛ ni. 4Ba Yahuda ka mwari ka 'ya sawari aka nggar fǝrist yarni ba ngganggar ndzǝr ɓǝla fǝr Hyal ata kǝra whal nam tǝ dzǝ awa ɓǝlai Yɛsu ala dar. 5Antǝ dar ka 'ya kutsari ba dar ka mbwai apǝri dar ata lar gǝna. 6Dzǝ tsuwɛ dzǝ yiɗɛ, tǝ dzǝ baditsǝni bara whal nam tǝ dzǝ awa hamnta Yɛsu ala dar saka kura ndzi hang adai.
Sǝr Sǝmǝr Tǝhaku nǝr Dǝnta
(Mat 26:17-25; Mar 14:12-21; Yaw 13:21-30)
7Antǝ vǝr Wudzǝr Mantsǝkǝl kura Thlǝlam ni ka si ani vǝr nam tǝ ndɛ ada tsa zǝr agam nǝr Wudzǝr Ngǝmba ni. 8Yɛsu ka hya Bitrusu aka Yawhana, tǝ dzǝ nkǝrɛ ala dar, “Mwaramɛ ka gǝri ɗǝmhǝi ala muri sǝr sǝmǝr Wudzǝr Ngǝmba.”
9Dar ka nkǝrɛ alari, “Amarɛ tǝ gǝ ada bara ka yar ɗǝmhǝi?”
10Dzǝ ka sǝnau, “Ma gǝri lǝkwa kuta mǝlmɛ, gǝri ata kǝɓai aka sal laka ada kǝl tǝghum yimi. Ka gǝri nu tǝni har kǝi nam tǝ dzǝ lǝkwa, 11ka gǝri nkǝrɛ ala thlakǝr kǝi ni, ‘Malǝm ada yuwɛ: Ama fǝr mǝthlǝɓi vui nam tǝ Yi awa sǝm sǝr sǝmǝr Ngǝmba kaka ndzǝr nuwurna?’ 12Dzǝ ata tsanti ala gǝri fǝr nam ata kǝra kǝmani nam ngga aka kari tǝ ndǝ ɗǝmhǝi akwa. Akwanda tǝ gǝri ata ɗǝmhǝi ala muri.”
13Ani dar ka tǝra ba dar ka ɓui apa tǝ dzǝ gha ala dar, dar ka ɗǝmhǝi sǝr sǝmǝr Wudzǝr Ngǝmba ndari.
14Sakatǝ sakari tara 'ya, Yɛsu kaka ndzǝr hyarni ka ndzai ata tɛbǝr. 15Dzǝ ka nkǝrɛ ala dar, “Yi bara ka Yi sǝm sǝr sǝmǝr Ngǝmba ǝni vwam kaka gǝri, kabutu ma Yi ata ɗar bwanai. 16Akuya Yi nkǝrɛ ala gǝri, Yi tsu adi ata ɓakta sǝm tǝni wɛ, tar ma dzǝ ɓui ghǝiyabadzi akwa kuhyikur Hyal.”
17Aghǝla tǝ dzǝ kǝtǝ kapu ni, dzǝ ka 'ya gwaditsǝni ba dzǝ ka nkǝrɛ, “Ndamɛ ǝni ka gǝri ndǝghǝi akwa ɓwanga gǝri. 18Yi ada nkǝrɛ ala gǝri, Yi tsu adi ata ɓakta sa yimǝr inabi wɛ, tar ma kuhyikur Hyal si.”
19Ba dzǝ ka kǝtǝ mantsǝkǝl, aghǝla tǝ dzǝ usar Hyal dzǝ ka ɓǝgǝlu, ba dzǝ ka la dar, dzǝ ka nkǝrɛ, “Əni ani dzawai nam tǝ Yi ata hamnta akuya gǝri, ka gǝri lǝkǝma aka 'ya ahani, kadǝbar ɗǝngati tǝra.”
20 #
Iri 31:31-34
Tsu akwa whal ǝni, aghǝla sǝr sǝmǝr tǝhaku ni, dzǝ kǝtǝ kapu ni ka nkǝrɛ, “Kapu ǝni ani sǝ nam mbwa-mbwa bǝlin akwa masǝrna, nam tara puntadzi akuya ka gǝri.” 21#Zab 41:9“Ama nda yar ata pau tsai akwa kwatǝm duku aka ndǝ nam ata siya ɓǝlai tǝra ni. 22Zǝr Ndɛ ni ata nti tsu apa tǝ ndǝ rǝbwai ata kǝrari, ama bwasam ala ndǝ ǝnda nam tara ɓǝlai Zǝr Ndɛ ni.” 23Dar ka baditsǝni yu kǝma dar apǝri ndǝ madi ani ata 'ya sǝ ni.
24 #
Mat 18:1; Mar 9:34; Luk 9:46 Ani ɓwalnya ka hyati akwa ɓwanga dar ata kǝra apǝri wa ani ata ndzai ndǝ nam nggar dar. 25Yɛsu ka nkǝrɛ ala dar, “Kuhyi yarɛ nǝr ndzǝ kura Yahudi ada tsan nggakur ata kǝra dar; ba ndzǝ nam aka wada dar ada nkǝrɛ ala kǝr dar apǝri dar ndzǝr dlar ndzi. 26#Mat 23:11; Mar 9:35#Mat 20:25-27; Mar 10:42-44Ama gǝri adi ata 'ya apani wɛ. Ata vuiya ǝni, ndǝ nam ngga ta sang akwa ntsa gǝri ka dzǝ ndzai apa dzǝ dza nkyiɗu ta sang, ba ndǝr 'ya haka ka dzǝ ndzai apa ndǝr 'ya kǝthlǝr. 27#Yaw 13:12-15Akuya wa ani ngga dar, ndǝ nam ada ndzai ka sǝm su kǝna ndǝ nam tara si aka sǝr sǝmari? Azarɛ, adi ndǝ nam tara ndzai ka sǝm ni wɛ? Nda yɛ akwa ntsa gǝri apa ndǝr 'ya kǝthlǝr.
28“Gǝri dza ndzǝ nam tara hyati adzǝra akwa sǝr nkǝrti yarɛ nam tǝ Yi tara lǝkwa. 29Apa tǝ Bana tara lai dǝnar kuhyikur ani Yi ma tǝ Yi la gǝri, 30#Mat 19:28ani ka gǝri sǝmɛ ba sa ata tɛbǝrna akwa kuhyikurna ka gǝri ndzai ata dǝgǝl kuhyikur, ka gǝr 'ya haka ala kulfɛ yarɛ kum kapu sǝɗɛ nǝr Izǝraila ni.
31“Simaun, Simaun, Satan yuwɛ dzǝ ka ɓui whalɛ ka dzǝ puhǝba tǝ gǝri apa tǝ ndɛ ada puhǝba lǝkama akwa ɓaɓiya. 32Ama Yi 'ya ala gǝ aduwa, ta hamnta dzǝri ngɛ ta kǝtǝ, ba sakatǝ gǝ mbaltǝdzi ka si, ka gǝ dǝnautsǝni madar ma yarɛ.”
33Ama Bitrusu sǝnau, “Thlaku, Yi ɗǝmhǝdzi ka Yi nu tǝngɛ akwa fǝrsǝna ma nti ma mwa nti.”
34Yɛsu ka sǝnau, “Yi ada gha ala gǝ, Bitrusu, asǝna kabutu ma vukum ata tuwa, gǝ ata ɓwalnta nyar zǝndi tǝra ka makǝr.”
35 #
Mat 10:9,10; Mar 6:8,9; Luk 9:3; 10:4 Antǝ Yɛsu ka nkǝrɛ ala dar, “Saka nam tǝ Yi tara hya tǝ gǝri kura aka gǝna, ngǝrkǝr, wala ɓǝɓai, sǝ laka adi nam kura gǝri ta ɓui ya?”
Dar ka nkǝrɛ, “Adi wɛ.”
36Dzǝ ka nkǝrɛ ala dar, “Ama kulini ma gǝri aka, gǝna, kǝtamɛ, ba ngǝrkǝr yɛ; ba ma gǝri adi aka katsakar wɛ, ka gǝri ɗǝlnta lǝkutǝr gǝri ka gǝri ɗǝlba. 37#Isa 53:12Rǝbwa-rǝbwa apǝri, ‘Ndǝ tsu tǝni akwa ntsa ndzǝr biku,’ ba yi ada gha ala gǝri apǝri sǝ ǝni ntsakǝr ka dzǝ ghǝiyabadzi akwa yɛ. A sǝ nam tǝ ndǝ rǝbwa ata kǝrawai angwa ada ghǝiyabadzi.”
38Ndzǝr tsǝlɛ ka nkǝrɛ alari, “Wulɛ, Thlaku, nda katsakar sǝɗɛ.”
Dzǝ ka sǝnau ala dar, “Kǝ mǝzi.”
Yɛsu 'Ya Aduwa ata Payar Zaitun
(Mat 26:36-46; Mar 14:32-42)
39Yɛsu sǝba ka mwari akwa Payar Zaitun apa tǝ dzǝ ada 'ya, ba ndzǝr nuwurni ka nu tǝni. 40Sakatǝ dzǝ tara tsǝbti vuiyari, dzǝ ka nkǝrɛ ala dar, “Ka gǝri 'ya aduwa ta gǝri ta ɗu akwa sǝr nkǝrti.” 41Dzǝ ka ɗar tabardzi ta dar apa pǝɗǝmkur ɗal paya pathlu, dzǝ ka zǝɗi, ka 'ya aduwa. 42Dzǝ ka gha, “Bana, ma apǝri gǝ yiɗɛ, ka gǝ kǝlnta alai kapǝr bwanai ǝni, ahanarma adi apa tǝ Yi ada bara wɛ, ama apa nam tǝ gǝ yiɗɛ.” 43Antǝ ndǝr hyantǝr Hyal si atahyal ka tsantǝdzi alari ka dǝnautsǝni tǝni. 44Sakatǝ dzǝ akwa bwanai, dzǝ hau kǝr akwa 'ya aduwa aka dǝna, har tǝ tsǝfǝrni ada ntǝɗi apa masi ata dai.#22:44 Laka rǝbwa tsai yarɛ nam watsi adi aka vǝrsu 43 ba 44 wɛ.
45Sakatǝ dzǝ hyati akwa 'ya aduwa ba dzǝ ka ɓitasi adzǝ ndzǝr nuwurni yarɛ, dzǝ ka ɓui tǝ dar ata hanyi, akuya dar ghǝri tǝ sǝzɛ. 46Dzǝ yu tǝ dar, “Kami tǝ gǝri ada hanyi? Hyatamɛ ka gǝri 'ya aduwa ani ka ta gǝri ta ɗu akwa sǝr nkǝrti.”
Ndǝ Ngǝti Yɛsu
(Mat 26:47-56; Mar 14:43-50; Yaw 18:2-11)
47Sakatǝ dzǝ tsu ata kǝra ndǝrɛ hangkur ndzi ka si, ba ndǝ nam tǝ ndɛ ada kǝga tǝ Yahuda, pathlu akwa ntsa kum kapu sǝɗɛ ni, ani ada lǝkǝma ala dar. Dzǝ ka dangudzi kudzǝghɛ adzǝ Yɛsu ka dzǝ ka tsǝkwar tǝni. 48Ama Yɛsu ka yu tǝni, “Yahuda, azarɛ aka tsǝkwar ani tǝ gǝ ata hamnta Zǝr Ndɛ ya?”
49Sakatǝ ndzǝr nuwur Yɛsu tara wuti sǝ nam ada 'ya, dar ka nkǝrɛ, “Thlaku, ka yar dlǝ tǝ dar aka katsakar ya?” 50Ani pathlu akwa ntsa dar ka dli zǝr kǝiyir kuhyir fǝrist ni, ba dzǝ ka tsaɓunta thlǝmari nǝr tsisǝmɛ.
51Ama Yɛsu ka sǝnau, “Ngyaramɛ tǝ dar apani.” Ba dzǝ ka tsǝkwar thlǝma zǝr kǝi ndari, dzǝ ka mbǝti tǝni.
52Antǝ Yɛsu ka gha ala nggar fǝrist yarɛ ni, ba ngganggar ndzǝr ɓǝla fǝr Hyal ba ndzǝ ngga-ngga yarɛ nam tara si ka dza, “Yi ndǝ nam ada ndǝrkǝma ala ndzǝ kulɗa ya, tǝ gǝri sǝba aka katsakar kaka zuwa apa gǝr si ngǝzǝ ndǝr hǝlɛ? 53#Luk 19:47; 21:37Tatang vǝri Yi vwam kaka gǝri akwa babalǝr fǝr Hyal, gǝri ta ngǝzǝ tǝra wɛ. Ama saka ǝni nǝgǝri—sakar dǝnar kuthlɛ.”
Bitrusu Ɓwalnta Nyar Zǝndi Yɛsu
(Mat 26:57-58,69-75; Mar 14:53,66-72; Yaw 18:25-27)
54Antǝ dar ka ngǝti tǝni, dar ka tǝra aka dza ba dar ka mwari aka dza aivi ahar kuhyir fǝrist ni, Bitrusu tsuwɛ dzǝ ada nu tǝ dar aghǝli pǝɗǝm. 55Ama sakatǝ dar tara mbati u'u ata babalǝr kuta kǝi dar ka ndzai ata nya, Bitrusu ma ka ndzai akwa ntsa dar. 56Antǝ nkwar kǝi laka ka wula tǝni ada ndzai ata nya parakǝr u'u ni, dzǝ ka ngikǝba tǝni ɗa dzǝ ka nkǝrɛ, “Ai, ndǝ ni ma dar vwam aka dza.”
57Ama Bitrusu ɓwalnya ka nkǝrɛ, “Mwalara gǝ Yi ta zǝndi tǝni wɛ.”
58Aghǝla saka nkyiɗu laka ndǝ laka ka wula tǝni ka nkǝrɛ, “Gǝ ma gǝ pathlu akwa ntsa dar.”
Ama Bitrusu ka gha, “Ndǝra gǝ, adi Yi wɛ.”
59Aghǝla awur pathlu ndǝ laka damwa hyati ka nkǝrɛ, “Pakat ndǝ ni ma dzǝ vwam kaka dza, kadǝbar dzǝ ndǝr Galili.”
60Ama Bitrusu ka sǝnau apǝri, “Yi ta zǝndi sǝ nam tǝ gǝ ada ndǝrɛ ata kǝr wɛ.” Tsu tǝ dzǝ ata kǝra ndǝrɛ ani vukum ka tuwa. 61Antǝ Thlaku ka mbalti kǝrni ka wular Bitrusu. Bitrusu ka ɗǝngati sǝ nam tǝ Thlaku tara gha alari apǝri, “Asǝna ma, kabutu vukum ta tuwa gǝ ata ɓwalnta nyar zǝndi tǝra ka makǝr.” 62Ba dzǝ ka mwari alǝba dzǝ ka tuwa nam dzau.
Ndǝ Gura Yɛsu ba Dlaɓwɛ tǝni
(Mat 26:67-68; Mar 14:65)
63Ndzǝ nam ada ɓǝla Yɛsu dar ka baditsǝni gura tǝni ba dar ada dlaɓu tǝni. 64Dar ka mbwai ntsari, tǝ dar nkǝrɛ alari, “'Ya nabikur! Wa dza tsa tǝngɛ ni?” 65Ba dar ka gha labar rutsǝni hangkurari alari.
Yɛsu Akǝma Pǝlatus aka Hirudus
(Mat 26:59-66; Mar 14:55-64; Yaw 18:1-24)
66Sakatǝ vǝr tara kuri Ndzǝr Hakar Yahudi, dar nam ani nggar fǝrist yarɛ ba malǝmǝr mabari yarni, dar kǝɓai atakǝmaduku, dar ka vi Yɛsu akǝma dar. 67Dar ka nkǝrɛ, “Ma gǝ dza Kǝrsti ni,” “gha ala yar.”
Yɛsu ka sǝnau ala dar, “Wala ma Yi gha ala gǝri ma, gǝri adi ata mbǝrsa akǝr wɛ, 68ba ma Yi yu tǝ gǝri, gǝri adi ata sǝnau alai wɛ. 69Ama baditsǝni kulini ka lǝkǝma, Zǝr Ndɛ ata ndzai tǝbwar tsisǝma Hyal nam ɓwaltasang.”
70Sanga dar ka yuwɛ, “Azarɛ gǝ ni gǝ Zǝr Hyal ya?”
Dzǝ ka sǝnau, “Apa tǝ gǝri tara gha, Yi ani dza.”
71Antǝ dar ka nkǝrɛ, “Kami tǝ muri tsu awa bara sakǝida damwa? Ai muri tǝ kǝr muri mur ngati akwa nyari.”
ที่ได้เลือกล่าสุด:
Luka 22: CKL
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©2023 Seed Company in collaboration with Language Developers and Bible Translators Association